Magkalipay sa Personal nga Pagtuon sa Pulong sang Dios

“Magapamalandong ako sa tanan mo nga binuhatan, kag sa imo mga pagpakig-angot magatalupangod ako.”​—⁠SALMO 77:12.

1, 2. (a) Ngaa dapat kita magpain sing tion sa pagpamalandong? (b) Ano ang buot silingon sang “pagpamalandong” kag “pagbinagbinag”?

SUBONG mga disipulo ni Jesucristo, dapat gid naton kabalak-an ang aton kaangtanan sa Dios kag ang aton motibo sa pag-alagad sa Iya. Apang sa karon, masako gid ang mga tawo amo nga wala na sila sing tion sa pagpamalandong. Nawili gid sila sa paghingamo sa materyal nga mga butang, pagpangumpra, kag pataka nga paglingawlingaw. Paano naton malikawan ining walay pulos nga panikasog? Subong nga nagapahamtang kita sing espesipiko nga tion kada adlaw para sa importante nga mga hilikuton, subong sang pagkaon kag pagtulog, dapat man kita magpain sing tion sa pagpamalandong sa mga binuhatan kag mga pagpakig-angot ni Jehova.​—⁠Deuteronomio 8:⁠3; Mateo 4:4.

² Nagadulog ka bala agod mamalandong? Ano ang buot silingon sang pagpamalandong? Ang isa ka diksionaryo nagahatag sing kahulugan sa sini nga tinaga subong amo ang “pagsentro sang panghunahuna sang isa: pagpanumdom ukon pagbinagbinag.” Kag ang tinaga nga “pagbinagbinag” nagakahulugan sing “paghunahuna: pagpanumdom . . . paghunahuna ukon pagbinagbinag ilabi na sing mahipos, sing mahalungon, kag sing madalom.” Ano ang kahulugan sini para sa aton?

3. Sa ano naangot sing direkta ang pag-uswag sa espirituwal?

³ Una, magapahanumdom ini sa aton sang ginsulat ni apostol Pablo sa iya masigkaalagad nga si Timoteo: “Samtang ako magaabot, mag-ukod ka sa pagbasa sa dayag, sa paglaygay, sa pagpanudlo. . . . Binagbinaga ining mga butang; ukuri ini, agod nga ang imo pag-uswag madayag sa tanan nga tawo.” Huo, ang pag-uswag ginapaabot, kag ang mga pulong ni Pablo nagapakita nga may direkta nga kaangtanan sa ulot sang pagbinagbinag sang espirituwal nga mga butang kag sang pag-uswag. Matuod man ini karon. Agod matigayon ang kaayawan sa espirituwal nga pag-uswag, dapat padayon naton nga ‘binagbinagon’ kag ‘ukuran’ ang mga butang nga may kaangtanan sa Pulong sang Dios.​—⁠1 Timoteo 4:13-15.

4. Ano nga mga aman ang sarang mo magamit agod makabulig sa imo nga mabinagbinag ang Pulong ni Jehova sing regular?

⁴ Ang labing maayo nga tion para sa imo nga magpamalandong nagadepende sa imo kag sa rutina sang imo pamilya. Madamo ang nagabinagbinag sang isa ka teksto sa Biblia sing temprano sa aga kon nagabasa sila sang pulyeto nga Pag-usisa sa Kasulatan sa Adlaw-adlaw. Sa katunayan, mga 20,000 ka boluntaryo sa mga puluy-an Bethel sa bug-os nga kalibutan ang nagasugod sang ila adlaw paagi sa 15-minutos nga pagbinagbinag sang teksto sa Biblia para sa sina nga adlaw. Bisan pa mga apat lang ka tawo sa pamilya Bethel ang nagakomento kada aga, ang iban nagabinagbinag sang ginasiling kag ginabasa. Ang iban nga mga Saksi nagabinagbinag sang Pulong ni Jehova samtang nagapadulong sila sa trabaho. Nagapamati sila sa mga audiocassette sang Biblia kag sang Lalantawan kag Magmata! nga mga magasin nga matigayon sa pila ka lenguahe. Madamo nga mga asawa ang nagahimo sini samtang nagaobra sa sulod sang balay. Sa paghimo sini, ginailog nila ang salmista nga si Asaf, nga  nagsulat: “Dumdumon ko ang mga binuhatan ni Jah; kay dumdumon ko ang imo makatilingala nga hinimuan sang una. Kag magapamalandong ako sa tanan mo nga binuhatan, kag sa imo mga pagpakig-angot magatalupangod ako.”​—⁠Salmo 77:​11, 12.

