Natalupangdan Bala ni Jehova ang Imo Ginahimo?

PAANO mo sabton ini nga pamangkot? Madamo ang magasiling: ‘Nagapati ako nga natalupangdan sang Dios ang mga hinimuan sang mga tawo pareho nanday Moises, Gideon, kag David, pero nagaduhaduha ako nga interesado sia sa bisan ano man nga mahimo ko. Indi gid ako pareho kay Moises, Gideon, ukon David.’

Matuod nga tumalagsahon gid ang mga hinimuan sang pila ka matutom nga mga lalaki sa panahon sang Biblia. ‘Nakadaug sila sing mga ginharian, nakapakium sa mga baba sang mga leon, nakapalong sa gahom sang kalayo, kag nakalikaw sa sulab sang espada.’ (Hebreo 11:​33, 34) Ang iban, sa pihak nga bahin, nagpakita sang ila pagtuo sa ordinaryo lamang nga mga paagi, kag ginapasalig kita sang Biblia nga natalupangdan man sang Dios ang ila mga buhat sang pagtuo. Sa pag-ilustrar, binagbinaga ang mga ehemplo sa Kasulatan sang isa ka manugbantay sang karnero, isa ka propeta, kag isa ka balo nga babayi.

Naghalad ang Isa ka Manugbantay sang Karnero

Ano ang madumduman mo tuhoy kay Abel, ang ikaduha nga anak nga lalaki nanday Adan kag Eva? Ayhan madumduman mo nga nangin isa sia ka martir, isa ka butang nga mahimo maeksperiensiahan sang pila lang sa aton. Apang una nga natalupangdan sang Dios si Abel bangod sa liwan nga rason.

Isa ka adlaw, ginpili ni Abel ang pinakamaayo nga mga sapat gikan sa iya panong kag naghalad sa Dios. Mahimo kabigon karon nga daw simple lang ang iya halad, apang natalupangdan ini ni Jehova kag nahamuot sia. Apang, indi lamang ina. Halos apat ka libo ka tuig sang ulihi, gin-inspirar ni Jehova si apostol Pablo nga magsulat tuhoy sini sa tulun-an sang Hebreo. Bisan nagligad ang madamo nga tuig, wala nalimtan sang Dios ining simple nga halad!​​—⁠Hebreo 6:​10; 11:4.

Paano nakapamat-od si Abel kon ano ang iya ihalad? Wala sing ginasugid ang Biblia, apang mahimo nga ginpamensaran gid niya ini. Isa sia ka manugbantay sang karnero, gani indi katingalahan kon ihalad niya ang pila sa iya panong. Apang, talupangda, nga ginhatag niya ang pinakamaayo​​—⁠ang “matambok nga mga bahin.” (Genesis 4:⁠4) Mahimo man nga ginpamalandungan niya ang mga pinamulong ni Jehova sa man-ug sa hardin sang Eden: “Butangan ko sing kaawayon sa tunga mo kag sang babayi kag sa tunga sang imo binhi kag sang iya binhi. Dugmukon ka niya sa ulo kag dugmukon mo sia sa tikod.” (Genesis 3:​15; Bugna 12:⁠9) Bisan wala mahangpan kon sin-o ang “babayi” kag ang iya “binhi,” ayhan narealisar ni Abel nga ang ‘pagdugmok sa tikod’ sang binhi sang babayi magadalahig sa pagpatulo sing dugo. Pat-od nga nahangpan niya nga wala na sing makalabaw pa sa balor sang isa ka buhi, nagaginhawa nga tinuga. Labaw sa tanan, nagakaigo gid ang iya halad.

Kaangay ni Abel, ang mga Cristiano karon nagahalad man sa Dios. Ginahalad nila, indi ang mga panganay sang ila panong, kundi ang ‘halad sang pagdayaw, nga amo, ang bunga sang mga bibig nga nagapahayag sing dayag sa ngalan sang Dios.’ (Hebreo 13:15) Nagapahayag sing dayag ang aton  mga bibig kon ginapaambit naton sa iban ang aton pagtuo.

Luyag mo bala pauswagon ang kalidad sang imo halad? Kon amo mahalungon nga hunahunaa ang mga kinahanglanon sang mga tawo sa inyo teritoryo. Ano bala ang ila mga ginakabalak-an? Ang ila mga interes? Ano bala nga mga aspekto sang mensahe sang Biblia ang makaganyat sa ila? Samtang nagabantala, tun-i ang mga pagpakighambal nga imo nahimo sa tuyo nga mangin mas epektibo. Kag kon nagapakighambal ka tuhoy kay Jehova, himua ini nga may pagtuo, upod ang sinseridad. Himua ang imo halad nga isa ka matuod nga “halad sang pagdayaw.”

