Mamati sa Ginasiling sang Espiritu!

“Ang may dulunggan magpamati sa ginasiling sang espiritu sa mga kongregasyon.”​—⁠BUGNA 3:⁠22.

1, 2. Ano nga laygay ang ginsulit sa mga mensahe ni Jesus sa pito ka kongregasyon nga ginsambit sa Bugna?

DAPAT mamati ang mga alagad ni Jehova sa gintuytuyan sang espiritu nga mga pinamulong ni Jesucristo sa pito ka kongregasyon nga ginsambit sa tulun-an nga Bugna sa Biblia. Sa pagkamatuod, ang tagsa ka mensahe nagaunod sini nga laygay: “Ang may dulunggan magpamati sa ginasiling sang espiritu sa mga kongregasyon.”​—⁠Bugna 2:​7, 11, 17, 29; 3:​6, 13, 22.

² Nabinagbinag na naton ang mga mensahe ni Jesus sa mga anghel, ukon mga manugtatap, sa Efeso, Smirna, kag sa Pergamo. Paano kita makabenepisyo sa iya ginsiling paagi sa balaan nga espiritu sa apat pa ka kongregasyon?

Sa Anghel sa Tiatira

3. Diin ang Tiatira, kag sa ano nga produkto nangin bantog gid ini?

³ Ang “Anak sang Dios” naghatag sing komendasyon kag pagsaway sa kongregasyon sang Tiatira. (Basaha ang Bugna 2:​18-​29.) Ang Tiatira (karon Akhisar) gintukod sa ubay sang isa ka sapa nga nagailig sa Suba Gediz (dumaan nga Hermus) sa nakatundan nga Asia Minor. Bantog ang siudad bangod sang pila ka produkto. Ang mga manughimo sang lugom sini naggamit sang gamot sang  madder subong amo ang ginhalinan sang bantog nga eskarlata, ukon purpura. Si Lydia, nga nangin Cristiano sang pagduaw ni Pablo sa Filipos sa Gresya, “manugbaligya sang purpura, sa siudad sang Tiatira.”​​—⁠Binuhatan 16:12-​15.

4. Ngaa gindayaw ang kongregasyon sa Tiatira?

⁴ Gindayaw ni Jesus ang kongregasyon sa Tiatira bangod sa maayo sini nga mga binuhatan, gugma, pagtuo, pagbatas, kag pagpanghikot sa ministeryo. Sa katunayan, ‘ang ila ulihi nga mga buhat labi pa sa mga nahauna.’ Apang, bisan may maayo kita nga hinimuan, indi gid kita magpatumbaya sa aton paggawi.

5-7. (a) Sin-o ang “babayi nga si Jesebel,” kag ano ang dapat himuon sa iya impluwensia? (b) Ang mensahe ni Cristo sa kongregasyon sa Tiatira nagabulig sa diosnon nga mga babayi nga himuon ang ano?

⁵ Ang kongregasyon sa Tiatira nagatugot sang idolatriya, sayop nga panudlo, kag seksuwal nga imoralidad. Yara sa tunga nila ang “babayi nga si Jesebel”​—⁠ayhan isa ka grupo sang mga babayi nga may batasan kaangay sang malauton nga si Reyna Jesebel sang napulo ka tribo nga Ginharian sang Israel. Ang pila ka iskolar nagpanugda nga ang ‘mga manalagna nga babayi’ sa Tiatira nagtinguha sa pagsulay sa mga Cristiano nga simbahon ang mga dios kag mga diosa sang mga negosyante kag makigbahin sa mga kapiestahan nga may ginahalad nga pagkaon sa mga idolo. Dapat wala sing nagtangdo-sa-kaugalingon nga manalagna nga babayi nga magmaniobra sa iban sa Cristianong kongregasyon karon!

