Kon Ngaa Indi Kita Mahimo Magkinaugalingon

SI Hari Solomon sang dumaan nga Israel nagsiling: “Ang duha maayo pa sa isa, bangod may maayo sila nga balos bangod sang ila pagpangabudlay. Kay kon mapukan ang isa sa ila, mabangon sang isa ang iya kaupod. Apang paano na lang kon mapukan ang isa kag wala sing iban nga magbangon sa iya?” (Manugwali 4:​9, 10) Ginapadaku sining maalam nga tagpanilag sang tawhanon nga paggawi ang pagkinahanglan naton sing kaupod kag ang importansia sang indi pagpain sang aton kaugalingon. Apang, indi lamang ini opinyon sang tawo. Ang ginsiling ni Solomon naghalin sa diosnon nga kaalam kag gin-inspirar sang Dios.

Indi maalamon nga painon naton ang aton kaugalingon. Kinahanglan sang tawo ang isa kag isa. Kinahanglan naton tanan ang kusog kag bulig sang iban nga mga tawo. “Ang isa nga nagapain sang iya kaugalingon magapangita sang iya makagod nga handum,” siling sang hulubaton sa Biblia. “Magapamatok sia sa tanan praktikal nga kaalam.” (Hulubaton 18:1) Gani indi katingalahan nga ginapalig-on sang mga social scientist ang mga indibiduwal nga magbuylog sa isa ka grupo kag magpakita sing interes sa iban.

Lakip sa mga rekomendasyon para mapasag-uli ang maayo nga pagtamdanay sa komunidad, ginsambit ni Propesor Robert Putnam ang “pagpabakod sa impluwensia sang pagtuo sa Dios.” Ang mga Saksi ni Jehova tumalagsahon sa sini nga bahin bangod nagaagom sila sing proteksion sa tulad-pamilya nga mga kongregasyon sa bug-os nga duta. Nahisanto sa ginsiling ni apostol Pedro, may yara sila ‘gugma sa bug-os nga katilingban sang mga kauturan,’ nga may yara matinahuron nga “kahadlok sa Dios.” (1 Pedro 2:17) Ginalikawan man sang mga Saksi ang pagpain sa kaugalingon kag ang makahalalit nga mga epekto sini bangod ang madamong positibo nga mga hilikuton nga naangot sa matuod nga pagsimba nagapahulag sa ila nga buligan ang ila mga isigkatawo sa pagtuon sa kamatuoran nga masapwan sa Pulong sang Dios, ang Biblia.​—⁠2 Timoteo 2:15.

Ginbag-o sang Gugma kag Pag-inupdanay ang Ila Kabuhi

Ang mga Saksi ni Jehova ginahuman sang isa ka nahiusa nga komunidad diin ang tagsa ka katapo may importante nga bahin. Binagbinaga ang halimbawa ni Miguel, ni Froylán, kag ni Alma Ruth, tatlo ka miembro sang isa ka Latin-Amerikano nga pamilya. Nabun-ag sila nga may problema sa tul-an nga nagaresulta sa isa ka sahi sang pagkainano. Sila nga tatlo naga-wheelchair. Ano ang epekto sa ila kabuhi sang pagpakig-upod nila sa mga Saksi?

Si Miguel nagkomento: “Naeksperiensiahan ko anay ang mga krisis sa kabuhi, apang sang nakig-upod  ako sa katawhan ni Jehova, nagbag-o ang akon kabuhi. Ang pagpain sa kaugalingon makatalagam gid. Ang pagpakig-upod sa mga masigkatumuluo sa Cristianong mga miting kada semana nagbulig gid sa akon nga mangin kontento kag naayawan.”

Si Alma Ruth nagsiling man: “May mga higayon anay nga napung-awan gid ako; nasubuan gid ako. Apang sang matun-an ko ang tuhoy kay Jehova, nabatyagan ko nga mahimo ako makatigayon sing suod nga relasyon sa iya. Para sa akon, amo ini ang labing bilidhon nga butang sa kabuhi. Ginsuportahan gid kami sang amon pamilya, kag labi ini nga nagpahiusa sa amon.”

