“Indi Mahadlok Ukon Makugmat”

“Indi mahadlok ukon makugmat. . . . Si Jehova kaupod ninyo.”​—⁠2 CRONICA 20:17.

1. Ano ang epekto sang terorismo sa mga tawo, kag ngaa natural lang nga mahadlok sila?

TERORISMO! Ang pagsambit lamang sa sining tinaga nagatuga sing kahadlok kag nagapabatyag sing walay kasiguruhan kag proteksion. Nagapukaw ini sing kakugmat, kalisod, kag kaakig. Kag ginalaragway sini ang ginakahadlukan sang madamo nga magatublag sa katawhan sa mga tinuig nga magaabot. May basihan gid ini nga kahadlok bangod sang kamatuoran nga ang iban nga mga pungsod indi madinalag-on sa ila madugay na nga pagpakig-away batok sa terorismo.

2. Ano ang reaksion sang mga Saksi ni Jehova sa problema tuhoy sa terorismo, nga nagadul-ong sa anong mga pamangkot?

² Walay sapayan sini, may rason gid agod maglaum. Ang mga Saksi ni Jehova, nga aktibo nga nagabantala sa 234 ka pungsod kag teritoryo sa duta, malaumon gid. Sa baylo nga mahangawa nga basi indi na madula ang terorismo, nagasalig sila nga madula ini sa indi madugay. Makatarunganon bala nga maglaum kaangay nila? Sin-o gid bala ang makadula sini nga salot sa kalibutan, kag paano ini matabo? Sanglit kita tanan naapektuhan sang nagkalainlain nga sahi sang kasingki, nagakaigo nga usisaon ang rason sa sini nga pagkamalaumon.

3. Ano ang mga ginatunaan sang kahadlok, kag ano ang gintagna tuhoy sa tion naton?

 ³ Ang mga tawo karon nahadlok kag nakugmat bangod sang nagkalainlain nga mga rason. Hunahunaa ang madamo nga mga tawo nga indi na makasarang sa pag-atipan sang ila kaugalingon bangod sang katigulangon, ang mga indibiduwal nga amat-amat nga nagaluya bangod sang indi na mabulong nga mga balatian, kag ang mga pamilya nga nagahimakas agod mabuhi. Sa pagkamatuod, hunahunaa ang walay kapat-uran mismo sang kabuhi! Ang aksidente ukon kalamidad mahimo tunaan sang hinali nga kamatayon, sa amo ginadula ang tanan nga butang nga ginapakabahandi naton. Ini nga kahadlok kag kabalaka, pati na ang madamong personal nga mga di-paghangpanay kag mga kapaslawan, nagahimo sang aton tion nga nagahisanto sa ginlaragway ni apostol Pablo: “Hibalua ini, nga sa katapusan nga mga adlaw magaabot ang makahalanguyos nga mga tion nga mabudlay pakigbagayan. Kay ang mga tawo mangin mga mahigugmaon sang kaugalingon, . . . mga wala sing kinaugali nga gugma, mga indi tampad sa bisan anong kasugtanan, mga mapatupatuon, mga wala sing pagpugong sa kaugalingon, mga mabangis, mga wala sing gugma sa kaayuhan.”​—⁠2 Timoteo 3:1-3.

4. Ano ang positibo nga aspekto sang makahaladlok nga kahimtangan nga ginlaragway sa 2 Timoteo 3:1-3?

⁴ Walay sapayan nga ginalaragway sini nga kasulatan ang isa ka makahaladlok nga mga tion, ginatudlo man sini ang paglaum. Talupangda nga sa “katapusan nga mga adlaw” sang karon malauton nga sistema sang mga butang ni Satanas, ang mga kahimtangan mangin makatalagam. Nagakahulugan ini nga malapit na ang kaumpawan kag ang malauton nga sistema sang kalibutan buslan sa indi madugay sang paggahom sang himpit nga Ginharian sang Dios, nga gintudlo ni Jesus nga ipangamuyo sang iya mga sumulunod. (Mateo 6:​9, 10) Ini nga Ginharian amo ang langitnon nga panguluhan sang Dios, nga “indi gid malaglag,” siling ni manalagna Daniel, kundi ‘magadugmok kag magapapas sining tanan nga ginharian sang tawo, kag magapadayon ini tubtob sa walay katubtuban.’​—⁠Daniel 2:44.

