Ano ang Kahulugan sa Imo sang Panihapon sang Ginuo?

“Ang bisan sin-o nga magkaon sang tinapay ukon mag-inom sa kopa sang Ginuo nga indi takus, makasala may kaangtanan sa lawas kag sa dugo sang Ginuo.”​​—⁠1 CORINTO 11:27.

1. Ano ang labing importante nga okasyon para sa tuig 2003, kag paano ini nagsugod?

ANG labing importante nga okasyon para sa tuig 2003 mahanabo pagtunod sang adlaw sa Abril 16. Sa sini nga tion, magatipon ang mga Saksi ni Jehova agod saulugon ang Memoryal sang kamatayon ni Jesucristo. Subong ginpakita sa nagligad nga artikulo, ginpasad ni Jesus ini nga pagsaulog, nga gintawag man Panihapon sang Ginuo, sa tapos sia kag ang iya mga apostoles nagsaulog sang Paskuwa sang Nisan 14, 33 C.⁠E. Ang mga emblema sa Memoryal nga tinapay nga walay lebadura kag mapula nga alak nagasimbulo sa walay sala nga lawas ni Cristo kag sa iya ginpaagay nga dugo​​—⁠ang lamang nga halad nga makatubos sa katawhan gikan sa napanubli nga sala kag kamatayon.​​—⁠Roma 5:​12; 6:⁠23.

2. Ano nga paandam ang narekord sa 1 Corinto 11:27?

² Dapat mangin takus ang mga magaambit sa mga emblema sang Memoryal. Maathag nga ginpakita ini ni apostol Pablo sang magsulat sia sa mga Cristiano sa dumaan nga Corinto, diin ang Panihapon sang Ginuo indi nagakaigo nga ginasaulog. (1 Corinto 11:20-​22) Si Pablo nagsulat: “Ang bisan sin-⁠o nga magkaon sang tinapay ukon mag-inom sa kopa sang Ginuo nga indi takus, makasala may kaangtanan sa lawas kag sa dugo sang Ginuo.” (1 Corinto 11:27) Ano ang kahulugan sining mga pulong?

Ang Iban Indi Takus nga Nagsaulog Sini

3. Ano ang ginhimo sang madamo nga mga Cristiano sa Corinto sang ginsaulog ang Panihapon sang Ginuo?

³ Madamo nga mga Cristiano sa Corinto ang indi takus nga nag-ambit sa Memoryal. May mga pagbinahinbahin sa tunga nila, kag sa sulod sang isa ka tion, ang iban nagadala sang ila palanyapunon kag nagakaon sini antes ukon sa tion sang miting, masami nga nagapasobra sa pagkaon kag pag-inom. Indi sila alerto sa mental ukon sa espirituwal. Bangod sini, ‘nakasala sila may kaangtanan sa lawas kag sa dugo sang Ginuo.’ Ang mga wala makapanihapon gingutom kag indi mapahamtang. Huo, madamo ang nag-ambit nga  wala sing pagtahod kag bug-os nga paghantop sa pagkaserioso sang okasyon. Indi katingalahan nga ginpakamalaut sila!​​—⁠1 Corinto 11:27-​34.

4, 5. Ngaa dapat usisaon sang mga nagaambit sa mga emblema sa Memoryal ang ila kaugalingon?

⁴ Samtang nagahilapit ang Memoryal kada tuig, dapat usisaon sang mga nagaambit sa mga emblema ang ila kaugalingon. Agod makaambit sa sining ginasaluhan nga pagkaon sing nagakaigo, dapat sila mangin mapagros sa espirituwal. Ang bisan sin-⁠o nga nagapakita sing di-pagtahod, ukon pagtamay pa gani, sa halad ni Jesus yara sa katalagman nga ‘utdon gikan sa katawhan sang Dios,’ subong sang ginahimo anay sa isa ka Israelinhon nga nag-ambit sa ginasaluhan nga pagkaon nga yara sa isa ka di-matinlo nga kahimtangan.​​—⁠Levitico 7:​20; Hebreo 10:28-​31.

