Magpahimunong kag Tan-awa ang Pagluwas ni Jehova!

“Magpahamtang kamo sa inyo lugar, magpahimunong kag tan-awa ang pagluwas ni Jehova sa inyo.”​—⁠2 CRONICA 20:17.

1, 2. Ngaa ang ginapaabot nga pagsalakay ni “Gog sang duta sang Magog” mas makatalagam pa sangsa internasyonal nga terorismo?

ANG terorismo ginlaragway sang iban subong pagsalakay sa bug-os kalibutan nga komunidad kag sa sibilisasyon pa gani. Amo kon ngaa ini nga katalagman dapat tamdon sing serioso. Sa pihak nga bahin, mas makatalagam pa ang isa ka pagsalakay, nga halos wala ginasapak sang kalibutan. Ano ini?

² Ini amo ang pagsalakay ni “Gog sang duta sang Magog,” nga ginapatuhuyan sa Biblia sa Ezequiel kapitulo 38. Sobra bala ang pagsiling nga ini nga pagsalakay mas makatalagam pa sangsa internasyonal nga terorismo? Indi, bangod ang pagsalakay ni Gog indi lamang pagsalakay sa tawhanon nga mga panguluhan. Pagsalakay ini sa langitnon nga panguluhan sang Dios! Apang, indi kaangay sang mga tawo, nga mahimo diutay lamang ang kadalag-an sa pag-atubang sa mga pagsalakay sa ila sistema, ang Manunuga makasarang gid sa pag-atubang sa mas mabangis nga pagsalakay ni Gog.

Pagsalakay sa Panguluhan sang Dios

3. Ano ang gin-agda sa mga manuggahom sang kalibutan nga himuon sugod sang 1914, kag ano ang ila sabat?

³ Ang inaway sa ulot sang Hari karon sang Dios kag sang malauton nga sistema ni Satanas nagapadayon gihapon sugod pa sang matukod ang Ginharian sang Dios sa langit sang 1914. Sadto, ang tawhanon nga mga manuggahom ginpahibalo nga dapat sila magpasakop sa ginpili sang Dios nga Manuggahom. Apang wala sila magpasakop, subong sang gintagna: “Ang mga hari sang duta nagpahamtang sang ila kaugalingon kag ang mataas nga mga opisyales naghilisugot sing tingob batok kay Jehova kag batok sa iya hinaplas, nga nagasiling: ‘Bugrason naton ang ila mga gapos kag ipilak gikan sa aton ang ila mga pisi!’” (Salmo 2:​1-3) Ang pagsalakay ni Gog sang Magog amo ang talipuspusan sang pagpamatok sa paggahom sang Ginharian.

4, 5. Paano makapakig-away ang mga tawo batok sa di-makita kag langitnon nga panguluhan sang Dios?

⁴ Ayhan matingala kita kon paano makapakig-away ang mga tawo batok sa di-makita kag langitnon nga panguluhan. Ini nga panguluhan, suno sa Biblia, ginahuman sang “isa ka gatos kag kap-atan kag apat ka libo nga ginbakal gikan sa duta,” upod ang “Kordero,” si Cristo Jesus. (Bugna 14:​1, 3; Juan 1:29) Bangod langitnon, ang bag-o nga panguluhan ginapatuhuyan subong “bag-ong mga langit,” samtang ang dutan-on nga mga sakop sini makatarunganon nga ginatawag nga “bag-ong duta.” (Isaias 65:17; 2 Pedro 3:13) Natapos na sang kalabanan sang 144,000 ka kaupod nga manuggahom ni Cristo ang ila matutom nga kabuhi sa duta. Sa amo napamatud-an na nila nga takus sila sa pagtuman sang ila bag-o nga mga hilikuton sang pag-alagad sa langit.

⁵ Apang, ang diutay nga nagkalabilin sang 144,000 yari pa sa duta. Sa kapin sa 15,000,000  nga nagtambong sa pagsaulog sang Panihapon sang Ginuo sang 2002, 8,760 lamang ang nagpabutyag sang ila paglaum subong napili para sa sining langitnon nga hilikuton. Ang bisan sin-o nga nagapangahas sa pagsalakay sa nabilin nga palaabuton nga mga katapo sang Ginharian aktuwal nga nagasalakay sa Ginharian sang Dios.​—⁠Bugna 12:17.

