‘Padayon nga Magpamunga sing Madamo’

‘Padayon nga magpamunga sing madamo kag pamatud-i ninyo nga kamo mga disipulo ko.’​—⁠JUAN 15:8.

1. (a) Ano nga kinahanglanon sang pagkadisipulo ang ginsambit ni Jesus sa iya mga apostoles? (b) Ano ang dapat naton ipamangkot sa aton kaugalingon?

GAB-I sadto antes sang kamatayon ni Jesus. Naghinguyang sia sang madamo nga tion agod palig-unon ang iya mga apostoles paagi sa suod nga pagpakighambal sa ila. Ayhan, lampas na sadto sa tungang gab-⁠i, apang si Jesus, nga napahulag sang gugma sa iya suod nga mga abyan, nagpadayon sa paghambal. Nian, sa iya pagpakighambal, ginpahanumdom niya sila sang isa pa ka kinahanglanon nga dapat nila tumanon agod makapabilin sila nga iya mga disipulo. Sia nagsiling: “Ang akon Amay mahimaya sa sini, nga padayon kamo nga nagapamunga sing madamo kag ginapamatud-an ninyo nga kamo mga disipulo ko.” (Juan 15:⁠8) Ginatuman bala naton karon ini nga kinahanglanon sang pagkadisipulo? Ano ang buot silingon sang “nagapamunga sing madamo”? Agod mahibaluan ini binagbinagon naton ang paghambalanay sadto nga gab-i.

2. Ano nga ilustrasyon tuhoy sa bunga ang ginsaysay ni Jesus sang gab-i antes sang iya kamatayon?

² Ang laygay nga magpamunga bahin sang isa ka ilustrasyon nga ginsugid ni Jesus sa iya mga apostoles. Sia nagsiling: “Ako ang matuod nga puno sang ubas, kag ang akon Amay amo ang mangunguma. Ang tagsa ka sanga sa akon nga wala nagapamunga ginakuha niya, kag ang tagsa nga nagapamunga  ginatinluan niya, agod nga magpamunga ina sing dugang pa. Kamo matinlo na bangod sang pulong nga akon napamulong sa inyo. Magpabilin kamo nga nahiusa sa akon, kag ako nahiusa sa inyo. Subong nga ang sanga indi makapamunga sa iya kaugalingon kon wala nagaangot sa puno sang ubas, amo man kamo, kon indi kamo magpabilin nga nahiusa sa akon. Ako amo ang puno sang ubas, kamo ang mga sanga. . . . Ang akon Amay mahimaya sa sini, nga padayon kamo nga nagapamunga sing madamo kag ginapamatud-an ninyo nga kamo mga disipulo ko. Subong nga ang Amay naghigugma sa akon kag ako naghigugma sa inyo, pabilin kamo sa akon gugma. Kon ginasunod ninyo ang akon mga sugo, magapabilin kamo sa akon gugma.”​—⁠Juan 15:1-10.

3. Ano ang dapat himuon sang mga sumulunod ni Jesus agod makapamunga?

³ Sa sini nga ilustrasyon si Jehova amo ang Mangunguma, si Jesus ang puno sang ubas, kag ang mga apostoles nga ginahambalan ni Jesus amo ang mga sanga. Tubtob nga ang mga apostoles nagtinguha nga “magpabilin nga nahiusa” kay Jesus, magapamunga sila. Dayon ginpaathag ni Jesus kon paano magmadinalag-on ang mga apostoles sa paghupot sining importante nga paghiusa: “Kon ginasunod ninyo ang akon mga sugo, magapabilin kamo sa akon gugma.” Sang ulihi, nagsulat man si apostol Juan sing amo man nga mga pulong sa mga masigka-Cristiano: “Sia nga nagatuman sang iya [ni Cristo] mga sugo nagapabilin nga nahiusa sa iya.”⁠ * (1 Juan 2:24; 3:24) Busa, paagi sa pagtuman sang mga sugo ni Cristo, nagapabilin nga nahiusa sa iya ang iya mga sumulunod, kag ini nga paghiusa, nagabulig sa ila nga magpamunga. Ano ang kinaiya sang mga bunga nga dapat naton ipamunga?

