Diin Masapwan ang Matuod nga Lugpay?

“Ang Dios kag Amay sang aton Ginuong Jesucristo . . . nagalugpay sa amon sa tanan namon nga kapipit-an.”​—⁠2 CORINTO 1:​3, 4.

1. Ano nga mga kahimtangan ang mahimo magpabatyag sa mga tawo nga kinahanglan gid nila ang lugpay?

ANG nagapainutil nga balatian mahimo magpabatyag sa isa ka tawo nga ang iya kabuhi wala na sing pulos. Ang mga linog, bagyo, kag gutom nagapapuraot sa mga tawo. Ang inaway mahimo bangdan sang pagkapatay sang mga katapo sang pamilya, pagkaguba sang mga puluy-an, ukon pagbiya sang mga tawo sa ila puluy-an kag mga pagkabutang. Ang inhustisya mahimo magpabatyag sa mga tawo nga wala na sila sing lugar nga madangpan para sa kaumpawan. Ang mga tawo nga naapektuhan sini nga kailo nagakinahanglan gid sing lugpay. Diin ini masapwan?

2. Ngaa ang lugpay nga ginahatag ni Jehova di-matupungan?

² Ang pila ka indibiduwal kag organisasyon nagapanikasog sa paghatag sing lugpay. Ang mainayuhon nga mga pulong ginaapresyar. Ang mga panikasog sa pag-aman sing kinahanglanon nga mga butang subong sang pagkaon, puluy-an, kag panapton nagabulig agod mapaayawan ang makadali nga mga kinahanglanon. Apang, ang matuod nga Dios lamang, nga si Jehova, ang makadula sang tanan nga halit kag makahatag sing kinahanglanon nga bulig agod indi na mahanabo liwat ini nga mga kalamidad. Tuhoy sa iya, ang Biblia nagasiling: “Pakamaayuhon ang Dios kag Amay sang aton Ginuong Jesucristo, ang Amay sang mapinalanggaon nga mga kaluoy kag ang Dios sang bug-os nga paglugpay, nga nagalugpay sa amon sa tanan namon nga kapipit-an, agod nga malugpayan namon ang yara sa bisan anong sahi sang kapipit-an paagi sa lugpay nga ginlugpay man sang Dios sa amon.” (2 Corinto 1:​3, 4) Paano kita ginalugpayan ni Jehova?

Pag-atubang sa Kabangdanan Gid sang mga Problema

3. Paano ginadula sang lugpay nga ginahatag sang Dios ang kabangdanan gid sang mga problema sang katawhan?

³ Ang tanan nga tawo nakapanubli sing di-kahimpitan bangod sang pagpakasala ni Adan, kag ini amo ang kabangdanan sang madamo nga mga problema nga nagadul-ong sa ulihi sa kamatayon. (Roma 5:12) Ang kahimtangan labi pa nga ginapalala sang kamatuoran nga si Satanas nga Yawa amo ang “manuggahom sang kalibutan.” (Juan 12:31; 1 Juan 5:19) Si Jehova wala lamang nagkasubo bangod sang di-malipayon nga kahimtangan sang katawhan. Ginpadala niya ang iya bugtong nga Anak subong gawad agod mag-aman sing kaluwasan, kag ginsugiran Niya kita nga mahilway kita sa mga epekto sang sala ni Adan kon magtuo kita sa Iya Anak. (Juan 3:16; 1 Juan 4:10) Gintagna man sang Dios nga laglagon ni Jesucristo, nga amo ang gintulinan sang tanan nga awtoridad sa langit kag sa duta, si Satanas kag ang iya bug-os malauton nga sistema sang mga butang.​—⁠Mateo 28:18; 1 Juan 3:⁠8; Bugna 6:⁠2; 20:10.

4. (a) Ano ang gin-aman ni Jehova agod pabakuron ang aton pagsalig sa iya mga saad sang kaumpawan? (b) Paano kita ginabuligan ni Jehova nga mahantop kon san-o magaabot ang kaumpawan?

