Madumduman Mo Bala?

Nalipay ka bala sa pagbasa sa ulihi nga mga guwa sang Ang Lalantawan? Ti, tilawi kon masabat mo ang masunod nga mga pamangkot:

• Paano kita makabenepisyo gikan sa pagtuon tuhoy sa pamilya ni Safan?

Si Safan isa anay ka manugkopya kag sekretaryo ni Hari Josias sang Juda. Subong isa ka impluwensiado nga tawo sa ginharian, ginsuportahan ni Safan ang kampanya sang hari nga ipasag-uli ang matuod nga pagsimba. Ang duha ka anak nga lalaki ni Safan nagpabilin nga matutom kay manalagna Jeremias. Kag gingamit man sang iya isa pa ka anak nga lalaki kag duha ka apo nga lalaki ang ila impluwensia para sa matuod nga pagsimba. Dapat man naton gamiton ang aton manggad kag impluwensia agod sakdagon ang matuod nga pagsimba.​​—⁠12/15, pahina 19-​22.

• Paano nalandas ni Irene Hochstenbach ang daku nga kasablagan kag nakaalagad kay Jehova?

Sang pito ka tuig sia, nadula niya ang iya palamatin-an. Walay sapayan nga bungol, natun-an niya nga makigkomunikar sa iban kag sa karon nagaupod sia sa iya bana (isa ka nagalakbay nga manugtatap) samtang nagaduaw sa mga kongregasyon sa Netherlands.​—⁠1/1, pahina 23-6.

• Ano ang duha ka bag-o nga bulig sa pagtuon ang ginpaguwa sa “Makugi nga mga Manugbantala Sang Ginharian” nga Distrito nga mga Kombension?

Ang mga Cristiano sa bug-os nga kalibutan nalipay sa pagbaton sa libro nga Simbaha ang Lamang Matuod nga Dios, nga gindesinyo nga tun-an upod sa mga bag-uhan kon matapos na nila ang libro nga Ang Ihibalo nga Nagadul-ong sa Kabuhi nga Walay Katapusan; ang isa pa ka bag-o nga libro amo ang Mangin Suod kay Jehova, nga nagakonsentrar sa mga kinaiya kag mga pagpakig-angot ni Jehova. Ginapakita man sini kon paano naton sia mailog sa pagpakita sang iya mga kinaiya.​—⁠1/15, pahina 23, 24.

• Ano ang kahulugan sang Hulubaton 12:⁠5: “Ang panghunahuna sang mga matarong paghukom”?

Ang panghunahuna sang maayo nga mga tawo maligdong kag napatuhoy sa kon ano ang wala sing ginapasulabi kag matarong. Sanglit ang mga matarong ginapahulag sang gugma para sa Dios kag para sa mga isigkatawo, ang ila mga tinutuyo maayo.​—⁠1/15, pahina 30.

• Ano ang makabulig sa isa ka tawo nga mapalambo ang balanse nga pagtamod sa trabaho?

Ang mahanas kutob sa pagkabata nga pabaloran ang trabaho mapuslanon. Ang Biblia nagalaygay sa aton sa pagtigayon sing maayo nga batasan sa pagtrabaho, sa amo ginalikawan ang katamad. (Hulubaton 20:⁠4) Nagapalig-on man ini sa mga Cristiano nga indi mangin sobra kasako sa trabaho. Dapat naton kilalahon nga ang pag-alagad sa Dios amo ang labing importante sa aton kabuhi. (1 Corinto 7:29-31) Dugang pa, ang matuod nga mga Cristiano nagasalig nga indi sila pagpabay-an sang Dios.​—⁠2/1, pahina 4-6.

• Diin ang altar nga una nga ginsambit sa Biblia?

Yari ini sa Genesis 8:​20, nga nagapatuhoy sa altar nga gintukod ni Noe pagguwa niya sa arka pagkatapos sang Anaw. Apang, mahimo nga naggamit si Cain kag si Abel sing mga altar sa pagdulot sang ila mga halad. (Genesis 4:​3, 4)​—⁠2/15, pahina 28.

• Paano mahimuslan sang pila ka Cristiano ang bag-o nga mga kahimtangan?

Ginbaton​​—⁠ukon ginsugdan⁠​—⁠sang iban ang mga pagbag-o sa ila palamugnan nga naghatag sa ila sing mas madamo pa nga tion para sa ministeryo. Gindugangan naman sang iban ang ila tion kag mga pribilehiyo sa pag-alagad sa Dios sang ang ila mga responsabilidad sa pamilya nabuhinan, subong sang ang ila mga kabataan nagdinalagku na kag nagminyo.​—⁠3/1, pahina 19-22.

• Paano ang mga halimbawa ni Jonas kag ni apostol Pedro nagabulig sa aton nga tamdon ang iban subong sang pagtamod ni Jehova sa ila?

Si Jonas kag si Pedro may nakilal-an nga mga kasaypanan sa ila panghunahuna kag sa ila reaksion sa mga pagtilaw sa pagtuo kag pagkamatinumanon. Apang, maathag nga nakita ni Jehova ang ila maayo nga mga kinaiya kag padayon nga naggamit sa ila sa pag-alagad sa iya. Kon saklawon ukon paslawon kita sang iban, mahimo naton dumdumon ang ila maayo nga mga kinaiya nga naluyagan anay naton kag ang maayo nga nakita sang Dios sa ila.​—⁠3/15, pahina 16-19.

• Ngaa ang mga badbad sang Biblia magkatuhay sa pagnumero sang tulun-an sang Salmo?

Magkatuhay ang pagnumero sa ulot sang tulun-an sa orihinal nga Hebreo nga hambal kag sang Griego nga badbad sini sa Septuagint. Ang mas bag-o nga mga badbad mahimo nga magkatuhay, depende sa kon bala napasad ini sa Hebreo nga teksto ukon sa Septuagint.​—⁠4/1, pahina 31.