⁵ Ginpaanggid ni Pablo ang Memoryal sa ginasaluhan nga pagkaon sa dumaan nga Israel. Ginpatuhuyan niya ang mga nagaambit upod kay Cristo kag nagsiling: “Indi kamo makainom sa kopa ni Jehova kag sa kopa sang mga demonyo; indi kamo makaambit sa ‘latok ni Jehova’ kag sa latok sang mga demonyo.” (1 Corinto 10:16-21) Kon ang isa nga nagaambit sa mga emblema sang Memoryal makahimo sing isa ka mabug-at nga sala, dapat sia magtu-ad kay Jehova kag mangayo man sing espirituwal nga bulig gikan sa mga gulang sang kongregasyon. (Hulubaton 28:13; Santiago 5:​13-​16) Kon matuod gid nga naghinulsol sia kag ginapamatud-an  ini sang iya mga buhat, indi mangin di-takus ang iya pagpakig-ambit.​​—⁠Lucas 3:8.

Pagtambong Subong Matinahuron nga mga Manugpanilag

6. Para kay sin-o gintigana sang Dios ang pribilehiyo nga mag-ambit sa Panihapon sang Ginuo?

⁶ Dapat bala mag-ambit sa Panihapon sang Ginuo ang mga nagahimo karon sing maayo sa mga nagkalabilin sang 144,000 ka kauturan ni Cristo? (Mateo 25:31-​40; Bugna 14:⁠1) Indi. Gintigana sang Dios ini nga pribilehiyo para sa mga indibiduwal nga ginhaplasan niya sing balaan nga espiritu agod mangin “mga masigkamanunubli ni Cristo.” (Roma 8:​14-​18; 1 Juan 2:20) Ano, nian, ang posisyon sang mga nagalaum nga magkabuhi sing dayon sa isa ka bug-os kalibutan nga paraiso sa idalom sang paggahom sang Ginharian? (Lucas 23:43; Bugna 21:​3, 4) Sanglit indi sila mga masigkamanunubli ni Jesus nga may langitnon nga paglaum, nagatambong sila sa Memoryal subong matinahuron nga mga manugpanilag.​​—⁠Roma 6:​3-5.

7. Ngaa nahibaluan sang unang-siglo nga mga Cristiano nga dapat sila mag-ambit sa mga emblema sang Memoryal?

⁷ Ang matuod nga mga Cristiano sang nahauna nga siglo ginhaplasan sing balaan nga espiritu. Madamo sa ila ang nakagamit sang isa ukon kapin pa sang milagruso nga mga dulot sang espiritu, subong sang paghambal sing lainlain nga mga hambal. Busa, indi mabudlay para sa sini nga mga indibiduwal ang mahibaluan nga sila ginhaplasan sing espiritu kag dapat mag-ambit sa mga emblema sang Memoryal. Apang, sa aton tion karon, sarang ini mahibaluan pasad sa inspirado nga mga pulong subong sini: “Ang tanan nga ginatuytuyan sang espiritu sang Dios, ini ang mga anak sang Dios. Kay wala kamo makabaton sing espiritu sang kahiulipnan nga nagatuga liwat sing kahadlok, kundi nakabaton kamo sing espiritu sang pag-ayop subong mga anak, nga paagi sining espiritu nagatu-aw kita: ‘Abba, Amay!’”​—⁠Roma 8:​14, 15.

8. Sin-o ang ginalaragway sang “trigo” kag sang “mga gamhon” nga ginasambit sa Mateo kapitulo 13?

⁸ Sa sulod sang mga siglo, ang matuod nga mga hinaplas nagtubo subong “trigo” sa latagon sang “mga gamhon,” ukon di-matuod nga mga Cristiano. (Mateo 13:24-​30, 36-​43) Sugod sang katuigan 1870, amat-amat nga nangin bal-anon ang “trigo,” kag sang nagligad nga halos 100 ka tuig ang hinaplas nga Cristianong mga manugtatap ginsingganan: “Ang mga gulang . . . dapat magsugid sa ila nga nagtipon [sa Memoryal] sining mga kondisyon,​​—⁠(1) pagtuo sa dugo [ni Cristo]; kag (2) dedikasyon sa Ginuo kag pag-alagad sa iya, bisan tubtob sa kamatayon. Nian dapat nila agdahon ang tanan nga subong sini nga magbuylog sa pagsaulog sang kamatayon sang Ginuo.”​​—⁠Studies in the Scriptures, Series VI, The New Creation, pahina 473.⁠ *

Pagpangita sa “Iban nga mga Karnero”

9. Paano ginpaathag ang identidad sang “dakung kadam-an” sang 1935, kag paano ini nakaapektar sa pila nga nagaambit sa mga emblema sang Memoryal?