Kahigayunan sa Pag-uswag

4. Ano ang matun-an naton gikan sa kamatuoran nga “ginakuha” ni Jehova ang tagsa ka sanga nga wala nagapamunga?

⁴ Sa ilustrasyon tuhoy sa puno sang ubas, “ginakuha,” ukon ginautod, ni Jehova ang sanga nga wala nagapamunga. Ano ang ginasugid sini sa aton? Wala lamang ini nagasugid sa aton nga ang tanan nga disipulo kinahanglan magpamunga kundi nga ang tanan makasarang man sa paghimo sini, walay sapayan kon ano man ang ila mga kahimtangan ukon mga limitasyon. Kay man, supak ini sa mahigugmaon nga dalanon ni Jehova nga ‘kuhaon,’ ukon sikwayon, ang isa ka disipulo ni Cristo nga indi makatuman sang isa ka butang nga indi niya masarangan.​​—⁠Salmo 103:14; Colosas 3:​23; 1 Juan 5:3.

5. (a) Paano ginapakita sang ilustrasyon ni Jesus nga mahimo kita mag-uswag sa pagpamunga? (b) Anong duha ka sahi sang bunga ang aton binagbinagon?

⁵ Ginapakita man sang ilustrasyon ni Jesus tuhoy sa puno sang ubas nga bisan may limitasyon ang aton mga kahimtangan, dapat kita magpangita sing kahigayunan sa pag-uswag sa aton mga hilikuton subong mga disipulo. Talupangda ang ginsiling ni Jesus: “Ang tagsa ka sanga sa akon nga wala nagapamunga ginakuha niya, kag ang tagsa nga nagapamunga ginatinluan niya, agod nga magpamunga ina sing dugang pa.” (Juan 15:⁠2) Sa hingapusan sang ilustrasyon, ginpalig-on ni Jesus ang iya mga sumulunod nga ‘magpamunga sing madamo.’ (Bersikulo 8) Ano ang ginapahangop sini? Subong mga disipulo, indi gid kita dapat magpabaya. (Bugna 3:​14, 15, 19) Sa baylo, dapat kita magpangita sing paagi agod mag-uswag sa pagpamunga. Ano nga sahi sang bunga ang dapat naton panikasugan nga ipamunga sing madamo? Amo ang (1) “bunga sang espiritu” kag (2) bunga sang Ginharian.​—⁠Galacia 5:​22, 23; Mateo 24:14.

Ang Bunga sang Cristianong mga Kinaiya

6. Paano ginpadaku ni Jesucristo ang balor sang bunga sang espiritu nga una ginsambit?

⁶ Una nga ginsambit sa mga “bunga sang espiritu” amo ang gugma. Ginapatubas sang balaan nga espiritu sang Dios ang gugma sa mga Cristiano, kay ginatuman nila ang sugo nga ginhatag ni Jesus wala madugay antes niya ginsaysay ang ilustrasyon tuhoy sa nagapamunga nga puno sang ubas. Ginsilingan niya ang iya mga apostoles: “Nagahatag ako sa inyo sing isa ka bag-o nga sugo, nga higugmaon ninyo ang isa kag isa.” (Juan 13:34) Sa katunayan, sa bug-os niya nga pagpakighambal sadtong katapusan nga gab-i sang iya dutan-on nga kabuhi, sulit-sulit nga ginpahanumdom ni Jesus ang mga apostoles sang kinahanglanon nga magpakita sing gugma.​—⁠Juan 14:​15, 21, 23, 24; 15:​12, 13, 17.

7. Paano ginpakita ni apostol Pedro nga ang pagpamunga may yara kaangtanan sa pagpadayag sing tulad-Cristo nga mga kinaiya?