Cristianong Neutralidad Kontra Terorismo

5. Ano ang ginhimo sining karon lang sang mga pungsod tuhoy sa katalagman sang terorismo?

⁵ Sa sulod sang madamo nga tinuig, linibo ka kabuhi na ang napatay bangod sang terorismo. Labi pa nga narealisar sang bug-os nga kalibutan ining katalagman sa terorismo sa tapos sang mga pagsalakay sa New York City kag sa Washington, D.C., sang Septiembre 11, 2001. Bangod sang kadakuon kag bug-os kalibutan nga kasangkaron sang terorismo, ang mga pungsod sa bug-os nga duta gilayon nga naghiliusa agod batuan ini. Halimbawa, sang Disiembre 4, 2001, suno sa report sang media, “ang mga ministro sa luwas gikan sa 55 ka pungsod sa Europa, Naaminhan nga Amerika kag Sentral Asia naghilisugot sa pagbaton sing pormal sang plano” nga gindesinyo agod maghilisanto ang ila mga panikasog. Gindayaw ini sang isa ka mataas nga opisyal sang Estados Unidos subong nagahatag sing “isa ka bag-o nga kapagsik” sa panikasog nga batuan ang terorismo. Sa hinali lamang, minilyon ka tawo ang nakigbahin sa ginatawag sang The New York Times Magazine nga “panugod sang isa ka maragtason nga inaway.” Indi pa nahibaluan kon daw ano ka madinalag-on ini nga mga panikasog. Madamo ang nahadlok kag nabalaka sa mangin mga epekto sini nga inaway batok sa terorismo, apang ang mga nagasalig kay Jehova wala mahadlok.

6. (a) Ngaa nabudlayan kon kaisa ang iban nga batunon ang neutral nga panindugan sang mga Saksi ni Jehova subong mga Cristiano? (b) Ano nga halimbawa may kaangtanan sa politika ang ginhatag ni Jesus para sa iya mga sumulunod?

 ⁶ Ang mga Saksi ni Jehova nakilal-an bangod sang ila neutral nga panindugan sa politika. Bisan pa ini nga panindugan sang mga Saksi ni Jehova mahimo batunon sang kalabanan nga mga tawo sa tion sang paghidait, indi na nila ini mahangpan sa tion nga mag-utwas ang di-kinaandan nga mga kahimtangan. Ang kahadlok kag walay kapat-uran nga tuga sang inaway masami nga nagapukaw sing mainit nga mga balatyagon sang nasyonalismo. Mahimo nga indi mahangpan sang iban kon ngaa ang isa indi magsuportar sa popular nga mga panikasog sang pungsod. Apang, ang matuod nga mga Cristiano nakahibalo nga dapat nila tumanon ang sugo ni Jesus nga mangin “indi bahin sang kalibutan.” (Juan 15:19; 17:14-​16; 18:36; Santiago 4:⁠4) Bangod sini, dapat sila magpabilin nga neutral sa politika ukon sa pag-alyansahanay sang mga pungsod. Si Jesus mismo naghatag sing maayo nga halimbawa. Bangod sang iya himpit nga kaalam kag tumalagsahon nga mga ikasarang, napauswag niya kuntani ang kahimtangan sang mga tawo sang panahon niya. Apang, wala sia magpasilabot sa politika. Sa panugod sang iya ministeryo, malig-on nga ginsikway niya ang tanyag ni Satanas nga gamhan niya ang tanan nga ginharian sa kalibutan. Sang ulihi, maisog nga ginlikawan niya ang pagbuyok sang mga tawo nga maggahom sia.​—⁠Mateo 4:8-10; Juan 6:​14, 15.

7, 8. (a) Ano ang indi buot silingon sang neutral nga panindugan sa politika sang mga Saksi ni Jehova, kag ngaa? (b) Paano wala ginalakip sang Roma 13:​1, 2 ang masingki nga mga buhat batok sa mga panguluhan?

⁷ Ang neutral nga panindugan sang mga Saksi ni Jehova indi dapat hangpon nga ginasuportahan ukon ginapasapayanan nila ang masingki nga mga buhat. Indi ini maghisanto sa ila ginasiling nga mga alagad sila sang “Dios sang gugma kag paghidait.” (2 Corinto 13:11) Nahibaluan nila kon ano ang ginabatyag ni Jehova sa kasingki. Ang salmista nagsulat: “Si Jehova nagausisa sa matarong subong man sa malaut, kag ang bisan sin-o nga nagahigugma sa kasingki pat-od nga dumtan sang Iya kalag.” (Salmo 11:⁠5) Nahibaluan man nila ang ginsiling ni Jesus kay apostol Pedro: “Itagob ang imo espada, kay ang tanan nga nagagamit sing espada sa espada mapatay.”​—⁠Mateo 26:52.

