Tinguhai nga Tamdon ang Iban Subong sang Pagtamod ni Jehova sa Ila

“Ang Dios nagatan-aw indi subong sang pagtan-aw sang tawo.”​—⁠1 SAMUEL 16:7.

1, 2. Paano ang pagtamod ni Jehova kay Eliab tuhay sa pagtamod ni Samuel, kag ano ang matun-an naton gikan sa sini?

SANG ika-11 nga siglo B.⁠C.⁠E., ginpadala ni Jehova si manalagna Samuel sa isa ka sekreto nga misyon. Ginsugo niya ang manalagna nga magkadto sa balay ni Jesse kag haplasan ang isa sa mga anak nga lalaki ni Jesse agod mangin palaabuton nga hari sang Israel. Sang nakita ni Samuel ang subang ni Jesse, nga si Eliab, napat-od niya nga nakita na niya ang isa nga ginpili sang Dios. Apang nagsiling si Jehova: “Indi ka magtulok sa iya panagway kag sa iya kataason, bangod ginsikway ko sia. Kay ang Dios nagatan-aw indi subong sang pagtan-aw sang tawo, bangod ang tawo nagatulok sa kon ano ang makita sang mga mata; apang tuhoy kay Jehova, nagatulok sia sa tagipusuon.” (1 Samuel 16:​6, 7) Wala gintan-aw ni Samuel si Eliab subong sang pagtan-aw ni Jehova sa iya.⁠ *

² Mahapos lang magsayop ang mga tawo sa ila pagtamod sa iban! Sa isa ka bahin, mahimo kita madaya sang mga indibiduwal nga maayo tulukon sa guwa apang sa sulod wala gali sing moral nga mga prinsipio. Sa pihak nga bahin, mahimo nga indi naton nagustuhan kag indi kita mainabyanon sa sinsero nga mga indibiduwal nga ang personalidad nagapaugot sa aton.

3, 4. (a) Kon may problema nga mag-utwas sa ulot sang duha ka Cristiano, ano dapat ang determinado nga himuon sang tagsatagsa? (b) Ano ang dapat naton ipamangkot sa aton kaugalingon kon may serioso nga di-paghangpanay kita sa isa ka masigkatumuluo?

³ Mahimo mag-utwas ang mga problema kon maabtik kita sa paghusgar sa iban​​—⁠bisan sa mga madugay na naton nga kilala. Ayhan nagbaisay kamo sang isa ka Cristiano nga suod mo nga abyan anay. Luyag mo bala nga magbalik ang inyo pag-abyanay? Ano ang makabulig sa imo sa paghimo sini?

⁴ Ngaa indi mo pagtan-awon sing maayo kag sing positibo ang imo Cristianong utod? Kag himua ini nga ginabinagbinag ang pinamulong ni Jesus: “Wala sing tawo nga makakari sa akon luwas kon buyukon sia sang Amay, nga nagpadala sa akon.” (Juan 6:44) Dayon pamangkuta ang imo kaugalingon: ‘Ngaa ginbuyok ni Jehova ini nga tawo sa Iya Anak? Ano ang kalahamut-an nga mga kinaiya sini nga indibiduwal? Ginapalampas ko bala ukon ginapakadiutay ini nga mga kinaiya? Ngaa nangin mag-abyan kami sang primero? Ano ang nagbuyok sa akon sa sini nga tawo?’ Sa umpisa, mahimo mabudlayan ka sa paghunahuna sing maayo nga mga kinaiya, ilabi na kon may hinakit  ikaw. Apang, importante ini nga tikang sa pagpasag-uli sang inyo pag-abyanay. Sa pag-ilustrar kon paano ini himuon, tan-awon naton ang positibo nga mga kinaiya sang duha ka lalaki nga ginatamod kon kaisa sing negatibo. Sila amo sanday manalagna Jonas kag apostol Pedro.