Ang Husto nga Panimuot Nagadala sing Positibo nga mga Resulta

5. Ngaa dapat mangin importante sa aton ang personal nga pagtuon?

⁵ Sa aton moderno nga dag-on sang TV, mga video, kag mga kompyuter, ang pagbasa naapektuhan gid. Apang indi gid dapat matabo ini sa mga Saksi ni Jehova. Kay man, ang pagbasa sing Biblia kaangay sang nagasalbar nga higot nga nagaangot sa aton kay Jehova. Linibo na ka tuig ang nagligad, ginbuslan ni Josue si Moises subong lider sang Israel. Agod matigayon ang pagpakamaayo ni Jehova, dapat basahon mismo ni Josue ang Pulong sang Dios. (Josue 1:⁠8; Salmo 1:​1, 2) Ginapatuman gihapon ini karon. Apang, bangod sang limitado nga tinun-an, ang iban nabudlayan ukon natak-an sa pagbasa. Busa, ano ang makabulig sa aton agod maganahan kita sa pagbasa kag pagtuon sang Pulong sang Dios? Masapwan ang sabat sa mga pinamulong ni Hari Solomon nga ginrekord sa Hulubaton 2:​1-6. Palihug buksi ang imo Biblia kag basaha ining mga bersikulo. Nian binagbinagon naton ini.

6. Ano dapat ang aton panimuot sa ihibalo tuhoy sa Dios?

⁶ Una, masapwan naton ining pagpalig-on: “Anak ko, kon batunon mo ang akon mga pulong kag pakabahandion ang akon mga sugo sa imo, agod talupangdon sang imo igdulungog ang kaalam, agod nga ihuyog mo ang imo tagipusuon sa paghantop; . . .” (Hulubaton 2:​1, 2) Ano ang matun-an naton sa sining mga pulong? Nga ang kada isa sa aton may responsabilidad nga tun-an ang Pulong sang Dios. Talupangda ang kondisyon nga “kon batunon mo ang akon mga pulong.” Importante gid ining “kon” bangod kalabanan sang katawhan wala nagatalupangod sang Pulong sang Dios. Agod malipay kita sa pagtuon sang Pulong sang Dios, dapat mangin handa kita sa pagbaton sang mga pulong ni Jehova kag tamdon ini nga isa ka bahandi nga indi naton luyag madula. Indi gid naton pagtugutan nga mangin masako kita ukon mabanga sa aton matag-adlaw nga rutina amo nga madula na ang interes naton sa Pulong sang Dios, kag magduhaduha pa gani sa sini.​—⁠Roma 3:​3, 4.

7. Kon posible, ngaa dapat kita magtambong kag mamati sa Cristianong mga miting?

⁷ ‘Nagatalupangod’ gid bala kita kag nagapamati sing maayo kon ginapaathag ang Pulong sang Dios sa aton Cristianong mga miting? (Efeso 4:​20, 21) Aton bala ‘ginahuyog ang tagipusuon’ agod makatigayon kita sing paghantop? Mahimo nga ang humalambal indi gid tuman ka eksperiensiado, apang samtang ginagamit niya ang Pulong sang Dios, dapat gid nga pamatian naton sia sing maayo. Sa pagkamatuod, agod matalupangod naton ang kaalam ni Jehova, dapat kita, kon posible, magtambong sa Cristianong mga miting. (Hulubaton 18:⁠1) Hunahunaa ang pagluya sang buot sadtong mahimo wala makatambong sa miting didto sa naibabaw nga hulot sa Jerusalem sang Pentecostes 33 C.⁠E.! Bisan pa nga ang aton mga miting indi tuman ka tumalagsahon kaangay sadto, ginahinun-anunan naton ang aton panguna nga tulun-an, ang Biblia. Sa amo, ang tagsa ka miting mangin isa ka pagpakamaayo para sa aton kon nagatalupangod kita kag nagasunod sa pagbasa sa aton Biblia.​—⁠Binuhatan 2:​1-4; Hebreo 10:​24, 25.

