Ang Pagkasinsero—Mapuslanon, Apang Tuman na Bala Ini?

MAPUSLANON gid bala ang pagkasinsero sa aton adlaw-adlaw nga pagkabuhi? Ang isa ka diksionaryo naghatag sing kahulugan sa “pagkasinsero” subong “indi pagpakunokuno ukon pagkasalimpapaw; pagkabunayag; pagkaprangka; pagkamaminatud-on.” Maathag, mapuslanon ini nga kinaiya sa pagpalambo sang maayo nga kaangtanan sa iban. Si apostol Pablo naglaygay: “Mangin matinumanon kamo sa tanan nga butang sa inyo mga agalon sa undanon nga kahulugan, indi paagi sa mga buhat sang pakitakita nga pag-alagad, subong mga nagapahamuot sa tawo, kundi upod ang pagkasinsero sang tagipusuon, nga may kahadlok kay Jehova.” (Colosas 3:22) Sin-o bala ang wala maluyag nga mangin trabahador niya ini nga sinsero nga tawo? Sa karon, ang sinsero nga mga tawo may mas daku nga tsansa nga makakita sing obra kag indi mapahalin sa ulubrahan.

Sa pihak nga bahin, mapuslanon gid ang pagkasinsero bangod naapektuhan sini ang aton kaangtanan sa Dios. Ginpakamaayo sang Dios ang mga Israelinhon sang una sang mahalungon nga gintuman nila ang mga kasuguan kag ginsaulog ang mga kapiestahan. Sang ginabinagbinag ang katinlo sa kongregasyon, ginpalig-on ni Pablo ang mga Cristiano: “Hiwaton naton ang piesta, indi sa daan nga lebadura, ni sa lebadura sang kalainan kag kalautan, kundi sa mga wala sing pangpaalsa nga mga tinapay sang pagkasinsero kag kamatuoran.” (1 Corinto 5:8) Indi lamang mapuslanon ang pagkasinsero kundi kinahanglanon man ini agod mangin kalahamut-an ang aton pagsimba sa Dios. Apang, talupangda nga ang pagkasinsero lamang indi tuman na. Kinahanglan updan ini sang kamatuoran.

Ang mga tagtukod kag mga pasahero sang Titanic mahimo sinsero sa ila pagpati nga ining daku nga de-pasahero nga barko indi gid malunod. Apang sa una sini nga pagpanakayon sang 1912, nakabunggo ini sa isa ka nagalutaw nga bukid sang yelo kag 1,517 ka tawo ang napatay. Mahimo nga ang pila sa mga Judiyo sang unang siglo sinsero nga nagpati sa ila paagi sang pagsimba sa Dios, apang ang ila kakugi “indi suno sa sibu nga ihibalo.” (Roma 10:⁠2) Agod mangin kalahamut-an kita sa Dios, ang aton sinsero nga mga pagpati dapat napasad sa sibu nga impormasyon. Nalipay magbulig sa imo ang mga Saksi ni Jehova sa inyo lugar nga usisaon kon ano ang nadalahig sa pag-alagad sa Dios nga may pagkasinsero kag kamatuoran.