Ang Paghatag nga Nagapahamuot sa Dios

SI Jesus kag ang iya mga disipulo manamit nga nagapanyapon sa Betania upod ang pila ka suod nga abyan, upod sanday Maria, Marta, kag ang bag-o lang ginbanhaw nga si Lazaro. Sang nagkuha si Maria sing isa ka libra sang malahalon nga lana kag ginhaplas sa mga tiil ni Jesus, nangakig si Judas Iscariote kag nagreklamo. “Ngaa nga wala ginbaligya ining mahumot nga lana sa tatlo ka gatos ka denario [halos katumbas sang isa ka tuig nga sueldo] kag ginhatag sa mga imol?” protesta niya. Maabtik nga nagreklamo man ang iban.​​—⁠Juan 12:​1-6; Marcos 14:​3-5.

Apang, si Jesus nagsabat: “Pabay-i ninyo sia. . . . Kay ang mga imol kaupod ninyo sa gihapon, kag bisan san-o nga luyag ninyo makahimo kamo gihapon sing maayo sa ila, apang ako indi ninyo kaupod sa tanan nga tion.” (Marcos 14:​6-9) Gintudlo sang Judiyong relihioso nga mga lider nga ang paghatag sing donasyon para sa mga imol indi lamang maayo nga kinaiya kundi makabayad pa gani sang mga sala. Sa pihak nga bahin, ginpaathag ni Jesus nga ang paghatag nga nagapahamuot sa Dios indi limitado sa maluluy-on nga mga dulot sa imol.

Ang malip-ot nga pagbinagbinag kon paano ginahimo ang paghatag sa Cristianong kongregasyon sang una magapadaku sang pila ka praktikal nga mga paagi kon paano naton mapakita ang kabalaka kag gani mapahamut-an ang Dios sa aton paghatag. Ipakita man sini ang isa ka pinasahi nga paagi sang paghatag nga mapuslanon gid.

“Maghatag sing mga Dulot sang Kaluoy”

Pila ka beses nga ginpalig-on ni Jesus ang iya mga disipulo nga “maghatag sing mga dulot sang kaluoy,” ukon sa iban nga mga pagbadbad, nga “magpanglimos” ukon “ihatag ang kuwarta sa mga imol.” (Lucas 12:33; Ang Biblia kag Maayong Balita nga Biblia, sang Philippine Bible Society) Apang, nagpaandam si Jesus batok sa mga pagpakitakita sa tuyo lamang nga himayaon ang naghatag sa baylo nga himayaon ang Dios. “Kon maghatag ka sing mga dulot sang kaluoy,” siling niya, “indi ka magpatunog sing budyong sa imo unahan, subong sang ginahimo sang mga salimpapaw sa mga sinagoga kag sa mga dalan, agod himayaon sila sang mga tawo.” (Mateo 6:​1-4) Sa pag-aplikar sining laygay, ginlikawan sang mga Cristiano sang una ang pagpadayawdayaw sang mga debotado nga relihioso nga mga lider sang ila panahon kag ginpakamaayo nga magbulig sa mga nagakinahanglan paagi sa paghatag sing personal nga mga serbisyo ukon mga dulot.

Halimbawa, sa Lucas 8:1-​3, ginasugiran kita nga sanday Maria Magdalena, Juana, Susana, kag iban  pa naggamit sang “ila mga pagkabutang” sa wala nagapadayawdayaw nga pag-atipan kay Jesus kag sa iya mga apostoles. Bisan ining mga lalaki indi imol, ginbiyaan nila ang ila mga palangitan-an agod bug-os nga ihinguyang ang ila ikasarang sa ministeryo. (Mateo 4:​18-​22; Lucas 5:​27, 28) Paagi sa pagbulig sa ila nga tumanon sing madinalag-on ang ila hatag-Dios nga mga hilikuton, ining mga babayi, subong resulta, naghimaya sa Dios. Kag ginpakita sang Dios ang iya apresasyon paagi sa pagtipig sa rekord sang ila maluluy-on nga kaalwan sa Biblia agod mabasa sang palaabuton nga mga henerasyon.​​—⁠Hulubaton 19:17; Hebreo 6:⁠10.

Si Dorcas isa man ka maluluy-on nga babayi nga “puno sang maayong mga buhat kag mga dulot sang kaluoy.” Naghimo sia sing mga panapton para sa imol nga balo nga mga babayi sa iya higad-baybay nga banwa sang Joppe. Kon bala sia mismo ang nagbakal sang mga materyales ukon wala lamang nagsukot sang iya kabudlay, wala kita makahibalo. Walay sapayan, bangod sang iya maayo nga buhat ginpalangga sia sang iya mga nabuligan, subong man sang Dios, nga maluluy-on nga nagpadya sang iya kaayo.​​—⁠Binuhatan 9:​36-​41.

