Nagaalagad Sila sa Cristianong mga Kauturan sa Iban nga mga Pungsod

NAKABATI ka na bala sing mga termino nga “internasyonal nga mga alagad” kag “internasyonal nga mga boluntaryo”? Ang mga Saksi ni Jehova nga nagahuman sini nga mga grupo nagahatag sang ila tion kag kalantip sa pagbulig sa pagpatindog sing mga pasilidad nga nagaimprinta kag nagapanagtag sing mensahe sang Biblia tuhoy sa Ginharian. Ini nga mga boluntaryo nagabulig man sa pagpatindog sing mga Assembly Hall kag Kingdom Hall, nga nangin mga sentro sang pagpanudlo sang Biblia. Sa karon, ini nga mga boluntaryo nagabulig sa mga proyekto sang pagpatindog sa 34 ka pungsod, ilabi na sa pigado nga mga duog. Ano nga mga kabudlayan kag kalipay ang naeksperiensiahan sini nga mga ministro samtang nagaalagad sila sa Cristianong mga kauturan sa iban nga mga pungsod? Ano ang ginabatyag nila tuhoy sa ginahimo nila nga “sagrado nga pag-alagad”? (Bugna 7:​9, 15) Agod mahibaluan ini, kilalahon naton ang pila ka boluntaryo nga nag-alagad sa Mexico.

Ang mga boluntaryo halin sa iban nga mga pungsod una nga nag-abot sa Mexico sang Mayo 1992. Pagkatapos sadto, ginpangunahan nila ang pagpasangkad sa sanga, nga amo ang nagadumala sa mga hilikuton sang mga Saksi ni Jehova sa Mexico. Katorse ka bag-o nga bilding ang ginpatindog, lakip na ang mga puluy-an para sa mga boluntaryo nga nagaalagad sa sanga talatapan, isa ka imprintahan, kag mga opisina.

Kapin sa 730 ka boluntaryo halin sa Canada, Gran Britanya, Estados Unidos, kag iban pa nga mga pungsod ang nagbuligay sing nahiusa upod sa ginatos ka mga boluntaryo halin sa tanan nga bahin sang Mexico. Dugang pa, kapin sa 28,000 ka Saksi nga katapo sang 1,600 ka kongregasyon nga malapit sa sanga talatapan ang nagbulig sa mga hilikuton sa pagpatindog sa mga talipuspusan sang semana. Ang tanan nag-alagad sing kinabubut-on kag naghatag sang ila mga ikasarang nga wala sing bayad. Ginkabig nila nga isa ka pribilehiyo ang pag-alagad kay Jehova sa sining paagi. Sa bug-os nga proyekto sang pagpatindog, ginadumdom nila ang inspirado nga mga pulong sa Salmo 127:⁠1: “Magluwas kon si Jehova ang magpatindog sing balay, wala sing pulos ang pagpangabudlay sing lakas sang mga nagapatindog sini.”

Ang mga Hangkat nga Ila Gin-atubang

Ano nga mga kabudlayan ang gin-atubang sang internasyonal nga mga boluntaryo samtang nagaalagad sila sa iban nga pungsod? Yari ang pila sang ila ginsiling. Sanday Curtis kag Sally, isa ka mag-asawa halin sa Estados Unidos, nagbulig  sa mga proyekto sang pagpatindog sa Alemanya, India, Mexico, Paraguay, Romania, Rusya, Senegal, kag Zambia. Si Curtis nagpanaysayon: “Ang una nga hangkat amo ang pagbiya sa amon anak nga babayi, nga isa ka payunir [bug-os tion nga ministro], kag sa amon kongregasyon sa Minnesota. Nagpakig-upod kami nga mag-asawa sa amo nga kongregasyon sa sulod na sang 24 ka tuig, kag nagustuhan gid namon didto.”

Si Sally nagsiling: “Ang pagkabuhi sa di-sunado nga mga kahimtangan isa ka hangkat, ayhan kapin pa sa isa ka babayi sangsa isa ka lalaki, apang natun-an ko nga posible ang pagpasibu. Natun-an ko pa gani nga agwantahon ang mga insekto, kag kadamo gid sa ila!” Nagsiling pa sia: “Sa isa ka pungsod, napulo kami nga boluntaryo ang nagdayon sa isa ka apartment nga wala sing kusina kag may duha lamang ka banyo. Natun-an ko didto nga mangin mapailubon pa.”

Ang pagtuon sing bag-o nga lenguahe isa pa ka hangkat nga nagakinahanglan sing panikasog kag pagkamapainubuson. Si Sharon, nga nagaalagad upod sa iya bana sa mga proyekto sang pagpatindog sa nagkalainlain nga pungsod, nagsiling: “Ang indi pagkahibalo sa lenguahe sang pungsod nga imo ginaalagaran isa ka hangkat. Sa primero, mabudlay nga magsuod sa imo espirituwal nga mga kauturan kon nabudlayan ka sa pagpabutyag sang imo balatyagon. Makaulugot ini. Apang ang mga kauturan nga nakilala namon sa amon mga asaynment sa iban nga mga pungsod mapailubon gid sa amon kag interesado gid sa amon kaayuhan. Wala madugayi kag nagapakighambal na kami sa pila ka paagi.”

