“May Duha ka Babayi nga Nanuktok sa Amon Puertahan”

“DUHA ka tuig na ang nagligad sang nangasubo gid kami sa kamatayon sang amon diutay nga bata nga babayi.” Amo ini ang umpisa sang isa ka sulat nga ginbalhag sa pamantalaan nga Le Progrès, nga gin-imprinta sa Saint-Étienne, Pransia.

“Si Mélissa tatlo ka bulan sadto kag may malala nga balatian nga trisomy 18. Mabudlay mo gid malampuwasan sing lubos ini nga trahedya nga daw indi gid makatarunganon. Bisan ginpadaku kami nga mga Katoliko, pirme namon ginpamensar nga ‘Dios ko, kon nagaluntad ka, ngaa ginapabay-an mo nga matabo ini nga mga butang?’” Maathag, ang iloy nga nagsulat sini nagbatyag sing kasubo kag pagkawalay mahimo. Ang iya sulat nagapadayon:

“Wala madugay pagkatapos sining mga hitabo, may duha ka babayi nga nanuktok sa amon puertahan. Nakilal-an ko dayon sila nga mga Saksi ni Jehova. Matinahuron na kuntani ako nga mangindi, apang natalupangdan ko ang isa ka brosyur nga ginatanyag nila. Tuhoy ini sa kon ngaa ginatugutan sang Dios ang pag-antos. Gani namat-od ako nga pasudlon sila agod pamatud-an nga sala ang ila mga pagpati. Ginhunahuna ko nga kon pag-antos ang pagahambalan, ang amon pamilya nag-antos gid sing tuman kag madamo na kami sing nabatian nga kinaandan nga mga komento subong sang ‘Ginhatag sia sang Dios sa aton, kag ginkuha man sia sang Dios.’ Ang mga Saksi nagpabilin sing mga sulusobra isa ka oras. May kahanuklog gid sila nga namati sa akon, kag sang manuglakat na sila, nahaw-asan gid ang akon pamatyag amo nga nagpasugot ako sa isa pa ka pagduaw. Duha na ka tuig ang nakaligad. Wala ako nangin isa sa mga Saksi ni Jehova, apang gin-umpisahan ko ang pagtuon sa Biblia upod sa ila, kag nagatambong ako sa ila mga miting sa tagsa ka tion nga mahimo ko.”