⁴ Agod pabakuron ang aton pagsalig sa iya mga saad, ginrekord sang Dios ang madamo nga ebidensia nga ang bisan ano man nga ginatagna niya nagakatuman. (Josue 23:14) Ginlakip niya sa Biblia  ang rekord tuhoy sa ginhimo niya agod maluwas ang iya mga alagad gikan sa mga kahimtangan nga imposible kuntani gikan sa pagtamod sang tawo. (Exodo 14:​4-​31; 2 Hari 18:⁠13⁠–​​19:37) Kag paagi kay Jesucristo, ginpakita ni Jehova nga ang iya katuyuan nagalakip sing pag-ayo sa “tanan nga sahi sang balatian” sang mga tawo, kag banhawon pa gani niya ang mga patay. (Mateo 9:35; 11:​3-6) San-o ini tanan mahanabo? Bilang sabat, ginalaragway sang Biblia ang katapusan nga mga adlaw sining daan nga sistema, nga magauna sa bag-ong mga langit kag bag-ong duta sang Dios. Ang paglaragway ni Jesus nagahisanto sa tion nga aton ginakabuhian.​—⁠Mateo 24:3-14; 2 Timoteo 3:1-5.

Lugpay sa Katawhan nga Ginasit-an

5. Sang naghatag sing lugpay sa dumaan nga Israel, ano ang ginpatalupangod ni Jehova sa ila?

⁵ Gikan sa pagpakig-angot ni Jehova sa dumaan nga Israel, matun-an naton kon paano sia naghatag sing lugpay sa ila sa panahon sang kasisit-an. Ginpahanumdom niya sila kon ano nga sahi sia sang Dios. Nagpabakod ini sang ila pagsalig sa iya mga saad. Paagi sa iya mga manalagna, ginpakita ni Jehova ang daku nga kinatuhayan sa ulot niya subong matuod kag buhi nga Dios kag sang mga idolo, nga indi makabulig sa ila kaugalingon ukon sa ila mga sumilimba. (Isaias 41:10; 46:⁠1; Jeremias 10:2-15) Sang ginsilingan niya si Isaias, “Lugpayi ninyo, lugpayi ninyo ang akon katawhan,” ginpahulag ni Jehova ang iya manalagna nga maggamit sing mga ilustrasyon kag mga paglaragway tuhoy sa Iya mga buhat sang pagpanuga agod ipadaku ang kalabawon ni Jehova subong ang lamang matuod nga Dios.​—⁠Isaias 40:1-31.

6. Ano ang mga palatandaan nga kon kaisa ginahatag ni Jehova kon san-o matigayon ang kaluwasan?

⁶ Kon kaisa, naglugpay si Jehova paagi sa paghatag sing espesipiko nga tion, malapit na ukon malayo pa, kon san-o maluwas ang iya katawhan. Sang nagahilapit ang kaluwasan gikan sa Egipto, ginsilingan niya ang ginapigos nga mga Israelinhon: “Isa pa ka kalalat-an ang dalhon ko kay Paraon kag sa Egipto. Sa tapos sini tugutan kamo niya sa paglakat gikan diri.” (Exodo 11:⁠1) Sang ginlikupan ang Juda sang nag-alyansahanay nga tatlo ka pungsod sang panahon ni Hari Jehosapat, ginsilingan sila ni Jehova nga magapasilabot Sia para sa ila “buwas.” (2 Cronica 20:​1-4, 14-17) Sa pihak nga bahin, ang pagluwas sa ila gikan sa Babilonia ginrekord ni Isaias halos 200 ka tuig sing abanse, kag ang dugang nga mga detalye ginhatag paagi kay Jeremias halos isa ka gatos ka tuig antes matabo ang pagluwas. Makapalig-on gid ining mga tagna para sa mga alagad sang Dios sang ang tion sa pagluwas naghilapit!​—⁠Isaias 44:26⁠–​45:⁠3; Jeremias 25:11-​14.

