Paano Naton Himuon nga Bilidhon ang Aton mga Adlaw kay Jehova?

“Nadula, kahapon, sa ulot sang pagbutlak kag pagtunod sang adlaw, ang duha ka bulawanon nga oras, ang tagsa may kan-uman ka daw diamante nga minutos. Wala sing ginatanyag nga padya, bangod indi na gid ini makit-an pa!”​​—⁠Lydia H. Sigourney, Amerikano nga awtor (1791-​1865).

DAW kadiutay kag umalagi ang mga adlaw sang aton kabuhi. Ang salmista nga si David nagbinagbinag sa kalip-ot sang kabuhi kag napahulag nga mangamuyo: “O Jehova, pahibalua ako sang akon katapusan, kag sang takus sang akon mga adlaw​​—⁠kon ano ini, agod mahibaluan ko kon daw ano ako ka umalagi. Tan-awa! Ginhimo mo nga diutay lamang ang akon mga adlaw; kag ang kalawigon sang akon kabuhi nga daw sa wala lang sa atubangan mo.” Luyag gid ni David nga pahamut-an ang Dios, paagi sa iya paghambal kag sa iya mga buhat. Ginpabutyag niya ang iya pagsandig sa Dios, paagi sa pagsiling: “Sa imo ako nagapaabot.” (Salmo 39:​4, 5, 7) Nagpamati si Jehova. Gin-usisa niya ang mga binuhatan ni David kag nagpadya sa iya sing nagakaigo.

Mahapos nga mangin masako sa tagsa ka minuto sang adlaw kag masiod sa isa ka pagkabuhi nga madasig kag puno sing hilikuton. Makapabalaka gid ini sa aton, labi na bangod madamo gid ang hilimuon kag maeksperiensiahan apang diutay lamang ang tion nga himuon ini. Kita bala kaangay ni David​​—⁠nga luyag magkabuhi sa paagi nga ginakahamut-an sang Dios? Sa pagkamatuod, si Jehova nagabantay kag mahalungon nga nagausisa sa tagsatagsa sa aton. Si Job, isa ka tawo nga nagkahadlok sa Dios, nagpamatuod mga 3,600 ka tuig na ang nakaligad nga nakita ni Jehova ang iya dalanon kag nagsayasat sang iya mga hilikuton. Nagpamangkot si Job: “Kon makighusay sia, ano ang isabat ko sa iya?” (Job 31:​4-6, 14) Posible nga himuon naton ang aton mga adlaw nga bilidhon kay Jehova paagi sa pag-una sa espirituwal nga mga butang, pagtuman sang iya mga sugo, kag maalamon nga paggamit sang aton tion. Binagbinagon naton sing kapin ining mga butang.

Unahon Naton ang Espirituwal nga mga Butang

Nagakaigo nga ipanugyan sa aton sang inspirado nga Kasulatan nga unahon ang espirituwal nga mga butang sang ini magsiling: ‘Pat-ura ninyo ang mas importante nga mga butang.’ Ano ining importante nga mga butang? Ang sabat nagadalahig sa “sibu nga ihibalo kag bug-os nga paghantop.” (Filipos 1:​9, 10) Ang pagkuha sing ihibalo sa katuyuan ni Jehova nagakinahanglan sing maalamon nga paggamit sang aton tion. Walay sapayan, ang pag-una sa espirituwal nga mga butang nagapasalig sa aton sing isa ka makapaladya kag makaalayaw nga kabuhi.

Si apostol Pablo nagapahanumdom sa aton nga ‘magpadayon sa pagpat-od kon ano ang kalahamut-an sa Ginuo.’ Ang aton pagpat-od dapat magadalahig sang pag-usisa sa aton mga motibo kag mga handum sang tagipusuon. Ang apostol nagapadayon: “Padayon ninyo nga hangpon kon ano ang kabubut-on ni Jehova.” (Efeso 5:​10, 17) Gani, ano ang ginakahamut-an ni Jehova? Ang isa ka hulubaton sa Biblia nagasabat: “Ang kaalam amo ang panguna nga butang. Magkuha sing kaalam; kag upod sa tanan nga makuha mo, magkuha sing paghangop. Pabalori ini sing daku, kag magabayaw ini sa imo.” (Hulubaton 4:​7, 8) Si Jehova nagakalipay sa isa ka tawo nga nagakuha kag nagagamit sang diosnon  nga kaalam. (Hulubaton 23:15) Ang bentaha sining kaalam amo nga indi ini makuha halin sa aton ukon maguba. Sa katunayan, mangin pangamlig kag proteksion ini ‘gikan sa malaut nga dalanon kag sa mga nagapamulong sing tiko nga mga butang.’​​—⁠Hulubaton 2:​10-​15.