⁹ Sang ulihi, wala labot sa hinaplas nga mga sumulunod ni Cristo, ang organisasyon ni Jehova nagpatuhoy sing igtalupangod sa iban pa gid. Tuhoy sini, isa ka talalupangdon nga butang ang natabo sang tunga-tunga sang katuigan 1930. Antes sini, gintamod sang katawhan sang Dios ang “dakung kadam-an” sa Bugna 7:⁠9 subong segunda nga espirituwal nga klase nga mga kaupod sang 144,000 ka ginbanhaw nga hinaplas sa langit​​—⁠subong mga abay ukon mga kaupod sang nobya ni Cristo. (Salmo 45:​14, 15; Bugna 7:⁠4; 21:​2, 9) Apang sang Mayo 31, 1935, sa isa ka diskurso nga ginhatag sa isa ka kombension sang mga Saksi ni Jehova sa Washington, D.C., E.⁠U.⁠A., ginpaathag gikan sa Kasulatan nga ang “dakung kadam-an” (“dakung kadamuan,” King James Version) nagapatuhoy sa “iban nga mga karnero” nga nagakabuhi sa tion sang katapusan. (Juan 10:16) Pagkatapos sadto nga kombension, ang pila nga nagaambit anay sa mga emblema sang Memoryal nag-untat sa pagpakig-ambit bangod narealisar nila nga ang ila paglaum dutan-on gali, indi langitnon.

10. Paano mo ilaragway ang paglaum kag mga salabton sang “iban nga mga karnero” karon?

¹⁰ Ilabi na sugod sang 1935, ginpangita ang “iban nga mga karnero,” nga nagatuo sa gawad, nagdedikar sang ila kaugalingon sa Dios, kag nagasakdag sa hinaplas nga “diutay nga panong” sa pagbantala sang Ginharian. (Lucas 12:32) Ining iban nga mga karnero nagalaum nga mabuhi sa duta tubtob sa walay katubtuban, apang sa tanan nga iban pa nga mga bahin, kaanggid sila sa mga nagkalabilin sang mga manunubli sang Ginharian  karon. Kaangay sang dumuluong nga mga pumuluyo sa dumaan nga Israel nga nagsimba kay Jehova kag nagpasakop sa Kasuguan, ang iban nga mga karnero karon nagabaton sang Cristianong mga salabton, subong sang pagbantala sing maayong balita upod sa mga katapo sang espirituwal nga Israel. (Galacia 6:16) Apang, subong nga ang isa ka dumuluong nga pumuluyo sadto indi mahimo nga mangin hari ukon saserdote sang Israel, wala man sing bisan sin-⁠o sa iban nga mga karnero ang maggahom sa langitnon nga Ginharian ukon mag-alagad subong mga saserdote.​​—⁠Deuteronomio 17:15.

11. Ngaa ang petsa sang bawtismo sang isa mahimo nga may kaangtanan sa iya paglaum?

¹¹ Sang katuigan 1930, nangin maathag nga, sa kabilugan, napili na ang langitnon nga klase. Sa sulod sang mga dekada na karon, ang ginapangita amo ang iban nga mga karnero nga may dutan-on nga paglaum. Kon ang isa ka hinaplas mangin di-matutom, mahimo gid nga ang isa ka tawo nga madugay na nagaalagad sa Dios sing matutom subong isa sa iban nga mga karnero amo ang tawgon nga magabulos sa isa nga nataktak sa 144,000.

Kon Ngaa Nagsayop ang Iban

12. Sa idalom sang anong mga kahimtangan dapat mag-untat ang isa ka tawo sa pag-ambit sa mga emblema sang Memoryal, kag ngaa?

¹² Sigurado gid ang hinaplas nga mga Cristiano nga gintawag sila para sa langit. Apang ano kon ang pila ka indibiduwal nga wala gintawag nagaambit sa mga emblema sang Memoryal? Bangod narealisar na nila nga wala gali sila sing langitnon nga paglaum, pat-od gid nga pahulagon sila sang ila konsiensia nga mag-untat sa pag-ambit. Indi mahamuot ang Dios sa bisan sin-⁠o nga nagalaragway sang iya kaugalingon subong isa nga gintawag agod mangin isa ka langitnon nga hari kag saserdote kon nahibaluan na niya nga wala sia gintawag para sa langit. (Roma 9:​16; Bugna 20:⁠6) Ginpatay ni Jehova ang Levinhon nga si Kora bangod makahason nga ginhingamo niya ang Aaroniko nga pagkasaserdote. (Exodo 28:⁠1; Numeros 16:​4-​11, 31-​35) Kon marealisar sang isa ka Cristiano nga nagsayop sia sa pag-ambit sa mga emblema sang Memoryal, dapat sia mag-untat sa pag-ambit kag mapainubuson nga mangamuyo kay Jehova agod mangayo sing patawad.​​—⁠Salmo 19:13.