7. Ano ang masunson nga nalakip sa mga saad sang kaluwasan, kag paano ini nag-apektar sa matutom nga katawhan sa Israel?

⁷ Talalupangdon nga ang mga saad nga naglugpay sa katawhan sang Dios masunson naglakip sing mga impormasyon tuhoy sa Mesias. (Isaias 53:1-12) Sa sulod sang madamo nga kaliwatan, naghatag ini sing paglaum sa matutom nga mga tawo samtang nagaatubang sila sing madamo nga mga pagtilaw. Sa Lucas 2:​25, aton mabasa: “Yari karon! may isa ka tawo sa Jerusalem nga ang  ngalan si Simeon, kag ining tawo matarong kag masimbahon, nga nagahulat sa kalugpayan [ukon, paglugpay; sing aktuwal, sang pagkari sang Mesias] sang Israel, kag ang balaan nga espiritu yara sa iya.” Nahibaluan ni Simeon ang paglaum tuhoy sa Mesias nga narekord sa Kasulatan, kag ang iya kabuhi naimpluwensiahan sang pagpaabot sa katumanan sini. Wala niya mahangpi kon paano ini tanan matuman, kag wala na niya masaksihan ang katumanan sang gintagna nga kaluwasan, apang nagkasadya sia sang makilala niya ang Isa nga mangin ang “paagi sang pagluwas” sang Dios.​—⁠Lucas 2:30.

Lugpay nga Gin-aman Paagi kay Cristo

8. Paano ipaanggid ang bulig nga ginhatag ni Jesus sa ginahunahuna sang madamo nga tawo nga kinahanglan nila?

⁸ Samtang ginahimo ni Jesucristo ang iya ministeryo sa duta, wala niya pirme ginhatag ang bulig nga ginahunahuna sang mga tawo nga kinahanglan nila. Ginhandum sang iban ang isa ka Mesias nga magahilway sa ila gikan sa ginakaugtan nga paggahom sang Emperyo sang Roma. Apang wala ginsakdag ni Jesus ang rebolusyon; ginsilingan niya sila nga “ihatag . . . kay Cesar ang mga butang nga iya ni Cesar.” (Mateo 22:21) Indi lamang paghilway sa mga tawo gikan sa paggahom sang isa ka rehimen sa politika ang katuyuan sang Dios. Luyag sang mga tawo nga himuon si Jesus nga hari, apang nagsiling sia nga “ihatag [niya] ang iya kalag subong gawad nga kabaylo sang madamo.” (Mateo 20:28; Juan 6:15) Indi pa tion nga maghari sia, kag si Jehova amo ang magahatag sa iya sing awtoridad sa paggahom, indi ang di-kontento nga kadam-an.

9. (a) Ano nga mensahe sang kalugpayan ang ginbantala ni Jesus? (b) Paano ginpasundayag ni Jesus ang kaangtanan sang mensahe sa mga kahimtangan nga personal nga ginaatubang sang mga tawo? (c) Para sa ano ang ministeryo ni Jesus nagpasad sing sadsaran?

⁹ Ang lugpay nga dala ni Jesus nalakip sa “maayong balita sang ginharian sang Dios.” Amo ini ang mensahe nga ginbantala ni Jesus bisan diin man sia nagkadto. (Lucas 4:43) Ginpadaku niya ang kaangtanan sini nga mensahe sa adlaw-adlaw nga mga problema sang mga tawo paagi sa pagpasundayag kon ano ang himuon niya para sa katawhan subong Mesianikong Manuggahom. Ginhatagan niya sing bag-o pa nga rason ang nagaantos nga mga indibiduwal nga mabuhi paagi sa pag-ayo sa mga bulag kag mga apa (Mateo 12:22; Marcos 10:​51, 52), pagbulong sa paralitiko (Marcos 2:3-12), pagtinlo sa mga masigka-Israelinhon gikan sa makangilil-ad nga mga balatian (Lucas 5:​12, 13), kag pagbulong sa ila iban pa malubha nga mga balatian. (Marcos 5:25-29) Ginpahalipay niya ang nagkalisod nga mga katapo sang pamilya paagi sa pagbanhaw sa ila mga anak. (Lucas 7:11-15; 8:49-56) Ginpakita niya ang iya ikasarang nga punggan ang makahalalit nga mga bagyo kag busgon ang pagkagutom sang daku nga mga kadam-an. (Marcos 4:37-41; 8:​2-9) Dugang pa, gintudluan sila ni Jesus sing mga prinsipio sa kabuhi nga makabulig sa ila nga malubad sing epektibo ang karon nga mga problema kag makahatag sa mga tawo sing paglaum para sa matarong nga pagginahom sa  idalom sang Mesias. Gani samtang ginahimo ni Jesus ang iya ministeryo, wala lamang niya ginlugpayan ang mga nagpamati nga may pagtuo kundi nagpasad man sia sing sadsaran nga makapalig-on sa mga tawo sa linibo ka tuig nga magaabot.

