Pilia ang Kabuhi nga Walay Katapusan

ANG katawhan wala pa gid makaatubang sing madamo nga pililian. Halimbawa, kon ano nga mga panapton ang aton suksukon, kon ano nga pagkaon ang aton kaunon, kag kon sa diin kita magatrabaho kag magapuyo masami mga butang nga ginapili. Sa madamo nga bahin sang kalibutan, ang pagpili sa tiayon isa man ka kustombre. Apang, ginapresentar sang Biblia ang isa ka pililian nga labaw pa sa tanan nga mga pililian​​—⁠isa nga bukas para sa tanan nga katawhan.

Ang Biblia nagasiling: “Ang malig-on nga nagatindog sa pagkamatarong takus sa kabuhi, apang ang nagahingamo sa kalainan takus sa iya kamatayon.” (Hulubaton 11:19) Kag nagsiling si Jesucristo: “Ini nagakahulugan sing kabuhi nga walay katapusan, ang pagkuha nila sing ihibalo tuhoy sa imo, ang lamang matuod nga Dios, kag tuhoy sa isa nga imo ginpadala, si Jesucristo.”​​—⁠Juan 17:3.

Huo, ang aton Manunuga naghatag sa aton sing kahigayunan agod pilion ang isa ka dalanon nga nagadul-ong sa kabuhi nga walay katapusan! Ano ang dapat naton himuon agod maagom ang kabuhi nga walay katapusan?

Suno sa Biblia, “sa dalanon sang pagkamatarong may kabuhi.” (Hulubaton 12:28) Makaupod kita sa mga matarong nga yara sa dalanon sang kabuhi nga walay katapusan. Paano? Paagi sa pagpat-od nga ang aton pagkabuhi nagahisanto sa kabubut-on sang Dios kag sa iya mga sugo. (Mateo 7:​13, 14) Busa, kabay nga magahimo kita sing husto nga pagpili kag magabaton sa dulot sang Dios nga kabuhi nga walay katapusan.​​—⁠Roma 6:⁠23.