Ang Pagbantala nga Indi Gid Malipatan

“Nagatagiti ang init sang adlaw. Ang makitid nga dalan sa bukid daw wala sing katapusan. Pagkatapos malampuwasan ang madamo nga kabudlayan, nakalab-ot gid man kami sa amon padulungan: ang pinakamalayo nga baryo. Ang kakapoy naislan sing kalipay sang nanuktok kami kag gin-abiabi sa una nga balay. Sang matapos na ang adlaw, napahamtang namon ang tanan nga literatura nga amon dala kag nakasugod sing pila ka mga pagtuon sa Biblia. Nalangkag sa pagtuon ang mga tawo. Kinahanglan nga magpauli na kami, apang nangako kami nga mabalik.”

ORDINARYO lang ini nga mga eksperiensia sa isa ka grupo sang mga payunir sa Mexico. Determinado sila nga makigbahin sing makugi sa pagtuman sa komisyon nga ginhatag ni Jesucristo sa iya mga disipulo: “Mangin mga saksi ko kamo . . . tubtob sa ukbong sang duta.” (Binuhatan 1:8) Sa Mexico, ang pinasahi nga mga kampanya sa pagbantala​​—⁠nga gintawag mga ruta sang payunir​​—⁠ginaorganisar agod lab-uton ang mga teritoryo nga wala maasayn sa isa ka kongregasyon kag, bangod sini, indi regular nga madalhan sing maayong balita sang Ginharian sang Dios. Sa masami, naligwin ini ukon mabudlay kadtuan nga mga teritoryo. Ginabuligan man ang nabaw-ing nga mga kongregasyon nga may malapad nga teritoryo.

Agod mahibaluan kon ano nga mga lugar sa pungsod ang kobrehan sang mga ruta sang payunir, ginausisa sang sanga talatapan sang mga Saksi ni Jehova ang mga kinahanglanon sang teritoryo.⁠ * Pagkatapos sini, ginapadala ang mga grupo sang mga espesyal payunir agod tuptupan ang teritoryo. Ginahatagan sila sing salakyan nga makasarang sa batuhon, indi aspaltado ukon sementado nga mga dalan. Ang mga salakyan ginagamit man nga mga bulutangan sang literatura kag mga tululugan kon kinahanglanon.

Handa sa Pagsabat

Sugod sang Oktubre 1996, gin-agda ang iban pa nga mga manugbantala sing maayong balita nga makigbahin sa sini nga hilikuton, nga nagaupod sa mga espesyal payunir. Nag-upod sa nagkalainlain nga bahin sang kampanya ang mga manugbantala sang Ginharian subong man ang mga regular payunir nga handa sa pag-alagad diin may mas daku nga kinahanglanon. Ang iban ginaasayn sa mga kongregasyon nga sakop sang ruta agod atipanon ang teritoryo kag palambuon ang nasapwan nga interes. Madamo nga lamharon nga mga manugbantala kag mga payunir ang nagbaton sini nga mga imbitasyon kag nakaagom sing makapalig-on gid nga mga eksperiensia.

Halimbawa, si Abimael, isa ka lamharon nga Cristiano nga may maayo nga obra sa isa ka kompanya sang cell phone, nagdesisyon nga makigbahin sa pagbantala sa naligwin nga mga rehiyon. Sang mahibaluan sang iya mga ginaobrahan nga mahalin sia, gintanyagan sia sing mas mataas nga posisyon kag sweldo. Gin-ipit man sia sang iya mga kaupod sa trabaho, nga nag-insister nga tumalagsahon lang ini nga oportunidad kag buangbuang sia kon indi niya ini pagbatunon. Apang, determinado si Abimael nga suportahan ining espesyal nga kampanya sa pagbantala sa sulod sang tatlo ka bulan. Sa tapos maeksperiensiahan ini nga pag-alagad, nagdesisyon si Abimael nga magpabilin tubtob sa indi mapat-od nga tion sa isa ka nabaw-ing nga kongregasyon diin mas daku ang kinahanglanon para sa mga manugbantala sang Ginharian. May simple sia nga trabaho karon kag natun-an niya nga pasimplehon ang iya kabuhi.

