Mga Pamangkot Gikan sa mga Bumalasa

Kon ang isa ka Cristiano makabati sing mga tingog, nagakahulugan bala ini nga ginasalakay sia sang demonyo?

Indi. Walay sapayan nga ang mga demonyo ginareport nga nagapadayag sang ila kaugalingon sa sini nga paagi, madamo nga mga indibiduwal nga nakabati sing lain nga tingog ukon may katingalahan ukon makatulublag nga nabatyagan ang nakasayod paagi sa pagpangusisa nga may balatian gali sila sa panglawas.

Bisan sang unang siglo, natalupangdan nga ang pagsalakay sang demonyo kag ang pisikal nga balatian may pareho nga mga epekto kon kaisa. Sa Mateo 17:14-​18, aton mabasa ang isa ka bata nga lalaki nga gin-ayo ni Jesus. Bisan pa ang bata nga lalaki may malala nga sintomas sang kuyap, sa pagkamatuod ang iya balatian tuga sang isa ka demonyo. Apang, sa mas nauna nga okasyon, sang ang madamo nga mga balatianon gindala agod ayuhon ni Jesus, naglakip ini sa iban nga “ginsuuban sang demonyo kag kuyapon.” (Mateo 4:24) Maathag nga ang pila ka kuyapon wala ginsuuban sang demonyo. Ang ila mga balatian sa pisikal lamang.

Ginreport nga ang pila nga nagabalatian sing schizophrenia, isa ka balatian nga masami mapaayo paagi sa pagbulong, makabati sing mga tingog ukon makaeksperiensia sing iban nga mga sintomas nga daw makatilingala.⁠ * Ang iban pa nga pisikal nga kahimtangan mahimo man maggumon sa pamensaron nga mahimo haumhaumon sing sayop sang iban nga tuga sang mga demonyo. Gani, bisan pa indi luyag sang isa nga nakabati sang lain nga tingog ukon may makatulublag nga nabatyagan nga bale-walaon ang pagsalakay sang demonyo, dapat palig-unon gid sia nga magpangusisa kon bala may paathag ang medisina tuhoy sa iya ginabatyag.

[Nota]