⁶ Si Cristo ‘malapit na magpamasakit sa babayi nga si Jesebel, kag magpaantos sa dakung kapipit-an sa mga nagpakighilahi sa iya, kon indi sila maghinulsol sa mga buhat niya.’ Indi gid dapat magpadala ang mga manugtatap sa sining malaut nga panudlo kag impluwensia, kag wala sing Cristiano ang dapat magpakighilawas sa espirituwal kag pisikal ukon makigbahin sa idolatriya agod lamang mahibaluan nga ang “madalom nga mga butang ni Satanas” malaut gid. Kon pamatian naton ang paandam ni Jesus, ‘mahuptan naton ang yara sa aton,’ kag indi kita madaug sang sala. Bangod ginsikway sang nabanhaw nga mga hinaplas ang di-diosnon nga mga buhat, mga kailigbon, kag mga ambisyon, nabaton nila ang “awtoridad sa mga pungsod” kag magabuylog kay Cristo sa pagdugmok sa mga pungsod. Ang mga kongregasyon karon may simbuliko nga mga bituon, kag ang mga hinaplas hatagan sing “kabugwason,” ang Nobyo, si Jesucristo, kon banhawon sila pa langit.​​—⁠Bugna 22:16.

⁷ Ginpaandaman ang kongregasyon sa Tiatira nga indi pagtugutan ang malaut nga impluwensia sang apostata nga mga babayi. Ang gin-inspirar sang espiritu nga mensahe ni Cristo sa kongregasyon nagabulig sa diosnon nga mga babayi karon nga huptan ang gintangdo sang Dios nga duog para sa ila. Wala sila nagatinguha sa pagmando sa mga lalaki kag wala sila nagasulay sa kay bisan sin-o nga utod nga lalaki nga makighilawas sa espirituwal ukon sa pisikal. (1 Timoteo 2:12) Sa baylo, ini nga mga babayi nagapahamtang sing halimbawa sang maayong mga buhat kag pag-alagad sa kadayawan sang Dios. (Salmo 68:11; 1 Pedro 3:​1-6) Kon amligan sang kongregasyon ang yara sa sini​—⁠putli nga doktrina kag paggawi kag hamili nga pag-alagad sa Ginharian​—⁠magakari si Cristo nga may makalilipay nga mga padya, indi kalaglagan.

Sa Anghel sa Sardis

8. (a) Diin ang Sardis, kag ano ang pila ka detalye tuhoy sa sini? (b) Ngaa nagakinahanglan sing bulig ang kongregasyon sa Sardis?

⁸ Nagakinahanglan sing bulig sa gilayon ang kongregasyon sa Sardis bangod patay ini sa espirituwal. (Basaha ang Bugna 3:1-6.) Nahamtang mga 50 kilometros sa bagatnan sang Tiatira, ang Sardis isa ka matin-ad nga siudad. Bangod sang komersio, pagkamapatubason sang duog, kag produksion sang delana nga mga panapton kag mga alpombra, nangin manggaranon ini nga siudad nga may mga 50,000 anay ka pumuluyo. Suno sa istoryador nga si Josephus, ang Sardis may daku nga komunidad sang mga Judiyo sang unang siglo B.⁠C.⁠E. Lakip sa kagulub-an sang siudad amo  ang isa ka sinagoga kag isa ka templo sang diosa sang mga taga-Efeso nga si Artemis.

9. Ano ang aton dapat himuon kon ang aton pag-alagad pakulahaw lamang?

⁹ Ginsilingan ni Cristo ang anghel sa kongregasyon sa Sardis: “Nahibaluan ko ang imo mga buhat, nga may ngalan ka nga ikaw buhi, apang ikaw patay.” Ano abi kon nakilal-an kita nga nagamata sa espirituwal apang halos nagakatulog sa Cristianong mga pribilehiyo kag ang aton pag-alagad pakulahaw lamang kag ‘malapit na lang mapatay’ sa espirituwal? Nian dapat naton ‘padayon nga dumdumon kon paano naton nabaton kag nabatian’ ang mensahe sang Ginharian, kag dapat papagsikon naton liwat ang aton mga panikasog sa sagrado nga pag-alagad. Dapat gid kita magsugod sa pagpakigbahin sing bug-os tagipusuon sa Cristianong mga miting. (Hebreo 10:​24, 25) Ginpaandaman ni Cristo ang kongregasyon sa Sardis: “Kon indi ka magmata, magakara ako subong sang makawat, kag indi ka makahibalo kon sa ano nga takna magaabot ako sa imo.” Kamusta naman sa aton adlaw? Sa dili madugay manabat man kita.

