Pag-ilog sa Dios sang Kamatuoran

“Mangin mga manug-ilog kamo sang Dios, subong nga mga anak nga hinigugma.”​—⁠EFESO 5:1.

1. Ano ang ginapatihan sang iban tuhoy sa kamatuoran, kag ngaa indi husto ang ila pangatarungan?

“ANO ang kamatuoran?” (Juan 18:38) Ini nga pamangkot, nga mayagutaon nga ginpamangkot ni Poncio Pilato halos 2,000 ka tuig na ang nakalipas, nagapahangop nga ang kamatuoran mabudlay pangitaon. Madamo sa karon ang magaugyon. Ang kamatuoran mismo ginasalakay. Ayhan nabatian mo na ang ginasiling nga ang kada isa nagapamat-od kon ano ang kamatuoran, ukon nga ang kamatuoran relatibo lamang, ukon nga ang kamatuoran pirme nagabag-o. Ini nga pangatarungan indi husto. Ang tulumuron sang pagpanalawsaw kag edukasyon amo ang pagtuon sa mga katunayan, sa kamatuoran, tuhoy sa kalibutan nga aton ginapuy-an. Ang kamatuoran indi lamang personal nga opinyon. Halimbawa, mamalatyon bala ukon indi ang tawhanon nga kalag? Nagaluntad bala si Satanas ukon wala? May katuyuan bala ang kabuhi ukon wala? Sa sining tagsa ka halimbawa, isa lamang ang husto nga sabat. Ang isa husto, kag ang isa sayop; indi mahimo nga ang duha husto.

2. Sa anong mga paagi si Jehova amo ang Dios sang kamatuoran, kag ano nga mga pamangkot ang binagbinagon karon?

² Sa nauna nga artikulo, ginbinagbinag naton nga si Jehova amo ang Dios sang kamatuoran. Nahibaluan niya ang kamatuoran sa tanan nga butang. Tuhay sa iya malimbungon nga kaaway nga si Satanas nga Yawa, si Jehova pirme gid maminatud-on. Dugang pa, si Jehova bugana nga nagasugid sang kamatuoran sa iban. Si apostol Pablo naglaygay sa mga masigka-Cristiano: “Mangin mga manug-ilog kamo sang Dios, subong nga mga anak nga hinigugma.” (Efeso 5:1) Subong mga Saksi ni Jehova, paano naton sia mailog sa hambal kag sa pagkabuhi suno sa kamatuoran? Ngaa importante nga himuon ini? Kag ano ang pasalig nga ginakahamut-an ni Jehova ang mga nagakabuhi sing maminatud-on? Tan-awon naton.

3, 4. Paano ginlaragway nanday apostol Pablo kag Pedro ang mahanabo sa “katapusan nga mga adlaw”?

³ Nagakabuhi kita sa isa ka dag-on diin madamo sing kabutigan sa relihion. Subong sang gintagna ni apostol Pablo sa idalom sang inspirasyon sang Dios, madamo nga mga tawo sa sining “katapusan  nga mga adlaw” ang may dagway sang diosnon nga debosyon apang nagapanghiwala sang gahom sini. Ginapamatukan sang iban ang kamatuoran, kay ‘malaut gid ang ila hunahuna.’ Dugang pa, ‘ang malaut nga mga tawo kag mga impostor nagalain kag nagalain pa, nga nagapatalang kag ginapatalang.’ Bisan pa ini nga mga tawo pirme nagatuon, wala gid nila matigayon ang “sibu nga ihibalo sang kamatuoran.”​—⁠2 Timoteo 3:​1, 5, 7, 8, 13.

⁴ Si apostol Pedro gin-inspirar man sa pagsulat tuhoy sa katapusan nga mga adlaw. Subong sang gintagna niya, indi lamang ginasikway sang mga tawo ang kamatuoran kundi ginayubit man nila ang Pulong sang Dios kag ang mga nagabantala sang kamatuoran sini. “Suno sa ila luyag,” ining mga mayubiton wala nagasapak sa kamatuoran nga ang kalibutan sang adlaw ni Noe ginlaglag paagi sa anaw, sa amo nagahatag sing sulundan para sa palaabuton nga adlaw sang paghukom. Ang ginahunahuna nila nga matuod magakahulugan sing kalaglagan para sa ila kon mag-abot ang tion sang Dios sa paglaglag sa mga di-diosnon.​—⁠2 Pedro 3:3-7.

Nahibaluan sang mga Alagad ni Jehova ang Kamatuoran

5. Suno kay manalagna Daniel, ano ang matabo sa “tion sang katapusan,” kag paano natuman ini nga tagna?

⁵ Sa paglaragway sa “tion sang katapusan,” gintagna ni manalagna Daniel ang tuhay nga matabo sa tunga sang katawhan sang Dios​—⁠ang pagpasag-uli sa relihioso nga kamatuoran. Nagsulat sia: “Madamo ang magadalagan pakadto-pakari, kag ang matuod nga ihibalo magabugana.” (Daniel 12:4) Ang katawhan ni Jehova wala nagumon ukon nabulag sang daku nga Manuglimbong. Sa ila pagbukad sa mga pinanid sang Biblia, natigayon nila ang matuod nga ihibalo. Sang unang siglo, ginpasanagan ni Jesus ang iya mga disipulo. “Ginbuksan niya ang ila mga painuino agod nga makahangop sila sang kahulugan sang Kasulatan.” (Lucas 24:45) Sa aton adlaw, amo man ang ginahimo si Jehova. Paagi sa iya Pulong, sa iya espiritu, kag sa iya organisasyon, ginbuligan niya ang minilyon sa bug-os nga duta nga mahangpan ang nahibaluan na niya​—⁠ang kamatuoran.

