Kon ano ang Matudlo sang mga Pispis sa Aton

“PANILAGI ninyo sing maayo ang mga pispis sa langit, bangod wala sila nagasab-ug ukon nagaani ukon nagatipon sa mga kamalig; walay sapayan ginapakaon sila sang inyo langitnon nga Amay. Indi bala kamo mahal pa sa ila?” (Mateo 6:26) Amo ini ang ginsiling ni Jesucristo sa iya bantog nga sermon sa higad sang bukid malapit sa Dagat sang Galilea. Indi lamang ang iya mga disipulo ang nagapamati. Yara man ang daku nga kadam-an sang katawhan nga mahimo mangin mga disipulo niya gikan sa tanan nga bahin sang pungsod. Madamo sa ila ang mga imol nga nagdala sang mga balatianon agod ipabulong kay Jesus.​​—⁠Mateo 4:​23⁠–​5:⁠2; Lucas 6:​17-​20.

Sang naayo ang tanan nga mga masakiton, ginpatalupangod ni Jesus ang mas importante nga espirituwal nga mga kinahanglanon. Ang isa sa mga leksion nga iya gintudlo amo ang ginhinambitan bag-o lang.

Ang mga pispis sa langit madugay na nga nagaluntad. Ang iban sa ila nagatuka sing mga insekto, ang iban naman sing prutas kag mga binhi. Kon ginaamanan sang Dios sing bugana nga pagkaon ang mga pispis, pat-od gid nga mabuligan niya ang iya tawhanon nga mga alagad nga matigayon ang ila kalan-on sa adlaw-adlaw. Mahimo niya himuon ini paagi sa pagbulig sa ila nga makakita sing trabaho agod makasaplid sing kuarta para ibakal sing pagkaon. Ukon mahimo pakamaayuhon niya ang ila mga pananom para may pagkaon sila. Sa panahon sang emerhensia, mapahulag sang Dios ang tagipusuon sang mainayuhon nga mga kaingod kag mga abyan agod ipaambit ang ila pagkaon sa mga nawad-an.

Madamo pa gid kita sing matun-an paagi sa pagpanilag sing maayo sa pagkabuhi sang mga pispis. Gintuga sang Dios ang mga pispis nga may makatilingala nga kinaugali sa paghimo sing mga pugad nga sa sini mapadaku nila ang ila mga buto. Talupangda ang duha ka sahi sang pugad. Ang laragway sa wala amo ang pugad sang rock martin sa Aprika. Gintukod ini sa kadaygan sang isa ka bato ukon sa dingding sang isa ka balay. Ang atop sini nga mga pugad amo ang nagakabit nga bato ukon, subong sang ginapakita sa laragway, ang balisbisan sang isa ka bilding. Ang salog sang pugad human sa magagmay nga inumok sang lunang nga gintapiktapik agod mangin daw korte-tasa. Nagabuligay ang sulog kag munga sa pagtipon sang mga inumok nga lunang kag mahimo mahuman ang ila pugad sa kapin sa isa ka bulan. Nian ginabutangan nila sing mga hilamon kag bulbol ang nasulod nga kadaygan sini. Nagabuligay sila sa pagpatuka sa ila buto. Ang laragway sa ubos amo ang pugad sang isa ka sulog nga masked weaver. Ining mapisan nga pispis sa Aprika nagahimo sang iya pugad nga ginagamit ang mga dahon sang mga hilamon ukon mga nahot sang iban nga mga tanom. Makahuman ini sing pugad sa sulod sang isa ka adlaw kag makahimo sing sobra sa 30 ka pugad sa isa ka panag-on!

Ano ang leksion? Kon ginasangkapan sang Dios ang mga pispis sini nga mga ikasarang kag sing bugana nga mga materyales sa paghimo sing mga pugad, pat-od gid nga mabuligan man niya ang iya tawhanon nga mga alagad nga makatigayon sing kinahanglanon nga puluy-an. Apang, ginpakita ni Jesus nga may butang pa nga ginakinahanglan kon luyag naton nga buligan kita ni Jehova nga matigayon ang aton materyal nga mga kinahanglanon. “Padayon, nian, nga pangitaa anay ang ginharian kag ang iya pagkamatarong, kag ining tanan iban pa nga mga butang idugang sa inyo,” pasalig ni Jesus. (Mateo 6:33) Mahimo ka mamangkot, ‘Ano ang nadalahig sa pag-una sa Ginharian sang Dios?’ Ang mga Saksi ni Jehova, nga nagapanagtag sini nga magasin, nalipay sa pagsabat sini nga pamangkot.