Mga Leksion Gikan sa Rekord sang Pagkabun-ag ni Jesus

GINAKAWILIHAN sang minilyon ang mga hitabo may kaangtanan sa pagkabun-ag ni Jesus. Makita ini sa madamo nga mga Belen nga ginapasundayag kag sa mga palaguwaon nahanungod sa Pagkabun-ag ni Jesus nga ginahiwat sa bug-os nga kalibutan sa panahon sang Paskwa. Bisan pa makawiwili, ang mga hitabo tuhoy sa pagkabun-ag ni Jesus wala ginrekord sa Biblia agod lingawon ang mga tawo. Sa baylo, bahin ini sang bug-os nga Kasulatan nga inspirado sang Dios sa pagpanudlo kag sa pagtadlong sang mga butang.​​—⁠2 Timoteo 3:⁠16.

Kon luyag gid man sang Dios nga saulugon sang mga Cristiano ang pagkabun-ag ni Jesus, naghatag kuntani ang Biblia sing eksakto nga petsa. Naghatag bala ini? Pagkatapos masambit nga si Jesus natawo sang gab-i nga ang mga manugbantay sang karnero yara sa latagon nga nagabantay sang ila mga panong, ang ika-19 nga siglo nga iskolar sang Biblia nga si Albert Barnes naghinakop: “Maathag gikan sa sini nga ang aton Manluluwas natawo antes sang ika-25 sang Disiembre . . . Ang amo nga tion matugnaw, kag labi na gid sa mataas kag bulubukid nga mga lugar malapit sa Betlehem. Ginlikom sang Dios ang petsa sang pagkabun-ag [ni Jesus]. . . . Indi importante nga mahibaluan ang petsa; kay kon importante ini, gintipigan kuntani sang Dios ang rekord tuhoy sini.”

Sa kabaliskaran, ang apat ka manunulat sang mga Ebanghelyo maathag nga nagasugid sa aton sang adlaw nga napatay si Jesus. Natabo  ini sa adlaw sang Paskwa ukon Passover, nga ginahiwat sa ika-14 nga adlaw sang Nisan nga bulan sang mga Judiyo, sa tigpamulak. Dugang pa, espesipiko nga ginsugo ni Jesus ang iya mga sumulunod nga saulugon ini nga adlaw sa iya handumanan. (Lucas 22:19) Ang Biblia wala nagasugo nga saulugon ang kaadlawan ni Jesus, ukon ang kaadlawan sang iban nga tawo. Makapasubo nga mahimo tabunan sang mga kontrobersiya tuhoy sa petsa sang pagkabun-ag ni Jesus ang mas talalupangdon nga mga hitabo sadto nga mga tion.

Mga Ginikanan nga Ginpili sang Dios

Halin sa linibo ka pamilya sa Israel, ano nga sahi sang mga ginikanan ang ginpili sang Dios sa pagpadaku sa iya Anak? Ginhatagan bala Niya sing importansia ang kabantugan kag manggad? Wala. Sa baylo, gintalupangod ni Jehova ang espirituwal nga mga kinaiya sang mga ginikanan. Usisaa ang ambahanon sang pagdayaw ni Maria, nga narekord sa Lucas 1:​46-​55, nga gin-amba niya sa tapos masugiran sang pribilehiyo nga mangin iloy sang Mesias. Lakip sa iban pa nga mga butang, nagsiling sia: “Ginapadaku sang akon kalag si Jehova . . . bangod ginatan-aw niya ang manubo nga kahimtangan sang iya ulipon nga babayi.” Mapainubuson nga gintamod niya ang iya kaugalingon subong isa nga may “manubo nga kahimtangan,” ang ulipon nga babayi ni Jehova. Sing mas importante pa, ang matahom nga pagpahayag sang pagdayaw sa ambahanon ni Maria nagapakita nga isa sia ka espirituwal nga tawo nga may masangkad nga ihibalo sa Kasulatan. Bisan isa ka makasasala nga kaliwat ni Adan, sia ang pinakamaayo gid nga pilion subong dutan-on nga iloy sang Anak sang Dios.

Kamusta naman ang bana ni Maria, nga magapadaku kay Jesus subong amay? Si Jose isa ka tawo nga may mapuslanon nga ihibalo sa pagpamanday. Bangod handa sia magpangabudlay, nahatag niya ang kinahanglanon sang pamilya nga sang ulihi nangin lima ka anak nga lalaki kag di-magkubos duha ka anak nga babayi. (Mateo 13:​55, 56) Indi manggaranon si Jose. Sang nag-abot ang tion nga ipresentar ni Maria ang iya panganay nga anak nga lalaki sa templo sang Dios, mahimo nagbatyag si Jose sing kapaslawan bangod indi niya masarangan nga maghalad sing karnero. Sa baylo, kinahanglan panginpuslan nila ang konsiderasyon nga ginatigana sa mga imol. Tuhoy sa iloy sang bag-o matawo nga bata nga lalaki, ang kasuguan sang Dios nagasiling: “Kon indi sia makasarang sing karnero, magakuha sia sing duha ka tukmo ukon duha ka kuyabog nga salampati, ang isa para sa halad nga sinunog kag ang isa para sa halad tungod sa sala, kag ang saserdote magahimo sing katumbasan para sa iya, kag mangin matinlo sia.”​​—⁠Levitico 12:⁠8; Lucas 2:​22-​24.

