Eskwelahan nga Gilead—60 ka Tuig nga Paghanas sa mga Misyonero

“BANGOD sang amon masangkad nga pagtuon sa Biblia, labi kami nga nagsuod kay Jehova kag nakatuon sing dugang pa tuhoy sa iya organisasyon. Ginhanda kami sini para sa kabuhi sa amon asaynment sa iban nga pungsod.” Amo sini ang paglaragway sang isa ka gradwado sa una nga klase tuhoy sa iya natun-an sa Watchtower Bible School of Gilead. Sugod sang inagurasyon sini sang nagligad nga 60 ka tuig, padayon nga nagpadala sing mga misyonero ang Eskwelahan nga Gilead. Sang Marso 8, 2003, ang gradwasyon sang ika-114 nga klase ginhiwat sa Watchtower Educational Center sa Patterson, New York. Namati sing maayo ang 6,404 nga nagtipon sa awditoryum kag sa iban pa nga duog diin ginpagua sa telebisyon ang programa, nga naglakip sang mga pamulongpulong, mga interbyu, kag paghinun-anon sang grupo.

Si Theodore Jaracz, nga isa ka katapo sang Nagadumala nga Hubon, amo ang tsirman. Ang iya nagabukas nga pamulongpulong nagpatuhoy sa internasyonal nga mga tumalambong, nga naghalin sa Asia, Caribeano, Sentral kag Bagatnan nga Amerika, kag Europa. Nagapasad sang iya mga komento sa 2 Timoteo 4:⁠5, ginpadaku ni Utod Jaracz ang panguna nga hilikuton sang nahanas sa Gilead nga mga misyonero​—⁠ang ‘paghimo sang hilikuton sang isa ka ebanghelisador.’ Nagapanaksi ang mga misyonero sa kamatuoran paagi sa pagtudlo sang Biblia sa mga tawo.

Ang mga Estudyante Nagbaton sing Katapusan nga Instruksion

Nagasugod sang serye sang malip-ot nga mga pamulongpulong, si John Larson, isa ka katapo sang Branch Committee sa Estados Unidos, nagpamulongpulong tuhoy sa isa ka makapalig-on sing pagtuo nga topiko nga “Kon ang Dios Apin sa Aton, Sin-o ang Mangin Batok sa Aton?” (Roma 8:31) Ginpaathag sang humalambal ang pasad-sa-Biblia nga bug-os nga pagsalig sang mga estudyante sa gahom ni Jehova nga buligan sila nga malandas ang bisan ano nga balagbag nga mahimo maatubang nila sa ila mga asaynment. Nagagamit sang Roma 8:​38, 39, si Utod Larson naglaygay sa mga estudyante: “Magdulog kag magpamalandong sa gahom nga ginagamit sang Dios para sa inyo, kag dumduma nga wala sing makabugto sang kaangtanan ni Jehova sa inyo.”

Ang masunod nga humalambal amo si Guy Pierce, isa ka katapo sang Nagadumala nga Hubon. Ginpili niya ang tema nga “Hupti nga Malipayon ang Inyo mga Mata!” (Lucas 10:23) Ginpaathag niya nga ang matuod nga kalipay nagalakip sa pagkilala kay Jehova kag paghangop sang iya dayon nga katuyuan subong man ang pagkakita sang katumanan sang mga tagna sa Biblia. Bisan diin sila magkadto, mahuptan sang mga estudyante ang matuod nga kalipay paagi sa paghupot sang ila mga mata nga malipayon. Ginpalig-on ni Utod Pierce ang mga naggradwar nga pamalandungan sing tudok ang kaayo ni Jehova kag huptan ang ila hunahuna kag tagipusuon nga nasentro sa paghimo sang Iya kabubut-on. (Salmo 77:12) Paagi sa paghupot sing positibo nga panimuot, malandas sang mga naggradwar ang bisan ano nga mga problema nga mahimo masumalang nila.

Pagkatapos sini, namati ang klase sa nagapamilinbilin nga mga pagpalig-on gikan sa duha nila ka instruktor nga nagtudlo sa ila adlaw-adlaw. Ang pamangkot nga gingamit ni Lawrence Bowen sa tig-ulo sang iya pamulongpulong amo ang “Nagapangita Ka Bala Sang Himaya?” Ginahunahuna sang kalabanan nga tawo  nga ang himaya naangot sa kadayawan, dungog, kag pagkilala sa ila. Apang, ang salmista nga si Asaf nakahangop sang matuod nga himaya​—⁠ang labing malahalon nga bahandi sang isa ka maayo nga kaangtanan kay Jehova. (Salmo 73:​24, 25) Ang mga estudyante nga naggradwar ginpalig-on nga maghupot sing isa ka suod nga kaangtanan kay Jehova paagi sa madalom nga pagtuon sa Biblia sing tayuyon. Ang mga anghel “nagahandum sa pagtan-aw” sang mga detalye tuhoy sa pagpanghikot sang katuyuan ni Jehova paagi kay Cristo. (1 Pedro 1:12) Luyag nila nga mahibaluan ang tanan tuhoy sa ila Amay agod mapabanaag nila ang iya himaya. Ginpalig-on dayon sang humalambal ang mga estudyante nga himayaon si Jehova sa ila mga asaynment sa pagkamisyonero paagi sa pagbulig sa iban nga masapwan ang bahandi nga bilidhon gid.