Ang Tampad nga Pagtamod kay Jonas

5. Ano ang ginsugo kay Jonas, kag ano ang iya ginhimo?

⁵ Si Jonas isa ka manalagna sa naaminhan nga ginharian sang Israel sang panahon ni Hari Jeroboam II, nga anak ni Jehoas. (2 Hari 14:23-​25) Isa ka adlaw, ginsugo ni Jehova si Jonas nga magbiya sa Israel kag magkadto sa Ninive, ang kapital sang gamhanan nga Emperyo sang Asiria. Ang iya hilikuton? Amo ang pagpaandam sa mga pumuluyo sini nga ang ila daku nga siudad pagalaglagon. (Jonas 1:​1, 2) Sa baylo nga sundon ang sugo sang Dios, nagpalagyo si Jonas! Nagsakay sia sa isa ka sakayan padulong sa Tarsis, nga malayo sa Ninive.​—⁠Jonas 1:3.

6. Ngaa ginpili ni Jehova si Jonas nga magkadto sa Ninive?

⁶ Ano ang imo mapensaran kon ginahunahuna mo si Jonas? Ginatamod mo bala sia nga isa ka di-matinumanon nga manalagna? Bangod sang hapaw nga pagtan-aw sa iya mahimo nga tamdon sia sing subong sini. Apang gintangdo bala sang Dios si Jonas subong manalagna bangod di-matinumanon sia? Siempre indi! Mahimo nga may pila ka kalahamut-an nga mga kinaiya si Jonas. Binagbinaga ang iya rekord subong manalagna.

7. Ano ang kahimtangan sang nagaalagad si Jonas kay Jehova sa Israel, kag ano ang epekto sang paghibalo sini sa imo pagtamod sa iya?

⁷ Sa pagkamatuod, matutom nga nagpangabudlay si Jonas sa Israel, nga isa gid ka di-mabinatunon nga teritoryo. Ginlaragway ni propeta Amos, nga halos kadungan ni Jonas, ang mga Israelinhon sadto nga panahon subong materyalistiko kag mahuyugon sa kinalipay.⁠ * Nagakatabo ang malaut nga mga butang sa pungsod, apang daw sa wala lang ini sa mga Israelinhon. (Amos 3:​13-​15; 4:⁠4; 6:​4-6)  Sa gihapon, padayon kag matutom nga gintuman ni Jonas ang iya komisyon sa pagbantala sa ila. Kon ikaw isa ka manugbantala sing maayong balita, nahibaluan mo kon daw ano kabudlay ang pagpakighambal sa mga tawo nga kontento na sa kaugalingon kag wala nagasapak. Gani, nian, samtang nakita naton ang mga kaluyahon ni Jonas, indi naton pagkalimtan ang mga kinaiya niya nga katutom kag pagbatas samtang nagbantala sia sa di-matinuuhon nga mga Israelinhon.

8. Ano nga mga kabudlayan ang nagahulat sa isa ka Israelinhon nga manalagna sa Ninive?

⁸ Ang asaynment nga magkadto sa Ninive nagdalahig sing mas mabudlay pa nga hilikuton. Agod makalab-ot sa amo nga siudad, dapat manglakaton si Jonas sing mga 800 kilometros​—⁠isa ka mabudlay nga paglakbay nga nagalawig sing mga isa ka bulan. Kon didto na, dapat magbantala ang manalagna sa mga Asirianhon, nga bantog sa ila kapintas. Ang ila pagpakig-away nagalakip pirme sing mapintas nga pagpaantos. Ginpabugal pa gani nila ang ila kapintas. Indi katingalahan nga ang Ninive gintawag nga “siudad nga nagapatulo sing dugo”!​—⁠Nahum 3:​1, 7.