10. Ano ang nangin posible bangod sang halad ni Jesus?

¹⁰ Kapin sa 60 ka tuig sa tapos ginhalad ni Jesus ang iya tawhanon nga kabuhi kag ginbanhaw sia pakadto sa langitnon nga kabuhi, si apostol Juan gin-inspirar sa pagsulat: “Magagmay ko nga mga anak, ginasulat ko sa inyo ining mga butang agod indi kamo makahimo sing sala. Apang, kon ang bisan sin-o makahimo sing sala, may mananabang kita upod sa Amay, si Jesucristo, isa nga matarong. Kag sia ang nagatumbas nga halad para sa aton mga sala, apang indi lamang para sa aton kundi para man sa bug-os nga kalibutan.” (1 Juan 2:​1, 2) Bangod sang mga benepisyo sang himpit tawhanon nga halad ni Jesus, nalugpayan kita sing daku. Nahibaluan naton nga mahimo naton matigayon ang kapatawaran sa mga sala, matinlo nga konsiensia, nahamut-an nga kaangtanan sa Dios, kag ang paglaum nga mabuhi sing dayon.​—⁠Juan 14:⁠6; Roma 6:23; Hebreo 9:24-28; 1 Pedro 3:21.

Ang Balaan nga Espiritu Subong Manuglugpay

11. Anong dugang pa nga kahimusan para sa kalugpayan ang ginsaad ni Jesus antes sia mapatay?

¹¹ Samtang kaupod sang iya mga apostoles sa bisperas sang iya mahalaron nga kamatayon, si Jesus naghambal tuhoy sa isa pa ka kahimusan nga ginhimo sang iya langitnon nga Amay agod lugpayan sila. Si Jesus nagsiling: “Magapangabay ako sa Amay kag magahatag sia sa inyo sing isa pa ka mananabang [manuglugpay; Griego, pa·raʹkle·tos] nga mangin kaupod ninyo sing dayon, ang espiritu sang kamatuoran.” Ginpasalig sila ni Jesus: “Ang mananabang, ang balaan nga espiritu, . . . magatudlo sa inyo sang tanan nga butang kag magapahanumdom sa inyo sang tanan nga butang nga ginsiling ko sa inyo.” (Juan 14:​16, 17, 26) Paano ang balaan nga espiritu aktuwal nga naglugpay sa ila?

12. Paano ang papel sang balaan nga espiritu subong bulig sa memorya sang mga disipulo ni Jesus nakabulig sa paglugpay sa madamo?

¹² Maid-id nga gintudluan ni Jesus ang mga apostoles. Indi gid nila malimtan ang eksperiensia, apang madumduman bala nila ang aktuwal nga ginsiling niya? Malimtan bala ang importante nga mga instruksion bangod sang ila di-himpit nga mga memorya? Ginpasalig sila ni Jesus nga ang balaan nga espiritu ‘magapahanumdom sa ila sang tanan nga butang nga ginsiling niya sa ila.’ Gani, mga walo ka tuig sa tapos napatay si Jesus, ginsulat ni Mateo ang nahauna nga Ebanghelyo, diin ginrekord niya ang makalilipay nga Sermon sa Bukid ni Jesus, ang iya madamo nga mga ilustrasyon tuhoy sa Ginharian, kag ang iya detalyado nga pagpaathag sa tanda sang iya presensia. Kapin sa 50 ka tuig sang ulihi, ginsulat ni apostol Juan ang isa ka masaligan nga rekord nga puno sing tul-id nga mga detalye tuhoy sa katapusan nga pila ka adlaw sang kabuhi ni Jesus sa duta. Makapalig-on gid ining inspirado nga mga rekord tubtob sa aton adlaw!

