Isa ka Makawiwili nga Lista-Adlawan

ANG manuglagulad nga si Richard E. Byrd lima ka beses nga naglakbay sa Antarctica kutob sang 1928 tubtob 1956. Paagi sa paghupot sing isa ka lista-adlawan kag sing sibu nga rekord sa paglakbay, natun-an sang ila grupo ang direksion sang hangin, nakahimo sila sing mga mapa, kag nakatigayon sing nagakaigo nga impormasyon tuhoy sa kontinente sang Antarctica.

Ang mga paglagulad ni Byrd nagapakita sang kapuslanan sang paghupot sing lista-adlawan. Ginasulat diri ang mga detalye sang isa ka pagpanakayon sa dagat ukon sa kahawaan. Ini nga impormasyon magamit sa ulihi agod usisaon ang natabo ukon agod tun-an ang impormasyon nga mapuslanon sa ulihi nga mga paglakbay.

Ang Kasulatan nagahatag sing isa ka makawiwili nga rekord tuhoy sa Anaw sang adlaw ni Noe. Yadtong tugob-globo nga Anaw naglawig sing kapin sa isa ka tuig. Bilang paghanda sa Anaw, si Noe, ang iya asawa, kag ang ila tatlo ka anak nga lalaki kag ang ila mga asawa naghinguyang sing 50 ukon 60 ka tuig sa pagtukod sing arka​—⁠isa ka daku nga sakayan nga may kadakuon nga mga 40,000 ka metros kubikos. Ano ang katuyuan sini? Agod maluwas ang pila ka tawo kag sapat sa Anaw.​—⁠Genesis 7:1-3.

Gani, ang tulun-an nga Genesis sa Biblia nagaunod sang lista-adlawan ni Noe tuhoy sa kon ano ang natabo kutob sang nagsugod ang Anaw tubtob sang nagguwa sila sang iya pamilya sa arka. May kabilinggan bala ini karon para sa aton?