Nagdaug Bala ang Malaut?

ANG ideya tuhoy sa bug-os uniberso nga pagsumpunganay sa ulot sang mga puwersa sang maayo kag sang malaut nagresulta sa walay katapusan nga espikulasyon sang mga manunulat kag mga pilosopo sa bug-os nga maragtas. Apang, may isa ka libro nga nagaunod sang sibu nga kasaysayan sang pagsumpunganay sa ulot sang Dios kag sang Yawa. Ini nga libro amo ang Biblia. Nagahatag ini sang kasanagan sa mga hulusayon nga nadalahig sa sining sumpunganay kag nagabulig ini agod mahibaluan kon sin-o gid ang nagdaug.

Wala madugayi sa tapos gintuga ang unang lalaki kag babayi, ginhangkat sang di-makita nga espiritu nga tinuga, nga si Satanas nga Yawa, ang paggahom sang Dios. Paano? Paagi sa malalangon nga pagpahangop nga ginadingot sang Dios ang maayo nga mga butang sa iya tinuga kag nga matigayon sang mga tawo ang mas maayo nga kabuhi nga wala nagasandig sa iya.​—⁠Genesis 3:​1-5; Bugna 12:9.

Sang ulihi, sang panahon sang patriarka nga si Job, nagpautwas si Satanas sing isa pa ka hulusayon. Nagatinguha nga gub-on ang integridad ni Job sa Dios, si Satanas nagsiling: “Panit sa panit, kag ang tanan nga iya sang tawo ihatag niya tungod sa iya kalag.” (Job 2:⁠4) Pangkabilugan nga pangangkon gid yadto! Paagi sa paggamit sing pangkabilugan nga termino nga “tawo” sa baylo sang ngalan nga Job, ginpangduhaduhaan ni Satanas ang integridad sang tagsa ka tawo. Daw subong bala nga nagsiling sia: ‘Himuon sang isa ka tawo ang bisan ano agod maluwas ang iya kabuhi. Hatagi ako sing kahigayunan, kag patalikuron ko ang bisan sin-o gikan sa Dios.’

Mahibaluan ang nagdaug sa pagsumpunganay sa ulot sang Dios kag sang Yawa paagi sa pagsabat sa duha ka pamangkot: Nagamhan bala sang tawo ang iya kaugalingon sing madinalag-on? Napatalikod bala sang Yawa ang tanan gikan sa matuod nga Dios?

Magamhan Bala sang mga Tawo ang Ila Kaugalingon sing Madinalag-on?

Sa sulod sang linibo ka tuig, ang mga tawo nag-eksperimento sa nanuhaytuhay nga sahi sang pagginahom. Sa bug-os nga maragtas, gintilawan ang nagkalainlain nga porma sang gobierno, subong sang monarkiya, aristokrasya, demokrasya, autokrasya, Pasismo, kag Komunismo. Indi bala nga ang dalayon mismo nga pag-eksperimento nagapakita nga ining nagkalainlain nga paagi sang paggahom may kakulangan?

“Halos walay hinalung-ong ang mga Romano nga nadalahig sila sa daku nga eksperimento sa paggahom,” sulat ni H. G. Wells sa A History of the World, nga ginbalhag sang 1922. Nagsiling pa sia: “Pirme ini nagabag-o, wala gid ini mag-istable. Sa isa ka pagtamod, ang eksperimento napaslawan. Sa isa pa ka kahulugan, ang eksperimento wala pa matapos, kag ang Europa kag Amerika karon nagatinguha gihapon nga malubad ang masibod nga mga problema sa bug-os nga kalibutan tuhoy sa pagdumala sa hilikuton sang estado nga una nga gin-atubang sang mga Romano.”

