Report sang Mga Manugbantala sang Ginharian

Makalilipay nga mga Resulta Bangod sang Pagkamapailubon kag Pagkamapinadayunon

GINTAGNA ni Jesucristo nga sa katapusan nga mga adlaw “ang gugma sang kalabanan magabugnaw.” Subong resulta, sa madamo nga bahin sang kalibutan karon, ang katawhan sa kabilugan wala nagasapak sa maayong balita sang Ginharian. Ginatamay pa gani sang iban ang relihion.​​—⁠Mateo 24:​12, 14.

Walay sapayan sini, paagi sa pagtuo kag pagkamapailubon, ang mga manugbantala sang Ginharian nagmadinalag-on sa pag-atubang sa hangkat, subong sang ginapakita sang isa ka eksperiensia sa Czech Republic.

Duha ka Saksi nga babayi ang nakigsugilanon sa isa ka babayi nga sirado ang puertahan. Wala madugay, nagbukas diutay ang puertahan, kag gindawhat sang babayi ang mga magasin nga Ang Lalantawan kag Magmata! nga ginatanyag sang mga Saksi. Nagsiling sia nga “salamat,” kag ginsira ang puertahan. “Mabalik pa bala kita?” palibog sang mga Saksi. Ang isa sa ila, nga isa ka payunir ukon bug-os tion nga ministro, namat-od nga magbalik, apang amo gihapon ang natabo, kag nagpadayon ini sa sulod sang isa ka tuig.

Nakadesisyon nga bag-uhon niya ang iya pamaagi sa pagpalapit, ang payunir nangamuyo sing bulig kay Jehova. Sang masunod nga higayon nga gintanyag niya ang mga magasin, ginpamangkot niya sing mainabyanon ang babayi: “Kumusta ka? Naluyagan mo bala ang mga magasin?” Sang primero wala sing sabat, apang pagligad sang pila pa ka pagduaw, nangin mas mainabyanon ang babayi. Isa ka bes ginbuksan niya sing daku ang puertahan, apang malip-ot lang ang paghambalanay.

Bangod sang pagpangalag-ag sang babayi nga makigsugilanon sa puertahan, namat-od ang payunir nga sulatan sia kag ipaathag ang katuyuan sang mga pagduaw kag agod tanyagan sia sing isa ka pagtuon sa Biblia sa puluy-an. Sang ulihi, pagligad sang isa ka tuig kag tunga sang mapailubon nga panikasog, nagmadinalag-on ang payunir nga masugdan ang isa ka pagtuon sa Biblia upod sa tagbalay. Nakibot sia apang napalig-on sang ginsugiran sia sang ulihi sang babayi: “Nagpati ako sa Dios sugod sang ginhatagan ninyo ako sang mga magasin.”

Sa pagkamatuod, ang pagkamapailubon kag pagkamapinadayunon makadala sing makalilipay nga mga resulta sa pagbantala sing Ginharian kag paghimo sing disipulo nga hilikuton.​​—⁠Mateo 28:​19, 20.