⁷ Nahangpan ni Pedro, nga presente sadto nga gab-⁠i, nga ang tulad-Cristo nga gugma kag ang may kaangtanan sa sini nga mga kinaiya dapat ipadayag sang tunay nga mga disipulo ni Cristo. Tinuig sang ulihi, ginpalig-on ni Pedro ang mga Cristiano nga palambuon ini nga mga kinaiya subong sang pagpugong sa kaugalingon, utudnon nga pagpalangga, kag gugma. Nagsiling pa sia nga ang paghimo sini magapugong sa aton nga “mangin di-aktibo ukon di-mabungahon.” (2 Pedro 1:​5-8) Ano man ang aton kahimtangan, ang pagpadayag sang bunga sang espiritu masarangan naton. Busa, kabay nga panikasugan naton nga ipakita ang gugma, kaayo, pagkakalmado, kag ang iban pa nga tulad-Cristo nga mga kinaiya sa bug-os nga kasangkaron, kay “batok sa sining mga butang wala sing kasuguan,” ukon limitasyon. (Galacia 5:23) Sa pagkamatuod, magpamunga kita “sing dugang pa.”

Pagpamunga sing Bunga sang Ginharian

8. (a) Ano ang kaangtanan sa ulot sang bunga sang espiritu kag sang bunga sang Ginharian? (b) Ano nga pamangkot ang dapat naton binagbinagon?

⁸ Ang madamo sing duag kag maduga nga mga bunga nagapatahom sa isa ka tanom. Apang, indi lamang pangpatahom ang balor sang amo nga mga bunga. Importante man ang mga bunga sa pagpadamo sang tanom paagi sa mga liso ukon binhi sini. Subong man, ang bunga sang espiritu wala lamang nagapatahom sang aton Cristianong personalidad. Ang mga kinaiya subong sang gugma kag pagtuo nagapahulag man sa aton nga ipalapnag ang tulad-binhi nga mensahe sang Ginharian nga masapwan sa Pulong sang Dios. Talupangda kon paano ini ginpadaku ni apostol Pablo. Sia nagsiling: “Kami man nagatuo [isa ka bunga sang espiritu] kag gani nagahambal kami.” (2 Corinto 4:13) Sa sining paagi, dugang nga nagpaathag si Pablo, ‘maghalad kita sa Dios sing halad sang pagdayaw, nga amo, ang bunga sang mga bibig’​—⁠ang ikaduha nga sahi sang bunga nga kinahanglan naton ipadayag. (Hebreo 13:15) May kahigayunan bala sa aton kabuhi nga mangin mas mabungahon, sa pagkamatuod “nagapamunga sing madamo,” subong mga manugbantala sang Ginharian sang Dios?

9. Ang pagpamunga bala katumbas sang paghimo sing mga disipulo? Ipaathag.

⁹ Agod masabat ini sing nagakaigo, dapat naton anay hangpon kon ano ang bunga sang Ginharian. Husto bala maghinakop nga ang pagpamunga nagakahulugan sang paghimo sing mga disipulo? (Mateo 28:19) Ang bunga bala panguna nga nagapatuhoy sa mga indibiduwal nga nabuligan naton nga mangin bawtismado nga mga sumilimba ni Jehova? Indi. Kay kon subong sini, makapaluya gid ini sa dalayawon nga mga Saksi nga matutom nga nagabantala sing mensahe sang Ginharian sa sulod sang mga tuig sa indi tanto ka mabinatunon nga mga teritoryo. Huo, kon ang bunga sang Ginharian nga ginapamunga naton nagapatuhoy lamang sa bag-o nga mga disipulo, ining mapisan nga mga Saksi mangin kaangay sa wala nagapamunga nga mga sanga sa ilustrasyon ni Jesus! Siempre, indi subong sini. Nian, ano ang panguna nga bunga sang Ginharian sa aton ministeryo?

Mabungahon Paagi sa Pagpalapnag sing Binhi sang Ginharian

10. Paano ang ilustrasyon ni Jesus tuhoy sa manugsab-ug kag sa nagkalainlain nga sahi sang duta nagapakita kon ano kag kon indi ano ang bunga sang Ginharian?