9. Sang yara sa katalagman ang mga marinero bangod sang mabaskog nga unos, ano nga mga kinaiya ang ginpakita ni Jonas?

⁹ Bangod nagpangalag-ag sa pagtuman sa sugo ni Jehova, nagsakay si Jonas sa isa ka sakayan nga nagdala sa iya palayo sa iya asaynment. Apang, wala nadula ang pagsalig ni Jehova sa iya manalagna ukon ginbuslan sia sing iban. Sa baylo, nanghikot si Jehova agod makita ni Jonas ang pagkaimportante sang iya hilikuton. Ginpahanabo sang Dios ang mabaskog nga unos sa dagat. Ginlinggilinggi sang mga balod ang sakayan nga ginsakyan ni Jonas. Buot na mapatay ang inosente nga mga tawo, bangod kay Jonas! (Jonas 1:⁠4) Ano ang reaksion ni Jonas? Bangod indi niya luyag nga mapatay ang mga marinero nga nagasakay sa sakayan tungod sa iya, ginsilingan sila ni Jonas: “Hakwata ninyo ako kag itagbong ako sa dagat, kag ang dagat maglinong sa inyo.” (Jonas 1:12) Wala sia sing rason nga maghunahuna nga sang gintagbong sia sang mga marinero, luwason sia ni Jehova gikan sa dagat. (Jonas 1:15) Apang, handa si Jonas nga mapatay agod indi maano ang mga marinero. Wala bala naton makita ang pagpadayag diri sang kaisog, pagkamapainubuson, kag gugma?

10. Ano ang natabo sang ginsugo liwat ni Jehova si Jonas?

¹⁰ Sang ulihi, ginluwas ni Jehova si Jonas. Indi na bala kalipikado si Jonas nga mag-alagad subong tiglawas sang Dios bangod sang iya bag-o lang ginhimo? Indi, maluluy-on kag mahigugmaon nga ginsugo liwat ni Jehova si Jonas nga magbantala sa mga taga-Ninive. Sang mag-abot si Jonas sa Ninive, maisog nga ginsilingan niya ang mga pumuluyo sini nga ang ila daku nga kalautan nakita sang Dios kag 40 pa ka adlaw kag ang ila siudad laglagon. (Jonas 1:⁠2; 3:⁠4) Sang mabatian ang talangkod nga mensahe ni Jonas, naghinulsol ang mga taga-Ninive, kag wala ginlaglag ang ila siudad.

11. Ano ang nagapakita nga si Jonas nakatuon sing importante nga leksion?

¹¹ Wala gihapon sing husto nga pagtamod si Jonas. Apang, paagi sa isa ka praktikal nga halimbawa, mapailubon nga ginbuligan ni Jehova si Jonas nga mahibaluan nga nagatulok Sia indi sa dagway lamang. Ginausisa niya ang tagipusuon. (Jonas 4:​5-​11) Makita sa tampad nga kasaysayan nga ginrekord mismo ni Jonas nga nakatuon sia sing importante nga leksion. Ang kahanda niya sa pagsulat sang iya mga kakulangan sa makahuluya nga mga detalye dugang pa nga nagapamatuod sang iya pagkamapainubuson. Nagakinahanglan sing kaisog ang pagbaton sing sayop!

12. (a) Paano naton mahibaluan nga si Jesus may pareho kay Jehova nga pagtamod sa mga tawo? (b) Ginapalig-on kita nga huptan ang ano nga pagtamod sa mga tawo nga aton ginabantalaan sing maayong balita? (Tan-awa ang kahon sa pahina 18.)

¹² Siniglo sang ulihi, nagpamulong sing positibo si Jesucristo tuhoy sa isa ka hitabo sa kabuhi ni Jonas. Sia nagsiling: “Subong nga si Jonas yara sa tiyan sang daku nga isda sing tatlo ka adlaw kag tatlo ka gab-⁠i, subong man ang anak sang tawo mangin yara sa alibutod sang duta sing tatlo ka adlaw kag  tatlo ka gab-⁠i.” (Mateo 12:40) Kon mabanhaw na si Jonas, mahibaluan niya nga ginpaanggid ni Jesus ang tion nga yara Sia sa lulubngan sa sining di-aktibo nga tion sa kabuhi sang manalagna. Indi bala kita malipay sa pag-alagad sa isa ka Dios nga wala nagasikway sa iya mga alagad kon magsayop sila? Ang salmista nagsulat: “Subong sang amay nga nagakaluoy sa iya mga anak, si Jehova nagakaluoy sa mga nagakahadlok sa iya. Kay sia gid nakahibalo sang aton pagkahuman, nagadumdom nga kita yab-ok.” (Salmo 103:​13, 14) Sa pagkamatuod, ining “yab-ok”​​—⁠pati na ang di-himpit nga mga tawo karon⁠​—⁠makahimo sing daku paagi sa pagsakdag sang balaan nga espiritu sang Dios!