Nagbantala ang Isa ka Propeta sa Wala Nagasapak nga mga Isigkatawo

Binagbinaga karon ang propeta nga si Enoc. Mahimo nga nagaisahanon lang sia nga saksi ni Jehova nga Dios sadto. Kaangay ni Enoc, ikaw lamang bala sa inyo pamilya ang matutom nga nagaalagad kay Jehova? Ikaw lamang bala nga estudyante sa inyo klase ukon empleyado sa inyo ulubrahan ang nagatuman sa mga prinsipio sang Biblia? Kon amo, mahimo nga atubangon mo ang madamo nga mga pag-ipit. Mahimo nga hayluhon ka sang mga abyan, mga himata, mga kaeskwela, ukon mga kaupod sa trabaho nga lapason ang mga kasuguan sang Dios. “Wala sing bisan isa nga makahibalo sang imo ginhimo,” mahimo isiling nila. “Indi kami manugid.” Mahimo mamilit sila nga kabuangan ang pagsunod sa moral nga mga talaksan sang Biblia bangod wala man nagapahilabot ang Dios sa imo ginahimo. Bangod naugot sila nga wala ka nagapanghunahuna kag nagahulag kaangay nila, ayhan himuon nila ang tanan nila nga masarangan agod paluyahon ang imo pagpamalibad.

Matuod, indi mahapos landason ining mga pag-ipit, apang indi ini imposible. Dumduma si Enoc, ang ikapito nga tawo sa linya gikan kay Adan. (Judas 14) Sang nabun-ag si Enoc, ang kalabanan nga tawo nawad-an sang tanan nga igbalatyag sa moral. Makahuluya ang ila ginahambal; “makakilibang” ang ila ginahimo. (Judas 15) Naggawi sila kaangay sa madamo nga mga tawo karon.

Paano ini nalandas ni Enoc? Interesado kita karon sa sabat sa sini nga pamangkot. Bisan pa si Enoc na lamang ang tawo sa duta nga mahimo nagsimba kay Jehova sadto, wala gid man sia nagaisahanon. Si Enoc naglakat upod sa Dios.​​—⁠Genesis 5:⁠22.

Ang pagpahamuot sa Dios amo ang sentro sang kabuhi ni Enoc. Nahibaluan niya nga ang paglakat upod sa Dios wala lamang nagakahulugan nga magkabuhi sing matinlo kag matarong. Ginpaabot ni Jehova nga magbantala sia. (Judas 14, 15) Kinahanglan paandaman ang mga tawo nga natalupangdan ang ila di-diosnon nga mga binuhatan. Nagpadayon sa paglakat si Enoc upod sa Dios sing kapin sa 300 ka tuig​​—⁠mas malawig pa sa ginbatas sang bisan sin-o man sa aton. Padayon sia nga naglakat upod sa Dios tubtob sa iya kamatayon.​​—⁠Genesis 5:​23, 24.

Kaangay ni Enoc, ginsugo man kita nga magbantala. (Mateo 24:14) Dugang pa sa pagpamalaybalay nga pagpanaksi, ginatinguhaan naton nga lab-uton sing maayong balita ang mga himata, mga kakilala sa negosyo, kag mga kaeskwela. Apang, kon kaisa, mahimo mangalag-ag kita sa pagpanaksi. Nagakatabo bala ini sa imo? Indi madulaan sing paglaum. Iluga ang mga Cristiano sang una, kag mangamuyo sing kaisog sa Dios. (Binuhatan 4:29) Indi gid pagkalimti nga tubtob nagalakat ka upod sa Dios, wala ka gid nagaisahanon.

Naghanda sing Kalan-on ang Balo nga Babayi

Hunahunaa, nagbaton sing duha ka pagpakamaayo ang isa ka wala ginhingadlan nga balo nga babayi bangod naghanda sia sing isa ka simple nga kalan-on! Indi sia isa ka Israelinhon, kundi isa ka dumuluong nga nagkabuhi sang ikanapulo nga siglo B.⁠C.⁠E. sa banwa sang Sarepta. Daw halos maubos na ang gintigana nga pagkaon sang balo sa hingapusan sang madugay nga tigpalamangag kag tiggulutom. Ang nabilin sa  iya amo na lang ang isa ka hakop nga harina kag langis nga bastante lang sa isa ka kalan-an para sa iya kag sa iya bata nga lalaki.

Sa sining kahimtangan, may nag-abot nga bisita. Ang propeta sang Dios nga si Elias nangayo sang bahin sang hawothawot nga pagkaon sang balo. Haluson gani ini makaigo sa ila sang iya anak nga lalaki, kag wala gid sia sing mahatag sa bisita. Apang ginpasalig sia ni Elias, paagi sa pulong ni Jehova, nga kon hatagan niya sang iya pagkaon si Elias, sia kag ang iya anak nga lalaki indi paggutumon. Kinahanglan sing pagtuo agod patihan niya nga sia, nga isa ka dumuluong nga balo, talupangdon sang Dios sang Israel. Apang, nagpati sia kay Elias, kag ginpadyaan sia ni Jehova. “Ang tadyaw sang harina wala maubusi, kag ang tibud sang lana wala mawad-i, suno sa pulong ni Jehova nga pinamulong niya paagi kay Elias.” Wala mawad-an sang pagkaon ang balo kag ang iya bata nga lalaki tubtob natapos ang tiggulutom.​​—⁠1 Hari 17:​8-​16.