¹⁰ Ang ilustrasyon ni Jesus tuhoy sa manugsab-ug kag sa nagkalainlain nga sahi sang duta nagapatalupangod  sang sabat​—⁠isa ka makapalig-on nga sabat para sa mga nagapanaksi sa indi tanto ka mabungahon nga mga teritoryo. Si Jesus nagsiling nga ang binhi amo ang mensahe sang Ginharian nga masapwan sa Pulong sang Dios, kag ang duta nagapatuhoy sa malaragwayon nga tagipusuon sang tawo. Ang iban nga binhi “nagtupa sa maayo nga duta, kag, sa tapos magpanugdo, nagpatubas ini sing bunga.” (Lucas 8:⁠8) Ano nga bunga? Bueno, sa tapos magpanugdo kag maggulang ang puno sang trigo, nagapamunga ini, indi sang gutok sang trigo, kundi sang bag-o nga binhi. Subong man, ang isa ka Cristiano nagapamunga, indi man gid sang bag-o nga mga disipulo, kundi sang bag-o nga binhi sang Ginharian.

11. Paano mahimo ipaathag ang bunga sang Ginharian?

¹¹ Sa amo, ang bunga sa sining kahimtangan indi ang bag-o nga mga disipulo ukon ang maayong Cristianong mga kinaiya. Sanglit ang binhi nga ginsab-ug amo ang pulong sang Ginharian, ang bunga amo ang madamo pa sina nga binhi. Ang pagpamunga sa sini nga kahimtangan nagapatuhoy sa paghambal tuhoy sa Ginharian. (Mateo 24:14) Ang pagpamunga bala sining bunga sang Ginharian​—⁠ang pagbantala sing maayong balita sang Ginharian⁠​—⁠masarangan, bisan ano man ang aton kahimtangan? Huo, sa pagkamatuod! Sa amo man nga ilustrasyon, ginpaathag ni Jesus kon ngaa.

Paghatag sang Aton Pinakamaayo Para sa Himaya sang Dios

12. Masarangan bala sang tanan nga mga Cristiano ang pagpamunga sing bunga sang Ginharian? Ipaathag.

¹² Ang “ginsab-ug sa maayong duta,” siling ni Jesus, “nagapatubas, ang isa sini isa ka gatos, ang isa sina kan-uman, ang iban katluan.” (Mateo 13:23) Ang binhi nga ginsab-ug sa uma nagapatubas sing  lainlain nga kadamuon suno sa mga kahimtangan. Sing kaanggid, ang mahimo naton sa pagbantala sing maayong balita mahimo nga nanuhaytuhay suno sa aton mga kahimtangan, kag ginapakita ni Jesus nga nahibaluan niya ini. Ang iban mahimo nga may madamo sing mga kahigayunan; ang iban may maayo nga panglawason kag mas mapagsik. Sa amo, ang masarangan naton mahimo nga kapin pa ukon kubos sangsa mahimo sang iban, apang basta amo ini ang aton pinakamaayo, nahamuot si Jehova. (Galacia 6:⁠4) Bisan pa ang katigulangon ukon kasablagan sa lawas nagalimite sang aton pagpakigbahin sa pagbantala, wala duhaduha nga ang aton maawaon nga Amay, si Jehova, nagatamod sa aton subong isa sa mga ‘nagapadayon sa pagpamunga sing madamo.’ Ngaa? Bangod ginahatag naton sa iya ang ‘tanan nga yara sa aton’​—⁠ang aton bug-os-kalag nga pag-alagad.⁠ *​​—⁠Marcos 12:​43, 44; Lucas 10:27.

13. (a) Ano ang panguna nga rason nga ‘magpadayon’ kita sa pagpamunga sing bunga sang Ginharian? (b) Ano ang makabulig sa aton nga magpadayon sa pagpamunga sa indi tanto ka mabinatunon nga mga teritoryo? (Tan-awa ang kahon sa pahina 21.)