Ang Balanse nga Pagtamod kay Pedro

13. Ano nga mga kinaiya ni Pedro ang mahimo madumduman naton, apang ngaa ginpili sia ni Jesus nga mangin apostol?

¹³ Binagbinagon naton karon sing malip-ot ang ikaduha nga halimbawa, ang iya ni apostol Pedro. Kon ipalaragway sa imo si Pedro, hunahunaon mo bala gilayon ang mga kinaiya subong sang dasudaso ukon matinaastaason pa gani? May tion nga subong sini si Pedro. Apang, pilion bala ni Jesus si Pedro nga isa sang iya 12 ka apostoles kon dasudaso gid ukon matinaastaason si Pedro? (Lucas 6:​12-​14) Indi gid! Ginpalampas ni Jesus ini nga mga kaluyahon kag nakita niya ang positibo nga mga kinaiya ni Pedro.

14. (a) Ano ang mahimo nga rason sang daw pagkapalahambal ni Pedro? (b) Ngaa dapat kita magpasalamat nga masunson nga nagpamangkot si Pedro?

¹⁴ Kon kaisa si Pedro ang nangin humalambal para sa iban pa nga mga apostoles. Mahimo tamdon ini sang iban nga indi maugdang. Apang amo gid bala? Ang iban nagsiling nga si Pedro mahimo nga mas magulang sa iban pa nga mga apostoles​​—⁠ayhan magulang pa gani kay Jesus. Kon husto ini, nagabulig ini sa pagpaathag kon ngaa masunson nga si Pedro ang una nga nagahambal. (Mateo 16:22) Apang, may isa pa ka butang nga dapat binagbinagon. Si Pedro isa ka espirituwal nga tawo. Ang iya kauhaw sa ihibalo nagpahulag sa iya nga magpamangkot. Nakabenepisyo kita sa sini. Nakapamulong si Jesus sing hamili nga mga pulong bilang sabat sa mga pamangkot ni Pedro, kag gintipigan ini sa Biblia. Halimbawa, naghambal si Jesus tuhoy sa “matutom nga tulugyanan” bilang sabat sa pinamulong ni Pedro. (Lucas 12:41-​44) Kag hunahunaa ang ginpamangkot ni Pedro: “Ginbayaan namon ang tanan nga butang kag nagsunod sa imo; ano gid ang yara para sa amon?” Nagdul-ong ini sa makapalig-on nga saad ni Jesus: “Ang tagsatagsa nga nagbiya sing mga balay ukon mga utod nga lalaki ukon mga utod nga babayi ukon amay ukon iloy ukon mga anak ukon mga duta tungod sa akon ngalan magabaton sing mas madamo pa kag magapanubli sing kabuhi nga walay katapusan.”​—⁠Mateo 15:15; 18:​21, 22; 19:27-​29.

15. Ngaa masiling nga si Pedro mainunungon gid?

¹⁵ May isa pa ka maayo nga kinaiya si Pedro​—⁠mainunungon sia. Sang ang madamo nga mga disipulo nag-untat sa pagsunod kay Jesus bangod wala nila mahangpan ang isa sang iya mga panudlo, si Pedro ang naghambal para sa 12 ka apostoles kag nagsiling: “Ginuo, kay sin-o bala kami makadto? Ikaw may mga pulong sang kabuhi nga walay katapusan.” (Juan 6:66-68) Nagpahamuot gid yadto nga mga pulong kay Jesus! Sang ulihi, sang gindakop sang isa ka guban ang Agalon, ang kalabanan  sang iya mga apostoles nagpalagyo. Apang, nagsunod si Pedro sa kadam-an sa malayo kag nagsulod mismo sa luwang sang mataas nga saserdote. Ang kaisog, kag indi katalaw, ang nagdala sa iya didto. Sang ginapamangkot na si Jesus, nagbuylog si Pedro sa isa ka grupo sang mga Judiyo nga nagapainit-init sang ila kaugalingon sa masanag nga kalayo. Nakilala sia sang isa ka ulipon nga babayi sang mataas nga saserdote kag ginsumbong sia nga kaupod ni Jesus. Huo, ginpanghiwala ni Pedro ang iya Agalon, apang indi naton pagkalimtan nga ang pagkamainunungon kag kabalaka kay Jesus amo ang nagbutang kay Pedro sa sadtong makatalagam nga kahimtangan, isa nga ang kalabanan sang iya mga apostoles wala sing kaisog nga atubangon.​—⁠Juan 18:15-​27.