Apang, may isa pa ka pagpakamaayo nga naghulat sa balo. Pila ka tion pagkatapos sining milagro, nagmasakit ang iya pinalangga nga bata nga lalaki kag napatay. Bangod naluoy gid, nakiluoy si Elias kay Jehova nga banhawon ang bata nga lalaki. (1 Hari 17:17-​24) Kinahanglan sini ang isa ka wala pa gid matabo nga milagro. Wala sing rekord nga may bisan isa nga ginbanhaw antes sini! Kaluuyan bala liwat ni Jehova ining dumuluong nga balo? Huo. Ginhatagan ni Jehova sing gahom si Elias agod buhion liwat ang bata nga lalaki. Nagsiling si Jesus sang ulihi tuhoy sa sining pinasidunggan nga babayi: “Madamo sang mga balo nga babayi sa Israel . . . Apang ginpadala si Elias . . . sa isa ka balo nga babayi sa Sarepta sa duog sang Sidon.”​​—⁠Lucas 4:​25, 26.

Indi gid mapag-on ang kahimtangan sang ekonomiya karon, bisan sa manggaranon nga mga pungsod. Ang pila ka dalagku nga mga kompanya nagpahalin sing mga empleyado nga nangin matutom nga mga trabahador sa sulod sang mga dekada. Nagaatubang sa posibilidad nga mawad-an sing palangitan-an, mahimo masulay ang isa ka Cristiano nga maghinguyang sing tuman kadamo nga tion sa trabaho, nga nagalaum nga hawiran sia sang kompanya. Bangod sini, daw mawad-an na sia sing tion sa pagtambong sa Cristianong mga miting, sa pagpakigbahin sa ministeryo sa latagon, ukon sa pagtatap sang emosyonal kag espirituwal nga mga kinahanglanon sang iya pamilya. Apang, ginabatyag niya nga dapat makapabilin sia sa amo nga trabaho bisan ano man ang matabo.

May kinamatarong nga mabalaka ang isa ka Cristiano nga yara sa sining mabudlay nga kahimtangan sang pagpangabuhi. Mabudlay mangita sing obra karon. Kalabanan sa aton wala nagatinguha nga magmanggaranon, apang katulad sa balo sang Sarepta, luyag naton matigayon ang mga kinahanglanon sa kabuhi. Apang, si apostol Pablo nagapahanumdom sa aton nga ang Dios nagsiling: “Indi ko gid kamo pagbiyaan ukon pagpatumbayaan.” May pagsalig nga makasiling kita: “Si Jehova ang akon manugtabang; indi ako mahadlok. Ano ang mahimo sang tawo sa akon?” (Hebreo 13:​5, 6) Handa si Pablo sa pagtaya sang iya mismo kabuhi sa sina nga saad, kag pirme sia gin-atipan ni Jehova. Amo man sini ang himuon sang Dios sa aton kon indi naton sia pagtalikdan.

Mahimo batyagon naton nga indi gid naton matupungan ang talalupangdon nga mga hinimuan sang espirituwal nga mga indibiduwal subong nanday Moises, Gideon, kag David, apang sarang naton mailog ang ila pagtuo. Kag mahimo naton dumdumon ang simple nga mga buhat sang pagtuo nga ginpakita nanday Abel, Enoc, kag sang balo nga babayi nga taga-Sarepta. Interesado si Jehova sa tanan nga mga buhat sang pagtuo​​—⁠bisan sa magagmay nga mga buhat. Kon wala ginabaton sang isa ka mahinadlukon sa Dios nga estudyante ang droga gikan sa iya katubotubo, kon ginasikway sang isa ka nagatrabaho nga Cristiano ang imoral nga mga tanyag sa iya sa ulubrahan, ukon kon matutom nga nagatambong sa mga miting sa kongregasyon ang isa ka tigulang nga Saksi bisan ginakapoy kag mapigaw na ang panglawason, nakita ini ni Jehova. Kag nalipay gid sia!​​—⁠Hulubaton 27:11.

 Natalupangdan Mo Bala ang Ginahimo sang Iban?

Huo, natalupangdan ni Jehova kon ano ang aton ginahimo. Busa, subong mga manug-ilog sang Dios, dapat maabtik man kita nga magtalupangod sa mga panikasog sang iban. (Efeso 5:1) Ngaa indi mo pagtan-awon sing maayo ang mga hangkat nga ginaatubang sang imo mga masigka-Cristiano agod makatambong sa mga miting sang kongregasyon, makapakigbahin sa ministeryo sa latagon, ukon bisan gani makahimo sang ila adlaw-adlaw nga hilikuton?

Nian, pahibalua ang imo mga masigkasumilimba kay Jehova nga ginaapresyar mo ang ila mga panikasog. Malipay sila nga natalupangdan mo sila, kag ang imo pag-ulikid makapasalig sa ila nga nagatalupangod man si Jehova.