¹³ Bisan sa ano man nga kasangkaron nga makapatubas kita sing bunga sang Ginharian, mapahulag kita nga ‘magpadayon sa pagpamunga’ kon ginadumdom naton kon ngaa ginahimo naton ini. (Juan 15:16) Ginsambit ni Jesus ang panguna nga rason: “Ang akon Amay mahimaya sa sini, nga padayon kamo nga nagapamunga sing madamo.” (Juan 15:⁠8) Huo, ang aton pagbantala nagapakabalaan sang ngalan ni Jehova sa tanan nga katawhan. (Salmo 109:30) Si Honor, nga isa ka 75 anyos nga matutom nga Saksi, nagsiling: “Bisan sa indi tanto ka mabinatunon nga mga teritoryo, isa gid ka pribilehiyo nga itiglawas ang Labing Mataas.” Sang ginpamangkot si Claudio, nga nangin makugi nga Saksi kutob sang 1974, kon ngaa padayon sia nga nagabantala bisan pa diutay lamang sa iya teritoryo ang nagabaton, ginkutlo niya ang Juan 4:​34, diin mabasa naton ang pinamulong ni Jesus: “Ang akon kalan-on amo ang paghimo sang kabubut-on sang nagpadala sa akon kag ang pagtapos sang iya buluhaton.” Nagsiling pa si Claudio: “Kaangay ni Jesus, luyag ko nga indi lamang magsugod kundi tapuson man ang akon buluhaton subong isa ka manugbantala sang Ginharian.” (Juan 17:⁠4) Nagaugyon sa iya ang mga Saksi ni Jehova sa bug-os nga kalibutan.​—⁠Tan-awa ang kahon nga “Kon Paano ‘Magpamunga nga May Pagbatas,’” sa pahina 21.

Sa Pagbantala kag sa Pagtudlo

14. (a) Ano ang duha ka katuyuan sang hilikuton ni Juan Bautista kag ni Jesus? (b) Paano mo ilaragway ang Cristianong hilikuton karon?

¹⁴ Ang una nga manugbantala sang Ginharian nga ginsambit sa mga Ebanghelyo amo si Juan Bautista. (Mateo 3:​1, 2; Lucas 3:18) Ang iya panguna nga katuyuan amo ang ‘pagpanaksi,’ kag ginhimo niya ini nga may daku nga pagtuo kag upod ang paglaum nga “ang tanan nga sahi sang mga tawo magtuo.” (Juan 1:​6, 7) Sa pagkamatuod, ang pila nga ginbantalaan ni Juan nangin mga disipulo ni Cristo. (Juan 1:​35-​37) Busa, si Juan isa ka manugbantala kag isa ka manughimo sing disipulo. Si Jesus isa man anay ka manugbantala kag manunudlo. (Mateo 4:​23; 11:⁠1) Kon amo, indi makapakibot nga wala lamang ginsugo ni Jesus ang iya mga sumulunod nga ibantala ang mensahe sang Ginharian kundi buligan man ang mga indibiduwal nga nagbaton sini nga mangin mga disipulo niya. (Mateo 28:​19, 20) Sa amo, ang aton hilikuton karon amo ang pagbantala kag pagpanudlo.

