Mga Pamangkot Gikan sa mga Bumalasa

Nahisuno bala sa Kasulatan nga ang isa ka Cristiano magtungtong sang iya kamot sa Biblia kag manumpa sa pagsugid sing bug-os nga kamatuoran sa korte?

Personal nga desisyon ini sang tagsa ka indibiduwal. (Galacia 6:⁠5) Apang, wala nagadumili ang Biblia nga magpanumpa sa pagsugid sing kamatuoran sa korte.

Ang pagpanumpa lapnag nga ginahimo sang una pa. Sang dumaan nga mga tion, halimbawa, ang mga Griego nagabayaw sang ila kamot sa langit ukon nagauyat sa altar samtang nagapanumpa. Kon ang isa ka Romanong hurado nagapanumpa, ginakaptan niya ang isa ka bato kag nagasumpa: “Kon hungod ako nga nagapatalang, samtang ginaluwas niya ang siudad kag kuta, kabay pa nga [ang dios nga] si Jupiter maghaboy sang tanan nga maayo halin sa akon, subong sang paghaboy ko sa sini nga bato.”​​—⁠Cyclopedia of Biblical, Theological, and Ecclesiastical Literature, nanday John McClintock kag James Strong, Tomo VII, pahina 260.

Nagapakita ini sa huyog sang katawhan nga kilalahon ang pagluntad sang isa ka dios nga nagabantay sa mga tawo kag may yara sila salabton. Halin pa sang dumaan nga mga tion, nahangpan na sang matuod nga mga sumilimba ni Jehova nga nakahibalo sia sang ila ginahambal kag ginabuhat. (Hulubaton 5:​21; 15:⁠3) Nagapanumpa sila sa presensia sang Dios, kon sa aton pa, ukon upod sa iya bilang testigo. Halimbawa, ginhimo ini nanday Boaz, David, Solomon, kag Sedequias. (Rut 3:​13; 2 Samuel 3:​35; 1 Hari 2:​23, 24; Jeremias 38:16) Ginpahanugutan man sang mga sumilimba sang matuod nga Dios nga pangabayon sila sang iban nga magsumpa. Subong sini ang ginhimo ni Abraham kag ni Jesucristo.​​—⁠Genesis 21:22-​24; Mateo 26:​63, 64.

Kon kaisa ang pagpanumpa sang isa ka tawo sa atubangan ni Jehova ginaupdan sang pagbayaw sang kamot. Nagsiling si Abram (Abraham) sa hari sang Sodoma: “Ginabayaw ko ang akon kamot sa pagsumpa kay Jehova nga Labing Mataas nga Dios, nga Manunuga sang langit kag duta.” (Genesis 14:22) Ang isa ka anghel nga nagpakighambal kay manalagna Daniel ‘nagbayaw sang iya tuo nga kamot kag sang iya wala nga kamot sa langit kag nagsumpa sa Isa nga nagakabuhi sing walay katapusan.’ (Daniel 12:⁠7) Bisan ang Dios ginpatuhuyan subong malaragwayon nga nagabayaw sang iya kamot sa pagsumpa.​​—⁠Deuteronomio 32:40; Isaias 62:8.

Ang pagpanumpa wala ginadumilian sang Kasulatan. Apang, ang isa ka Cristiano indi kinahanglan nga magpanumpa agod pamatud-an ang tagsa niya ka pahayag. Si Jesus nagsiling: “Ang inyo pulong nga Huo magakahulugan sing Huo, ang inyo Indi, Indi.” (Mateo 5:​33-​37) Amo man sini ang ginpahangop ni disipulo Santiago. Sang sia nagsiling nga “indi na magpanumpa,” nagpaandam sia batok sa pagpanumpa tuhoy sa witi-witi nga mga butang. (Santiago 5:12) Wala nagsiling si Jesus ukon si Santiago nga sala ang magpanumpa sa pagsugid sing kamatuoran sa korte.

Ano abi kon ang isa ka Cristiano sa korte ginapangabay nga magsumpa nga ang iya panaysayon matuod? Mahimo batyagon niya nga puwede sia magpanumpa. Kon indi, mahimo tugutan sia nga maghatag sing isa ka serioso nga pahayag nga wala sia nagabutig.​​—⁠Galacia 1:⁠20.

Kon ang pamaagi sang korte nagalakip sang pagbayaw sa kamot ukon pagtungtong sini sa Biblia kon nagapanumpa, mahimo pakamaayuhon sang isa ka Cristiano nga magsunod. Mahimo niya dumdumon ang mga halimbawa sa Kasulatan sa pagpanumpa nga ginaupdan sang isa ka hulag subong sang pagbayaw sang kamot. Para sa isa ka Cristiano, mas importante nga dumdumon niya nga nagasumpa sia sa atubangan sang Dios sa pagsugid sing kamatuoran sangsa ginahulag niya kon nagapanumpa. Serioso nga butang ini nga pagpanumpa. Kon ginabatyag sang isa ka Cristiano nga puwede kag dapat niya sabton ang ginapamangkot sa iya sa sini nga kahimtangan, nian dapat niya dumdumon nga nagsumpa sia sa pagsugid sing kamatuoran, nga, sa pagkamatuod, amo ang luyag ihambal sang isa ka Cristiano sa tanan nga tion.