10. Bisan sa kahimtangan nga kaangay sa Sardis, ano ang matuod sa pila ka Cristiano?

¹⁰ Bisan sa kahimtangan nga kaangay sa Sardis, ayhan may pila nga ‘wala magdagta sang ila mga kunop nga panapton kag makalakat upod kay Cristo sa maputi nga panapton kay mga takus sila.’ Nahuptan nila ang ila Cristianong identidad, nagpabilin nga wala sing dagta, nga wala sing higko sa moral kag sa relihion gikan sa sining kalibutan. (Santiago 1:27) Busa, ‘indi gid pagpanason ni Jesus ang ila ngalan gikan sa tulun-an sang kabuhi, kundi kilalahon niya sila sa atubangan sang iya Amay kag sang mga anghel.’ Bangod ginpahayag nga takus nga maglakat kaupod ni Cristo, ang iya nobya nga klase sang mga hinaplas panaptan sing nagaidlak, matinlo, kag manipis nga lino nga nagasimbulo sang matarong nga mga buhat sang mga balaan sang Dios. (Bugna 19:⁠8) Ang makalilipay nga mga pribilehiyo sang pag-alagad nga nagahulat sa ila sa langit nagapalig-on sa ila nga daugon ining kalibutan. May mga pagpakamaayo man nga nagahulat sa sadtong may paglaum nga mabuhi sing dayon diri sa duta. Ang ila mga ngalan nasulat man sa tulun-an sang kabuhi.

11. Ano ang aton dapat himuon kon daw ginatuyo kita sa espirituwal?

¹¹ Wala sing isa sa aton nga maluyag mangin kaangay sa makapasubo nga kahimtangan sa espirituwal sang kongregasyon sa Sardis. Apang ano kon mahantop naton nga daw ginatuyo kita sa espirituwal? Dapat maghulag kita gilayon para sa aton kaayuhan. Pananglitan naganyat kita sa di-diosnon nga mga paggawi ukon talagsa na lang nagatambong sa miting ukon nagapatumbaya sa aton ministeryo. Dapat mangayo kita sang bulig ni Jehova paagi sa hanuot nga pangamuyo. (Filipos 4:​6, 7, 13) Ang adlaw-adlaw nga pagbasa sing Biblia kag pagtuon sa Kasulatan kag mga publikasyon sang “matutom nga tulugyanan” makabulig agod makapabilin kita nga nagamata sa espirituwal. (Lucas 12:42-​44) Nian mangin kaangay kita sadtong sa Sardis nga nahamut-an ni Cristo, kag mangin pagpakamaayo kita sa mga masigkatumuluo.

Sa Anghel sa Filadelfia

12. Paano mo ilaragway ang relihioso nga kahimtangan sa dumaan nga Filadelfia?

¹² Gindayaw ni Jesus ang kongregasyon sa Filadelfia. (Basaha ang Bugna 3:​7-​13.) Ang Filadelfia (karon Alasehir) isa ka manggaranon nga sentro sang nagapatubas sing alak nga rehiyon sa nakatundan nga Asia Minor. Ang matuod, ang panguna nga dios sini amo si Dionysus, ang dios sang alak. Maathag nga ang mga Judiyo sa Filadelfia wala magmadinalag-on sa pagbuyok sa Judiyong mga Cristiano didto nga magpabilin ukon magbalik sa pila ka buhat sa Mosaikong Kasuguan.

13. Paano gingamit ni Cristo ang “yabi ni David”?

¹³ Si Cristo “may yabi ni David,” kag gintugyanan sia sang tanan nga mga intereses sang Ginharian kag sang pagdumalahan sang panimalay sang pagtuo. (Isaias 22:22; Lucas 1:32) Gingamit ni Jesus ini nga yabi agod buksan ang mga kahigayunan kag mga pribilehiyo may kaangtanan sa Ginharian sa mga Cristiano sa dumaan nga Filadelfia kag sa bisan diin. Sugod sang 1919 ginbutang niya sa atubangan sang “matutom nga tulugyanan” ang “isa ka daku nga ganhaan” nga nagadul-ong sa pagbantala sing Ginharian nga wala sing manugpamatok nga makasira. (1 Corinto 16:⁠9; Colosas 4:​2-4) Sa pagkamatuod, ang ganhaan pakadto sa mga pribilehiyo sa Ginharian ginsira sa mga sa “sinagoga ni Satanas,” kay indi sila espirituwal nga mga Israelinhon.