13, 14. Ngaa ang iban sayop nga nagahunahuna nga gintawag sila para sa langit?

¹³ Ngaa mahimo magsayop ang iban sa paghunahuna nga gintawag sila para sa langit? Bangod sang kamatayon sang tiayon ukon sang iban pa nga trahedya, mahimo nga madula ang ila interes sa kabuhi sa duta. Ukon mahimo nga handumon man nila ang langitnon nga paglaum sang ila suod nga abyan nga nagapangangkon nga isa ka hinaplas nga Cristiano. Sa pagkamatuod, wala ginsugo sang Dios ang bisan sin-⁠o nga mangrekrut para sa sining pribilehiyo. Kag wala sia nagatangdo sing mga manunubli sa Ginharian paagi sa pagpabati sa ila sing tingog nga ginpili sila.

¹⁴ Ang butig nga relihiosong ideya nga ang tanan nga maayo nga mga tawo nagapalangit mahimo magdul-ong sa iban sa paghunahuna nga sila gintawag para sa langit. Gani, dapat kita maghalong nga indi kita maimpluwensiahan sang aton sayop nga mga pagtamod sang una ukon sang iban pa nga mga butang. Halimbawa, mahimo pamangkuton sang iban ang ila kaugalingon: ‘Nagagamit bala ako sing bulong nga nagaapektar sang akon emosyon? May huyog bala ako nga mangin tuman ka emosyonal nga mahimo masal-an ko?’

15, 16. Ngaa ang pila sayop nga nagahinakop nga mga hinaplas sila?

¹⁵ Mahimo pamangkuton sang pila ang ila kaugalingon: ‘Luyag ko bala mangin prominente? Ambisyuso bala ako nga makatigayon sing awtoridad karon ukon mangin kaupod nga manunubli ni Cristo sa palaabuton?’ Sang gintawag ang mga manunubli sang Ginharian sang nahauna nga siglo, indi tanan sa ila nag-uyat sing responsable nga mga posisyon sa kongregasyon. Isa pa, ang mga indibiduwal nga gintawag para sa langit wala nagahingamo nga mangin prominente ukon nagapahambog nga hinaplas sila. Nagapakita sila sing pagkamapainubuson nga amo ang ginapaabot sa mga may “hunahuna ni Cristo.”​​—⁠1 Corinto 2:⁠16.

¹⁶ Ang iban mahimo maghinakop nga gintawag sila para sa langit bangod madamo sila sing nahibaluan sa Biblia. Apang ang paghaplas sing balaan nga espiritu sa isa wala nagakahulugan nga may yara sia tumalagsahon nga paghangop, kay ginkinahanglan pa nga tudluan kag laygayan ni Pablo ang pila ka hinaplas sadto anay. (1 Corinto 3:​1-3;  Hebreo 5:​11-​14) May kahimusan ang Dios para sa espirituwal nga pagkaon sang iya tanan nga katawhan. (Mateo 24:45-​47) Gani indi dapat maghunahuna ang bisan sin-⁠o nga ang iya pagkahinaplas nga Cristiano nagahatag sa iya sing kaalam nga labaw sa kaalam sang mga may dutan-on nga paglaum. Indi ang kalantip sa pagsabat sa Makasulatanhon nga mga pamangkot, sa pagpanaksi, ukon sa paghatag sing pasad-sa-Biblia nga mga pamulongpulong ang palatandaan nga ang isa hinaplasan sing balaan nga espiritu. Hanas man sa sini nga bahin ang mga Cristiano nga may dutan-on nga paglaum.