Sa isa pa ka kahimtangan, kinahanglan ni Julissa nga magbiyahe paagi sa bus sing 22 ka oras  agod makakadto sa iya asaynment. Sa hingapusan nga bahin sang iya pagbiyahe, wala niya maabtan ang pinakaulihi nga bus sadto nga adlaw. Apang may pick-up nga trak nga nagasugat kag nagadul-ong sa mga trabahador. Ginpabakod ni Julissa ang iya buot kag nangabay sa ila nga pasakyon sia. Halangpunon nga ginkulbaan sia, bangod isa lang sia nga babayi sa tunga sang madamo nga mga lalaki. Sang gin-umpisahan niya nga bantalaan ang isa ka lamharon nga lalaki, narealisar niya nga isa sia sa mga Saksi ni Jehova! “Luwas pa sini,” hinumdom ni Julissa, “ang drayber sang trak isa gali ka gulang sa kongregasyon diin ako naasayn!”

Nagapakigbahin ang mga May Edad Na

Apang, ini nga hilikuton indi lamang para sa mga lamharon. Si Adela, isa ka may edad na nga utod, luyag gid maghinguyang sing mas madamo pa nga tion sa pag-alagad. Nag-abot ang oportunidad sang mabaton niya ang isa ka imbitasyon nga makigbahin sa sining pinasahi nga pagbantala nga hilikuton. Sugid niya: “Nagustuhan ko gid ang akon asaynment amo nga nangabay ako sa mga gulang nga tugutan ako nga magpabilin tubtob san-⁠o. Malipayon ako bangod bisan may edad na ako, mapuslanon gihapon ako kay Jehova.”

Subong man, bangod napahulag sang apresasyon kay Jehova kag gugma sa iya isigkatawo, ginhanda sang 60-anyos nga si Martha ang iya kaugalingon nga makigbahin sa kampanya. Bangod nakita niya nga ang kalayuon kag kabudlay sang dalan nagpugong sa iya grupo nga lab-uton ang tanan nga tawo, nagbakal sia sing salakyan agod gamiton sang mga payunir. Ang bulig sining utod nagpaposible nga makobrehan ang mas madamo pa nga teritoryo kag ipaambit ang kamatuoran sang Biblia sa mas madamo nga tawo.

Makalilipay nga Pagbaton

Ang tuyo sang mga nagapakigbahin sa sining pinasahi nga mga kampanya sa pagbantala amo ang “paghimo sing mga disipulo.” Maayo gid ang mga resulta sa sini nga bahin. Ang mga tawo nga nagapuyo sa naligwin nga mga duog nakabaton sing nagaluwas-kabuhi nga mga kamatuoran gikan sa Biblia. (Mateo 28:​19, 20) Madamo nga mga pagtuon sa Biblia ang nasugdan. Ginaatipan ini sang mga manugbantala nga nagapuyo malapit didto ukon sang mga ebanghelisador nga nagpabilin sa teritoryo. Sa pila ka kaso, naorganisar ang mga grupo sang mga manugbantala, kag natukod ang diutay nga mga kongregasyon sa iban.

Si Magdaleno kag ang iya mga kaupod nagsakay sa de-pasahero nga salakyan pakadto sa naligwin nga teritoryo diin sila naasayn. Samtang nagalakbay, ginpanginpuslan nila ang oportunidad agod makapanaksi sa drayber. “Ini nga tawo nagsugid sa amon nga sang nagligad nga semana, may pila ka mga Saksi nga nagkadto sa iya balay samtang wala sia. Sang nakapauli na sia, ginsaysay sa  iya sang iya pamilya ang ila nabatian. Ginsugiran namon sia nga wala kami naghalin sa kaiping lang nga mga lugar, kundi naghalin pa sa pila ka mga probinsia sa pungsod agod suportahan ining pinasahi nga kampanya sa pagbantala kag kami tanan ang nagbayad sang amon mga gasto. Bangod nahamuot sia sa ginsugid namon sa iya, nagsiling ang drayber nga umpisahan niya ang pagtuon sa Biblia upod sa iya pamilya sa sina mismo nga semana. Nag-amot pa gani sia sa hilikuton paagi sa paglibre sang amon plete.”