14. (a) Ano ang ginsaad ni Jesus sa kongregasyon sa Filadelfia? (b) Paano naton mahuptan nga indi mapaslawan sa “takna sang pagtilaw”?

 ¹⁴ Ginsaaran ni Jesus ang mga Cristiano sa dumaan nga Filadelfia: “Bangod ginbantayan mo ang pulong nahanungod sa akon pagbatas, bantayan ko man ikaw sa takna sang pagtilaw, nga magaabot sa bug-os napuy-an nga duta.” Ang pagbantala nagakinahanglan sing pagbatas kaangay sang ginpakita ni Jesus. Wala gid sia magpadaug sa kaaway kundi nagpadayon sia sa paghimo sang kabubut-on sang iya Amay. Busa, ginbanhaw si Cristo sa di-mamalatyon nga kabuhi sa langit. Kon magpabilin kita sa aton desisyon nga simbahon si Jehova kag sakdagon naton ang Ginharian paagi sa pagbantala sing maayong balita, indi kita mapaslawan sa panahon sang pagtilaw karon, ang “takna sang pagtilaw.” ‘Huptan naton ang yara sa aton’ nga halin kay Cristo paagi sa pagpadamo sadtong mga intereses sang Ginharian. Ang paghimo sini magaresulta sa malahalon gid nga langitnon nga purongpurong para sa mga hinaplas kag kabuhi nga wala sing katapusan naman sa duta para sa ila mainunungon nga mga kaupod.

15. Ano ang ginakinahanglan sa mangin ‘mga haligi sa templo sang Dios’?

¹⁵ Si Cristo nagsiling pa: “Ang nagadaug​—⁠himuon ko sia nga haligi sa templo sang akon Dios, . . . kag isulat ko sa iya ang ngalan sang akon Dios kag ang ngalan sang siudad sang akon Dios, ang bag-ong Jerusalem nga nagapanaug halin sa langit gikan sa akon Dios, kag ang akon bag-ong ngalan.” Ang hinaplas nga mga manugtatap dapat  magsakdag sang matuod nga pagsimba. Dapat magpabilin sila nga kalipikado nga mga katapo sang “bag-ong Jerusalem” paagi sa pagbantala tuhoy sa Ginharian sang Dios kag pagpabilin nga matinlo sa espirituwal. Kinahanglanon ini kon luyag nila nga mangin mga haligi sang ginhimaya nga langitnon nga templo kag agod makadala sila sang ngalan sang siudad sang Dios subong langitnon nga mga banwahanon sini kag makaambit sa ngalan ni Cristo subong iya nobya. Kag siempre, dapat may mga dulunggan sila “sa pagpamati sa ginasiling sang espiritu sa mga kongregasyon.”

Sa Anghel sa Laodicea

16. Ano ang pila ka impormasyon tuhoy sa Laodicea?

¹⁶ Ginsaway ni Cristo ang nagapulupatawhay nga kongregasyon sa Laodicea. (Basaha ang Bugna 3:​14-​22.) Mga 150 kilometros sa sidlangan sang Efeso kag nahamtang sa ginsang-an sang dalagku nga mga ruta sa negosyo sa mauya nga nalupyakan sang Suba Lycus, manggaranon gid nga siudad ang Laodicea nga nagapatubas sing mga produkto kag sentro sang negosyo. Bantog ang mga panapton nga human sa itom nga delana sang rehiyon. Subong amo ang ginahamtangan sang bantog nga eskwelahan sa medisina, posible nga ang Laodicea amo ang nagapatubas sang bulong sa mata nga ginatawag nga pulbos nga Phrygianhon. Si Asclepius, isa ka dios sang medisina, amo ang isa sang panguna nga mga dios sang siudad. Daw may daku nga populasyon sang mga Judiyo ang Laodicea, kag ang pila sa ila maathag nga manggaranon gid.