Natapos sang Hari ang Iya Pagdaug

6. Paano ginatamod ni Jehova kag ni Cristo ang pagpamatok sa katawhan sang Dios?

⁶ Ang reaksion ni Jehova sa pagpamatok sa iya natukod na nga Ginharian gintagna: “Ang Isa nga nagalingkod sa kalangitan magakadlaw; si Jehova magauligyat sa ila. Sa sina nga tion magapamulong sia sa ila sa iya kasingkal kag gamuhon sila sa iya tama nga kaakig, nga nagasiling: ‘Ako, ako mismo, nagpahamtang sang akon hari sa ibabaw sang Sion, ang akon balaan nga bukid.’” (Salmo 2:​4-6) Nag-abot na ang tion para kay Cristo, sa idalom sang panuytoy ni Jehova, nga ‘tapuson ang iya pagdaug.’ (Bugna 6:⁠2) Paano ginatamod ni Jehova ang pagpamatok sa iya katawhan sa tion sang katapusan nga pagdaug? Ginatamod niya ini subong batok gid sa iya kag batok sa iya nagagahom nga Hari. “Sia nga nagatandog sa inyo nagatandog sang tawotawo sang akon mata,” siling ni Jehova. (Zacarias 2:⁠8) Kag nagsiling gid si Jesus nga ang ginahimo ukon wala ginahimo sang mga tawo sa iya hinaplas nga mga utod ginakabig niya subong nga ginhimo ukon wala ginhimo sa iya.​—⁠Mateo 25:​40, 45.

7. Bangod sa ano nga mga rason nga ang “dakung kadam-an,” nga ginlaragway sa Bugna 7:⁠9, nakaeksperiensia sang kasingkal ni Gog?

⁷ Sa pagkamatuod, ang aktibo nga nagasuportar sa hinaplas nga nagkalabilin makaeksperiensia man sang kasingkal ni Gog. Ining palaabuton nga mga katapo sang “bag-ong duta” sang Dios isa ka “dakung kadam-an” nga gintawag “gikan sa tanan nga pungsod kag tribo kag katawhan kag hambal.” (Bugna 7:⁠9) Ginalaragway sila nga “nagatindog sa atubangan sang trono kag sa atubangan sang Kordero, nga napanaptan sing maputi nga malaba nga mga panapton.” Sa amo may yara sila nahamut-an nga tindog sa atubangan sang Dios kag ni Cristo Jesus. Nagauyat sing “mga sanga sang palma sa ila mga kamot,” ginadayaw nila si Jehova subong ang makatarunganon nga Soberano sang uniberso, nga ang iya paggahom ginahimo paagi sa iya ginpalingkod nga Hari, si Jesucristo, “ang Kordero sang Dios.”​​—⁠Juan 1:​29, 36.

8. Bangod sang pagsalakay ni Gog, ano ang himuon ni Cristo, kag ano ang resulta?

⁸ Bangod sang pagsalakay ni Gog, ang iya sang Dios ginpapungko sa trono nga Hari magapanghikot kag magapakig-away sa inaway sang Armagedon. (Bugna 16:​14, 16) Ang indi magakilala sa pagkasoberano ni Jehova pagalaglagon. Sa pihak nga bahin, ang mga nagaantos sing kapipit-an tungod sa pag-unong nila sa Ginharian sang Dios makaeksperiensia sing permanente nga kaumpawan. Bahin sini, si apostol Pablo nagsulat: “Ini amo ang pamatuod sang matarong nga paghukom sang Dios, amo nga naisip kamo nga takus sa ginharian sang Dios, nga tungod sini kamo gid nagaantos. Ginabinagbinag sini nga matarong sa bahin sang Dios nga balusan sing kapipit-an ang mga nagapapiot sa inyo, apang, sa inyo  nga ginapapiutan, kapahuwayan kaupod namon sa pagpahayag ni Ginuong Jesus gikan sa langit kaupod sang iya gamhanan nga mga anghel sa nagadabdab nga kalayo, samtang ginatimalusan niya ang mga wala nagakilala sa Dios kag ang mga wala nagatuman sa maayong balita tuhoy sa aton Ginuong Jesus.”​—⁠2 Tesalonica 1:5-8.