Nalipay man si Magdaleno sa pagbaton sang mga tumandok sa kabukiran sang Chiapas. “Napaambit namon sang akon asawa ang mensahe sang Ginharian sa grupo sang 26 ka pamatan-on nga nagatambong sa Presbyterian Church. Tanan sila nagpamati sing maayo sa sulod sang 30 minutos. Ginpaguwa nila ang ila mga Biblia, kag nakahatag kami sing tul-id nga pagpanaksi tuhoy sa mga katuyuan ni Jehova. Kalabanan sang mga tawo may kaugalingon nga Biblia sa Tzeltal nga lenguahe.” Madamo ang naumpisahan nga progresibo nga mga pagtuon sa Biblia.

Napahaganhagan nga Pagpamatok

Kapin sa duha ka tuig nga wala makabati sang mensahe sang Biblia ang isa ka komunidad sa Chiapas bangod sang pagpamatok sang pila ka tawo. Natalupangdan ni Teresa, isa ka bug-os tion nga ministro, nga nagapangalag-ag ang pila ka Saksi sa pagbantala sa amo nga lugar. “Sa kakibot sang tanan, namati ang mga tawo. Sang makatapos na kami sa pagbantala, nag-ulan sing mabaskog. Sa pagpangita sing mapasilungan, nakadtuan namon ang balay sang isa ka maabiabihon nga tawo nga nagahingalan kay Sebastián, nga nagpasugot nga magsulod kami kag magpanilong. Sang nakasulod na kami, ginpamangkot ko sia kon may nagduaw na sa iya. Sang magsabat sia nga wala, nagpanaksi ako sa iya kag gin-umpisahan ang pagtuon sa Biblia nga ginagamit ang libro nga Ang Ihibalo nga Nagadul-ong sa Kabuhi nga Walay Katapusan.⁠ * Sang makatapos na kami, nagaluhaluha nga nakiluoy si Sebastián sa amon nga magbalik agod tun-an sia.”

Ang isa pa ka grupo sang mga payunir nga nagduaw sa Chiapas nagasiling: “Bangod sa bulig ni Jehova, natigayon namon ang maayo nga mga resulta. Sa una nga semana, 27 ka pagtuon ang naumpisahan namon; sa ikaduha, gin-imbitahan namon ang mga tawo sa paglantaw sang aton video nga The Bible​​—⁠Its Power in Your Life. Kan-uman ang nagtambong. Naluyagan gid ini sang tanan. Sang matapos na, nagpanugyan kami nga umpisahan ang isa ka grupo nga pagtuon sa Biblia. Makapakibot nga duha ka grupo sang pagtuon ang natukod sa sini nga baryo.

“Sang matapos na namon makobrehan ang gin-asayn nga mga teritoryo, nagbalik kami sa baryo agod palig-unon ang mga interesado kag kamustahon ang gin-organisar nga mga grupo sa pagtuon sa Biblia. Gin-imbitahan namon sila sa miting publiko kag Pagtinuon sa Ang Lalantawan. Apang,  wala sing daku nga lugar agod hiwatan sang mga miting. Ang tawo nga nagtanyag sang iya puluy-an nga tipunan sang grupo nagtudlo sa likod sang iya balay kag nagsiling: ‘Puwede hiwaton ang mga miting sa likod sang balay.’”

Sadto nga talipuspusan sang semana mapagsik nga nagbinuligay ang nagduaw nga mga payunir kag ang mga interesado sa pagpreparar sang likod balay agod magamit ini sa mga miting. May 103 ka tawo nga nagtambong sa una nga miting. Karon 40 ka pagtuon sa Biblia ang ginahiwat sa amo nga baryo.

“Isa ka Matahom nga Eksperiensia”

Luwas sa maayo gid nga mga bunga sa pagbantala nga hilikuton, nakabenepisyo gid ang mga nakigbahin mismo sa sining pag-ebanghelyo nga hilikuton. Si María, isa ka lamharon nga payunir nga nakigbahin sa isa sining mga kampanya, nagapabutyag sang iya nabatyagan sing subong sini: “Isa ini ka matahom nga eksperiensia bangod sang duha ka rason. Nagdugang gid ang akon kalipay sa pagbantala nga hilikuton, kag nangin mas suod ang akon kaangtanan kay Jehova. Isa ka bes sang nagataklad kami sa isa ka bukid, ginlapyo gid kami. Pagkatapos mangayo sing bulig kay Jehova, nabatyagan namon ang ginasiling sang Isaias 40:29-​31: ‘Ang mga nagalaum kay Jehova maulian sing kusog.’ Gani nakalab-ot kami sa amon padulungan kag naghiwat sing mga pagtuon upod sa mga tawo nga mainit gid nga nagbaton sa amon.”