17. Ngaa ginsabdong ang mga taga-Laodicea?

¹⁷ Nagapatuhoy sa kongregasyon sa Laodicea paagi sa “anghel” sini, naghambal nga may awtoridad si Jesus subong ang “matutom kag matuod nga saksi, ang pamuno sang pagpanuga sang Dios.” (Colosas 1:​13-​16) Ginsabdong ang mga taga-Laodicea bangod ‘indi sila mabugnaw ukon mainit’ sa espirituwal. Bangod maalabaab sila, ibuga sila ni Cristo. Indi kuntani mabudlay sa ila nga mahangpan ining ilustrasyon. Ang kaingod nga Hierapolis may mainit nga mga tuburan, kag ang Colosas may mabugnaw nga tubig. Apang bangod malawig pa ang pagpailig sang tubig sa tubo pakadto sa Laodicea, maalabaab na ini kon makalab-ot sa siudad. Sa pila ka bahin, ginapaagi ini sa kanal. Malapit sa Laodicea, nagailig ini sa may buho nga mga bloke sang bato nga ginsemento.

18, 19. Paano mabuligan ang mga Cristiano karon nga kaanggid sa mga taga-Laodicea sadto?

¹⁸ Ang mga indibiduwal karon nga kaanggid sa mga taga-Laodicea indi makapapagsik ang kainit ukon makapaumpaw ang kabugnaw. Kaangay sang maalabaab nga tubig, ibuga sila! Indi luyag ni Jesus nga mangin mga humalambal niya sila, subong hinaplas nga “mga embahador nga salili kay Cristo.” (2 Corinto 5:20) Kon indi sila maghinulsol, madula nila ang ila pribilehiyo subong mga manugbantala sang Ginharian. Ginhingamo sang mga taga-Laodicea ang dutan-on nga mga manggad kag ‘wala makahibalo nga kailo sila, makaluluoy, imol, bulag, kag hubo.’ Agod madula ang ila espirituwal nga kaimulon, pagkabulag, kag pagkahubo, ang bisan sin-o nga kaangay sa ila karon dapat magbakal kay Cristo sang ‘inulay nga bulawan’ sang natilawan nga pagtuo, ‘puti nga pangsampaw nga panapton’ sang pagkamatarong, kag sang “inughaplas sa mata” nga nagapasanag sang espirituwal nga panan-aw. Ang Cristianong mga manugtatap malipay sa pagbulig sa ila nga mangin mahunahunaon sa ila espirituwal nga kinahanglanon agod sila mangin “manggaranon sa pagtuo.” (Santiago 2:⁠5; Mateo 5:⁠3) Dugang pa, dapat buligan sila sang mga manugtatap nga magbutang sang espirituwal nga “inughaplas sa mata”​—⁠nga batunon kag sundon ang panudlo, laygay, halimbawa, kag panghunahuna ni Jesus. Ini ang makabulong batok sa ‘kailigbon sang unod kag sa kailigbon sang mga mata kag sa pagpadayawdayaw sang palangabuhian sang isa.’​​—⁠1 Juan 2:​15-​17.

¹⁹ Ginasabdong kag ginadisiplina ni Jesus yadtong ginapalangga niya. Ang mga manugtatap sa idalom niya dapat maghimo sing amo man nga butang nga may kalum-ok. (Binuhatan 20:​28, 29) Ang mga taga-Laodicea dapat “mangin makugi kag maghinulsol,” nagabag-o sang ila panghunahuna kag paagi sang pagkabuhi. Bueno, ang pila bala sa aton naanad na sa estilo sang pagkabuhi nga nagabutang sang aton sagrado nga pag-alagad sa Dios nga ikaduha lamang sa aton kabuhi? Kon amo ‘magbakal kita sang inughaplas sa mata gikan kay Jesus’ agod makita naton ang importansia sang makugi nga pag-una sa Ginharian.​​—⁠Mateo 6:⁠33.

20, 21. Sin-o ang nagasabat sing nagakaigo sa ‘pagpanuktok’ ni Jesus karon, kag ano ang ila palaabuton?

²⁰ “Yari karon!” siling ni Cristo, “nagatindog  ako sa ganhaan kag nagapanuktok. Kon ang bisan sin-o nga makabati sang akon tingog kag magbukas sang ganhaan, magasulod ako sa iya balay kag magapanihapon kaupod niya kag sia kaupod nakon.” Masami nga nagapaambit si Jesus sang espirituwal nga instruksion kon nagakaon sia. (Lucas 5:​29-​39; 7:​36-​50; 14:​1-​24) Nagapanuktok sia karon sa kongregasyon nga kaangay sa Laodicea. Ang mga katapo bala sini magabukas sa iya pagpanuktok, magabalik sang ila pagpalangga sa iya, magaabiabi sa iya sa tunga nila, kag magpatudlo sa iya? Kon amo, magasalo si Cristo sa ila para sa ila daku nga kaayuhan sa espirituwal.

