Mainit Ka nga Ginaagda

ANG Katapusan nga Panihapon, nga ginpasad ni Ginuong Jesucristo mga 2,000 ka tuig na ang nagligad, indi lamang isa ka maragtason nga okasyon. May daku gid ini nga epekto sa mga tawo kutob pa sang gin-umpisahan ini. Napahulag sang ila nabasahan sa rekord sang Ebanghelyo tuhoy sa natabo sadto nga gab-i, madamo ang nagpanikasog nga saulugon ang Panihapon sang Ginuo sa nanuhaytuhay nga mga paagi.

Ini tanan nga pagpabalor halangpunon, bangod ginsugo mismo ni Jesucristo ang iya mga sumulunod nga saulugon ini nga okasyon kag himuon nila ini sing tayuyon. Espesipiko nga ginsugo niya sila: “Padayon nga himuon ninyo ini bilang pagdumdom sa akon.”​​—⁠Lucas 22:19; 1 Corinto 11:23-25.

Apang, agod mangin makalilipay gid ini nga pagsaulog, ang isa dapat may sibu nga paghangop tuhoy sa kahulugan sini, nga masapwan sa Pulong sang Dios, ang Biblia. Dugang pa, importante gid nga mahibaluan kon ano ang ginasiling sang Biblia tuhoy sa kon san-o kag kon paano dapat saulugon ini nga okasyon.

Bilang pagtuman sa sugo ni Jesus, ang mga Saksi ni Jehova sa bug-os nga kalibutan magatipon sa gab-i sang Mierkoles, Abril 16, 2003, agod dumdumon ang kamatayon ni Jesus. Mangin isa ini ka okasyon para sa ila nga usisaon ang Kasulatan kag palig-unon liwat ang ila pagtuo kag gugma kay Ginuong Jesucristo, nga nagsiling: “Ginhigugma gid sang Dios ang kalibutan sa bagay nga ginhatag niya ang iya bugtong nga anak, agod nga ang bisan sin-o nga magtuo sa iya indi malaglag kundi may kabuhi nga wala sing katapusan.” (Juan 3:16) Mainit ka nga ginaagda nga magtipon upod sa ila sa amo nga gab-i agod mapalig-on mo man ang imo pagtuo kag gugma kay Jesucristo kag sa langitnon nga Amay, si Jehova nga Dios.