Mahigugmaon nga gintudluan si Miguel sang iya amay sa pagbasa kag sa pagsulat. Nian gintudluan man ni Miguel si Froylán kag si Alma Ruth. Kinahanglan ini para sa ila espirituwalidad. “Ang pagtuon sa pagbasa nakabulig sing daku sa amon bangod mahimo na kami makakaon sa espirituwal paagi sa pagbasa sa Biblia kag sa mga publikasyon pasad sa Biblia,” siling ni Alma Ruth.

Sa karon, si Miguel nagaalagad subong isa ka Cristiano nga gulang. Nabasa na ni Froylán ang bug-os nga Biblia sing siam ka beses. Ginpasangkad ni Alma Ruth ang iya pag-alagad kay Jehova subong payunir nga ministro, ukon bug-os tion nga manugbantala sang Ginharian, sugod sang 1996. Nagkomento sia: “Paagi sa pagpakamaayo ni Jehova nalab-ot ko ini nga tulumuron, kay indi lamang nga ginbuligan ako sang akon pinalangga nga mga kauturan sa pagbantala kundi gintudluan man nila ako kon paano dumalahan ang 11 ka pagtuon sa Biblia nga nasugdan ko.”

Ang isa pa ka maayong halimbawa amo si Emelia, nga kinahanglan mag-wheelchair sang nahalitan ang iya mga batiis kag taludtod bangod sa aksidente. Ang mga Saksi ni Jehova sa Mexico City nagtuon sing Biblia upod sa iya, kag nabawtismuhan sia sang 1996. Si Emelia nagsiling: “Sang wala ko pa matun-an ang kamatuoran, luyag ko manginmatay; indi ko na luyag mabuhi. Nagbatyag ako nga walay kabilinggan, kag nagahilibion ako sa adlaw kag gab-i. Apang sang nakig-upod ako sa katawhan ni Jehova, nabatyagan ko ang gugma sang mga kauturan. Ang personal nga interes nga ginpakita nila sa akon makapalig-on gid. Ang isa sa mga gulang nangin daw akon magulang ukon amay. Gindala niya ako kag sang iban pa nga mga ministeryal nga alagad sa mga miting kag sa hilikuton nga pagbantala sakay sa akon wheelchair.”

Si José, nga ginbawtismuhan subong isa sang mga Saksi ni Jehova sang 1992, nagpangabuhi sing isahanon. Setenta anyos sia, kag nagretiro sa trabaho sang 1990. Si José ginpung-aw anay, apang sa tapos sia mabantalaan sang isa ka Saksi, gilayon nga nagtambong sia sa Cristianong mga miting.  Naluyagan niya ang iya nabatian kag nakita didto. Halimbawa, nakita niya ang pag-inupdanay sang mga kauturan kag nabatyagan ang ila pag-ulikid sa iya. Ginaatipan sia karon sang mga gulang kag sang mga ministeryal nga alagad sa iya kongregasyon. (Filipos 1:⁠1; 1 Pedro 5:2) Ining mga masigkatumuluo “nagapabakod nga bulig” sa iya. (Colosas 4:11) Ginadala nila sia sa doktor, ginaduaw sia sa iya puluy-an, kag ginsuportahan sia sa emosyon sa tion sang iya apat ka operasyon. Sia nagsiling: “Nagaulikid sila sa akon. Sila gid ang akon pamilya. Nalipay ako sa pagpakig-upod sa ila.”

May Matuod nga Kalipay sa Paghatag

Sang nagsiling si Hari Solomon nga “ang duha maayo pa sa isa,” bag-o lang niya ginhambal ang pagkawalay kapuslanan sang paghugod sang tanan nga panikasog sa pagtigayon sing materyal nga mga manggad. (Manugwali 4:7-9) Amo gid sini ang hanuot nga ginahimud-usan karon sang madamo, bisan pa nagakahulugan ini sang pagsakripisyo sa tawhanon nga mga relasyon sa sulod kag sa gua sang pamilya.