9, 10. (a) Paano ginhatagan ni Jehova ang Juda sing kadalag-an batok sa makahaladlok nga kaaway? (b) Ano dapat ang padayon nga himuon sang mga Cristiano karon?

⁹ Sa nagapakari nga dakung kapipit-an, nga matapos sa Armagedon, si Cristo magapakig-away batok sa tanan nga kalautan. Apang, kaangay sa mga pumuluyo anay sang duha-ka-tribo nga ginharian sang Juda sang nagligad nga linibo ka tuig, ang iya mga sumulunod indi kinahanglan nga makig-away. Ang inaway iya ni Jehova, kag naghatag sia sing kadalag-an. Ang rekord mabasa: “Nagbutang si Jehova sing mga manugpuot batok sa mga tawo sang Amon, sang Moab kag sang mabukid nga rehiyon sang Seir, nga nagkari batok sa Juda, kag ginsakit nila ang isa kag isa. Kag ang mga anak ni Amon kag ni Moab nagtindog batok sa mga pumuluyo sang mabukid nga rehiyon sang Seir sa pagpatay kag paglaglag sa ila sing bug-os; kag sang natapos nila ang mga pumuluyo sang Seir, ang tagsatagsa nagbuligay sa paglaglag sa isa kag isa. Apang bahin sa Juda, nagkadto ini sa torre nga balantayan sa kahanayakan. Sang ginliso nila ang ila nawong sa kadam-an, abaw, didto sila, ang ila mga bangkay napukan sa duta nga wala gid sing nakapalagyo.”​​—⁠2 Cronica 20:​22-​24.

¹⁰ Subong gid ini sa gintagna ni Jehova: “Indi kinahanglan nga makig-away kamo.” (2 Cronica 20:17) Nagahatag ini sing sulundan nga dapat sundon sang mga Cristiano kon magpanghikot si Jesucristo “sa pagtapos sang iya pagdaug.” Sa karon, padayon sila nga nagapakig-away batok sa kalainan, indi paagi sa literal, kundi paagi sa espirituwal nga mga hinganiban. Sa sini nga paagi, ‘padayon nila nga ginadaug ang malaut paagi sa maayo.’​​—⁠Roma 6:​13; 12:17-​21; 13:12; 2 Corinto 10:​3-5.

Sin-o ang Magapanguna sa Pagsalakay ni Gog?

11. (a) Ano nga mga ahensia ang gamiton ni Gog sa iya pagsalakay? (b) Ano ang buot silingon sang pagkaalisto sa espirituwal?

¹¹ Si Gog sang Magog amo si Satanas nga Yawa nga ginpaubos sugod sang 1914. Subong isa ka espiritu nga tinuga, indi sia direkta nga makasalakay, apang gamiton niya ang tawhanon nga mga ahensia sa paghimo sini. Sin-o ining tawhanon nga mga ahensia? Ang Biblia wala nagahatag sa aton sing mga detalye, apang nagahatag ini sa aton sing pat-od nga mga palatandaan nga magabulig sa aton agod makilala kon sin-o sila. Sa mga hitabo sa kalibutan bilang katumanan sang mga tagna sa Biblia, amat-amat nga makatigayon kita sing mas maathag nga laragway. Ginalikawan sang katawhan ni Jehova nga haumhaumon  ang mga nagakatabo apang nagapabilin sila nga alisto sa espirituwal, paagi sa paghibalo sang mga nagakatabo sa politika kag sa relihion nga nagahisanto sa katumanan sang tagna sa Biblia.

12, 13. Paano gintagna ni manalagna Daniel ang katapusan nga pagsalakay sa katawhan sang Dios?