⁸ Bisan pa maathag nga ginapakita sang maragtas nga ang huwad nga mga Cristiano masami nga nagagamit sing “espada,” indi ini matuod sa mga Saksi ni Jehova. Nagalikaw sila sa sining tanan nga buhat. Matutom nga ginasunod sang mga Saksi ang sugo sang Roma 13:​1, 2: “Ang tagsa ka kalag magpasakop sa superyor nga mga awtoridad [mga manuggahom sa politika], kay wala sing awtoridad nga indi paagi sa Dios; ang nagaluntad nga mga awtoridad ginabutang sang Dios sa ila relatibo nga mga posisyon. Busa sia nga nagapamatok sa awtoridad nagatindog batok sa kahimusan sang Dios; ang mga nagatindog batok sa sini magabaton sing paghukom sa ila kaugalingon.”

9. Sa anong duha ka paagi ginabatuan sang mga Saksi ni Jehova ang terorismo?

⁹ Apang, bangod ang terorismo malain gid, indi bala dapat nga may ginahimo ang mga Saksi ni Jehova agod batuan ini? Huo dapat gid, kag ginahimo nila ini. Una sa tanan, wala sila nagapakigbahin sa sini nga buhat. Ikaduha, ginatudluan nila ang mga tawo sing Cristianong mga prinsipio nga kon iaplikar, magadula sang tanan nga sahi sang kasingki.⁠ * Sang nagligad nga tuig, ang mga Saksi naghinguyang sing 1,202,381,302 ka oras sa pagbulig sa mga tawo nga matun-an ining Cristiano nga dalanon. Indi ini pag-uyang sing tion, kay subong resulta sini nga hilikuton, 265,469 ka tawo ang nabawtismuhan subong mga Saksi ni Jehova, busa ginapakita sing dayag ang ila bug-os nga pagsikway sa kasingki.

10. Ano ang posibilidad nga madula ang kasingki sa kalibutan karon?

¹⁰ Dugang pa, ginakilala sang mga Saksi ni Jehova nga kon sila lamang, indi gid nila masarangan nga dulaon ang kalautan sa kalibutan. Amo kon ngaa nagasalig sila sing bug-os sa isa nga makahimo sini​—⁠si Jehova nga Dios. (Salmo 83:18) Walay sapayan sang hanuot nga mga panikasog, indi gid madula sang mga tawo ang kasingki. Ang inspirado nga manunulat sang Biblia nagpaandam sa  aton tuhoy sa aton tion, ang “katapusan nga mga adlaw,” kag nagsiling: “Ang malaut nga mga tawo kag mga impostor magalain kag magalain pa, nga nagapatalang kag ginapatalang.” (2 Timoteo 3:​1, 13) Gikan sa sini nga punto-de-vista, ang pagpakig-away sang tawo batok sa kalainan indi gid magmadinalag-on. Sa pihak nga bahin, makasalig kita nga dulaon ni Jehova ang kasingki sing bug-os kag sing permanente.​​—⁠Salmo 37:​1, 2, 9-​11; Hulubaton 24:​19, 20; Isaias 60:18.

Wala Nahadlok Walay Sapayan Sang Posible nga Pagsalakay

11. Ano nga mga tikang ang ginhimo na ni Jehova agod madula ang kasingki?

¹¹ Sanglit ang kasingki ginadumtan sang Dios sang paghidait, mahangpan naton kon ngaa naghimo sia sing una nga mga tikang agod laglagon ang ginatunaan gid sini, si Satanas nga Yawa. Sa katunayan, ginpahanabo na Niya nga si Satanas makahuluya nga malutos ni arkanghel Miguel​—⁠ang iya sang Dios bag-o ginpapungko sa trono nga Hari, nga si Cristo Jesus. Amo sini ang paglaragway sang Biblia: “Nagdabdab ang inaway sa langit: Si Miguel kag ang iya mga anghel nagpakig-away batok sa dragon, kag ang dragon kag ang mga anghel sini nagpakig-away apang wala ini magdaug, ni may nakita pa nga duog para sa ila sa langit. Gani gintagbong ang daku nga dragon, ang orihinal nga man-ug, ang ginatawag nga Yawa kag Satanas, nga nagapatalang sa bug-os napuy-an nga duta; gintagbong sia sa duta, kag ang iya mga anghel gintagbong upod sa iya.”​—⁠Bugna 12:7-9.