Ang Husto nga Motibo Importante

Ano ang nagpahulag sa sini nga mga indibiduwal agod maghatag? Indi lamang ini kaluoy nga nabatyagan subong reaksion sa makatandog-balatyagon nga pagpangayo sing bulig. Nagbatyag sila sing personal nga katungdanan nga maghimo sang ila bug-os nga masarangan adlaw-adlaw agod buligan ang mga nagaantos sing kaimulon, kapiutan, balatian, ukon iban pa nga mga kabudlayan. (Hulubaton 3:​27, 28; Santiago 2:​15, 16) Ini amo ang sahi sang paghatag nga nagapahamuot sa Dios. Panguna nga ginapahulag ini sang tudok nga gugma sa Dios kag sang handum nga ilugon ang iya maluluy-on kag mahinatagon nga personalidad.​​—⁠Mateo 5:​44, 45; Santiago 1:⁠17.

Ginpadaku ni apostol Juan ining importante nga aspekto sang paghatag sang namangkot sia: “Ang bisan sin-o nga may pangabuhian sining kalibutan kag nakita niya ang iya utod nga nagakinahanglan apang nagatakop sang ganhaan sang iya mapinalanggaon nga pagkaluoy sa iya, sa ano bala nga paagi nga ang gugma sang Dios nagapabilin sa iya?” (1 Juan 3:17) Maathag ang sabat. Ang gugma sa Dios nagapahulag sa mga tawo nga mangin mahinatagon. Ginaapresyar kag ginapadyaan sang Dios ang mga tawo nga, kaangay niya, maalwan man. (Hulubaton 22:⁠9; 2 Corinto 9:​6-​11) Makita bala naton ini nga sahi sang pagkamahinatagon karon? Binagbinaga ang natabo kasan-o lang sa isa ka kongregasyon sang mga Saksi ni Jehova.

Ang balay sang isa ka tigulang nga Cristianong babayi gubaon na gid. Nagaisahanon lang sia kag wala sing pamilya nga makabulig sa iya. Sa mga tinuig na, nangin bukas pirme ang iya puluy-an agod hiwatan sang Cristianong mga miting, kag masami niya ginapakaon ang bisan sin-o nga magbaton sang iya pangagda. (Binuhatan 16:​14, 15, 40) Sang nakita ang iya kahimtangan, ang mga katapo sang kongregasyon naghulag sing tingob agod buligan sia. Ang iban naghatag sing kuarta, ang iban naman nagtanyag sang ila kabudlay. Sa sulod sang pila ka talipuspusan sang semana, ang mga boluntaryo nagpang-atop, naghimo sing bag-o nga banyo, nagsemento kag nagpinta sang bug-os nga unang panalgan, kag  nagtakod sing bag-o nga mga kabinet sa kusina. Ang pagbulig wala lamang nagpuno sa kinahanglanon sang tigulang kundi nagpasuod man sa kongregasyon kag nagtandog sa mga kaingod subong halimbawa sang tunay nga Cristianong pagbinuligay.

Madamo sing paagi nga personal kita nga makabulig sa iban. Mahatagan bala naton sing tion ang isa ka ilo nga bata? Makapamalaklon bala kita ukon makapanahi para sa isa ka tigulang nga balo nga babayi nga kilala naton? Makahatag bala kita sing pagkaon ukon kuarta para sa isa nga pigado? Makabulig kita bisan indi kita manggaranon. Si apostol Pablo nagsulat: “Kon ang pagkahanda yara na nga daan, labi ini nga kalahamut-an suno sa yara sa isa ka tawo, indi suno sa wala sa iya.” (2 Corinto 8:12) Apang, ining personal, direkta nga paghatag bala amo lamang ang sahi sang pagbulig nga pakamaayuhon sang Dios? Indi.

Paano Naman ang Organisado nga Pagbulig?

Kon kaisa indi bastante ang personal nga mga panikasog. Sa pagkamatuod, si Jesus kag ang iya mga apostoles may kumon nga pundo para sa mga imol, kag nagbaton sila sang mga donasyon nga kuarta halin sa mga mainulikdon nga mga tawo nga napakig-angutan nila sa ila hilikuton. (Juan 12:​6; 13:29) Subong man, ang unang siglo nga mga kongregasyon nagbaton sing mga donasyon kon kinahanglanon kag nag-organisar sang mas masangkad nga pagbulig.​​—⁠Binuhatan 2:​44, 45; 6:​1-3; 1 Timoteo 5:​9, 10.

Ang isa ka hitabo nag-utwas sang mga 55 C.⁠E. Namigado ang mga kongregasyon sa Judea, ayhan bangod sa daku nga tiggulutom nga bag-o lang sadto natapos. (Binuhatan 11:27-​30) Si apostol Pablo, nga nagaulikid pirme sa mga imol, nagpangayo sang bulig sa mga kongregasyon tubtob sa Macedonia. Personal nga gin-organisar niya ang pagbaton sing donasyon kag nagsugo sa gintangduan nga mga lalaki nga magdul-ong sini. (1 Corinto 16:​1-4; Galacia 2:10) Wala sia ukon bisan isa man sa ila ang nagbaton sing kabayaran para sa ila kabudlay.​​—⁠2 Corinto 8:​20, 21.