16. Ngaa ginabinagbinag naton ang positibo nga mga kinaiya nanday Jonas kag Pedro?

¹⁶ Ginlabawan sang maayo nga mga kinaiya ni Pedro ang iya mga kakulangan. Amo man kay Jonas. Subong nga natigayon naton ang mas positibo nga pagtamod kay Jonas kag kay Pedro sangsa kinaandan nga pagtamod naton, dapat man naton hanason ang aton kaugalingon nga mangin labi pa ka positibo sa aton pagtamod sa aton espirituwal nga mga kauturan karon. Ang paghimo sini magaresulta sa mas maayo nga kaangtanan sa ila. Ngaa kinahanglan gid ini?

Pag-aplikar sa Leksion Karon

17, 18. (a) Ngaa mahimo mag-utwas ang di-paghangpanay sa ulot sang mga Cristiano? (b) Ano nga mga laygay sa Biblia ang makabulig sa aton nga mahusay ang mga problema sa mga masigkatumuluo?

¹⁷ Ang mga lalaki, babayi, kag kabataan gikan sa tanan nga kahimtangan sang kabuhi kag tinun-an kag rasa nahiusa nga nagaalagad kay Jehova karon. (Bugna 7:​9, 10) Nagkalainlain gid nga personalidad ang makita naton sa Cristianong kongregasyon! Sanglit ginaalagad naton ang Dios sing ululupod, indi malikawan nga ang di-paghangpanay magautwas kon kaisa.​—⁠Roma 12:10; Filipos 2:3.

¹⁸ Bisan pa makita naton ang mga kakulangan sang aton mga kauturan, wala naton ginasentro ang aton igtalupangod sa sini. Ginatinguhaan naton nga ilugon si Jehova, nga tuhoy sa iya ang salmista nag-amba: “Kon ang mga sayop amo ang imo ginabantayan, O Jah, O Jehova, sin-o bala ang makatindog?” (Salmo 130:⁠3) Sa baylo nga talupangdon ang mga kinaiya nga mahimo magbahinbahin sa aton, “tinguhaon naton ang mga butang nga nagadala sing paghidait kag ang mga butang nga makapalig-on sa isa kag isa.” (Roma 14:19) Ginapanikasugan naton nga tamdon ang mga indibiduwal subong sang pagtamod ni Jehova sa ila, ginapalampas ang mga kaluyahon kag ginatalupangod ang maayo nga mga kinaiya. Kon himuon naton ini, nagabulig ini sa aton nga “magpinaumuray sa isa kag isa.”​—⁠Colosas 3:13.

