Madula Gid Bala ang Kaimulon?

“YARI karon! ang mga luha sang mga ginapigos, apang wala sila sing manuglugpay; kag sa bahin sang ila mga manugpigos may gahom, amo nga wala sila sing manuglugpay,” siling sang maalamon nga si Hari Solomon sang dumaan nga Israel. (Manugwali 4:⁠1) Wala sing duhaduha, ang madamo sang iya ginpatuhuyan nga mga ginapigos mga imol man.

Ang kaimulon indi lamang mabulubanta paagi sa kuwarta. Suno sa impormasyon nga ginhatag sang World Bank sang Hunyo 2002, “ginbanabana nga sang 1998 ang nagasto sang 1.2 bilyones ka tawo sa bug-os kalibutan wala makalab-ot sa $1 kada adlaw . . . kag 2.8 bilyones ang nagkabuhi sa kubos sa $2 kada adlaw.” Natalupangdan nga bisan mas manubo ini nga numero sangsa nagligad nga mga pagbanabana, “tuman kataas ini gihapon kon tawhanon nga pag-antos bangod sa kaimulon ang pagahambalan.”

Madula gid bala ang kaimulon? Si Jesucristo nagsiling sa iya mga disipulo: “Ang mga kubos kaupod ninyo pirme.” (Juan 12:⁠8) Apang nagakahulugan bala ini nga ang kaimulon kag ang mapait nga mga resulta sini magapadayon tubtob sa walay katubtuban? Indi, kay bisan wala nangako si Jesus sa iya mga sumulunod nga magmanggaranon sila tanan, indi kita dapat maghinakop gikan sa iya mga tinaga nga wala na sing paglaum para sa imol.

Walay sapayan sang tawhanon nga mga panikasog kag sang kamatuoran nga pirme napaslawan ang mga saad nga dulaon ang kaimulon, ang Pulong sang Dios, ang Biblia, nagapasalig sa aton nga sa dili madugay wala na sing tawo nga imol. Sa pagkamatuod, si Jesus nagpahayag sing “maayong balita sa mga imol.” (Lucas 4:18) Ining maayong balita nagalakip sa saad nga dulaon na ang kaimulon. Matabo ini kon paluntaron sang Ginharian sang Dios ang matarong nga mga kahimtangan sa duta.

Mangin lain na gid ang kahimtangan sang kalibutan sa sina nga tion! Si Jesucristo, ang langitnon nga Hari, ‘maluoy sa kubos kag sa imol, kag luwason niya ang mga kalag sang mga imol.’ Matuod gid, “tubuson niya ang ila kalag gikan sa pagpigos kag kasingki.”​​—⁠Salmo 72:​13, 14.

Tuhoy sa sina nga tion, ang Miqueas 4:⁠4 nagasiling: “Magalingkod sila, ang tagsatagsa sa idalom sang iya puno sang ubas kag sa idalom sang iya kahoy nga higuera, kag wala sing magapakurog sa ila; kay ang baba mismo ni Jehova sang mga kasuldadusan ang nagpamulong sini.” Lubaron sang Ginharian sang Dios ang tanan nga problema sang katawhan, dulaon bisan pa ang balatian kag kamatayon. ‘Lamunon sang Dios ang kamatayon sing dayon, kag pat-od nga pahiran sang Soberanong Ginuong Jehova ang mga luha gikan sa tanan nga nawong.’​​—⁠Isaias 25:8.

Makasalig ka sa sining mga saad bangod inspirado ini mismo sang Dios. Ngaa indi usisaon ang mga ebidensia nga nagapamatuod sang pagkamasaligan sang mga tagna sang Biblia?

[Credit Line sang retrato sa pahina 32]

FAO photo/M. Marzot