Ano ang Nagakatabo sa Pagkamahinatagon?

PAGKATAPOS sang Septiembre 11, 2001, nga mga pag-atake sa New York City kag sa Washington, D.C., ang pagsuportar sang publiko sa mga biktima sang trahedya talalupangdon. Nalumsan sa $2.7 bilyones nga mga donasyon ang mga organisasyon nga nagabulig sa mga kubos agod atipanon ang pamilya sang mga biktima. Nakibot sa kasangkaron sang kahalitan, ang mga tawo bisan diin luyag nga magbulig.

Apang, madasig nga naugot ang pila ka mga tawo, sang may naggua nga mga alegasyon nga ining prominente nga mga organisasyon nagpalapaw sang mga pundo. Madamo ang naakig sa report nga ang isa ka daku nga organisasyon nga nagabulig sa mga kubos nagplano nga taguon ang halos katunga sang $546 milyones nga nabaton sini kag gamiton ini sa iban nga mga katuyuan. Bisan pa ginbawi sang ulihi sang organisasyon ang desisyon sini kag nangayo sing pasaylo, ang isa ka reporter nagsiling: “Ginatamod sang mga kritiko ining importante nga pagbawi sang desisyon nga ulihi na kag indi na makapasag-uli pa sang pagsalig” nga gin-agom sang organisasyon antes sang mga pag-atake. Kamusta naman ikaw? Naghuyang bala ang imo pagsalig sining karon lang sa sini nga mga organisasyon?

Makabulig Ukon Indi?

Ang pagdonar sa sini nga mga organisasyon ginakabig sa masami nga dalayawon. Apang, indi tanan nagaugyon. Kapin sa 200 ka tuig sang una, si Samuel Johnson, ang manunulat nga taga-Inglaterra, nagsiling: “Mas sigurado ka nga nagahimo ka sing maayo kon ginahatag mo ang kuarta sa mga nagaobra, subong kabayaran sang ila kabudlay, sangsa ginadonar mo lang ang kuarta.” May pila nga nagapangalag-ag man karon sa pagdonar, kag ang mga report tuhoy sa mga organisasyon nga nagapalapaw ukon indi maayo nga nagapatikang sa mga donasyon wala nagapabakod sa kompiansa sang publiko. Binagbinaga ang duha ka natabo kasan-o lang.

Ang isa ka direktor sang isa ka relihioso nga organisasyon nga nagabulig sa mga kubos sa San Francisco ginpahalin pagkatapos sang alegasyon nga ginpabayaran niya sa iya ahensia ang iya pagpa-plastic surgery kag ang iya $500 kada semana nga gasto sa mga restawran sa sulod sang duha ka tuig. Sa Britanya, nahuy-an ang mga nag-organisar sing isa ka daku nga pagpangampanya sang donasyon sa telebisyon sang madiskobrehan nga sa 6.5 milyones ka pound (mga $10 milyones, U.⁠S.) nga ginpadala sa Romania agod magpatindog sing bag-o nga mga balay-alaypan, 12 lamang ka manubo sing kalidad nga mga balay ang napatindog, kag indi mapaathag kon diin gingasto ang ginatos ka libo nga dolyar. Ang  negatibo nga mga report kaangay sini naghimo sa pila ka mga nagadonar nga mangin mahalungon tuhoy sa kon pila ang ila idonar kag kon kay sin-o.

Mahatag Ukon Indi

Apang, masubo man nga patyon naton ang aton tunay nga pag-ulikid kag kaluoy para sa iban bangod lamang sa ginhimo sang pila ka indibiduwal ukon organisasyon. Ang Biblia nagasiling: “Ang porma sang pagsimba nga matinlo kag walay dagta gikan sa pagtamod sang aton Dios kag Amay amo ini: ang pag-atipan sa mga ilo kag sa balo nga mga babayi sa ila kapipit-an.” (Santiago 1:27) Huo, ang aktibo nga pagbulig sa mga kubos kag mga imol importante nga bahin sang Cristianismo.

Apang, mahimo ka mamangkot, ‘Dapat ko bala padayunon ang pagdonar sa mga organisasyon nga nagabulig sa mga kubos, ukon dapat bala personal na lang ako nga maghatag sing bulig sa mga indibiduwal?’ Ano nga sahi sang paghatag ang ginalauman sang Dios? Binagbinagon ini nga mga pamangkot sa masunod nga artikulo.