8, 9. (a) Ano ang kinahanglanon sa aton personal nga pagtuon? (b) Paano mo ikumparar ang balor sang bulawan sa paghangop sang ihibalo tuhoy sa Dios?

⁸ Ang masunod nga mga pinamulong sang maalam nga hari amo: “Dugang pa, kon magtuaw ka para sa paghangop kag magbayaw sang imo tingog para sa paghantop, . . .” (Hulubaton 2:⁠3) Ano nga panimuot ukon huyog ang ginapaalinton sa aton sining mga pulong? Amo ang hanuot nga handum nga mahangpan ang Pulong ni Jehova! Nagapahangop ini sing kahanda sa pagtuon agod matigayon ang paghantop, agod mahangpan ang kabubut-on ni Jehova. Sa pagkamatuod, nagakinahanglan ini sing panikasog, amo kon ngaa ginadul-ong kita sini sa masunod nga mga pinamulong kag ilustrasyon ni Solomon.​—⁠Efeso 5:​15-17.

⁹ Sia nagpadayon: “Kon padayon mo ini [ang paghangop] nga pangitaon subong sang pilak, kag padayon mo ini nga pangitaon subong sang bahandi nga natago, . . .” (Hulubaton 2:⁠4) Magapahunahuna ini sa aton sang hinimuan sang mga tawo sa pagmina sang malahalon kuno nga mga metal nga pilak kag bulawan. Bangod sang bulawan, ginpatay sang mga tawo ang iban nga mga tawo. Ginhinguyang sang iban ang ila bug-os nga kabuhi sa pagpangita sini. Apang, ano gid  ang matuod nga balor sang bulawan? Kon magtalang ka sa desyerto kag nagatagumatayon bangod sang kauhaw, diin ang pilion mo: isa ka barita nga bulawan ukon isa ka baso nga tubig? Apang, nagapanikasog gid ang mga tawo sa pagpangita sing bulawan, nga ang balor sini artipisyal kag nagabulubag-o!⁠ * Busa dapat pa gid kita nga magmakugi sa pagpangita sing kaalam, paghantop, kag paghangop tuhoy sa Dios kag sa iya kabubut-on! Apang ano ang mga benepisyo sining pagpangita?​—⁠Salmo 19:​7-​10; Hulubaton 3:​13-​18.

10. Ano ang masapwan naton kon tun-an naton ang Pulong sang Dios?

¹⁰ Nagpadayon ang diskurso ni Solomon: “Kon amo mahangpan mo ang kahadlok kay Jehova, kag masapwan mo ang ihibalo mismo tuhoy sa Dios.” (Hulubaton 2:⁠5) Daw ano ka makahalawhaw nga panghunahuna​—⁠nga kita nga makasasala nga mga tawo makasapo sang “ihibalo mismo tuhoy sa Dios,” si Jehova, ang Soberanong Ginuo sang uniberso! (Salmo 73:28; Binuhatan 4:24) Sa sulod sang mga siniglo, gintinguhaan nga hangpon sang mga pilosopo kag sang kuno maalamon nga mga tawo sang kalibutan ang mga misteryo sang kabuhi kag sang uniberso. Apang, napaslawan sila nga masapwan ang “ihibalo mismo tuhoy sa Dios.” Ngaa? Bisan pa nga sarang ini matigayon sa sulod sang linibo na ka tuig sa Pulong sang Dios, ang Biblia, ginkabig nila ini nga tuman ka simple kag sa amo wala nila ini ginbaton kag ginhangop.​—⁠1 Corinto 1:​18-​21.