¹² Si manalagna Daniel nagahatag sing dugang nga impormasyon tuhoy sa katapusan nga pagsalakay batok sa katawhan sang Dios, sa pagsulat: “Magagua sia [ang hari sang aminhan] sa daku nga kasingkal sa paglaglag kag sa paghapay sa madamo. Kag patindugon niya ang iya tulad palasyo nga mga tolda sa ulot sang daku nga dagat kag sang balaan nga bukid sang Puni.”​—⁠Daniel 11:​44, 45.

¹³ Sang panahon sang Biblia, ang “daku nga dagat” amo ang Great Sea, ukon ang Mediteraneo, kag ang “balaan nga bukid” amo ang Sion, nga sa sini si Jehova nagsiling: “Ako, ako mismo, nagpahamtang sang akon hari sa ibabaw sang Sion, ang akon balaan nga bukid.” (Salmo 2:⁠6; Josue 1:⁠4) Busa, sa espirituwal nga kahulugan, ang duta “sa ulot sang daku nga dagat kag sang balaan nga bukid” nagarepresentar sa mahamungayaon nga kahimtangan sa espirituwal sang hinaplas nga mga Cristiano. Indi na sila bahin sang katawhan nga nahamulag sa Dios, kag ginahulat nila ang tion nga magagahom sila upod kay Cristo Jesus sa langitnon nga Ginharian. Maathag nga ang hinaplas nga mga alagad sang Dios, upod ang ila mainunungon nga mga kaupod nga dakung kadam-an, mangin puntariya sang hari sang aminhan kon sugdan niya ang iya mabangis nga pagsalakay bilang katumanan sang tagna ni Daniel.​​—⁠Isaias 57:20; Hebreo 12:22; Bugna 14:1.

Ano ang Himuon sang mga Alagad sang Dios?

14. Anong tatlo ka butang ang himuon sang katawhan sang Dios kon salakayon na sila?

¹⁴ Ano ang ginapaabot nga himuon sang mga alagad sang Dios kon salakayon sila? Sa liwat, ang ginhimo sang tipiko nga pungsod sang Dios sang panahon ni Jehosapat nagahatag sing sulundan. Talupangda nga ang mga pumuluyo sini ginsugo sa paghimo sing tatlo ka butang: (1) magpahamtang, (2) magpahimunong, kag (3) tan-awon ang pagluwas ni Jehova. Paano karon magapanghikot ang katawhan sang Dios nahisanto sa sining mga pulong?​—⁠2 Cronica 20:17.

15. Ano ang buot silingon sang pagpahamtang sang katawhan ni Jehova?

¹⁵ Magpahamtang: Sing di-malingkang, ang katawhan sang Dios padayon nga magasuportar sing aktibo sa Ginharian sang Dios. Padayon nga huptan nila ang ila neutral nga panindugan subong mga Cristiano. ‘Magapakapag-on kag di-mationg’ sila sa ila mainunungon nga pag-alagad kay Jehova kag padayon nga magadayaw sing dayag kay Jehova bangod sang iya mahigugmaon nga kaayo. (1 Corinto 15:58; Salmo 118:​28, 29) Wala sing pag-ipit sa karon ukon sa palaabuton ang makapatalikod sa ila gikan sa sining panindugan nga nahamut-an sang Dios.

16. Sa anong mga paagi magapahimunong ang mga alagad ni Jehova?

¹⁶ Magpahimunong: Ang mga alagad ni Jehova indi magatinguha nga luwason ang ila kaugalingon kundi magasalig sila sing bug-os kay Jehova. Sia lamang ang makaluwas sa iya mga alagad gikan sa kinagubot sa bug-os nga kalibutan, kag nagsaad sia nga himuon niya ini. (Isaias 43:​10, 11; 54:15; Panalabiton 3:26) Ang pagsalig kay Jehova nagalakip sang pagsalig sa modernong kitaon nga alagyan nga maathag nga ginagamit niya sa sulod sang kapin sa 100 ka tuig sa pagtuman sang iya mga katuyuan. Nian, subong wala pa matabo sang una, ang matuod nga mga Cristiano dapat magpakita sing pagsalig sa ila mga masigkasumilimba nga gintangdo ni Jehova kag sang iya nagagahom nga Hari nga manguna. Dumalahan sining matutom nga mga lalaki  ang katawhan sang Dios. Ang indi pagsapak sa ila pagdumala magaresulta sa kalaglagan.​​—⁠Mateo 24:45-​47; Hebreo 13:​7, 17.