15. Ano ang pagkaanggid sang reaksion sa pagbantala nga hilikuton sang unang siglo C.⁠E. kag sa karon?

¹⁵ Sa mga tawo sang unang siglo C.⁠E. nga nakabati sa pagbantala kag pagpanudlo ni Pablo, “ang pila nagpati sa mga butang nga ginsiling; ang iban wala magpati.” (Binuhatan 28:24) Pareho gid ang mga reaksion sa karon. Makapasubo nga ang kalabanan nga binhi sang Ginharian nagtupa sa di-mabinatunon nga duta. Apang, ang pila ka binhi nagtupa sa maayo nga duta, nagpanggamot, kag nagpanugdo, subong sang gintagna ni Jesus. Sa katunayan, sa bug-os nga kalibutan, may promedyo  nga kapin sa 5,000 ka tawo ang nangin tunay nga mga disipulo ni Cristo kada semana! Ining bag-o nga mga disipulo “nagpati sa mga butang nga ginsiling,” bisan pa ang kalabanan nga iban nga tawo wala magpati. Ano ang nakabulig agod nangin mabinatunon ang ila tagipusuon sa mensahe sang Ginharian? Sa masami ang personal nga interes nga ginapakita sang mga Saksi​—⁠ang pagbunyag sa bag-o lang ginsab-ug nga binhi, kon sa aton pa⁠—may daku nga epekto. (1 Corinto 3:⁠6) Binagbinaga ang duha lamang sa madamo nga mga halimbawa.

Ang Personal nga Interes May Daku nga Epekto

16, 17. Ngaa importante nga magpakita sing personal nga interes sa mga masugilanon naton sa aton ministeryo?

¹⁶ Si Karolien, isa ka pamatan-on nga Saksi sa Belgium, nagduaw sa isa ka tigulang nga babayi nga indi interesado sa mensahe sang Ginharian. Sanglit may bendahe ang kamot sang babayi, nagtanyag sing bulig si Karolien kag ang iya kaupod, apang wala ini ginbaton sang babayi. Pagligad sang duha ka adlaw nagbalik ang amo man nga mga Saksi sa balay sang babayi kag ginkamusta sia. “Daku gid ang epekto sini,” siling ni Karolien. “Nakibot sia nga makita nga interesado gid kami sa iya. Ginpadayon niya kami sa iya balay, kag nasugdan ang isa ka pagtuon sa Biblia.”

¹⁷ Si Sandi, isa ka Saksi sa Estados Unidos, nagpakita man sing personal nga interes sa mga ginabantalaan niya. Ginatan-aw niya ang mga pahibalo tuhoy sa mga nagbun-ag sa lokal nga pamantalaan kag dayon ginaduaw niya ang bag-o nga mga ginikanan dala Ang Akon Libro Sang mga Sugilanon sa Biblia.⁠ * Sanglit masami nga yara sa puluy-an ang iloy kag ginapabugal ang iya lapsag sa mga bisita, masami nga masugdan ang paghambalanay. “Ginapakighambal ko sa mga ginikanan ang importansia sang pagpakigsuod sa bag-o natawo paagi sa pagbasa,” paathag ni Sandi. “Sang ulihi ginapakighambal ko ang tuhoy sa mga kabudlayan sang pagpadaku sa bata sa katilingban karon.” Sining karon lang, bilang resulta sini nga pagduaw, ang isa ka iloy kag ang anom ka kabataan nag-alagad kay Jehova. Ang paghimo sang una nga tikang kag pagpakita sing personal nga interes mahimo man magdul-ong sa makalilipay nga mga resulta sa aton ministeryo.

18. (a) Ngaa ang kinahanglanon nga ‘magpamunga sing madamo’ masarangan naton tanan? (b) Ano ang tatlo ka kinahanglanon sang pagkadisipulo nga ginsambit sa Ebanghelyo ni Juan ang determinado mo nga tumanon?

¹⁸ Makapalig-on gid mahibaluan nga ang kinahanglanon nga ‘magpadayon sa pagpamunga sing madamo’ masarangan naton! Bata man kita ukon tigulang, mapagros man kita ukon balatianon, nagabantala man kita sa mabinatunon ukon indi tanto ka mabinatunon nga mga teritoryo, tanan kita sarang makapamunga sing madamo. Paano? Paagi sa pagpadayag sang mga bunga sang espiritu sa daku pa nga kasangkaron kag sa pagpalapnag sing mensahe sang Ginharian sang Dios sa bug-os naton nga masarangan. Sa amo man nga tion, ginatinguhaan naton nga ‘magpabilin sa pulong ni Jesus’ kag “maghigugmaanay.” Huo, paagi sa pagtuman sining tatlo ka importante nga kinahanglanon sang pagkadisipulo nga ginsambit sa Ebanghelyo ni Juan, ginapamatud-an naton nga ‘mga disipulo gid kita ni Cristo.’​​—⁠Juan 8:​31; 13:35.