Ang Pagpakigbahin sa Ministeryo Nagakinahanglan sing Kaisog

Bisan pa ining masinakripisyuhon nga mga boluntaryo nagabulig sing daku sa pag-uswag sang hilikuton sa pagpatindog, narealisar nila nga una sa tanan, mga manugbantala sila sang maayong balita tuhoy sa Ginharian sang Dios. Gani, ginasakdag nila sing bug-os ang pagbantala nga hilikuton nga ginahimo sang mga kongregasyon nga ginapakig-angutan nila. Si Åke kag si Ing-Mari, isa ka mag-asawa nga nagbulig sa mga proyekto sang pagpatindog sa Guadeloupe, Malawi, Mexico, kag Nigeria, nagbaton nga ang paghambal sing tuhay  nga lenguahe kon nagapakigbahin sa ministeryo sa latagon sa iban nga pungsod nagakinahanglan sing kaisog.

Si Ing-Mari nagapanugiron: “Sang primero limitado ang amon pagpakigbahin, sanglit pirme kami ginaupdan sang lokal nga mga Saksi kag, bangod nahuya kami, sila pirme ang amon ginapahambal. Apang, isa ka aga namat-od kami nga magguwa sa pag-alagad sa latagon sing kamihanon lang. Nagbantala kami nga nagakurog ang tuhod kag nagakubakuba ang dughan. Nasugilanon namon ang isa ka lamharon nga babayi nga nagpamati sa ginhanda ko nga presentasyon. Nagbasa ako sing isa ka teksto kag nagpahamtang sing literatura. Dayon ang babayi nagsiling: ‘Sugiri ako. May paryente ako nga nagatuon sing Biblia upod sa mga Saksi ni Jehova. Paano man ako makatuon?’ Nakum-an ako. Nian ginpakalma ko ang akon kaugalingon kag gintanyagan sia sing pagtuon sa Biblia.”

Nagsiling pa si Ing-Mari: “Handurawa lamang ang akon kalipay kag ang akon pagpasalamat kay Jehova bangod sang pagpakamaayo niya sang amon inisyatibo kag sang amon handum nga ipaambit ang kamatuoran.” Nag-uswag ini nga babayi kag ginbawtismuhan subong isa ka Saksi sa isa ka distrito nga kombension sa Mexico City. Ginsumaryo ni Åke kag ni Ing-Mari ang ila ministeryo sa sining paagi: “Ginapabaloran gid namon ang amon mga asaynment sa nagkalainlain nga proyekto sang pagpatindog, apang wala sing makalabaw sa kalipay kag kaayawan sa pagbulig sa isa ka tawo nga magbaton sing kamatuoran.”

Ang Pagkamasinakripisyuhon

Matuod, ang mga boluntaryo nga nagbiya sang pamilya kag mga abyan nagasakripisyo agod mag-alagad sa ila mga kauturan sa iban nga mga pungsod, apang naeksperiensiahan man nila ang di-matupungan nga kalipay. Ano ini?

Si Howard, nga nag-alagad upod sa iya asawa nga si Pamela sa Angola, Colombia, Ecuador, El Salvador, Guyana, Mexico, kag Puerto Rico nagapaathag: “Isa ka pribilehiyo nga makilala ang mga kauturan nga lalaki kag babayi sa nagkalainlain nga pungsod kag maeksperiensiahan mismo ang gugma nga nagaluntad sa aton internasyonal nga paghiliutod. Masami naton mabasahan ang tuhoy sini, apang kon magpuyo ka kag mag-alagad upod sa iban nga tuhay ang kultura kag ginhalinan, mas labi pa nga maapresyar mo ang aton hamili nga paghiliutod.”

Si Gary, nga nagbulig sa proyekto sang pagpatindog sa Colombia, Costa Rica, Ecuador, Mexico, kag Zambia, nagbatyag man nga nakabenepisyo sia sing daku sa sini nga programa. Sia nagasaysay: “Ang paghanas nga nabaton ko sa sulod sang mga tuig paagi sa pagpakig-upod sa hamtong nga mga kauturan nga nagaalagad sa mga sanga sa mga pungsod diin naasayn ako nagbulig sa akon nga masangkapan sing maayo para sa mga hangkat sa akon mga asaynment. Makapalig-on gid ini sing pagtuo bangod nagahatag ini sing kahigayunan nga maeksperiensiahan ang paghiusa nga kinaiya sang bug-os kalibutan nga organisasyon ni Jehova​​—⁠isa ka paghiusa nga nagalandas sa mga kinatuhayan sang lenguahe, rasa, ukon kultura.”

Sa karon, natapos na ang hilikuton sa pagpatindog sa Mexico, kag ang ginpasangkad nga pasilidad sang sanga gindedikar sini nga tuig. Bangod ginpahulag sang ila gugma sa Dios, ang internasyonal nga mga alagad kag internasyonal nga mga boluntaryo nakabulig gid sing daku sa pagsangkad sang matuod nga pagsimba sa Mexico kag sa iban pa nga duog. Ang ila kahanda kag pagkamasinakripisyuhon sa pag-alagad sa ila Cristianong mga kauturan sa iban nga mga pungsod ginaapresyar gid sang mga Saksi ni Jehova sa bug-os nga kalibutan.

[Retrato sa pahina 25]

Ecuador

[Retrato sa pahina 25]

Colombia

[Retrato sa pahina 25]

Angola

[Retrato sa pahina 26]

Ang hilikuton nagsugod sa bag-o nga mga pasilidad sa sanga sang Mexico

[Retrato sa pahina 26]

Ang hardin sa sanga

[Retrato sa pahina 26]

Sa ubos: Ang pila ka katapo sang Construction Department sa atubangan sang isa ka bahin sang bag-o nga mga pasilidad

[Retrato sa pahina 27]

Ang mga boluntaryo sa pagpatindog nalipay sa pagsakdag sa pagbantala nga hilikuton upod sa lokal nga mga kongregasyon