Daw ano ka maalamon, nian, nga pamatukan ang ano man nga huyog nga nagapadulong sa pagpasapayan sa espirituwal nga mga butang! Kinahanglan palambuon naton ang isa ka mapasalamaton nga panimuot sa mga pulong ni Jehova kag ang nagakaigo nga kahadlok sa iya. (Hulubaton 23:​17, 18) Samtang ining panimuot sang hunahuna mahimo maangkon sa bisan ano nga tion sang pagkabuhi, labing maayo nga ipasad ining matarong nga talaksan kag ipatudok ang mga prinsipio sang Biblia sa aton personalidad sa tion sang pagkapamatan-on. “Dumduma, karon, ang imo Dakung Manunuga sa adlaw sang imo pagkapamatan-on,” ang siling sang maalam nga si Hari Solomon.​​—⁠Manugwali 12:1.

Ang personal nga pagpangamuyo kay Jehova sa tagsa ka adlaw amo ang pinakasuod nga paagi sa pagpalambo sing apresasyon sa iya. Nahibaluan ni David ang importansia sang pagsalig kay Jehova, bangod sia nangabay: “O Jehova, pamatii ang akon pangamuyo, kag dungga ang akon pagpangayo sing bulig. Dili ka maghipos sa akon mga luha.” (Salmo 39:12) Ang pagkasuod bala sang aton kaangtanan kay Jehova nagatandog sang aton emosyon sa pila ka tion tubtob sa pagluha? Sa pagkamatuod, kon masami kita nagapakigsugilanon kay Jehova nahanungod sa natago nga mga butang sang tagipusuon kag nagapamalandong sa iya Pulong, magasuod pa gid sia sa aton.​​—⁠Santiago 4:8.

Magtuon sing Pagkamatinumanon

Ang isa pa ka tawo sang pagtuo nga nagsandig sa Dios amo si Moises. Kaangay ni David, nakita ni Moises nga ang kabuhi puno sing kagamo. Gani nangabay sia sa Dios nga ipakita sa iya ‘kon paano ang pag-isip sang iya mga adlaw agod nga maagom ang tagipusuon nga may kaalam.’ (Salmo 90:10-​12) Ang tagipusuon nga may kaalam maangkon lamang paagi sa pagtuon kag pagkabuhi nahisuno sa mga kasuguan kag mga prinsipio ni Jehova. Nahibaluan ini ni Moises kag naninguha sia nga ipatudok ining importante nga kamatuoran sa pungsod sang Israel paagi sa pagpahanumdom liwat sang kasuguan kag regulasyon sang Dios sa ila antes nila mapanag-iyahan ang Ginsaad nga Duta. Ang bisan sin-o nga tawhanon nga hari nga pilion ni Jehova sa ulihi sa paggahom sa Israel magasulat para sa iya kaugalingon sing kopya sang Kasuguan kag basahon ini sa tanan nga mga adlaw sang iya kabuhi. Ngaa? Agod matun-an niya nga magkahadlok sa Dios. Nangin isa ini ka pagtilaw sa pagkamatinumanon sang hari. Pagaamligan sia sini gikan sa pagpakataas sang iya tagipusuon labaw sa iya mga utod kag magapalawig man sang iya mga adlaw sa iya ginharian. (Deuteronomio 17:18-​20) Ginsulit ini nga saad sang si Jehova nagsiling sa anak ni David nga si Solomon: “Kon maglakat ka sa akon mga dalanon paagi sa pagtuman sang akon mga regulasyon kag sang akon mga sugo, subong sang paglakat ni David nga imo amay, palawigon ko man ang imo mga adlaw.”​​—⁠1 Hari 3:​10-​14.