13. Paano ang balaan nga espiritu nag-alagad subong manunudlo sa unang mga Cristiano?

¹³ Ang balaan nga espiritu wala lamang nagpahanumdom sang mga pulong kundi nagtudlo man sa mga disipulo kag nagtuytoy sa ila agod mahangpan sing bug-os ang katuyuan sang Dios. Sang kaupod pa si Jesus sang iya mga disipulo, ginsugiran niya sila sang mga butang nga wala pa nila sadto mahangpan sing maayo. Apang, sang ulihi, bangod ginpahulag sang balaan nga espiritu, si Juan, si Pedro, si Santiago, si Judas, kag si Pablo nagsulat sing mga paathag tuhoy sa dugang pa nga mga matabo sa katuyuan sang Dios. Sa amo ang balaan nga espiritu nag-alagad subong manunudlo, nga mapuslanon nga nagapasalig nga ginatuytuyan sila sang Dios.

14. Sa anong mga paagi ginbuligan sang balaan nga espiritu ang katawhan ni Jehova?

¹⁴ Ang milagruso nga mga dulot sang espiritu nakabulig man agod ipakita nga ginliton sang Dios ang iya kahamuot gikan sa undanon nga Israel pakadto sa Cristianong kongregasyon. (Hebreo 2:⁠4) Ang bunga sini nga espiritu sa kabuhi sang mga indibiduwal isa man ka importante nga butang sa pagkilala sa matuod nga mga disipulo ni Jesus. (Juan 13:35; Galacia 5:22-24) Kag ginpabakod sang espiritu ang mga katapo sina nga kongregasyon nga mangin masidla kag maisog nga mga saksi.​—⁠Binuhatan 4:31.

 Bulig Kon Ginaipit sing Daku

15. (a) Ano nga mga pag-ipit ang gin-atubang sang mga Cristiano sang nagligad kag karon? (b) Ngaa ang mga nagahatag sing pagpalig-on nagakinahanglan man kon kaisa sing pagpalig-on?

¹⁵ Ang tanan nga debotado kay Jehova kag mainunungon sa iya makaeksperiensia sing pila ka sahi sang paghingabot. (2 Timoteo 3:12) Apang, madamo nga mga Cristiano ang gin-ipit gid sing daku. Sa modernong mga tion, ang iban ginhingabot sang mga guban kag ginbilanggo sa mga kampo konsentrasyon, mga prisuhan, kag mga labor camp nga may makaluluoy nga kahimtangan. Ang mga gobierno nangin aktibo nga mga manughingabot, ukon gintugutan nila ang malinapason nga mga grupo sa paghimo sing masingki ukon magamo nga mga butang nga wala sila ginasilutan. Dugang pa, ang mga Cristiano nag-atubang sing malala nga mga problema sa panglawas ukon sing mabug-at nga mga problema sa pamilya. Ang pag-ipit mahimo man maeksperiensiahan sang isa ka hamtong nga Cristiano nga nagabulig sa mga masigkatumuluo sa pag-atubang sa mabudlay nga mga kahimtangan. Sa sini nga mga kahimtangan, ang isa nga nagahatag sing pagpalig-on mahimo man nagakinahanglan sing pagpalig-on.

16. Sang gin-ipit sing daku si David, paano sia nakabaton sing bulig?

¹⁶ Sang ginlagas ni Hari Saul si David agod patyon, nagdangop si David sa Dios subong ang iya Mananabang: “O Dios, pamatii ang akon pangamuyo,” pakitluoy niya. “Sa landong sang imo mga pakpak magadangop ako.” (Salmo 54:​2, 4; 57:⁠1) Nakabaton bala sing bulig si David? Huo. Sadto nga tion, gingamit ni Jehova ang manalagna nga si Gad kag ang saserdote nga si Abiatar agod ipaalinton ang panuytoy kay David, kag gingamit Niya si Jonatan nga anak ni Saul agod pabakuron ang pamatan-on nga si David. (1 Samuel 22:​1, 5; 23:9-13, 16-18) Gintugutan man ni Jehova ang mga Filistinhon nga salakayon ang pungsod, sa amo nauntat ang paglagas ni Saul kay David.​—⁠1 Samuel 23:​27, 28.

17. Sang gin-ipit sing daku, diin nangayo si Jesus sing bulig?

¹⁷ Si Jesucristo mismo nakabatyag man sing daku nga pag-ipit samtang nagahilapit ang katapusan sang iya kabuhi sa duta. Nakahibalo gid sia kon paano maapektuhan sang iya paggawi ang ngalan sang iya langitnon nga Amay kag kon ano ang mangin kahulugan sini sa palaabuton sang tanan nga katawhan. Nangamuyo sia sing hanuot, nga may “kasakit” pa gani. Ginpat-od sang Dios nga makabaton si Jesus sing pag-alay-ay nga kinahanglan niya sa sadtong mabudlay nga tion.​—⁠Lucas 22:41-44.

