“Husto Ka, ang Kabuhi Makalilipay Gid!”

GUSTO mo bala mahibaluan ang matuod nga kahulugan sang kabuhi? Si Magdalena, nga 18-anyos ang edad kag isa sang mga Saksi ni Jehova nga taga-Szczecin, Poland, nagbulig sa iya kabutho sa hayskul nga si Katarzyna agod mahibaluan ini. Gin-ako ni Katarzyna nga isa sia ka ateista, apang nagpakita sia sing tunay nga interes sang nakighambal si Magdalena sa iya tuhoy sa Biblia.

Bisan pa nagustuhan ni Katarzyna ang ginasugid sa iya ni Magdalena halin sa Biblia, indi niya ini mabaton sing bug-os. Sang nakighambal sia kay Magdalena nahanungod sa matuod nga mga abyan, nagsiling anay si Katarzyna: “May Biblia ka; nakahibalo ka kon ano nga mga prinsipio ang dapat mo sundon kag kon diin ka mangita sing mga abyan. Apang paano naman ang iban nga indi makabaton karon sa sini nga mga prinsipio?”

Nagbag-o ang pagtamod ni Katarzyna sang nagkadto sia sa London, Inglaterra. Nagbisita sia sa sanga-talatapan sang mga Saksi ni Jehova didto, kag natandog sia sa kaayo nga ginpakita sa iya. Naganyat sia sa mga simple nga katahuran nga ginpakita sa iya subong sang pagbukas sang puwertahan para sa iya kag pagpakita sing tunay nga interes sa iya ginahambal.

Sang nagbukas ang klase sang Septiembre 2001, namat-od si Katarzyna nga batunon ang isa ka regular nga pagtuon sa Biblia. Ginapalambo niya ang iya apresasyon sa mga prinsipio sa Biblia kag ginsugdan nga iaplikar ini sa iya adlaw-adlaw nga pagkabuhi. Nagsugid sia sining karon lang kay Magdalena: “Pamatyag ko daw ginasugdan ko ang isa ka bag-o nga kabuhi.” Nagpadala man sia sing isa ka malip-ot nga mensahe sa cell phone ni Magdalena: “Madamo gid nga salamat sa aton pagtuon kaina! Husto ka, ang kabuhi makalilipay gid! Makalilipay man nga mahibaluan naton kon sin-o ang dapat naton pasalamatan sa sini.”