Ginpadyaan ang Iya Pagpaninguha

Handum sang madamo nga mga indibiduwal nga may matarong sing tagipusuon nga makatuon ang ila mga hinigugma tuhoy sa mga katuyuan sang Dios kag sa amo matigayon ang malipayon nga kabuhi. Kon ang isa nagadedikar sang iya kaugalingon sa Dios, posible gid nga nakabulig sa iya ang iban, bata man kag tigulang, nga himuon ining maalamon nga desisyon paagi sa ila maayo nga paggawi. Amo sini ang ginhimo ni Jearim, isa ka dalagita nga taga-Mexico, nga naghatag sang masunod nga sulat sa mga utod nga nagadumala sa pinasahi nga adlaw nga asambleya sang mga Saksi ni Jehova:

“Gusto ko mahibaluan ninyo ang akon daku nga kalipay. Pasugira ako kon ngaa. Napulog-walo ka tuig na ang nagligad, sang wala pa ako matawo, natun-an sang akon mga ginikanan ang kamatuoran. Nag-uswag ang akon iloy, kag sang ulihi nagtuon man kami sang akon manghod nga lalaki. Nangamuyo kami kay Jehova nga kuntani maglakat man ang akon amay sa dalanon sang kabuhi. Naglipas ang 18 ka tuig, kag isa ka espesyal nga adlaw ini para sa amon karon. Bawtismuhan na ang akon amay. Ginapasalamatan ko gid si Jehova nga wala anay niya ginpahanabo ang katapusan samtang wala pa mag-abot ining madugay na namon ginahulat nga tion. Salamat gid, Jehova!”

Sa sulod sang mga tinuig, pat-od nga ginahunahuna gid pirme sang pamilya sini nga dalagita ang mga prinsipio nga masapwan sa inspirado nga laygay sang 1 Pedro 3:​1, 2, nga nagasiling: “Kamo nga mga asawa, magpasakop kamo sa inyo mga bana, agod nga, bisan ang wala nagatuman sang pulong, madaug sila sa walay pulong paagi sa paggawi sang ila mga asawa, bangod nasaksihan nila ang inyo putli nga paggawi nga may tudok nga pagtahod.” Kag pat-od nga gin-aplikar gid sang dalagita nga si Jearim ang mga tinaga sang Deuteronomio 5:​16: “Padunggi ang imo amay kag ang imo iloy, subong sang ginsugo sa imo ni Jehova nga imo Dios.” Ang pag-aplikar sa sini nga mga prinsipio kag ang mapailubon nga paghulat kay Jehova nagdulot gid sing mga pagpakamaayo kay Jearim kag sa iya pamilya.