Ining espiritu sang kakagod kag kadalok nagdul-ong sa madamo nga painon ang ila kaugalingon. Wala ini maghatag sa ila sing kalipay ukon kaayawan sa kabuhi, kay ang kapaslawan kag pagkawalay paglaum kinaandan na nga nabatyagan sang mga nagpadaug sa sining espiritu. Apang, ginapakita sang mga sugilanon nga bag-o lang ginsaysay ang maayo nga mga epekto sang pagpakig-upod sa mga nagaalagad kay Jehova kag sa mga napahulag sang gugma sa iya kag sa ila isigkatawo. Ang tayuyon nga pagtambong sa Cristianong mga miting, ang suportar kag pag-ulikid sang mga masigka-Cristiano, kag ang makugi nga pagpanghikot sa ministeryo nagbulig gid sa sining mga indibiduwal nga madaug ang negatibo nga mga balatyagon nga naangot sa pagkinaugalingon.​—⁠Hulubaton 17:17; Hebreo 10:​24, 25.

Sanglit nagasandig kita sa isa kag isa, natural lang nga ang paghimo sing mga butang para sa iban nagapatubas sing kaayawan. Si Albert Einstein, nga ang iya ginhimo nakabenepisyo sa iban, nagsiling: “Ang kabilihanan sang isa ka tawo . . . dapat makita sa ginahatag niya kag indi sa ginabaton niya.” Nahisanto ini sa pinamulong sang aton Ginuong Jesucristo: “May kapin nga kalipay sa paghatag sangsa pagbaton.” (Binuhatan 20:35) Gani, walay sapayan nga makalilipay nga makabaton sing gugma, makapapagros man nga magpakita sing gugma sa iban.

Ang isa ka nagalakbay nga manugtatap nga sa sulod sang mga tinuig nagaduaw sa mga kongregasyon agod maghatag sing espirituwal nga bulig kag nakabulig sa pagpatindog sing mga duog-tilipunan para sa mga Cristiano nga kulang sing kuarta nagpabutyag sang iya balatyagon sa sining paagi: “Ang kalipay nga maalagaran ang akon mga kauturan kag makita ang ila nawong nga puno sing apresasyon nagapahulag sa akon nga padayon nga magpangita sing mga kahigayunan nga makabulig. Naeksperiensiahan ko nga ang pagpakita sing personal nga interes sa iban amo ang yabi sa kalipay. Kag nahibaluan ko nga subong mga gulang, dapat kami mangin ‘subong sang palalipdan sa hangin . . . , subong sang mga ilig sang tubig sa duog nga kigas, subong sang landong sang daku nga igang sa duta nga lamgod.’”​—⁠Isaias 32:2.

Daw Ano Katahom Magpuyo sing Tingob sa Paghiusa!

Pat-od gid nga may daku nga benepisyo kag matuod nga kalipay sa pagbulig sa iban kag sa pagpakig-upod sa mga nagaalagad kay Jehova. “Yari karon!” tuaw sang salmista. “Daw ano kaayo kag  daw ano katahom sang mag-ulutod nga magpuyo sing tingob sa paghiliusa!” (Salmo 133:1) Ang paghiusa sa pamilya isa ka importante nga butang agod suportahan ang isa kag isa, subong sang ginpakita sa halimbawa ni Miguel, ni Froylán, kag ni Alma Ruth. Kag daw ano nga pagpakamaayo nga mahiusa sa isa kag isa sa matuod nga pagsimba! Sa tapos laygayan ang Cristiano nga mga mag-asawa, si apostol Pedro nagsulat: “Sa katapusan, kamo tanan mag-anggid sa panghunahuna, nga nagapakita sing patugsiling, may utudnon nga gugma, mapinalanggaon nga kaawa, mapainubuson sa hunahuna.”​—⁠1 Pedro 3:8.

Ang matuod nga pag-inabyanay nagahatag sing daku nga mga benepisyo, lunsay sa emosyon kag sa espirituwal. Si apostol Pablo naglaygay sa mga masigkatumuluo: “Maghambal sing malugpayon sa mga kalag nga ginapung-awan, sakdagon ang mga maluya, magmainantuson sa tanan. . . . Pirme himud-usi ang maayo sa isa kag isa kag sa tanan.”​—⁠1 Tesalonica 5:​14, 15.

