‘Si Solomon Wala Mapanapti sing Subong sang Isa Sini’

ANG ilahas nga mga bulak kaangay sang makita diri kinaandan na nga makita sa mga dalanon sa nabagatnan nga Aprika. Ginatawag sila nga cosmos kag naghalin sa mainit nga mga duog sang Amerika. Ining matahom nga mga bulak nagapahanumdom sa aton sa isa ka leksion nga gintudlo ni Jesus. Madamo sang iya mga tagpalamati ang imol, kag nagakabalaka gid sila tuhoy sa ila pisikal nga mga kinahanglanon, sa ila kalan-on kag panapton.

“Tuhoy sa panapton,” namangkot si Jesus, “ngaa bala nagakabalaka kamo? Magkuha kamo sing leksion gikan sa mga liryo sa latagon, kon paano sila nagatubo; wala sila nagapangabudlay, ukon nagapamurong; apang ginasiling ko sa inyo nga bisan si Solomon sa bug-os niya nga himaya wala mapanapti sing subong sang isa sini.”​​—⁠Mateo 6:​28, 29.

May nanuhaytuhay nga mga ideya kon ano nga sahi sang ilahas nga bulak ang ginapatuhuyan ni Jesus. Apang, ginpaanggid ini ni Jesus sa kinaandan nga tanom, nga nagasiling: “Karon, kon ginapapanaptan sang Dios sing subong ang mga tanom sa latagon, nga yari karon kag buwas ginadap-ong sa hurno, indi bala magpapanapot sia sing labi pa sa inyo, kamo nga may diutay sing pagtuo?”​​—⁠Mateo 6:⁠30.

Bisan pa indi kinaugali nga nagatubo ang cosmos sa Israel, ginpalig-on gid sini ang leksion nga gintudlo ni Jesus. Ginatan-aw man ini gikan sa malayo ukon ginahimutaran ini, tuman gid katahom sini kag paborito gid ini sang mga retratista kag mga pintor. Ang matuod, wala nagapasobra si Jesus sang sia nagsiling, “bisan si Solomon sa bug-os niya nga himaya wala mapanapti sing subong sang isa sini.”

Ano ang leksion para sa aton karon? Ang mga nagaalagad sa Dios makasalig nga buligan niya sila nga matigayon ang ila mga kinahanglanon bisan sa mabudlay nga mga tion. Si Jesus nagpaathag: “Padayon ninyo nga pangitaa ang ginharian [sang Dios], kag ining mga butang [subong sang kinahanglanon nga kalan-on kag panapton] idugang sa inyo.” (Lucas 12:31) Huo, ang matuod nga mga benepisyo nagagikan sa pagpangita sa Ginharian sang Dios. Apang nahibaluan mo bala kon ano ang Ginharian sang Dios kag kon ano ang himuon sini sa katawhan? Nalipay ang mga Saksi ni Jehova nga buligan ka nga makita ang mga sabat sa Biblia.