17. Ngaa makita sang matutom nga mga alagad sang Dios ang pagluwas ni Jehova?

¹⁷ Tan-awa ang pagluwas ni Jehova: Kaluwasan ang padya sang tanan nga nagahupot sang ila Cristianong integridad kag nagasalig sa pagluwas ni Jehova. Tubtob sa katapusan nga tion​—⁠kag tubtob sa masarangan nila⁠​—⁠ipahibalo nila ang pag-abot sang adlaw sang paghukom ni Jehova. Dapat mahibaluan sang tanan nga tinuga nga si Jehova amo ang matuod nga Dios kag may yara sia matutom nga mga alagad sa duta. Indi na matabo liwat nga suayan sa malawig nga tion ang pagkamakatarunganon sang pagkasoberano ni Jehova.​​—⁠Ezequiel 33:33; 36:23.

18, 19. (a) Paano ginapabanaag sang ambahanon sang kadalag-an sa Exodo kapitulo 15 ang batyagon sang mga makalampuwas sa pagsalakay ni Gog? (b) Ano ang nagakaigo nga himuon sang katawhan sang Dios karon?

¹⁸ Upod ang bag-o nga kusog, ang katawhan sang Dios magasulod sa bag-ong kalibutan, nga nalangkag sa pag-amba sang ambahanon sang kadalag-an, kaangay sa ginhimo sang dumaan nga mga Israelinhon sa tapos sila ginluwas sa Dagat nga Mapula. Bangod nagapasalamat sing dayon kay Jehova sa iya pag-amlig, sing indibiduwal kag sing tingob, ipalanog nila ang mga pulong sang una: “Magaamba ako kay Jehova, kay sia ginpakataas gid. . . . Si Jehova isa ka isganan nga mangangaway. Jehova ang iya ngalan. . . . Ang imo tuo nga kamot, O Jehova, makadugmok sa kaaway. Sa kabuganaan sang imo pagkalabaw mapukan mo ang nagatindog batok sa imo; ginapadala mo ang imo nagasilabo nga kaakig, ginalamon niya ini kaangay sang dagami. . . . Sa imo mahigugmaon nga kaayo gintuytuyan mo ang katawhan nga gintubos mo; sa imo kusog idul-ong mo sila sa imo balaan nga puluy-an. . . . Dalhon mo sila kag itanom sila sa bukid sang imo panublion, sa malig-on nga duog nga ginhanda mo agod imo puy-an, O Jehova, isa ka santuaryo, O Jehova, nga gintukod sang imo mga kamot. Si Jehova magahari tubtob sa tion nga walay latid, bisan tubtob sa walay katubtuban.”​—⁠Exodo 15:1-19.

¹⁹ Karon nga ang paglaum nga kabuhi nga walay katapusan mas maathag na sangsa nagligad, ini na ang nagakaigo nga tion nga ipakita sang mga alagad sang Dios ang ila debosyon kay Jehova kag bag-uhon liwat ang ila determinasyon nga alagdon sia subong ila walay katapusan nga Hari!​​—⁠1 Cronica 29:11-​13.

Mapaathag Mo Bala?

• Ngaa salakayon ni Gog ang mga hinaplas kag ang iban nga mga karnero?

• Paano magapahamtang ang katawhan sang Dios?

• Ano ang buot silingon sang pagpahimunong?

• Paano tan-awon sang katawhan sang Dios ang pagluwas ni Jehova?

[Mga Pamangkot sa Pagtinuon]

 [Retrato sa pahina 18]

Ginhatag ni Jehova kay Jehosapat kag sa iya katawhan ang kadalag-an, nga indi na kinahanglan nga makig-away sila

[Retrato sa pahina 20]

Ang mga hinaplas kag ang iban nga mga karnero nagabuligay sa pagsakdag sa pagkasoberano ni Jehova

[Retrato sa pahina 22]

Kaangay sang dumaan nga mga Israelinhon, ang katawhan sang Dios magaamba sing ambahanon sa kadalag-an sa indi madugay