Ang Biblia nagasiling nga si Jose “matarong.” (Mateo 1:19) Halimbawa, wala sia naghulid sa iya birhen nga asawa tubtob natawo si Jesus. Nalikawan bangod sini ang ano man nga pangduhaduha sa kon sin-o gid ang matuod nga Amay ni Jesus. Indi mahapos para sa mag-asawa nga bag-o lang makasal nga maglikaw sa paghulid samtang nagaupod sa isa ka puluy-an, apang ginapakita sini nga ila ginpabaloran ang pribilehiyo subong ginpili nga magpadaku sa Anak sang Dios.​​—⁠Mateo 1:​24, 25.

Kaangay ni Maria, si Jose isa ka espirituwal nga tawo. Nagauntat sia sa pagtrabaho kada tuig kag nagalakbay sa sulod sang tatlo ka adlaw upod sang iya pamilya halin sa Nasaret pakadto sa Jerusalem agod magtambong sa tuigan nga piesta sang Paskwa. (Lucas 2:41) Dugang pa, mahimo ginhanas ni Jose ang bata pa nga si Jesus sa semanal nga kinabatasan sang pagpakigbahin sa pagsimba sa lokal nga sinagoga, diin ginabasa kag ginapaathag ang Pulong sang Dios. (Lucas 2:​51; 4:16) Gani, wala sing duhaduha nga ang napilian sang Dios nga mangin iloy kag amay sang iya Anak sa duta nagakaigo gid.

Daku nga Pagpakamaayo sa Kubos nga mga Manugbantay

Bisan mabudlay para sa iya asawa, nga karon siam ka bulan na nga nagadala, si Jose naglakbay  pakadto sa siudad sang iya mga katigulangan agod magparehistro, sa pagtuman sa mando ni Cesar. Sang nag-abot ang mag-asawa sa Betlehem, wala sila sing makita nga dalayunan sa gutok nga siudad. Napilitan sila nga magdayon sa isa ka kuwadra, diin natawo si Jesus kag ginpahigda sa pasungan. Agod pabakuron ang ila pagtuo, naghatag si Jehova sing pamatuod sa kubos nga mga ginikanan nga kabubut-on gid sang Dios ini nga pagkabun-ag. Nagpadala bala sia sing isa ka delegasyon sang bantog nga mga tigulang nga lalaki halin sa Betlehem agod magpalig-on sa mag-asawa? Wala. Sa baylo, ginpahayag ini ni Jehova nga Dios sa mapisan nga mga manugbantay sang karnero nga nagapulaw sa latagon sa pagbantay sang ila mga panong.

Nagpakita sa ila ang anghel sang Dios kag nagsugo sa ila nga magkadto sa Betlehem, diin masapwan nila ang bag-o lang matawo nga Mesias nga “nagahigda sa pasungan.” Nakibot ukon natublag bala ining kubos nga mga lalaki sa ila nabatian nga yara sa isa ka kuwadra ang bag-o lang matawo nga Mesias? Wala gid! Sa gilayon, ginbiyaan nila ang ila panong kag nagkadto sa Betlehem. Sang makita nila si Jesus, ginsaysay nila kay Jose kag kay Maria ang ginsiling sang anghel sang Dios. Walay duhaduha nga nagpabakod ini sa pagtuo sang mag-asawa nga ang tanan nga mga butang nagakatabo suno sa katuyuan sang Dios. “Ang mga manugbantay,” sa ila bahin, “nagbalik, nga nagahimaya kag nagadayaw sa Dios bangod sa tanan nga butang nga ila nabatian kag nakita.” (Lucas 2:​8-20) Huo, sa pagpahayag sini sa mahinadlukon sa Dios nga mga manugbantay, nagpili si Jehova sing nagakaigo.

Gikan sa nasambit na, natun-an naton kon ano dapat kita nga sahi sang mga tawo agod maangkon naton ang pagpakamaayo sang Dios. Indi naton kinahanglan nga handumon ang kabantugan ukon manggad. Sa baylo, kaangay ni Jose, ni Maria, kag sang mga manugbantay, kinahanglan tumanon naton ang Dios kag pamatud-an ang aton gugma sa iya paagi sa pag-una sang espirituwal nga mga intereses sangsa materyal nga mga butang. Matuod, makatuon kita sing maayo nga mga leksion paagi sa pagpamalandong sa rekord sang mga hitabo sang mga panahon nga natawo si Jesus.

[Retrato sa pahina 7]

Ano ang ginapakita sang paghalad ni Maria sing duha ka tukmo?

[Retrato sa pahina 7]

Ginpakamaayo sang Dios nga ipahayag ang pagkabun-ag ni Jesus sa pila ka kubos nga mga manugbantay