Ang pagkamatinumanon isa ka serioso nga butang sa Dios. Kon ginapakadiutay naton ang pila ka mga aspekto sang mga ginapatuman kag mga sugo ni Jehova nga daw indi importante, pat-od gid nga matalupangdan niya ina nga panimuot. (Hulubaton 15:⁠3) Ang pagkahibalo sini magapahulag sa aton nga maghupot sing mataas nga pagtamod sa tanan nga mga sugo ni Jehova, bisan pa nga indi pirme mahapos ang paghimo sini. Ginahimo ni Satanas ang iya bug-os nga masarangan nga ‘balabagan ang aton banas’ samtang nagahimud-os kita sa pagsunod sa mga kasuguan kag mga sugo sang Dios.​​—⁠1 Tesalonica 2:⁠18.

Importante gid ang pagtuman sa laygay sang Biblia nga magtipon sing tingob sa pagsimba kag paghiliupod. (Deuteronomio 31:​12, 13; Hebreo 10:​24, 25) Gani maayo gid nga pamangkuton naton ang aton kaugalingon: ‘May yara bala ako determinasyon kag pagkamapinadayunon nga kinahanglan sa paghimo sang kon ano ang mapuslanon gid?’ Ang pagpabaya sa pagpakig-upod kag instruksion  sa Cristianong mga miting bangod lang sa pagpaninguha nga maangkon ang pinansial nga kasiguruhan magapaluya sang aton kaangtanan kay Jehova. Si apostol Pablo nagsulat: “Likawi ninyo ang gugma sa kuwarta, samtang kontento kamo sa mga butang karon. Kay [si Jehova] nagsiling: ‘Indi ko gid kamo pagbiyaan ukon pagpatumbayaan.’ ” (Hebreo 13:⁠5) Ang kinabubut-on nga pagtuman sa mga sugo ni Jehova nagapakita sing bug-os nga pagsalig nga sia magaatipan sa aton.

Natun-an ni Jesus ang pagkamatinumanon kag nakabenepisyo sia. Gani mahimo man naton ini. (Hebreo 5:⁠8) Kon ginapalambo naton sing dugang pa ang pagkamatinumanon, dugang pa nga mangin mas mahapos sa aton ang magtuman, bisan sa mga magagmay nga mga butang. Matuod, bangod sang aton integridad, mahimo nga dapat naton batason ang indi maayo kag ang mapintas pa gani nga pagpakig-angot sang iban. Labi na gid nga matuod ini sa ulubrahan, sa eskwelahan, ukon sa isa ka nabahinbahin sa relihion nga panimalay. Apang, makasapo kita sing lugpay sa ginsaad sa mga Israelinhon nga kon sila ‘magahigugma kay Jehova paagi sa pagpamati sa iya tingog kag paagi sa pag-unong sa iya, sia mangin ila kabuhi kag kalawigon sang ila mga adlaw.’ (Deuteronomio 30:20) Amo man ini ang ginasaad sa aton.

Gamita ang Tion sing Maalamon

Ang paggamit sing maalamon sa aton tion magabulig man sa aton nga himuon ang aton mga adlaw nga bilidhon kay Jehova. Indi kasubong sang kuwarta nga puwede matago, ang tion dapat gamiton, bangod nagalipas ini. Ang tagsa ka oras nga nagalipas indi na gid magbalik pa. Bangod masami nga mas madamo ang hilikuton sangsa aton tion, ginagamit bala naton ang aton tion nahisuno sa aton mga tulumuron sa kabuhi? Ang labing importante nga tulumuron sang tanan nga mga Cristiano dapat amo ang regular nga pagpakigbahin sa pagbantala sang Ginharian kag paghimo sing disipulo nga hilikuton.​​—⁠Mateo 24:14; 28:​19, 20.

Magamit lamang naton sing maalamon ang aton tion kon nahibaluan naton ang balor sini. Sing nagakaigo, ang Efeso 5:​16  nagapanugyan sa aton nga ‘magbakal sing nagakaigo nga tion para sa aton kaugalingon,’ kag nagapahangop ini sing pagsikway sa indi importante nga mga butang. Nagakahulugan ini nga buhinan ang uyang sa tiempo nga mga hilikuton. Mahimo kapuyon kita sa sobra nga paglantaw sing telebisyon ukon paglagulad sa Internet, pagbasa sing walay kapuslanan nga sekular nga balasahon, ukon sobra nga paglingawlingaw kag kalingawan. Dugang pa, ang pagtipon sing sobra nga materyal nga pagkabutang magakaon sang aton tion nga kinahanglan agod maangkon ang tagipusuon nga may kaalam.