Ang registrar sang eskwelahan, si Wallace Liverance, naghinakop sang una nga serye sang mga pamulongpulong sa tema nga “Ihambal ang Kaalam Sang Dios sa Sagrado nga Likom.” (1 Corinto 2:⁠7) Ano ining diosnon nga kaalam nga ginhambal ni apostol Pablo sang misyonero sia? Amo ini ang maalamon kag gamhanan nga paagi ni Jehova sa pagpaluntad sing paghidait kag paghiusa sa bug-os nga uniberso. Ini nga kaalam nasentro kay Jesus. Sa baylo nga ibantala ang social gospel, ginbuligan ni Pablo ang mga tawo nga mahangpan kon paano tadlungon  sang Dios ang mga epekto sang sala ni Adan. (Efeso 3:​8, 9) Ginpalig-on sang humalambal ang iya mga tagpalamati: “Gamita ang inyo pribilehiyo sa pag-alagad subong sang ginhimo ni Pablo, nga nagtamod sang iya misyonero nga asaynment subong isa ka kahigayunan nga buligan ang mga tawo nga mahangpan kon paano si Jehova magapatuman sang iya katuyuan.”

Pagkatapos sini, si Mark Noumair, ang isa pa ka instruktor sa Gilead, nagdumala sang isa ka mapagsik nga paghinun-anon upod sa pila ka estudyante sang klase. Ang tema nga “Ang Pagtuon sa Pulong Sang Dios Nagapatubas Sing Makugi nga mga Ministro” nagpadaku sang mga pinamulong ni Pablo sa Roma 10:10. Ginsugid sang klase ang pila nila ka eksperiensia sa latagon samtang nagatambong sila sa eskwelahan. Ginpakita sang ila mga eksperiensia nga kon magtuon kag magpamalandong kita sa Pulong sang Dios, ang makadalayaw nga mga butang tuhoy kay Jehova nga Dios kag sa iya Ginharian amo ang magapuno sang aton tagipusuon kag masugiran naton ang iban tuhoy sa sini. Sa lima ka bulan nila nga pagtener sa Watchtower Educational Center, ang mga estudyante nakasugod sing kapin sa 30 ka pagtuon sa Biblia sa puluy-an upod sa mga interesado sa pirme ginapanaksihan nga mga teritoryo sang kaingod nga mga kongregasyon.

Ang mga Hamtong Nagpamulong

Sa ila pag-eskwela, nakabenepisyo ang mga estudyante paagi sa pagpakig-upod sa mga katapo sang pamilya Bethel sa Estados Unidos. Ang mga katapo sang sanga sa Estados Unidos nga sanday Robert Ciranko kag Robert P. Johnson nag-interbyu sa pila ka madugay na nga bug-os tion nga mga alagad ni Jehova, lakip ang nagalakbay nga mga manugtatap nga ginahanas karon sa Watchtower Educational Center. Ang tanan nga gin-interbyu mga gradwado sang Gilead nga nakaagi man misyonero. Makapalig-on gid sa mga estudyante kag sa ila mga pamilya kag mga abyan nga makabati sing mga laygay gikan sa sining eksperiensiado nga espirituwal nga mga tawo.

Ang ila mga laygay naglakip sa: “Pirme gid mangin masako sa ministeryo kag sa kongregasyon.” “Balanseha ang pagtamod mo sa imo kaugalingon. Dumduma pirme ang imo katuyuan subong misyonero, kag kabiga nga imo puluy-an ang imo asaynment.” Ang iban sang makabulig nga mga komento nagailustrar kon paano nasangkapan sang paghanas sa Gilead ang isa ka ministro para sa maayo nga hilikuton, bisan diin man sia naasayn. Yari ang pila sa sini: “Natun-an namon nga magkooperar kag magpangabudlay sing tingob.” “Ang eskwelahan nagbulig sa amon nga batunon ang bag-o nga mga kultura.” “Gintudluan kami kon paano gamiton ang Kasulatan sa tuhay naman nga anggulo.”

