“Magpalapit Kamo sa Dios, kag Magapalapit Sia sa Inyo”

Antes kag Pagkatapos ang Pulong sang Dios Nagapabag-o sa Kabuhi sang mga Tawo

KON nakilala mo si Tony sang nagasinultero pa lang sia, makita mo ang isa ka hurong kag masingki nga bata nga nagasayo pirme sa mga duog nga ginahukmungan sang mga kriminal sa Sydney, Australia. Mga miembro sang gang ang iban sang iya mga abyan. Pirme sila nagakadalahig sa mga pagpangawat, pag-inaway sang mga gang, kag pagtiniruhay sa dalan.

Nagpanigarilyo si Tony sang nuebe anyos sia. Sa edad nga 14, regular ang paggamit niya sing marijuana kag nangin imoral. Sa edad nga 16, nagiyan sia sa heroina, kag ginsundan ini sang paggamit sing cocaine, sing LSD​​—⁠“kag sa pagkamatuod, sing bisan ano nga makapabalong,” ang termino ni Tony sa sini. Nian nakatigayon sia sing koneksion sa duha ka bantog nga sindikato sa krimen. Wala madugay, nakilal-an si Tony subong isa sang labing masaligan nga mga suplayer sang droga sa sidlangan nga baybayon sang Australia.

Sa isa ka adlaw makagasto si Tony sing mga $160 tubtob $320 (U.⁠S.) sa iya bisyo sa heroina kag marijuana. Apang sobra pa sa sini ang gin-antos sang iya pamilya. “Kami nga mag-asawa,” siling niya, “pila ka beses nga gintayaan sing mga shotgun kag mga kutsilyo sang mga kriminal nga nagapangita sing mga droga kag kuwarta sa amon balaligyaan.” Pagkatapos nga mabilanggo sing tatlo ka beses, napahulag si Tony nga usisaon kon ano ang mangin palaabuton sang iya estilo sang pagkabuhi.

Bisan pa pirme sia nagasimba, nagbatyag si Tony nga malayo sia sa Dios nga nagasilot kuno sa mga makasasala sing dayon sa impierno. Apang, sang ginduaw sang duha ka Saksi ni Jehova, nakibot gid si Tony sang matukiban niya nga indi gali amo sini ang Dios. Nalipay si Tony nga mahimo pa niya mabag-⁠o ang iya pagkabuhi kag makabaton sing mga pagpakamaayo halin sa Dios. Napahulag si Tony sang ginsiling ni Jesucristo: “Ang tanan nga butang posible sa Dios.” (Marcos 10:27) Labi nga natandog si Tony sang makapalig-on nga mga pulong: “Magpalapit kamo sa Dios, kag magapalapit sia sa inyo.”​​—⁠Santiago 4:8.

Nagaatubang karon si Tony sang hangkat nga ipahisuno ang iya kabuhi sa mga talaksan sang Biblia. Sia nagsiling: “Ang una nga butang nga akon gin-untatan amo ang pagpanigarilyo, isa ka butang nga abi ko indi ko gid mahimo, bisan pa nga madamong beses nga gintinguhaan ko ini. Paagi sa gahom ni Jehova, nauntat ko ang paggamit sing heroina kag marijuana, ang bisyo sa droga nga nagkontrol sa akon sa nagligad nga 15 ka tuig. Wala ako maghunahuna nga posible pa nga bayaan ini nga mga bisyo.”

Sa baylo nga kahadlukan ang Dios nga nagapaantos sing dayon sa mga tawo sa impierno​​—⁠ang panudlo nga indi masapwan sa Biblia⁠​—⁠ginbaton ni Tony kag sang iya asawa ang paglaum nga mabuhi sing dayon sa paraiso nga duta. (Salmo 37:​10, 11; Hulubaton 2:21) “Nagkinahanglan sang madugay nga tion kag lakas nga panikasog para sa akon agod mapahisuno ang akon pagkabuhi sa mga talaksan sang Dios,” baton ni Tony, “apang sa bulig ni Jehova nagmadinalag-on ako.”

Huo, ining isa anay ka nagiyan sa droga nangin isa ka Cristiano. Paagi sa boluntaryo nga paggamit sang  ila tion kag materyal nga mga pagkabutang, nagahinguyang sia upod sa iya asawa sing linibo ka oras sa hilikuton sang pagtudlo sa Biblia. Masako man sila nga nagapadaku sing duha ka mahinadlukon sa Dios nga kabataan. Nahimo ining daku nga pagbag-o paagi sa indi mapamatukan nga gahom sang Pulong sang Dios, ang Biblia. Sa pagkamatuod, subong sang ginsiling ni apostol Pablo, “ang pulong sang Dios buhi kag gamhanan.”​​—⁠Hebreo 4:⁠12.

Walay sapayan sining positibo nga mga halimbawa, ang iban di-makatarunganon nga nagasiling nga ang pasad sa Biblia nga hilikuton sa pagpanudlo sang mga Saksi ni Jehova nagabungkag sing mga pamilya kag nagapahuyang sang maayo nga mga prinsipio sang mga pamatan-on. Ang natabo kay Tony nagasabat sa ila pangangkon.

Kaangay ni Tony, natun-an sang madamo nga mahimo malandas ang makamamatay nga pagkagiyan. Paano? Paagi sa pagtuo sa Dios kag pagsandig sa iya kag sa iya Pulong, subong man paagi sa bulig sang mainulikdon kag mahigugmaon nga Cristianong mga kaupdanan. Malipayon si Tony nga naghinakop: “Nakita ko kon paano ginaamligan sang mga prinsipio sang Biblia ang akon mga kabataan. Ginsalbar sang mga panudlo sang Biblia ang amon pag-asawahay. Kag makatulog na ang akon mga kaingod bangod indi na ako makatalagam sa ila.”

[Blurb sa pahina 9]

‘Paagi sa gahom ni Jehova, nauntat ko ang bisyo sa droga nga nagkontrol sa akon sa sulod sang 15 ka tuig’

[Kahon sa pahina 9]

Mga Prinsipio sa Bibliya nga Nagapabag-o

Madamo nga nagiyan sa droga ang nabuligan sang nanuhaytuhay nga mga prinsipio sang Biblia agod untaton ining makahalalit nga bisyo. Ang masunod amo ang pila sa sini nga mga prinsipio:

“Tinluan naton ang aton kaugalingon sang tanan nga kadagtaan sang lawas kag espiritu, nga ginahimpit ang pagkabalaan nga may kahadlok sa Dios.” (2 Corinto 7:⁠1) Ang paggamit sing droga isa ka paglapas sa kasuguan sang Dios.

“Ang kahadlok kay Jehova amo ang pamuno sang kaalam, kag ang ihibalo tuhoy sa Isa nga Labing Balaan amo ang paghangop.” (Hulubaton 9:10) Ang pagtahod kay Jehova pasad sa sibu nga ihibalo sa iya kag sa iya mga dalanon nakabulig sa madamo nga mahilway sa impluwensia sang droga.

“Magsalig kay Jehova sa bug-os mo nga tagipusuon kag indi ma gsandig sa imo kaugalingon nga paghangop. Sa tanan mo nga dalanon talupangda sia, kag tadlungon niya ang imo mga banas.” (Hulubaton 3:​5, 6) Sarang mauntat ang makahalalit nga mga bisyo paagi sa tinagipusuon nga pagsalig sa Dios kag bug-os nga pagsandig sa iya.