Ang Katapusan nga Panihapon—Ano Ini?

ANO ang ginahunahuna mo kon mabatian mo ang ekspresyon nga “katapusan nga panihapon”? Hunahunaon sang madamo nga tawo ang dalayawon gid nga ginpinta nga larawan sa Milan, Italya, sang pintor nga si Leonardo da Vinci (1452-⁠1519). Sa katunayan ang Katapusan nga Panihapon nangin bantog gid nga tema para sa mga dibuhista, mga manunulat, kag mga musikero sa bug-os nga mga siglo.

Apang, ano ang Katapusan nga Panihapon, kag ano ang kahulugan sini para sa mga tawo nga nagakabuhi sa ika-21 nga siglo? Ang mga insiklopedia kag mga diksionaryo magasugid sa imo nga ang Katapusan nga Panihapon, nga ginatawag man nga Panihapon sang Ginuo, amo ang panihapon ni Jesucristo upod sa iya mga apostoles sang gab-i antes sang iya mahalaron nga kamatayon. Sanglit amo ini ang katapusan nga panihapon ni Jesus upod sa iya matutom nga mga sumulunod, naandan na ini tawgon nga Katapusan nga Panihapon. Kag sanglit ginpasad ini ni Ginuong Jesucristo mismo, ang pagtawag nga Panihapon sang Ginuo nagakaigo.

Sa sulod sang mga siglo, madamo ang nagsakripisyo sang ila kabuhi tungod sa ginakabig nila nga maayo gid nga kausa. Ang pila sini nga kamatayon naghatag sing benepisyo sa pila ka tawo sa sulod sang pila ka tion. Apang sa pagpaanggid, wala sa sadtong masinakripisyuhon nga mga kamatayon, ano man ini ka dalayawon, ang makatupong sa pagkaimportante sang kamatayon ni Jesucristo. Dugang pa, ayhan wala sing kamatayon sa magamo nga maragtas sang tawo ang may tuman ka lapnag nga epekto. Ngaa?

Agod masabat ini nga pamangkot kag buligan ka nga mahibaluan ang kahulugan sang Panihapon sang Ginuo para sa imo, ginaagda ka namon nga basahon ang masunod nga artikulo.