Ang isa pa ka lamharon nga payunir, ang 17-anyos nga si Claudia, nagasugid sa aton: “Nakabenepisyo gid ako sing daku. Nangin mas lantip ako sa ministeryo, nga nagpahalipay gid sa akon, amo kon ngaa nagpahamtang ako sing espirituwal nga mga tulumuron. Naghamtong man ako sa espirituwal. Sa amon balay, ang akon iloy ang nagahimo sang tanan para sa akon. Karon, nga mas eksperiensiado, nangin mas responsable ako. Halimbawa, sang una pislian ako sa pagkaon. Apang karon nga kinahanglan ko makigbagay sa tuhay nga mga kahimtangan, wala na ako nagareklamo sa pagkaon. Ining porma sang pag-alagad nagbulig sa akon nga mapalambo ang maayo gid nga mga pag-abyanay. Nagahatagay kami kag nagabuligay.”

Isa ka Malipayon nga Pagpangani

Ano ang mga resulta sining pinasahi nga pagpanikasog? Sang temprano nga bahin sang 2002, mga 28,300 ka payunir ang nakapakigbahin sa sining mga ruta sang payunir. Naghiwat sila sang kapin sa 140,000 ka pagtuon sa Biblia, nga naghinguyang sing kapin sa duha ka milyon ka oras sa pagbantala nga hilikuton. Agod buligan ang mga tawo nga matun-an ang kamatuoran sa Biblia, nagpahamtang sila sang halos 121,000 ka libro kag halos 730,000 ka magasin. Indi tumalagsahon nga ang pila ka payunir nagadumala sing 20 ukon kapin pa nga pagtuon sa Biblia.

Ang mga nakabaton sining kaayo mapinasalamaton gid sa pinasahi nga pagpaninguha nga ginhimo agod malab-ot sila sang mensahe sang Biblia. Bisan imol sila, madamo ang nagapamilit nga batunon sang mga manugbantala ang ila mga donasyon. Ang isa ka imol nga 70-anyos nga babayi pirme gid nga may ginahatag sa mga payunir nga nagabisita sa iya. Kon indi nila ini pagbatunon, nagahibi sia. Ang isa ka imol nga pamilya nagsiling sa bug-os tion nga mga ebanghelisador nga nangitlog gid ang munga para sa ila, kag ginpilit sila nga kuhaon ang mga itlog.

Sing mas importante, ining sinsero nga mga tawo nagapakita sing tunay nga apresasyon sa espirituwal nga mga butang. Halimbawa, ang isa ka dalaga nagalakat sing isahanon sa sulod sang tatlo ka oras kag tunga agod makatambong sa Cristianong mga miting, nga wala nagapalta sa bisan isa sini. Bisan masakit ang iya tuhod, ang isa ka tigulang nga interesado nga babayi nagalakbay sing duha ka oras agod makabaton sing mga instruksion gikan sa Biblia sa tion sang pagduaw sang nagalakbay nga manugtatap. Luyag sang pila nga indi makahibalo magbasa kag magsulat nga tun-an ini agod mas makabenepisyo sila gikan sa edukasyon sa Biblia. Ginpakamaayo gid ang ila mga pagpaninguha.

Sa tulun-an sang Binuhatan, ginlaragway ni Lucas ang isa ka palanan-awon nga nakita ni apostol Pablo: “Isa ka lalaki nga taga-Macedonia ang nagatindog kag nagapakitluoy sa iya kag nagasiling: ‘Tabok ka sa Macedonia kag tabangi kami.’” Kinabubut-on nga nagsunod si Pablo. Karon, didto sa naligwin nga mga lugar sa Mexico, madamo ang nagakadto nga may amo man nga panimuot, nga nagahimo sang ila kaugalingon nga handa sa pagpahayag sing maayong balita “tubtob sa ukbong sang duta.”​​—⁠Binuhatan 1:⁠8; 16:​9, 10.

[Mga nota]

[Retrato sa pahina 9]

Madamo nga mga Saksi sa Mexico ang nakigbahin sa pinasahi nga mga kampanya sang pagbantala