[Mga nota]

Mga Pamangkot Para sa Repaso

• Ano nga sahi sang bunga ang dapat naton ipamunga sing madamo?

• Ngaa ang tulumuron nga ‘magpamunga sing madamo’ masarangan naton?

• Ano ang tatlo ka importante nga kinahanglanon sang pagkadisipulo nga ginsambit sa Ebanghelyo ni Juan ang nabinagbinag naton?

[Mga Pamangkot sa Pagtinuon]

[Kahon/Retrato sa pahina 21]

KON PAANO ‘MAGPAMUNGA NGA MAY PAGBATAS’

ANO ang nagabulig sa imo nga makapadayon sing matutom sa pagbantala sing mensahe sang Ginharian sa indi tanto ka mabinatunon nga mga teritoryo? Yari ang pila ka mabuligon nga mga sabat sa sini nga pamangkot.

“Ang paghibalo nga ginasakdag gid kita ni Jesus nagapalig-on sang pagkamalaumon kag pagpadayon, bisan ano man ang reaksion sa teritoryo.”​​—⁠Harry, 72 anyos; nabawtismuhan sang 1946.

“Ang 2 Corinto 2:17 pirme nagapalig-on sa akon. Ini nagasiling nga nagapakigbahin kita sa ministeryo ‘sa idalom sang panan-aw sang Dios, upod ni Cristo.’ Kon yara ako sa ministeryo, nalipay ako sa pagpakig-upod sa akon suod nga mga abyan.”​​—⁠Claudio, 43 anyos; nabawtismuhan sang 1974.

“Sing prangka, nabudlayan ako magbantala. Apang, naeksperiensiahan ko ang pagkamaminatud-on sang mga pulong sa Salmo 18:29: ‘Paagi sa akon Dios masaka ko ang pader.’”​​—⁠Gerard, 79 anyos; nabawtismuhan sang 1955.

“Kon makabasa ako bisan isa lang ka kasulatan sa ministeryo, nalipay ako nga nausisa sang Biblia ang tagipusuon sang isa.”​​—⁠Eleanor, 26 anyos; nabawtismuhan sang 1989.

“Ginatilawan ko ang nanuhaytuhay nga mga introduksion. Madamo gid ini amo nga indi ko ini magamit tanan sa bug-os ko nga kabuhi.”​​—⁠Paul, 79 anyos; nabawtismuhan 1940.

“Wala ako nagakasaklaw sa negatibo nga mga reaksion. Ginatinguhaan ko nga mangin mainabyanon sa pagpalapit sa mga tawo, nagapakighambal sa ila kag nagapamati sa ila pagtamod.”​​—⁠Daniel, 75 anyos; nabawtismuhan sang 1946.

“Nakilala ko ang mga bag-o nabawtismuhan nga nagasiling sa akon nga ang akon pagbantala nakabulig gid nga nangin Saksi sila. Lipod sa akon, may isa nga nagtuon sing Biblia sa ila sang ulihi kag nagbulig sa ila agod mag-uswag. Nalipay gid ako sa paghibalo nga ang aton ministeryo isa ka pagbuligay.”​​—⁠Joan, 66 anyos; nabawtismuhan sang 1954.

Ano ang nagabulig sa imo nga ‘makapamunga nga may pagbatas’?​​—⁠Lucas 8:⁠15.

 [Mga retrato sa pahina 20]

Paagi sa pagpadayag sing mga bunga sang espiritu kag sa pagbantala sing mensahe sang Ginharian, nagapamunga kita sing madamo

[Retrato sa pahina 23]

Ano ang buot silingon ni Jesus sang ginsilingan niya ang iya mga apostoles: ‘Padayon nga magpamunga sing madamo’?