Mga Pamangkot Gikan sa mga Bumalasa

Gintugutan ni Jehova ang poligamya sang una sa iya mga alagad, ang mga Israelinhon, apang wala na niya ini ginatugutan subong. Nagabag-obag-o bala ang iya talaksan?

Wala magbag-o ang pagtamod ni Jehova sa poligamya. (Salmo 19:⁠7; Malaquias 3:6) Indi ini bahin sang iya kahimusan para sa mga tawo halin sang una, kag indi man ini bahin sang iya kahimusan karon. Sang gintuga niya si Eva subong asawa ni Adan, ginpahayag ni Jehova nga ang iya talaksan amo ang isa ka asawa para sa isa ka bana. “Amo sina kon ngaa bayaan sang lalaki ang iya amay kag ang iya iloy kag magahiusa sia sa iya asawa kag sila mangin isa ka unod.”​​—⁠Genesis 2:⁠24.

Sang si Jesucristo yari sa duta, ginsulit niya ini nga talaksan sa pagsabat sa mga nagpamangkot tuhoy sa diborsio kag pagpangasawa liwat. Sia nagsiling: “Wala bala ninyo mabasa nga sia nga nagtuga sa ila sa umpisa naghimo sa ila nga lalaki kag babayi kag nagsiling, ‘Bangod sini bayaan sang lalaki ang iya amay kag iloy kag maghiusa sa iya asawa, kag ang duha mangin isa ka unod’? Gani indi na sila duha, kundi isa ka unod.” Si Jesus nagsiling pa: “Ang bisan sin-o nga nagadiborsio sa iya asawa, luwas sa rason nga pakighilawas, kag magminyo sang iban nagapanghilahi.” (Mateo 19:​4-6, 9) Maathag suno diri nga ang pagpangasawa sing isa pa gid ukon kapin pa pagpanghilahi man.

Kon amo ngaa gintugutan ang poligamya sang una nga tiempo? Panumduma nga si Jehova wala nagpahimuno sini nga kinabatasan. Ang una nga ginhinambitan sa Biblia nga may kapin sa isa ka asawa amo si Lamec, isa ka kaliwat ni Cain. (Genesis 4:​19-​24) Sang ginpahanabo ni Jehova ang Anaw sa adlaw ni Noe, si Noe kag ang iya tatlo ka anak nga lalaki may tig-isa lang ka asawa. Ang tanan nga may madamo sing asawa nalaglag sa Anaw.

Sang ginpili ni Jehova mga siniglo sa ulihi ang mga Israelinhon subong iya katawhan, may pila nga madamo na sing asawa, apang maathag nga mas kinaandan sa mga bana sadto ang may isa lang ka asawa. Kon may kapin sa isa ka asawa, wala ginpangayo sang Dios nga magbulagay ang mga pamilya. Sa baylo, estrikto niya nga ginkontrol ang poligamya.​​—⁠Exodo 21:​10, 11; Deuteronomio 21:15-​17.

Ini nga pagpaumod sa poligamya temporaryo lang, kag maathag nga makita ini indi lamang sa pinamulong ni Jesus tuhoy sa orihinal nga talaksan ni Jehova sa pag-asawahay kundi sa ginsulat man ni apostol Pablo sa idalom sang pag-inspirar sang balaan nga espiritu sang Dios. Sia nagsiling: “Ang tagsa ka lalaki maghupot sang iya kaugalingon nga asawa kag ang tagsa ka babayi maghupot sang iya kaugalingon nga bana.” (1 Corinto 7:2) Gin-inspirar man si Pablo sa pagsulat nga ang bisan sin-o nga lalaki nga gintangduan subong manugtatap ukon ministeryal nga alagad sa Cristianong kongregasyon dapat “bana sang isa ka asawa.”​​—⁠1 Timoteo 3:​2, 12; Tito 1:6.

Gani, natapos ang pagpaumod ni Jehova sa poligamya sang gintukod ang Cristianong kongregasyon mga 2,000 ka tuig sang una. Sadto nga tion, ang talaksan sa pag-asawahay napasag-uli sa kon ano gid ini sa umpisa sang pagtuga sang Dios sa lalaki kag babayi: isa ka bana, isa ka asawa. Amo ini ang talaksan karon sa tunga sang katawhan sang Dios sa bug-os nga kalibutan.​​—⁠Marcos 10:​11, 12; 1 Corinto 6:​9, 10.