Ang mga tawo nga pabor sa mahalungon nga paggamit sa tion nagasiling: “Imposible nga magamit sing maayo ang imo tion kon wala ka sing maathag kag espesipiko nga mga tulumuron.” Nagapanugda sila sing lima ka talaksan sa paghimo sing mga tulumuron: espesipiko, mabulubanta, mahimo lab-uton, realistiko, kag may talana nga tion.

Ang isa ka mapuslanon nga tulumuron amo ang pagpauswag sang aton pagbasa sang Biblia. Ang una nga tikang amo ang paghimo sang aton tulumuron nga espesipiko​​—⁠basahon ang bug-os nga Biblia. Ang masunod nga tikang amo ang paghimo sang aton tulumuron nga mabulubanta. Paagi sa paghimo sini, masundan naton ang aton pag-uswag. Ang mga tulumuron dapat magpalig-on sa aton nga magpanikasog kag mag-uswag. Dapat man ini mahimo lab-uton kag realistiko. Ang personal nga mga ikasarang, mga kalantip, kag ang mahinguyang nga tion dapat binagbinagon. Para sa iban, mas madamo nga tion ang kinahanglan agod malab-ot ang tulumuron. Bilang katapusan, dapat kita magtalana sing tion sa aton tulumuron. Magadugang ang aton kapagsik nga himuon ang isa ka butang kon magtalana kita sing petsa nga tapuson ini.

Ang tanan nga miembro sang bug-os kalibutan nga panimalay Bethel, nga nagaalagad sa ulong talatapan sang mga Saksi ni Jehova ukon sa isa sa mga sanga talatapan sini sa bug-os nga kalibutan, may yara espesipiko nga tulumuron nga basahon ang bug-os nga Biblia sa sulod sang ila nahauna nga tuig sa Bethel. Narealisar nila nga ang mapuslanon nga pagbasa sang Biblia nagapalambo sang ila espirituwal nga pag-uswag kag sang isa ka mas suod nga kaangtanan kay Jehova, nga nagatudlo sa ila agod makabenepisyo sila. (Isaias 48:17) Mahimo man bala naton nga tulumuron ang regular nga pagbasa sang Biblia?

Mga Benepisyo sang Paghimo sang Aton mga Adlaw nga Bilidhon

Ang pag-una sa espirituwal nga mga butang magaresulta sa madamo nga pagpakamaayo. Una, mabatyagan naton nga may hinimuan kita kag may katuyuan ang aton kabuhi. Labi pa nga mangin suod kita kay Jehova kon regular nga nagapakig-angot kita sa iya paagi sa hanuot nga pagpangamuyo. Ang pagpangamuyo mismo nagapamatuod nga nagasalig kita sa iya. Ang adlaw-adlaw nga pagbasa sang Biblia kag pasad sa Biblia nga mga publikasyon nga ginaaman sang “matutom kag mainandamon nga ulipon” nagapakita sang aton kahanda nga mamati sa Dios samtang nagapakighambal sia sa aton. (Mateo 24:45-​47) Nagabulig ini sa aton nga maangkon ang isa ka tagipusuon nga may kaalam agod mahimo ang nagakaigo nga mga desisyon kag mga pagpili sa kabuhi.​​—⁠Salmo 1:​1-3.

Nalipay kita sa pagtuman sang mga sugo ni Jehova, bangod ang paghimo sini indi mabug-at. (1 Juan 5:⁠3) Samtang ginahimo naton ang tagsa ka adlaw nga bilidhon kay Jehova, ginapabakod naton ang aton kaangtanan sa iya. Mangin isa man kita ka matuod espirituwal nga bulig sa aton mga masigka-Cristiano. Ining mga buhat nagapahalipay kay Jehova nga Dios. (Hulubaton 27:11) Kag wala na sing mas daku nga padya sangsa maagom ang kahamuot ni Jehova karon kag tubtob sa walay katubtuban!

[Retrato sa pahina 21]

Ang mga Cristiano nagahupot sing serioso nga pagtamod sa espirituwal nga mga butang

[Mga retrato sa pahina 22]

Ginagamit mo bala ang imo tion sing maalamon?

[Retrato sa pahina 23]

Ginapabakod naton ang aton kaangtanan kay Jehova samtang ginahimo naton ang tagsa ka adlaw nga bilidhon sa iya