18. Ano nga lugpay ang ginhatag sang Dios sa unang mga Cristiano nga ginhingabot sing masingki?

¹⁸ Masingki gid ang paghingabot sa mga Cristiano sa tapos matukod ang unang-siglo nga kongregasyon amo nga ang tanan magluwas sa mga apostoles nag-alaplaag gikan sa Jerusalem. Ang  mga lalaki kag mga babayi ginguyod paguwa sa ila mga puluy-an. Ano nga lugpay ang ginhatag sang Dios sa ila? Ang iya Pulong nagapasalig nga may yara sila “mas maayo kag nagadugay nga pagkabutang,” ang di-mapaslawan nga palanublion sa mga langit kaupod ni Cristo. (Hebreo 10:34; Efeso 1:18-20) Samtang padayon sila nga nagabantala, nakita nila ang pamatuod nga ang espiritu sang Dios yara sa ila, kag ang ila mga naeksperiensiahan naghatag sing dugang pa nga rason agod magkasadya.​—⁠Mateo 5:​11, 12; Binuhatan 8:1-40.

19. Bisan pa nag-antos si Pablo sing daku nga paghingabot, ano ang ginbatyag niya tuhoy sa lugpay nga ginahatag sang Dios?

¹⁹ Sang ulihi, si Saulo (Pablo), nga isa anay ka masingki nga manughingabot, ginhingabot man bangod nangin Cristiano sia. Sa pulo sang Cipre, may isa ka manugtiwtiw nga nagtinguha sa pag-upang sa ministeryo ni Pablo paagi sa paggamit sing daya kag kabutigan. Sa Galacia, si Pablo ginbato kag ginbilin nga daw patay. (Binuhatan 13:8-10; 14:19) Sa Macedonia, ginbunal sia sing mga bilugon. (Binuhatan 16:​22, 23) Sa tapos sang masingki nga pagsalakay sang mga guban sa Efeso, nagsulat sia: “Napaidalom kami sa lakas nga pag-ipit labaw sa amon kusog, amo kon ngaa indi gid kami pat-od bisan sang amon kabuhi. Sa katunayan. nabatyagan namon sa sulod namon nga nabaton na namon ang pamatbat sang kamatayon.” (2 Corinto 1:​8, 9) Apang sa sini man nga sulat, ginsulat ni Pablo ang makapalugpay nga mga pulong nga ginbalikwat sa parapo 2 sining artikulo.​—⁠2 Corinto 1:​3, 4.

20. Ano ang binagbinagon naton sa masunod nga artikulo?

²⁰ Paano ka makapakigbahin sa paghatag sing lugpay? Madamo karon sa aton adlaw ang nagakinahanglan sini kon nagabatyag sing kalisod, ayhan bangod sang isa ka kalamidad nga nag-apektar sa madamo nga tawo ukon bangod sang mga kapipit-an nga sila lamang ang naapektuhan. Sa masunod nga artikulo, binagbinagon naton kon paano maghatag sing lugpay sa sining duha ka kahimtangan.

Madumduman Mo Bala?

• Ngaa ang lugpay gikan sa Dios labi gid ka bilidhon?

• Ano nga lugpay ang ginahatag paagi kay Cristo?

• Paano ang balaan nga espiritu napamatud-an nga isa ka manuglugpay?

• Maghatag sing mga halimbawa sang lugpay nga ginhatag sang Dios sang ang iya mga alagad gin-ipit sing daku.

[Mga Pamangkot sa Pagtinuon]

[Mga retrato sa pahina 15]

Ginapakita sa aton sang Biblia nga naghatag si Jehova sing lugpay paagi sa pagluwas sa iya katawhan

[Mga retrato sa pahina 16]

Si Jesus naghatag sing lugpay paagi sa pagtudlo, pagpang-ayo, kag sa pagbanhaw sa mga patay

[Retrato sa pahina 18]

Si Jesus nakabaton sing bulig gikan sa hitaas