²¹ Ang “iban nga mga karnero” karon malaragwayon nga nagapasulod kay Jesus, kag ini nga buhat nagadul-ong sa kabuhi nga wala sing katapusan. (Juan 10:16; Mateo 25:34-​40, 46) Sa tagsa ka hinaplas nga nagdaug, hatagan sia ni Cristo sing pribilehiyo nga ‘maglingkod kaupod niya sa iya trono, subong nga sia nagdaug kag naglingkod kaupod sa iya Amay sa Iya trono.’ Huo, sa hinaplas nga mga manugdaug, nagsaad si Jesus sang daku nga padya sang isa ka trono kaupod niya sa tuo nga kamot sang iya Amay sa langit. Kag ang nagadaug nga iban nga mga karnero nagapaabot sa isa ka makalilipay nga duog sa duta sa idalom sang paggahom sang Ginharian.

Mga Leksion sa Aton Tanan

22, 23. (a) Paano makabenepisyo ang tanan nga Cristiano sa mga pinamulong ni Jesus sa pito ka kongregasyon? (b) Ano dapat ang aton determinasyon?

²² Wala sing duhaduha nga ang tanan nga mga Cristiano makabenepisyo gid gikan sa mga pinamulong ni Jesus sa pito ka kongregasyon sa Asia Minor. Halimbawa, bangod nahibaluan nga naghatag sing nagakaigo nga komendasyon si Cristo, ang mahigugmaon nga Cristianong mga gulang napahulag nga hatagan sing komendasyon ang mga indibiduwal kag mga kongregasyon nga nagahimo sing maayo sa espirituwal. Kon may mga kaluyahon nga nagaluntad, ginabuligan sang mga gulang ang ila mga masigkatumuluo nga iaplikar ang mga prinsipio sa Kasulatan. Kita tanan makapadayon sa pagbenepisyo gikan sa nagkalainlain nga bahin sang laygay ni Cristo sa pito ka kongregasyon, basta ginaaplikar naton ini sing mapinangamuyuon kag wala sing langan.⁠ *

²³ Ining katapusan nga mga adlaw indi tion sa pagpabuyanbuyan, materyalismo, ukon sa bisan ano pa nga mahimo bangdan sang aton pakulahaw nga pag-alagad sa Dios. Busa kabay nga ang tanan nga kongregasyon magapabilin nga nagasiga sing masanag subong mga kandelero nga ginbutang ni Jesus sa ila duog. Subong matutom nga mga Cristiano, kabay nga mangin determinado kita sa pagpamati kon nagahambal si Cristo kag sa ginasiling sang espiritu. Nian matigayon naton ang walay katapusan nga kalipay subong mga manugdala sang kapawa sa himaya ni Jehova.

[Nota]

Ano ang Imo Sabat?

• Sin-o ang “babayi nga si Jesebel,” kag ngaa indi sia dapat ilugon sang diosnon nga mga babayi?

• Ano nga kahimtangan ang nagluntad sa kongregasyon sa Sardis, kag ano ang aton himuon agod indi kita mangin kaangay sa madamo nga mga Cristiano nga nagkabuhi didto?

• Ano ang ginsaad ni Jesus sa kongregasyon sa Filadelfia, kag paano ini naaplikar karon?

• Ngaa ginsabdong ang mga taga-Laodicea, apang ano ang malauman sang makugi nga mga Cristiano?

[Mga Pamangkot sa Pagtinuon]

[Retrato sa pahina 16]

Dapat likawan ang malaut nga mga dalanon sang “babayi nga si Jesebel”

[Mga retrato sa pahina 18]

Ginpahamtang ni Jesus sa atubangan sang iya mga sumulunod ang “daku nga ganhaan” nga nagapadulong sa mga pribilehiyo sa Ginharian

[Retrato sa pahina 20]

Ginaabiabi mo bala si Jesus kag ginapamatian sia?