Sa Lamesa sang Kapitan

ANG pagkaon sa lamesa sang kapitan samtang sakay sa barko makalilipay gid bangod sang makawiwili nga mga tawo, manamit nga mga pagkaon, kag makalilipay nga paghambalanay. Apang ang isa ka paghambalanay sa lamesa ni Kapitan Robert G. Smith, sang White Star Line, naghatag sing kasanag sa isa ka espirituwal nga bangkete.​—⁠Isaias 25:6.

Sang 1894, sa edad nga 24, si Robert amo ang kapitan sang de-layag nga barko nga Kinclune of Dundee agod himuon ang iya una nga paglibot sa kalibutan. Sang ulihi nangin kapitan sia sang mga barko sang White Star, subong sang Cedric, Cevic, kag Runic.⁠ * Samtang nagatabok sa Atlantiko halin sa New York pakadto sa Liverpool, Inglaterra, gindipara ni Robert si Charles Taze Russell sa lamesa sang kapitan sa isa sini nga mga barko. Napukaw ang interes ni Robert sa mensahe sang Biblia sang makigsugilanon sia kay Russell, kag agod makatuon sia sing dugang pa, malipayon sia nga nagkuha kay Russell sing mga kopya sang Studies in the Scriptures.

Padayon nga nakig-angot si Russell paagi sa sulat, kag subong resulta, ang interes ni Robert sa mensahe sang Biblia nagtubo. Ginpaambit ni Robert ang iya bag-ong nasapwan nga ihibalo sa iya asawa. Wala madugay sila nga duha nangin aktibo nga mga Estudyante sang Biblia, nga amo anay ang pagtawag sa mga Saksi ni Jehova. Nakatigayon sang ulihi si Robert sing pribilehiyo nga maghatag sing mga diskurso sa Biblia. Sa Brisbane, Australia, halimbawa, naghatag sia sing pamulongpulong tuhoy sa “Ang Banyos Sang Gilead” kag ginpakita niya kon paano ang Pulong sang Dios nagaunod sing mensahe nga “bulong sa tanan nga mga kailo sa duta.” Didto naman sa Inglaterra, ang iya asawa kag mga kabataan nagbulig sa pagpasalida sing “Photo-Drama of Creation,” sa pagpatokar sing mga plaka sang komentaryo ni Russell samtang ginapasalida ang mga slide.

Ginpasubli ni Robert sa iya mga kabataan ang kamatuoran sang Ginharian nga nabaton niya. Sa karon, lima ka kaliwatan sang ulihi, 18 ka katapo sang pamilya ang masako nga nagabantala sing maayong balita sa iban, nga nagapasalamat gid sa ginserbe anay sa lamesa sang kapitan.

Paagi sa ila mga publikasyon kag sa ila hilikuton sa pagtudlo sa Biblia, ang mga Saksi ni Jehova nagabulig sa mga tawo sa bug-os nga kalibutan nga mahibaluan ang mensahe sang Biblia nga nagpainteres kay Kapitan Smith. Sarang mo man mahibaluan kon ano gid ang makawiwili nga ginserbe sa lamesa sang kapitan.

[Nota]

[Retrato sa pahina 8]

Si Robert G. Smith

[Retrato sa pahina 8]

Si Charles T. Russell