Busa, mangita sing praktikal nga mga paagi sa paghimo sing maayo sa iban. “Magbuhat [ka] sing maayo sa tanan, apang labi na gid sa mga may labot sa [imo] sa pagtuo,” kay magahatag ini sing matuod nga kabilinggan sa imo kabuhi kag magapahalipay kag magapabatyag sa imo sing kaayawan. (Galacia 6:​9, 10) Si Santiago, nga disipulo ni Jesus, nagsulat: “Kon ang isa ka utod nga lalaki ukon isa ka utod nga babayi hubo kag kulang sing kalan-on nga nagakaigo para sa adlaw, apang may isa sa inyo nga nagasiling sa ila: ‘Lakat kamo sa paghidait, magpainit-init kag magpakabusog,’ apang wala ninyo sila ginahatagan sing mga kinahanglanon para sa ila lawas, ano ang kapuslanan sini?” (Santiago 2:​15, 16) Maathag ang sabat sa sini nga pamangkot. Dapat naton ‘ituon ang mata, indi sa personal nga interes sang aton kaugalingon lamang nga mga butang, kundi sa personal man nga interes sang iban.’​—⁠Filipos 2:4.

Wala labot nga nagabulig sa iban sa materyal nga paagi kon may pinasahi nga kinahanglanon ukon kon may kalamidad, ang mga Saksi ni Jehova masako man sa pagbulig sa mga isigkatawo sa importante nga paagi​—⁠ang pagbantala sing maayong balita sang Ginharian sang Dios. (Mateo 24:14) Ang pagpakigbahin sang kapin sa 6,000,000 ka Saksi sa pagbantala sining mensahe sang paglaum kag lugpay pamatuod sang ila matuod kag mahigugmaon nga interes sa iban. Apang ang paghatag sing bulig gikan sa Balaan nga Kasulatan magapaayaw man sa isa pa ka kinahanglanon sang tawo. Ano ini?

Pagpaayaw sa Importante nga Kinahanglanon

Agod matigayon ang matuod nga kalipay, dapat nga may yara kita maayo nga kaangtanan sa Dios. Ginasiling ini: “Ang katunayan nga ang tawo, bisan diin sa tanan nga tion, sugod sa umpisa tubtob karon, napahulag sa pagpanawag sa isa nga ginapatihan niya nga mas mataas kag mas gamhanan sangsa iya, nagapakita nga ang relihion duna kag dapat kilalahon suno sa siensia. . . . Dapat kita mahalawhaw, mahayanghag kag mapunaw nga makita ang mga tawo bisan diin nga nagapangita, kag nagapati, sa isa ka supremo nga persona.”​—⁠Man Does Not Stand Alone, ni A. Cressy Morrison.

Si Jesucristo nagsiling: “Malipayon ang mga mahunahunaon sang ila espirituwal nga kinahanglanon.” (Mateo 5:3) Ang mga tawo indi magmadinalag-on kon madugay sila nga magpahilayo sa iban. Apang, ilabi na gid kon magpahilayo kita sa aton Manunuga. (Bugna 4:11) Ang pagtigayon kag pag-aplikar sa “ihibalo gid sa Dios” dapat mangin isa ka importante nga bahin sang aton kabuhi. (Hulubaton 2:1-5) Sa pagkamatuod, dapat kita mangin determinado nga paayawan ang aton espirituwal nga kinahanglanon, kay indi kita mahimo magkinaugalingon kag magpahilayo sa Dios. Ang isa ka malipayon kag makapaladya gid nga kabuhi nasandig sa maayo nga relasyon kay Jehova, “ang Labing Mataas sa bug-os nga duta.”​—⁠Salmo 83:18.

[Retrato sa pahina 5]

Miguel: “Naeksperiensiahan ko anay ang mga krisis sa kabuhi, apang sang nakig-upod ako sa katawhan ni Jehova, nagbag-o ang akon kabuhi”

[Retrato sa pahina 5]

Alma Ruth: “Sang matun-an ko ang tuhoy kay Jehova, nabatyagan ko nga mahimo ako makatigayon sing suod nga relasyon sa iya”

[Retrato sa pahina 6]

Emelia: “Sang wala ko pa matun-an ang kamatuoran, . . . nagbatyag ako nga walay kabilinggan”

[Retrato sa pahina 7]

Ang pagpakig-upod sa matuod nga mga sumilimba nagapaayaw sang aton espirituwal nga kinahanglanon