Ang mga Saksi ni Jehova karon maabtik man sa pagbulig kon may mga kalamidad. Halimbawa, sang tig-ilinit sang 2001, nagbaha sing madalom sa Houston, Texas, E.⁠U.⁠A., bangod sang mabaskog nga bagyo. Sa kabilugan, 723 ka puluy-an sang mga Saksi ang nahalitan, nga madamo sini ang nahalitan sing daku. Isa ka disaster relief nga komite nga ginahuman sang kalipikado nga Cristianong mga gulang ang gintukod gilayon agod hibaluon ang mga kinahanglanon sang kada indibiduwal kag magbutang sing mga pundo agod buligan ang lokal nga mga Saksi sa pag-atubang sang sitwasyon kag pagkaayo sang ila mga puluy-an. Ang handa nga mga boluntaryo gikan sa malapit nga mga kongregasyon amo ang nag-obra sang tanan. Gin-apresyar gid sang isa ka Saksi ang bulig amo nga sang nabaton niya ang kuarta gikan sa kompanya sang paseguro para sa mga kalay-uhon sa iya balay, gilayon niya nga gindonar ang kuarta sa pundo agod mabuligan man ang iban.

Apang, kon tuhoy sa mga organisasyon nga nagabulig sa mga imol kag nalisdan, kinahanglan  mangin mahalungon kita samtang ginausisa naton ang mga nabaton naton nga pagpangayo sang donasyon. Ang pila sini nga mga organisasyon may daku nga kagastuhanan para sa ila talapuanan ukon gasto sa pagpangampanya sang donasyon, nga diutay na lamang nga bahin sang nakolekta nga kuarta ang mabilin para sa orihinal nga katuyuan. Ang Hulubaton 14:15 nagasiling: “Ang bisan sin-o nga di-eksperiensiado nagatuo sa tagsa ka pulong, apang ang isa nga maalam nagabinagbinag sang iya mga tikang.” Gani maalamon nga usisaon naton sing mahalungon ang mga butang.

Ang Paghatag nga Mapuslanon Gid

May isa ka sahi sang paghatag nga mas importante pa sangsa paghatag sing donasyon para sa mga kubos. Ginpatuhuyan ini ni Jesus sang ang isa ka manggaranon lamharon nga pangulo namangkot kon ano ang iya dapat himuon agod maagom ang kabuhi nga walay katapusan. Ginsilingan sia ni Jesus: “Lakat ka kag ibaligya ang imo mga pagkabutang kag ihatag mo sa mga imol kag maangkon mo ang bahandi sa langit, kag kari mangin sumulunod ko ikaw.” (Mateo 19:16-​22) Talupangda nga wala magsiling si Jesus, ‘Maghatag sa mga imol kag maagom mo ang kabuhi.’ Sa baylo, nagsiling pa sia, “Kari mangin sumulunod ko ikaw.” Buot silingon, bisan dalayawon kag mapuslanon man ang pagkamahinatagon sa mga kubos, labaw pa ang nadalahig sa katungdanan sang isa ka Cristiano.

Ang panguna nga interes ni Jesus amo ang pagbulig sa iban sa espirituwal. Wala madugay antes sia mapatay, nagsiling sia kay Pilato: “Tungod sini natawo ako, kag tungod sini nagkari ako sa kalibutan, agod magpanaksi ako sa kamatuoran.” (Juan 18:37) Bisan pa nanguna sia sa pagbulig sa mga imol, pag-ayo sa mga masakiton, kag pagpakaon sa mga ginagutom, labi nga ginhanas ni Jesus ang iya mga disipulo agod magbantala. (Mateo 10:​7, 8) Sa pagkamatuod, isa sa hingapusan niya nga instruksion sa ila amo ang sugo: “Busa lakat kamo kag maghimo sing mga disipulo sa mga tawo sa tanan nga kapungsuran.”​​—⁠Mateo 28:​19, 20.

Siempre pa, indi masolbar sang pagbantala ang tanan nga problema sa kalibutan. Apang, ang pagpaambit sa maayong balita sang Ginharian sang Dios sa tanan nga katawhan nagahimaya sa Dios bangod ang pagbantala nagatuman sa kabubut-on sang Dios kag nagabukas sa dalan pakadto sa walay katapusan nga mga kaayuhan para sa mga nagabaton sa mensahe sang Dios. (Juan 17:⁠3; 1 Timoteo 2:​3, 4) Ngaa indi ka mamati sa mga Saksi ni Jehova sa sunod nila nga pagduaw? Nagadala sila sing espirituwal nga dulot. Kag nakahibalo sila nga amo ini ang pinakamaayo nga paagi agod makahatag sa imo.

[Mga retrato sa pahina 6]

Madamo sing paagi agod ipakita nga nagaulikid kita

[Retrato sa pahina 7]

Ang aton pagbantala sang maayong balita nagapahamuot sa Dios kag nagabukas sang dalan pakadto sa walay katapusan nga mga kaayuhan