19. Ibalay ang praktikal nga mga tikang nga dapat himuon sang isa ka Cristiano sa paghusay sa di-paghangpanay.

¹⁹ Kamusta naman kon mag-utwas ang di-paghangpanay nga padayon nga nagapaugot sa aton? (Salmo 4:⁠4) Natabo na bala ini sa ulot mo kag sang isa ka masigkatumuluo? Ngaa indi mo pagtinguhaan nga husayon ang problema? (Genesis 32:13-​15) Una, magpangamuyo kay Jehova, nga nagapangayo sang iya panuytoy. Nian, ginahunahuna ang maayo nga mga kinaiya sang isa, palapiti sia upod ang “kalulo nga iya sang kaalam.” (Santiago 3:13) Sugiri sia nga luyag mo makighidait sa iya. Dumduma ang inspirado nga laygay: “Magmadagmit sa pagpamati, magmahinay sa paghambal, magmakuli sa pagpangakig.” (Santiago 1:19) Ang laygay nga “magmakuli sa pagpangakig” nagapahangop nga ang isa ayhan makahimo ukon makahambal sing isa ka butang nga makapaakig sa imo. Kon matabo ini, mangayo sing bulig kay Jehova agod mapunggan ang kaugalingon. (Galacia 5:​22, 23) Tuguti ang imo utod nga magpautwas sang iya hinakit, kag magpamati sing maayo. Indi magsamulak sa iya, bisan pa indi ka ugyon sa iya  ginasiling. Mahimo nga sayop ang iya pagtamod, apang pagtamod niya ini. Tinguhai nga tan-awon ang problema suno sa iya punto de vista. Mahimo ini maglakip sing pag-usisa sang imo kaugalingon suno sa pagtamod sang imo utod.​—⁠Hulubaton 18:17.

20. Kon ginahusay ang di-paghangpanay, ano pa nga mga tikang ang mahimo magresulta sa pag-uliay?

²⁰ Kon ikaw na ang maghambal, mangin mainayuhon. (Colosas 4:⁠6) Isugid sa imo utod kon ano ang naluyagan mo sa iya. Magpangayo sing pasaylo sa bisan ano nga nahimo mo nga gintunaan sang di-paghangpanay. Kon ang imo mapainubuson nga mga panikasog magresulta sa pag-uliay, magpasalamat kay Jehova. Kon indi, padayon nga magpangayo sing panuytoy kay Jehova samtang nagapangita ka sing dugang nga mga kahigayunan nga makighidait.​—⁠Roma 12:18.

21. Paano ini nga paghinun-anon nakabulig sa imo nga tamdon ang iban subong sang pagtamod ni Jehova sa ila?

²¹ Ginahigugma ni Jehova ang tanan niya nga mga alagad. Nahamuot sia sa paggamit sa aton tanan sa pag-alagad sa iya walay sapayan sang aton pagkadihimpit. Samtang ginatun-an naton sing dugang pa ang iya pagtamod sa iban, ang aton gugma sa aton mga kauturan magalambo. Kon ang aton gugma sa masigka-Cristiano nagbugnaw, mahimo ini mapalambo liwat. Magabaton kita sing madamo nga pagpakamaayo kon determinado kita nga manikasog sa pagpakita sing positibo nga pagtamod sa iban​—⁠huo, ang pagtamod sa iban subong sang pagtamod ni Jehova sa ila!

[Mga nota]

Paano Mo Sabton?

• Paano ginatamod ni Jehova ang mga kakulangan sang iya matutom nga mga alagad?

• Ano ang pila ka maayo nga mga kinaiya nanday Jonas kag Pedro?

• Ano nga pagtamod sa imo Cristianong mga kauturan ang determinado mo nga huptan?

[Mga Pamangkot sa Pagtinuon]

[Kahon sa pahina 18]

Hunahunaa Kon Paano Ginatamod sang Dios ang Iban

Samtang ginapamalandungan mo ang kasaysayan ni Jonas sa Biblia, kinahanglan mo bala nga bag-uhon ang imo pagtamod sa mga tawo nga regular mo nga ginabantalaan sing maayong balita? Mahimo nga daw kontento na sila sa kaugalingon kag wala nagasapak, subong sang mga Israelinhon, ukon mahimo nga nagapamatok sila sa mensahe sang Dios. Apang, paano sila ginatamod ni Jehova nga Dios? Bisan ang pila ka indibiduwal nga prominente sa sining sistema sang mga butang mahimo nga magpangita kay Jehova sa pila ka adlaw, subong nga ang hari sang Ninive naghinulsol bangod sang pagbantala ni Jonas.​—⁠Jonas 3:​6, 7.

[Retrato sa pahina 15]

Ginatamod mo bala ang iban subong sang pagtamod ni Jehova sa ila?

[Retrato sa pahina 16, 17]

Si Jesus may positibo nga butang nga masiling tuhoy sa eksperiensia ni Jonas