11. Ano ang pila ka benepisyo gikan sa personal nga pagtuon?

¹¹ Yari ang dugang pa nga rason nga ginpadaku ni Solomon: “Si Jehova nagahatag sing kaalam; gikan sa iya baba nagaguwa ang ihibalo kag paghantop.” (Hulubaton 2:⁠6) Handa si Jehova sa paghatag sing bugana nga kaalam, ihibalo, kag paghantop sa kay bisan sin-o nga luyag magpangita sini. Busa may rason gid kita nga pakabahandion ang personal nga pagtuon sa Pulong sang Dios, bisan pa nga nagakinahanglan ini sing panikasog, disiplina, kag pagsakripisyo. Ti, may naimprinta na kita nga mga kopya sang Biblia kag indi na kinahanglan magsulat pa sing mga kopya, subong sang ginhimo sang pila sang dumaan nga tion!​—⁠Deuteronomio 17:​18, 19.

Paglakat sing Takus kay Jehova

12. Ano dapat ang motibo naton sa pagtigayon sing ihibalo tuhoy sa Dios?

¹² Ano dapat ang motibo naton sa aton personal nga pagtuon? Agod mangin mas maayo bala  sa iban? Agod ipakita ang labaw nga ihibalo? Agod mangin tuman kaalam sa Biblia? Indi. Ang tulumuron naton amo nga mangin mga Cristiano nga nagasunod, nagahambal, nagabuhat, nga handa pirme sa pagbulig sa iban, suno sa makapaumpaw nga espiritu ni Cristo. (Mateo 11:28-30) Si apostol Pablo nagpaandam: “Ang ihibalo nagapabugalon, apang ang gugma nagapalig-on.” (1 Corinto 8:⁠1) Busa, dapat may mapainubuson kita nga panimuot kaangay sang ginpakita ni Moises sang sia nagsiling kay Jehova: “Ipahibalo mo sa akon, palihug, ang imo mga dalanon, agod makilala ko ikaw, agod makasapo ako sing kahamuot sa imo mga mata.” (Exodo 33:13) Huo, dapat naton handumon ang ihibalo agod mapahamut-an ang Dios, indi agod magpadayaw sa mga tawo. Luyag naton nga mangin takus, mapainubuson nga mga alagad sang Dios. Paano naton matigayon ini nga tulumuron?

13. Ano ang kinahanglanon agod mangin takus ang isa subong alagad sang Dios?

¹³ Ginlaygayan ni Pablo si Timoteo kon paano pahamut-an ang Dios, nga nagasiling: “Himua ang imo bug-os nga masarangan nga ipakita ang imo kaugalingon nga nahamut-an sang Dios, manugpangabudlay nga wala sing dapat ikahuya, nga nagagamit sing matadlong sang pulong sang kamatuoran.” (2 Timoteo 2:15) Ang ekspresyon nga “nagagamit sing matadlong” naggikan sa Griegong berbo nga sa orihinal nagakahulugan sing “tadlong nga pag-utod,” ukon ‘pag-utod sing tadlong.’ (Kingdom Interlinear) Suno sa pila ka iskolar, nagapahangop ini sang ideya tuhoy sa isa ka sastre nga nagatabas sang tela sigun sa sulundan, sa isa ka mangunguma nga nagaarado sing mga idas sa isa ka ulumhan, kag iban pa. Sa bisan diin sini nga kahimtangan, ang resulta dapat tadlong. Ang punto amo nga agod mangin takus kag kalahamut-an nga alagad sang Dios, dapat si Timoteo ‘maghimo sang iya bug-os nga masarangan’ agod makapat-od nga ang iya panudlo kag pagginawi nahisuno sa pulong sang kamatuoran.​—⁠1 Timoteo 4:⁠16.

14. Ano dapat ang epekto sang personal naton nga pagtuon sa aton ginabuhat kag ginasiling?

¹⁴ Amo man sini ang punto ni Pablo sang ginpalig-on niya ang mga masigka-Cristiano sa Colosas nga “maglakat sing takus kay Jehova sa tuyo nga pahamut-an sia sing bug-os” paagi sa ‘pagpamunga sa tagsa ka maayong buhat kag paglambo sa sibu nga ihibalo tuhoy sa Dios.’ (Colosas 1:10) Ginaangot diri ni Pablo ang mangin takus kay Jehova sa ‘pagpamunga sa tagsa ka maayong buhat’ subong man sa ‘paglambo sa sibu nga ihibalo tuhoy sa Dios.’ Buot silingon, importante kay Jehova indi lamang ang pagpabalor naton sang ihibalo kundi kon paano man naton ginasunod ang Pulong sang Dios sa aton ginabuhat kag ginasiling. (Roma 2:​21, 22) Nagakahulugan ini nga ang aton personal nga pagtuon dapat may epekto sa aton panghunahuna kag paggawi kon luyag naton pahamut-an ang Dios.