Ang pag-eksperimento sa gobierno nagpadayon tubtob sa ika-20 nga siglo. Ina nga siglo natapos nga labi pa nga ginbaton ang demokratiko nga paggahom. Ginapangangkon nga sa demokrasya ang tanan ginatugutan nga may bahin sa gobierno. Apang ginapakita bala sang demokrasya nga ang tawo makagahom sing madinalag-on nga wala ang Dios? Gintawag ni Jawaharlal Nehru, primer ministro anay sang India, ang demokrasya nga maayo apang nagdugang sia: “Ginasiling ko ini bangod ang iban nga sistema sang paggahom tuman kalain.” Ang presidente anay sang Pransia nga si Valéry Giscard d’Estaing nagsiling: “Nasaksihan naton ang krisis sang tiglawas nga demokrasya.”

Bisan sang ikalima nga siglo B.⁠C.⁠E., namutikan sang Griegong pilosopo nga si Plato ang kaluyahon sang demokratiko nga paggahom. Suno  sa libro nga A History of Political Theory, ginaatake sini “ang pagkaignorante kag pagkadisangkol sang mga politiko, nga amo ang dimalas sa demokrasya.” Madamo sang mga politiko karon ang nagapanganduhoy sa kabudlayan sang pagpangita sing sangkol nga mga indibiduwal nga kalipikado nga mag-alagad sa gobierno. Ang mga tawo “naugot sa mga lider nga daw indi kalipikado sa tion nga nagaatubang sila sing mabug-at nga mga problema,” siling sang The Wall Street Journal. Ini nagpadayon: “Naugot sila nga makita ang pagpang-alang-alang kag kagarukan [sang ila mga lider] kon nagakinahanglan sila sang panuytoy.”

Binagbinaga karon ang paggahom ni Hari Solomon sang dumaan nga Israel. Ginhatagan ni Jehova nga Dios si Solomon sing talalupangdon nga kaalam. (1 Hari 4:​29-​34) Ano ang kahimtangan sang pungsod sang Israel sa 40-ka-tuig nga paghari ni Solomon? “Ang Juda kag Israel madamo,” sabat sang Biblia, “subong sang balas nga yara sa higad sang dagat sa kadamuon, nga nagakaon kag nagainom kag nagakasadya.” Ang rekord nagsiling man: “Ang Juda kag Israel nagpuyo sing malig-on, ang tagsa ka tawo sa idalom sang iya ubas kag sa idalom sang iya higuera, kutob sa Dan tubtob sa Beer-seba, sa tanan nga adlaw ni Solomon.” (1 Hari 4:​20, 25) Bangod ginagamhan sila sang maalam nga hari subong kitaon nga tiglawas sang di-kitaon nga Supremo nga Manuggahom, si Jehova nga Dios, natigayon sang pungsod ang di-malabawan nga kalig-unan, kahamungaya, kag kalipay.

Daw ano gid nga pagkatuhay sa ulot sang paggahom sang tawo kag sang Dios! May makasiling gid bala nga nagdaug si Satanas sa hulusayon tuhoy sa paggahom? Wala, kay sibu gid nga ginpahayag ni manalagna Jeremias: “Nahibaluan ko, O Jehova, nga ang dalanon sang tawo wala sa iya kaugalingon. Wala sa tawo nga nagalakat bisan ang pagtuytoy sa iya tikang.”​—⁠Jeremias 10:23.

Mapatalikod Bala ni Satanas ang Tanan Gikan sa Dios?

Nagmadinalag-on bala si Satanas sa pangangkon niya nga mapatalikod niya ang tanan gikan sa Dios? Sa kapitulo 11 sang Hebreo nga tulun-an sang Biblia, ginhingadlan ni apostol Pablo ang madamo nga matutom nga lalaki kag babayi sang antes-Cristiano nga panag-on. Nian nagsiling sia: “Kulangon ako sang panahon kon magpadayon ako sa pagsaysay tuhoy kanday Gideon, Barak, Samson, Jefte, David kag kay Samuel kag sa iban pa nga mga manalagna.” (Hebreo 11:32) Ginpatuhuyan ni Pablo ining matutom nga mga alagad sang Dios subong ‘daku nga panganod sang mga saksi.’ (Hebreo 12:⁠1) Ang Griegong tinaga nga gingamit diri para sa “panganod” nagakahulugan, indi sang isa ka panganod nga napain nga may maathag nga kadakuon kag korte, kundi isa ka madamol kag daku kaayo nga panganod nga wala sing korte. Nagakaigo gid ini bangod ang matutom nga mga alagad sang Dios sang nagligad tuman gid kadamo amo nga nangin kaangay sila sang madamol kag daku kaayo nga panganod. Huo, sa sulod sang mga siglo, gingamit sang di-maisip nga kadam-an sang mga tawo ang ila kahilwayan sa pagbuot kag ginpili  nila nga magmatutom kay Jehova nga Dios.​—⁠Josue 24:15.