Si John E. Barr, isa ka madugay na nga katapo sang Nagadumala nga Hubon, amo ang naghatag sing panguna nga pamulongpulong sa programa. Ang iya pasad-sa-Kasulatan nga tema amo ang “Sa Bug-os nga Duta ang Ila Tunog Naggua.” (Roma 10:18) Namangkot sia, Natuman bala sang katawhan sang Dios karon ining mabudlay nga hilikuton? Huo, sa pagkamatuod! Sugod pa sang 1881, ang mga bumalasa sang magasin nga Ang Lalantawan ginpamangkot: “Nagabantala ka bala?” Nian ang humalambal nagpahanumdom sa tanan nga tagpalamati sang maragtason nga panawagan sang 1922 nga kombension sa Cedar Point, Ohio, E.⁠U.⁠A.: “Ibantala ang Hari kag ang iya Ginharian!” Sa pagligad sang tion, ang kakugi sang matutom nga mga alagad sang Dios nagpahulag sa ila nga ibantala ang dalayawon nga mga kamatuoran tuhoy sa Ginharian sa tanan nga kapungsuran. Paagi sa naimprinta nga mga balasahon kag paagi sa paghambal, ang maayong balita nakalab-ot sa mga ukbong sang napuy-an nga duta​—⁠tanan sa kahimayaan kag kadayawan ni Jehova. Sa isa ka makapapagsik nga konklusion, ginpalig-on ni Utod Barr ang mga manuggradwar nga isipon ang ila mga pagpakamaayo, nga nagasiling: “Adlaw-adlaw, kon nagapangamuyo kamo kay Jehova didto sa inyo asaynment, pasalamati sia sing tudok sa tagipusuon bangod sang inyo bahin sa katumanan sang mga pinamulong, ‘Sa bug-os nga duta ang ila tunog naggua.’”

Pagkatapos sining pamulongpulong, ginbasa ang mga panamyaw, kag ginhatag sang tsirman ang diploma sa kada naggradwar. Nian, upod ang nagasalakot nga kalipay kag kasubo bangod biyaan na nila ang pinalangga nga eskwelahan, ginbasa sang isa ka tiglawas sang klase ang tinagipusuon nga resolusyon nga ginpatuhoy sa Nagadumala nga Hubon kag sa pamilya Bethel, nga nagapabutyag sang determinasyon sang mga naggradwar nga dayawon si Jehova “kutob karon kag tubtob sa panahon nga walay latid.”​​—⁠Salmo 115:18.

Ginapangamuyo naton nga ining mga naggradwar makapasibu sa ila bag-o nga mga puluy-an kag makabulig sing maayo sa pag-uswag sang bug-os kalibutan nga pagbantala nga hilikuton, kaangay sang mga nauna sa ila sa sulod na sang 60 ka tuig.

[Kahon sa pahina 23]

ESTADISTIKA SANG KLASE

Kadamuon sang mga pungsod nga gintiglawas: 12

Kadamuon sang mga pungsod nga ginpadalhan: 16

Kadamuon sang mga estudyante: 48

Promedyo nga edad: 34.4

Promedyo nga tuig sa kamatuoran: 17.6

Promedyo nga tuig sa bug-os tion nga ministeryo: 13.5

[Retrato sa pahina 24]

Ika-114 nga Naggradwar nga Klase sang Watchtower Bible School of Gilead

Sa listahan sa ubos, ang mga raya ginanumeruhan halin sa atubangan pa-likod, kag ang mga ngalan ginalista halin sa wala pa-tuo sa kada raya.

(1) Rosa, D.; Garrigolas, J.; Lindström, R.; Pavanello, P.; Tait, N. (2) Van Hout, M.; Donabauer, C.; Martínez, L.; Millar, D.; Festré, Y.; Nutter, S. (3) Martínez, P.; Clarke, L.; Maughan, B.; Fischer, L.; Romo, G. (4) Romo, R.; Eadie, S.; Tuynman, C.; Campbell, P.; Millar, D.; Rosa, W. (5) Lindström, C.; Garrigolas, J.; Markevich, N.; Lindala, K.; van den Heuvel, J.; Tait, S.; Nutter, P. (6) Maughan, P.; Pavanello, V.; Eadie, N.; West, A.; Clarke, D.; Markevich, J. (7) Fischer, D.; Donabauer, R.; Curry, P.; Curry, Y.; Carfagno, W.; West, M.; Tuynman, A. (8) Van Hout, M.; Campbell, C.; Festré, Y.; Carfagno, C.; van den Heuvel, K.; Lindala, D.