12, 13. (a) Ano ang tumalagsahon sa tuig 1914? (b) Ano ang ginatagna sang Ezequiel para sa mga nagasuportar sa Ginharian sang Dios?

¹² Ang kronolohiya sang Biblia kag ang mga hitabo sa kalibutan nagahisanto sa pagtudlo sa tuig 1914 subong ang tion nga yadto nga inaway natabo sa langit. Sugod sadto, ang mga kahimtangan sang kalibutan padayon nga naglain. Ang Bugna 12:⁠12 nagapaathag kon ngaa, nga nagasiling: “Bangod sini magkalipay kamo, kamo nga mga langit kag kamo nga nagapuyo sa sini! Kailo sa duta kag sa dagat, kay ang Yawa nagpanaug sa inyo nga may daku nga kaakig, kay nahibaluan niya nga malip-ot na lamang ang iya tion.”

¹³ Amo kon ngaa naakig ang Yawa ilabi na sa hinaplas nga mga sumilimba sang Dios kag sa ila mga kaupod nga “iban nga mga karnero.” (Juan 10:16; Bugna 12:17) Sa indi madugay, ini nga pagpamatok magadangat sa talipuspusan sini kon sugdan sang Yawa ang mapait nga pagsalakay sa tanan nga nagasuportar kag nagasalig sa natukod na nga Ginharian sang Dios. Ining desidido nga pagsalakay ginapatuhuyan sa Ezequiel kapitulo 38 subong pagsalakay ni “Gog sa duta sang Magog.”

14. Ano nga pangamlig ang naagom sang mga Saksi ni Jehova sang nagligad, kag amo bala sini pirme ang kahimtangan?

¹⁴ Sugod sang si Satanas gintabog sa langit, ang katawhan sang Dios ginaamligan kon kaisa gikan sa mga pagsalakay ni Satanas paagi sa mga panikasog sang pila ka ahensia sa politika, nga ginlaragway sing simbuliko sa Bugna 12:​15, 16. Apang, ginapakita sang Biblia nga sa katapusan nga pagsalakay ni Satanas, wala sing tawhanon nga mga ahensia ang magaamlig sa mga nagasalig kay Jehova. Dapat bala mahadlok ukon makugmat ang mga Cristiano sa sini? Indi gid!

15, 16. (a) Ang nagapasalig nga mga pulong ni Jehova sa iya katawhan sang panahon ni Jehosapat nagahatag sing ano nga rason sang paglaum para sa mga Cristiano karon? (b) Ano nga sulundan ang ginhatag ni Jehosapat kag sang katawhan para sa mga alagad sang Dios karon?

¹⁵ Suportahan sang Dios ang iya katawhan subong gid sa pagsuportar niya sa iya tipiko nga pungsod sang panahon ni Hari Jehosapat. Aton  mabasa: “Pamati kamo, bug-os nga Juda kag kamo nga mga pumuluyo sang Jerusalem kag ikaw Hari Jehosapat! Amo ini ang ginasiling ni Jehova sa inyo, ‘Indi kamo mahadlok ukon makugmat bangod sining daku nga kadam-an; kay ang inaway indi inyo kundi iya sang Dios. . . . Indi ninyo kinahanglan nga makig-away sa sini nga higayon. Magpahamtang kamo sa inyo lugar, magpahimunong kag tan-awa ang pagluwas ni Jehova para sa inyo. O Juda kag Jerusalem, indi mahadlok ukon makugmat. Buwas gua kamo batok sa ila, kag si Jehova kaupod ninyo.’”​—⁠2 Cronica 20:15-17.

¹⁶ Ang katawhan sang Juda ginpasalig nga indi kinahanglan nga makig-away sila. Subong man, kon ang katawhan sang Dios salakayon ni Gog sang Magog, indi sila magagamit sing armas agod pangapinan ang ila kaugalingon. Sa baylo, sila ‘magapahimunong kag magatan-aw sang pagluwas ni Jehova’ para sa ila. Sa pagkamatuod, ang pagpahimunong wala nagakahulugan sing bug-os nga pagdulog sa pagpanghikot, kay ang katawhan sang Dios sang panahon ni Jehosapat may yara ginhimo. Aton mabasa: “Gilayon nga nagyaub si Jehosapat nga ang iya nawong nagaatubang sa duta, kag ang bug-os nga Juda kag ang mga pumuluyo sang Jerusalem naghapa sa atubangan ni Jehova sa pagsimba kay Jehova. . . . Dugang pa, nakigsapol [si Jehosapat] sa katawhan kag nagbutang sing mga manug-amba kay Jehova kag sing mga manugdayaw nga may balaan nga panapot samtang nagagua sila sing una sa hangaway, kag nagasiling: ‘Dayawa ninyo si Jehova, kay tubtob sa tion nga wala latid ang iya mahigugmaon nga kaayo.’” (2 Cronica 20:​18-​21) Huo, bisan samtang ginsalakay sang mga kaaway, ang katawhan padayon nga nagdayaw kay Jehova. Amo sini ang sulundan nga himuon sang mga Saksi ni Jehova kon salakayon sila ni Gog.