15. Paano naton maamligan kag makontrol ang aton mga panghunahuna?

¹⁵ Sa karon, determinado si Satanas nga gub-on ang aton espirituwalidad paagi sa pagpasanyog sing inaway nga nagadalahig sa hunahuna. (Roma 7:​14-​25) Busa, dapat naton amligan kag kontrolon ang aton hunahuna kag mga panghunahuna agod mangin takus kita sa aton Dios, nga si Jehova. Ang aton hinganiban amo ang ‘ihibalo tuhoy sa Dios,’ nga makasarang sa ‘pagdala sa tagsa ka panghunahuna sa pagkabihag agod himuon ini nga matinumanon kay Cristo.’ Dugang pa gid ini nga rason kon ngaa dapat naton talupangdon ang adlaw-adlaw nga pagtuon sa Biblia, bangod luyag naton nga dulaon ang aton makagod, undanon nga mga panghunahuna.​—⁠2 Corinto 10:5.

 Mga Bulig sa Paghangop

16. Paano kita makabenepisyo samtang ginatudluan kita ni Jehova?

¹⁶ Ang panudlo ni Jehova nagahatag sing espirituwal kag pisikal nga mga benepisyo. Indi ini makatalaka kag wala sing pulos nga teolohiya. Sa amo, aton mabasa: “Ako, si Jehova, amo ang imo Dios, ang Isa nga nagatudlo sa imo agod makabenepisyo ka, ang Isa nga nagatuytoy sa imo sa dalanon nga dapat mo laktan.” (Isaias 48:17) Paano ginpahanabo ni Jehova nga makalakat kita sa iya mapuslanon nga dalanon? Una, yara sa aton ang iya inspirado nga Pulong, ang Balaan nga Biblia. Amo ini ang aton panguna nga tulun-an, nga pirme naton ginagamit. Amo kon ngaa maayo nga mamati sa Cristianong mga miting nga ginagamit ang Biblia. Ang mapuslanon nga mga resulta sa paghimo sini sarang makita sa kasaysayan sang Etiopianhon nga eunuco, nga ginrekord sa Binuhatan kapitulo 8.

17. Ano ang natabo sa Etiopianhon nga eunuco, kag ano ang ginailustrar sini?

¹⁷ Kumbertido sa Judaismo ang Etiopianhon nga eunuco. Sinsero sia nga nagatuo sa Dios, kag gintun-an niya ang Kasulatan. Samtang nagalakbay nga sakay sa iya kangga, ginabasa niya ang tulun-an sang Isaias sang magdalagan sing dungan si Felipe sa iya kag namangkot: “Nahibaluan mo gid bala ang imo ginabasa?” Ano ang sabat sang eunuco? “ ‘Sa pagkamatuod, paano ko bala ini mahimo, luwas kon may isa nga magtuytoy sa akon?’ Kag nagpakiluoy sia kay Felipe nga magsakay kag maglingkod upod sa iya.” Nian si Felipe, nga ginatuytuyan sang balaan nga espiritu, nagbulig sa eunuco nga mahangpan ang tagna ni Isaias. (Binuhatan 8:​27-​35) Ano ang ginailustrar sini? Nga ang pribado naton nga pagbasa sing Biblia indi pa tuman. Si Jehova, paagi sa iya espiritu, nagagamit sang matutom kag mainandamon nga ulipon nga klase agod buligan kita nga mahangpan ang iya Pulong sa nagakaigo nga tion. Paano ini ginahimo?​—⁠Mateo 24:45-​47; Lucas 12:42.

