“Nasapwan Ko ang Tanan nga Kinahanglan Ko”

ANG kapung-aw, suno sa report sang World Health Organization, ginabanabana karon nga nagaapektar sing kapin sa 120 milyones ka tawo sa bug-os nga kalibutan. Kada tuig, isa ka milyon ka tawo ang nagahikog kag mga 10 tubtob 20 milyones ang nagatinguha sa paghikog. Ano nga bulig ang matigayon para sa mga ginapung-awan? Mahimo mapahaganhagan sang medikal nga pagbulong ang kapung-aw, kag importante ang emosyonal nga suporta. Dugang pa, ang iban nga ginapung-awan nabuligan sing dugang sang praktikal nga pasad-sa-Biblia nga mga publikasyon sang mga Saksi ni Jehova, subong ginapakita sang masunod nga sulat halin sa Pransia.

“Kasan-o lang, nadulaan na ako sing gana nga mabuhi. Nangamuyo ako sa Dios nga mapatay na lang ako. Kay daw subong bala nga patay na ako. Nagapangita sing panuytoy, nangamuyo ako sing hanuot gid kay Jehova. Ginbasa ko man ang 2002 Yearbook of Jehovah’s Witnesses kag natapos ko ini sa sulod sang tatlo ka adlaw. Nagpalig-on gid ini sa akon kag nagpabakod sang akon pagtuo.

“Nagpanalawsaw ako sa Lalantawan kag Magmata! nga mga magasin, kag nakibot gid ako! Kapin na sa 15 ka tuig nga ginabasa ko sing regular ining mga magasin, apang wala ko gid marealisar kon daw ano ka makapalig-on kag makawiwili ang mga artikulo sini. Puno ini sang gugma​​—⁠isa ka kinaiya nga talagsahon na lang karon. Nasapwan ko ang tanan nga kinahanglan ko.”

Ang Biblia nagasiling: “Si Jehova malapit sa mga buong sing tagipusuon; kag ginaluwas niya ang mga nadugmok sa espiritu.” (Salmo 34:18) Wala sing duhaduha, ang tanan nga “buong sing tagipusuon” ukon “nadugmok sa espiritu” makasapo sing pagpalig-on kag paglaum para sa palaabuton sa Biblia. Ang mga Saksi ni Jehova nagapanagtag sing pasad-sa-Biblia nga mga literatura agod mabuligan ang mga nagakinahanglan nga makabenepisyo sa sining inspirado sang Dios nga tuburan sang paglipay.