17. Sa ano kag kay sin-o nasandig ang pagkahinaplas?

¹⁷ Kon mamangkot ang isa ka masigkatumuluo tuhoy sa langitnon nga pagtawag, mahimo ini hambalan upod sa iya sang isa ka gulang ukon sang isa pa ka hamtong nga Cristiano. Apang, indi ini madesisyunan sang iban nga tawo. Ang isa ka tawo nga matuod gid nga gintawag para sa langit indi na kinahanglan nga mamangkot pa sa iban kon may subong sia sini nga paglaum. Ang mga hinaplas ‘ginhatagan sing bag-⁠o nga pagkabun-ag, indi paagi sa madinulunton, kundi sa di-madinulunton nga binhi sa pagmuad, paagi sa pulong sang buhi kag mapinadayunon nga Dios.’ (1 Pedro 1:23) Paagi sa iya espiritu kag Pulong, ginatanom sang Dios ang “binhi” nga nagahimo sa isa ka indibiduwal nga isa ka ‘bag-⁠o nga tinuga,’ nga may langitnon nga paglaum. (2 Corinto 5:17) Kag si Jehova ang nagapili. Ang pagkahinaplas ‘wala nasandig sa isa nga nagahandum ukon sa isa nga nagadalagan, kundi sa Dios.’ (Roma 9:16) Gani paano mapat-od sang isa ka tawo nga gintawag sia para sa langit?

Kon Ngaa Sigurado Sila

18. Paano ang espiritu sang Dios nagasaksi sa espiritu sang mga hinaplas?

¹⁸ Ang pagsaksi sang espiritu sang Dios nagakumbinsi sa hinaplas nga mga Cristiano nga gintawag sila para sa langit. “Nakabaton kamo sang espiritu sang pag-ayop subong mga anak,” sulat ni Pablo, “nga paagi sining espiritu nagatu-aw kita: ‘Abba, Amay!’ Ang espiritu mismo nagasaksi upod sa aton espiritu nga kita mga anak sang Dios. Nian, kon kita mga anak, kita mga manunubli man: mga manunubli gid sang Dios, apang mga masigkamanunubli ni Cristo, kon nagaantos kita kaupod niya agod nga pagahimayaon man kita kaupod niya.” (Roma 8:​15-​17) Sa idalom sang impluwensia sang balaan nga espiritu, ang espiritu, ukon nagapangibabaw nga panimuot sang mga hinaplas nagapahulag sa ila nga iaplikar sa ila kaugalingon ang ginasiling sang Kasulatan tuhoy sa espirituwal nga mga anak ni Jehova. (1 Juan 3:2) Ginapabatyag sila sang espiritu sang Dios nga sila  mga anak niya kag nga may tumalagsahon sila nga paglaum. (Galacia 4:​6, 7) Huo, matahom gid ang walay katapusan nga kabuhi sa duta subong himpit nga mga tawo nga ginapalibutan sang imo mga kapamilya kag mga abyan, apang indi amo sini ang ila hinatag-sang-Dios nga paglaum. Paagi sa iya espiritu, ginpalambo sang Dios sa ila ang isa ka mabaskog gid nga paglaum para sa langit amo kon ngaa handa sila nga isakripisyo ang tanan nila nga hinigugma kag paglaum sa duta.​​—⁠2 Corinto 5:​1-5, 8; 2 Pedro 1:​13, 14.

19. Ano nga papel ang ginatungdan sang bag-ong katipan sa kabuhi sang isa ka hinaplas nga Cristiano?

¹⁹ Napat-od sang hinaplas nga mga Cristiano ang ila langitnon nga paglaum, ang pagpasulod sa ila sa bag-ong katipan. Ginsambit ini ni Jesus sang ginpasad niya ang Memoryal kag nagsiling: “Ining kopa nagakahulugan sang bag-ong katipan tungod sa akon dugo, nga iula tungod sa inyo.” (Lucas 22:20) Ang mga umalambit sa bag-ong katipan amo ang Dios kag ang mga hinaplas. (Jeremias 31:31-​34; Hebreo 12:22-​24) Si Jesus amo ang manugpatunga. Paagi sa epekto sang ginpaagay nga dugo ni Cristo, nagkuha ang bag-ong katipan indi lamang gikan sa mga Judiyo kundi gikan man sa mga pungsod sing isa ka katawhan para sa ngalan ni Jehova kag ginhimo sila nga bahin sang “binhi” ni Abraham. (Galacia 3:​26-​29; Binuhatan 15:14) Bangod sining “walay katapusan nga katipan,” ang tanan nga espirituwal nga mga Israelinhon banhawon padulong sa di-mamalatyon nga kabuhi sa langit.​​—⁠Hebreo 13:20.