18. Paano kita ginabuligan sang matutom kag mainandamon nga ulipon nga klase?

¹⁸ Bisan pa nga ang ulipon nga klase ginpaathag subong “matutom kag mainandamon,” wala magsiling si Jesus nga indi sila makasala. Ining grupo sang matutom nga hinaplas nga mga kauturan ginahuman gihapon sang di-himpit nga mga Cristiano. Bisan pa may labing maayo nga mga tinutuyo, mahimo sila magsala kon kaisa, subong sang nahimo anay sang ila mga kaupod sang unang siglo. (Binuhatan 10:​9-​15; Galacia 2:​8, 11-​14) Apang ang ila motibo putli, kag ginagamit sila ni Jehova agod mag-aman sa aton sing mga bulig sa pagtuon sa Biblia agod mapabakod ang aton pagtuo sa Pulong kag mga saad sang Dios. Ang panguna nga bulig para sa personal nga pagtuon nga ginahatag sa aton sang ulipon amo ang New World Translation of the Holy Scriptures. Sarang ini matigayon karon, sa kabug-usan ukon sa bahin, sa 42 ka lenguahe, kag 114 milyones ka kopya sa madamo nga edisyon ang naimprinta. Paano naton magamit ini sing epektibo sa aton personal nga pagtuon?​—⁠2 Timoteo 3:​14-​17.

19. Ano ang pila ka bahin sang New World Translation of the Holy Scriptures​—⁠With References nga makabulig sa personal nga pagtuon?

¹⁹ Halimbawa, binagbinaga ang New World Translation of the Holy Scriptures​​—⁠With References. May mga kolumna ini sang mga cross-reference,  mga nota sa ubos, isa ka ginpalip-ot nga konkordansia sa porma sang “Bible Words Indexed” kag “Footnote Words Indexed,” kag isa ka Apendise nga may masangkad nga impormasyon sang 43 ka topiko, lakip ang mga mapa kag mga tsart. May “Introduction” man ini, lakip ang mga paathag sa madamo nga mga reperensia nga ginkuhaan sining pinasahi nga badbad sang Biblia. Kon sarang ini matigayon sa lenguahe nga imo mahangpan, tinguhai gid nga mangin pamilyar sa sining mga bahin kag gamita ini. Sa bisan ano nga kahimtangan, ang Biblia amo ang panugod sang aton programa sa pagtuon, kag sa New World Translation, may isa kita ka bersion nga nagapadaku sing nagakaigo sang ngalan sang Dios kag sang paggahom sang Ginharian sang Dios.​—⁠Salmo 149:​1-9; Daniel 2:​44; Mateo 6:​9, 10.

20. Ano nga mga pamangkot ang dapat karon sabton tuhoy sa personal nga pagtuon?

²⁰ Karon, sarang kita makapamangkot: ‘Anong dugang nga bulig ang aton kinahanglan agod mahangpan ang Biblia? Paano kita makahimo sing iskedyul para sa personal nga pagtuon? Paano naton mahimo nga mangin kapin ka epektibo ang aton pagtuon? Ano dapat ang epekto sang aton pagtuon sa iban?’ Ang masunod nga artikulo magabinagbinag sining importante nga mga bahin sang aton Cristianong pag-uswag.

[Nota]

Madumduman Mo Bala?

• Ano ang buot silingon nga “magpamalandong” kag “magbinagbinag”?

• Ano dapat ang aton panimuot sa pagtuon sang Pulong sang Dios?

• Ano dapat ang aton motibo sa aton personal nga pagtuon?

• Ano nga mga bulig ang aton matigayon sa paghangop sa Biblia?

[Mga Pamangkot sa Pagtinuon]

[Retrato sa pahina 15]

Nasapwan sang mga katapo sang pamilya Bethel nga makapabakod sa espirituwal ang pagsugod sang adlaw paagi sa pagbinagbinag sang isa ka teksto sa Biblia

[Mga retrato sa pahina 15]

Sarang magamit ang malahalon nga tion paagi sa pagpamati sa mga “tape” sang Biblia samtang nagalakbay kita

[Retrato sa pahina 16]

Ang mga tawo nagapangabudlay sing lakas kag sing malawig agod makatigayon sing bulawan. Daw ano kadaku nga panikasog ang imo ginahimo sa pagtuon sa Pulong sang Dios?

[Credit Line]

Courtesy of California State Parks, 2002

[Mga retrato sa pahina 17]

Ang Biblia isa ka bahandi nga makadul-ong sa kabuhi nga walay katapusan