Kamusta naman sa aton tion? Ang kadamuon sang mga Saksi ni Jehova sa bug-os nga kalibutan nagdugang sa kapin sa anom ka milyon walay sapayan sang grabe nga paghingabot kag pagpamatok nga naeksperiensiahan nila sa ika-20 nga siglo. Dugang pa nga mga siam ka milyon ang nagapakig-upod sa ila, kag madamo sa ila ang namat-od nga magtigayon sing suod nga personal nga kaangtanan sa Dios.

Ang talalupangdon gid nga sabat sa pangangkon ni Satanas nga mapatalikod niya ang tanan nga mga tawo gikan kay Jehova naghalin sa Anak mismo sang Dios, si Jesucristo. Bisan ang tuman nga kasakit sa usok sang pag-antos wala makaguba sang iya integridad. Sa katapusan nga pagginhawa ni Jesus, nagsinggit sia: “Amay, sa imo mga kamot ginatugyan ko ang akon espiritu.”​—⁠Lucas 23:46.

Ginagamit ni Satanas ang tanan niya nga masarangan​—⁠halin sa mga pagsulay tubtob sa talangkod nga paghingabot⁠​—⁠agod makontrol ang mga tawo. Ginagamit “ang kailigbon sang unod kag ang kailigbon sang mga mata kag ang pagpadayawdayaw sang palangabuhian sang isa” sa pagsulay sa mga tawo, ginatinguhaan niya nga ipahilayo ukon ganyaton sila palayo gikan kay Jehova. (1 Juan 2:16) ‘Ginbulag man ni Satanas ang painuino sang mga di-matinuuhon, agod nga ang kapawa sang mahimayaon nga maayong balita tuhoy kay Cristo, nga larawan sang Dios, indi magsilak.’ (2 Corinto 4:⁠4) Kag wala nagapangalag-ag si Satanas sa paggamit sing mga pamahog kag kahadlok sa mga tawo agod matuman ang iya tulumuron.​—⁠Binuhatan 5:40.

Apang, ang mga dampig sa Dios indi madaug sang Yawa. Nakilala nila si Jehova nga Dios kag ‘ginhigugma sia sa bug-os nila nga tagipusuon kag sa bug-os nila nga kalag kag sa bug-os nila nga hunahuna.’ (Mateo 22:37) Huo, ang di-malingkang nga katutom ni Jesucristo kag sang di-maisip nga mga tawo nagapamatuod sang daku kaayo nga kalutusan ni Satanas nga Yawa.

Ano ang Mahanabo sa Palaabuton?

Ang pag-eksperimento bala sang mga tawo sa gobierno magapadayon tubtob san-o? Si manalagna Daniel nagtagna: “Sa mga adlaw sadto nga mga hari ang Dios sang langit magapatindog sing ginharian nga indi gid malaglag. Kag ang ginharian mismo indi iliton sa iban nga katawhan. Dugmukon sini kag papason ini tanan nga ginharian, kag magapadayon ini tubtob sa walay katubtuban.” (Daniel 2:44) Ang Ginharian nga ginpatindog sang Dios sang langit isa ka langitnon nga gobierno nga gamhan ni Jesucristo. Amo man ini nga Ginharian ang gintudlo ni Jesus nga ipangamuyo sang iya mga sumulunod. (Mateo 6:​9, 10) Ini nga Ginharian magalaglag sa tanan nga tawhanon nga mga panguluhan “sa [nagahilapit nga] inaway sang daku nga adlaw sang Dios nga Labing Gamhanan” kag magaapektar sa bug-os nga duta.​—⁠Bugna 16:​14, 16.

