Ang Pinakamaayo nga Tion nga Mabuhi

KON nagaatubang ka sang mabudlay nga mga kahimtangan, ginakahidlawan mo bala ang maayo nga mga adlaw sang una? Kon amo, binagbinaga ang pinamulong sang maalam nga si Hari Solomon: “Dili ka magsiling: ‘Ngaa bala nga ang nahaunang mga adlaw maayo pa sa sini?’ kay indi tungod sa kaalam nga ikaw nagpamangkot tuhoy sini.”​—⁠Manugwali 7:10.

Ngaa ginlaygay ini ni Solomon? Bangod nahibaluan niya nga ang realistiko nga pagtamod sa nagligad mapuslanon nga bulig agod malandas ang indi maayo nga mga kahimtangan karon. Ang mga nahidlaw sa maayo nga mga adlaw sang una mahimo nga nalipat nga yadtong mga adlaw puno man sing mga problema kag kagamo kag nga indi gid maayo ang kabuhi. Ang pila ka butang sang nagligad mahimo nga mas maayo, apang mahimo gid nga ang iban indi. Subong sang ginpatalupangod ni Solomon, indi maalamon ang di-nagakaigo nga pagpamensar sa nagligad, kay indi na naton mabalik ang naglipas nga panahon.

Makahalalit bala ang masubo nga pagkahidlaw sa nagligad? Huo, kon bangod sini indi na kita makapasibu sa kahimtangan karon ukon indi na naton maapresyar ang mga tion nga kita nagakabuhi kag ang aton paglaum.

Ang matuod, karon na ang pinakamaayo nga tion nga mabuhi, walay sapayan sang nagadamo nga mga problema sa kalibutan. Ngaa? Bangod nagahilapit na kita sa katumanan sang katuyuan sang Dios tuhoy sa aton duta kag sa mga pagpakamaayo sang mahidaiton nga paggahom sang iya Ginharian. Ang Biblia nagasaad: “Pahiran niya ang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit pa. Ang nahaunang mga butang nagtaliwan.” (Bugna 21:⁠4) Nian, bangod maayo na gid ang mga kahimtangan, wala na sing rason nga kahidlawan pa sang isa ang mga adlaw sang una.