17, 18. (a) Ano ang positibo nga panimuot sang mga Saksi ni Jehova karon bahin sa mga pagsalakay ni Gog? (b) Ano nga pahanumdom ang ginhatag sining karon lang sa Cristiano nga mga pamatan-on?

¹⁷ Antes sini​—⁠kag bisan kon magsugod na ang pagsalakay ni Gog⁠​—⁠ang mga Saksi ni Jehova padayon nga magasuportar sa Ginharian sang Dios. Padayon sila nga makatigayon sing kabakod kag pag-amlig sa pagpakig-upod sa kapin sa 94,600 ka kongregasyon sa bug-os nga kalibutan. (Isaias 26:20) Tion gid ini agod dayawon si Jehova sing maisugon! Indi gid sila magaisol sa kahadlok bisan pa ginapaabot nila ang pagsalakay ni Gog. Sa baylo, nagapahulag ini sa ila nga dugangan ang ila halad sang pagdayaw tubtob sa masarangan gid nila.​—⁠Salmo 146:2.

¹⁸ Ining maisugon nga panimuot nagakaigo nga ginpakita sang linibo ka pamatan-on sa bug-os nga kalibutan nga nagsulod sa bug-os tion nga ministeryo. Agod ipadaku nga ang pagpili sa sini  nga dalanon sang kabuhi tumalagsahon gid, ang tract nga Mga Pamatan-on​—⁠Ano ang Himuon Ninyo sa Inyo Kabuhi? ginpagua sa distrito nga mga kombension sang 2002. Nagapasalamat gid ang mga Cristiano, bata man kag tigulang, sa sining sibu-sa-tion nga mga pahanumdom.​—⁠Salmo 119:​14, 24, 99, 119, 129, 146.

19, 20. (a) Ngaa ang mga Cristiano wala sing rason nga mahadlok ukon makugmat? (b) Ano ang himuon sang masunod nga artikulo nga tulun-an?

¹⁹ Walay sapayan sang mga kahimtangan sa kalibutan, ang mga Cristiano indi dapat mahadlok ukon makugmat. Nahibaluan nila nga sa indi madugay dulaon sing dayon sang Ginharian ni Jehova ang tanan nga sahi sang kasingki. Nalugpayan man sila sa paghibalo nga ang madamo nga napatay sa kasingki banhawon. Samtang ini nga pagkabanhaw magahatag sa iban sang ila una nga kahigayunan nga makatuon tuhoy kay Jehova, magapaposible man ini sa iban nga padayunon ang ila dedikado nga pag-alagad sa iya.​—⁠Binuhatan 24:15.

²⁰ Subong matuod nga mga Cristiano, nahangpan naton nga kinahanglan naton huptan ang Cristianong neutralidad kag determinado kita nga himuon ini. Luyag naton huptan ang dalayawon nga paglaum nga ‘magpahimunong kag tan-awon ang pagluwas ni Jehova.’ Ang masunod nga artikulo magapabakod sang aton pagtuo paagi sa pagbulig sa aton nga mangin alisto sa karon nga mga hitabo nga progresibo nga nagahatag sing dugang pa nga paghangop sa katumanan sang tagna sang Biblia.

[Nota]

Mapaathag Mo Bala?

• Ngaa madamo nga tawo karon ang nadulaan sing paglaum?

• Ngaa ang mga Saksi ni Jehova malaumon tuhoy sa palaabuton?

• Ano na ang ginhimo ni Jehova tuhoy sa ginatunaan sang tanan nga kasingki?

• Ngaa wala sing rason nga mahadlok kita sa pagsalakay ni Gog?

[Mga Pamangkot sa Pagtinuon]

[Retrato sa pahina 13]

Si Jesus naghatag sing maayo nga halimbawa sang Cristianong neutralidad

[Mga retrato sa pahina 16]

Linibo ka pamatan-on nga mga Saksi ang malipayon nga nagsulod sa bug-os tion nga ministeryo

[Credit Line sang retrato sa pahina 12]

UN PHOTO 186226/M. Grafman