Ano ang matabo kay Satanas? Ginalaragway sang Biblia ining hitabo sa palaabuton: “Gindakop [sang anghel ni Jehova] ang dragon, ang orihinal nga man-ug, nga amo ang Yawa kag Satanas, kag gingapos sia sa sulod sang isa ka libo ka tuig. Kag gintagbong sia sa kadadalman kag gintakpan ini kag ginpat-inan ini sa ibabaw niya, agod indi na niya mapatalang pa ang mga pungsod, tubtob nga matapos ang isa ka libo ka tuig.” (Bugna 20:1-3) Ang Isa ka Libo ka Tuig nga Paggahom ni Jesucristo magasugod sa tapos nga matagbong si Satanas sa kadadalman kag wala na sia sing mahimo.

Nian, mangin makalilipay gid nga duog ini nga duta! Wala na ang kalautan kag ang mga nagahimo sini. Ang Biblia nagasaad: “Ang mga nagahimo sing malaut utdon . . . Apang ang mga mahagop magapanag-iya sang duta, kag makasapo gid sila sing daku nga kalipay sa kabuganaan sang paghidait.” (Salmo 37:9-11) Wala na sing magatublag sang ila paghidait​—⁠tawo man ukon sapat. (Isaias 11:​6-9) Bisan ang minilyon nga, bangod wala sing hinalung-ong ukon wala sing kahigayunan nga makilala si Jehova, nagdampig sa Yawa sang nagligad pagabanhawon kag tudluan tuhoy sa Dios.​—⁠Binuhatan 24:15.

Sa katapusan sang Isa ka Libo ka Tuig nga Paggahom, ang duta mangin paraiso, kag ang mga tawo sa sini mangin himpit na. Nian si Satanas pagabuhian “sa malip-ot nga tion,” kag pagkatapos sini pagalaglagon sing dayon upod sa tanan  nga nagapamatok sa paggahom sang Dios.​​—⁠Bugna 20:​3, 7-​10.

Kay Sin-o Ka Magadampig?

Ang ika-20 nga siglo amo ang tion nga ginhalitan sing daku ni Satanas ang duta. Apang, sa baylo nga nagapakita nga nagdaug sia, ang mga kahimtangan sa duta nagapakita sing tanda nga yara na kita sa katapusan nga mga adlaw sining malaut nga kalibutan. (Mateo 24:​3-​14; Bugna 6:​1-8) Indi na ang kadamuon sang kalautan sa duta ukon ang kalabanan nga pagtamod ang magapat-od sa kon sin-o ang nagdaug. Kundi kon kay sin-o paggahom ang pinakamaayo kag kon bala may nagaalagad sa Dios tungod sa gugma. Diin man sini, ang kadalag-an iya ni Jehova.

Kon ang ginpahanugot nga tion nagpamatuod na nga sayop si Satanas, ngaa gintugutan pa sang Dios nga magpadayon ang kalautan? Si Jehova nagapailob “bangod indi niya luyag nga ang bisan sin-o malaglag kundi luyag niya nga ang tanan makadangat sa paghinulsol.” (2 Pedro 3:⁠9) Kabubut-on sang Dios “nga ang tanan nga sahi sang tawo maluwas kag makadangat sa sibu nga ihibalo sang kamatuoran.” (1 Timoteo 2:⁠4) Kabay nga gamiton mo ang nabilin nga tion sa pagtuon sa Biblia kag ‘magkuha sing ihibalo tuhoy sa lamang matuod nga Dios, kag tuhoy sa isa nga iya ginpadala, si Jesucristo.’ (Juan 17:⁠3) Malipay ang mga Saksi ni Jehova sa pagbulig sa imo nga matigayon ina nga ihibalo agod mangin isa ka sa minilyon nga nagatindog sing malig-on dampig sa nagadaug.

[Mga retrato sa pahina 5]

Paagi sa paghupot sing integridad, dugang pa nga ginapamatud-an sang mga Saksi ni Jehova ang kalutusan ni Satanas

[Retrato sa pahina 7]

Madamo nga mga matutom ang nagadampig kay Jehova