20. Sa ano nga pagpakigkatipan kay Cristo ginpasulod ang mga hinaplas?

²⁰ Sigurado ang mga hinaplas sa ila paglaum. Ginpasulod sila sa isa pa ka katipan, ang katipan para sa Ginharian. Tuhoy sa ila pagpakig-ambit kay Cristo, si Jesus nagsiling: “Gin-unungan ninyo ako sa akon mga pagtilaw; kag nagapakigkatipan ako sa inyo, subong nga ang akon Amay nagpakigkatipan sa akon, para sa isa ka ginharian.” (Lucas 22:28-​30) Ining katipan sa ulot ni Cristo kag sang iya kaupod nga mga hari magapadayon tubtob sa walay katubtuban.​​—⁠Bugna 22:5.

Ang Panahon sang Memoryal—⁠Isa ka Makalilipay nga Tion

21. Paano kita makabenepisyo sing daku sa panahon sang Memoryal?

²¹ Madamo ang mga pagpakamaayo sang panahon sang Memoryal. Makabenepisyo kita gikan sa balasahon nga bahin sang Biblia nga naiskedyul para sa sini nga panahon. Maayo man ini nga tion para sa pagpangamuyo, pagpamalandong sa kabuhi kag kamatayon ni Jesus sa duta, kag para sa pagpakigbahin sa pagbantala-sing-Ginharian nga hilikuton. (Salmo 77:12; Filipos 4:​6, 7) Ang pagsaulog mismo sa Memoryal nagapahanumdom sa aton sang gugma nga ginpakita sang Dios kag ni Cristo may kaangtanan sa halad nga gawad ni Jesus. (Mateo 20:28; Juan 3:16) Ini nga aman nagahatag sa aton sing paglaum kag paumpaw kag dapat magpalig-on sang aton determinasyon nga padayunon ang tulad-Cristo nga dalanon. (Exodo 34:⁠6; Hebreo 12:⁠3) Dapat man kita palig-unon sang Memoryal nga tumanon ang aton dedikasyon subong mga alagad sang Dios kag mangin matutom nga mga sumulunod sang iya pinalangga nga Anak.

22. Ano ang pinakadaku nga dulot sang Dios sa katawhan, kag ano ang isa ka paagi sa pagpakita sing apresasyon sa sini?

²² Maayo gid ang mga dulot nga ginahatag sa aton ni Jehova! (Santiago 1:17) Ginatuytuyan kita kag ginabuligan sang iya Pulong, sang iya balaan nga espiritu, kag may paglaum kita nga dayon nga kabuhi. Ang pinakadaku nga dulot sang Dios amo ang halad ni Jesus para sa mga sala sang mga hinaplas kag sang tanan nga iban pa nga nagatuo. (1 Juan 2:​1, 2) Gani paano mo ginapabaloran ang kamatayon ni Jesus? Lakip ka bala sa mga magapakita sing pasalamat sa sini paagi sa pagtipon pagtunod sang adlaw sa Abril 16, 2003, agod saulugon ang Panihapon sang Ginuo?

[Nota]

Ano ang Imo mga Sabat?

• Sin-o ang dapat makig-ambit sa mga emblema sang Memoryal?

• Ngaa nagatambong ang “iban nga mga karnero” sa Panihapon sang Ginuo subong matinahuron nga mga manugpanilag lamang?

• Paano mahibaluan sang hinaplas nga mga Cristiano nga dapat sila mag-ambit sa tinapay kag alak sa Memoryal sang kamatayon ni Cristo?

• Ang panahon sang Memoryal isa ka maayong tion para sa ano?

[Mga Pamangkot sa Pagtinuon]

[Graph/Retrato sa pahina 18]

(Para sa aktual nga pormat, tan-awa ang publikasyon)

Nagtambong sa Memoryal

MILYONES

15,597,746

15

14

13,147,201

13

12

11

10

 9

 8

 7

 6

 5

4,925,643

 4

 3

 2

 1

878,303

63,146

1935 1955 1975 1995 2002

[Retrato sa pahina 18]

Matambong ka bala sa Panihapon sang Ginuo karon nga tuig?

[Mga retrato sa pahina 21]

Ang panahon sang Memoryal isa ka maayong tion para sa dugang pa nga pagbasa sa Biblia kag pagpakigbahin sa pagbantala sing Ginharian nga hilikuton