6. Ano nga mga kamatuoran sa Biblia ang nahangpan karon sang katawhan sang Dios?

⁶ Subong katawhan sang Dios, nahangpan naton ang madamo nga mga butang nga kuntani wala naton mahibaluan. Nahibaluan naton ang sabat sa mga pamangkot nga ginapanikasugan sang mga mangin-alamon nga mahibaluan sa sulod sang mga milenyo. Halimbawa, nahibaluan naton kon ngaa nagaluntad ang pag-antos, kon ngaa nagakapatay ang mga tawo, kag kon ngaa indi matigayon sang mga tawo ang paghidait kag paghiusa sa bug-os nga kalibutan. Ginhatagan man kita sing ideya sa kon ano ang nagahulat sa palaabuton​—⁠ang Ginharian sang Dios, ang paraiso nga duta, kag ang himpit nga kabuhi nga walay katapusan. Nakilala naton si Jehova, ang Isa nga Supremo. Natun-an naton ang iya makagalanyat nga personalidad pati na kon ano ang dapat naton himuon agod matigayon ang iya pagpakamaayo. Ang paghibalo sa kamatuoran nagabulig sa aton nga makilala ang indi matuod. Ang pag-aplikar sa kamatuoran nagaamlig sa aton gikan sa walay bunga nga mga paghimud-os, nagabulig sa aton nga matigayon ang pinakamaayo sa kabuhi, kag nagahatag sa aton sing makalilipay nga paglaum sa palaabuton.

7. Sin-o ang makahangop sa kamatuoran, kag sin-o ang indi?

⁷ Nahangpan mo bala ang kamatuoran sang Biblia? Kon amo, ginpakamaayo gid ikaw. Kon ang isa ka awtor magsulat sing libro, masami nga ginasulat niya ini agod magganyat sa isa ka espesipiko nga grupo sang katawhan. Ang iban nga mga libro ginsulat para sa mga may mataas sing tinun-an, ang iban para sa mga kabataan, kag ang iban naman para sa pinasahi nga mga patag. Bisan pa ang Biblia mahapos nga matigayon sang tanan, gintuyo ini nga mahangpan kag maapresyar sang isa ka partikular nga grupo sang katawhan. Gindesinyo ini ni Jehova para sa mga mapainubuson kag sa mga mahagop sa duta. Mahangpan sini nga mga tawo ang kahulugan sang Biblia, bisan ano man ang ila tinun-an, kultura, kahimtangan sa kabuhi, ukon etniko nga grupo. (1 Timoteo 2:​3, 4) Sa pihak nga bahin, ang kamatuoran sang Biblia indi mahangpan sang mga indi nahuyog sa matarong, bisan daw ano man ka intelihente ukon edukado sila. Indi mahangpan sang mga matinaastaason, sang mga bugalon, ang hamili nga mga kamatuoran sang Pulong sang Dios. (Mateo 13:11-15; Lucas 10:21; Binuhatan 13:48) Ang Dios lamang ang makahimo sing subong sini nga sahi sang libro.

Ang mga Alagad ni Jehova Maminatud-on

8. Ngaa si Jesus amo gid ang kamatuoran?

⁸ Kaangay ni Jehova, ang iya matutom nga mga  Saksi maminatud-on. Ginpamatud-an ni Jesucristo, ang nagapanguna nga Saksi ni Jehova, ang kamatuoran paagi sa mga butang nga gintudlo niya kag paagi sa kon paano sia nagkabuhi kag napatay. Ginsakdag niya ang kamatuoran sang pulong kag mga saad ni Jehova. Gani, si Jesus amo gid ang kamatuoran, subong sang ginsiling niya mismo.​—⁠Juan 14:⁠6; Bugna 3:14; 19:10.

9. Ano ang ginasiling sang Kasulatan tuhoy sa paghambal sing kamatuoran?

⁹ Si Jesus ‘puno sing di-bagay nga kaayo kag kamatuoran’ kag “wala sing limbong sa iya baba.” (Juan 1:14; Isaias 53:9) Ginailog sang matuod nga mga Cristiano ang sulundan nga ginpahamtang ni Jesus nga mangin maminatud-on sa iban. Si Pablo naglaygay sa mga masigkatumuluo: “Maghambal sing kamatuoran ang tagsatagsa sa inyo sa iya isigkatawo, bangod mga bahin kita nga iya sang isa kag isa.” (Efeso 4:25) Antes sini, si manalagna Zacarias nagsulat: “Magpamulong kamo sing kamatuoran sa isa kag isa.” (Zacarias 8:16) Ang mga Cristiano maminatud-on bangod luyag nila pahamut-an ang Dios. Si Jehova maminatud-on kag nahibaluan niya ang halit nga bunga sang kabutigan. Gani, ginapaabot gid niya nga ang iya mga alagad maghambal sing kamatuoran.

10. Ngaa nagabinutig ang mga tawo, kag ano ang makahalalit nga mga resulta?

¹⁰ Para sa madamo, ang pagbutig daw isa ka mahapos nga paagi agod matigayon ang isa ka partikular nga bentaha. Ang mga tawo nagabutig agod makalikaw sa silot, agod makabenepisyo sa pila ka paagi, ukon agod dayawon sang iban. Apang, ang batasan nga pagbutig malain. Dugang pa, ang butigon indi makatigayon sang kahamuot sang Dios. (Bugna 21:​8, 27; 22:15) Kon kilala kita nga nagahambal sing matuod, magapati ang iban sa aton ginasiling; magasalig sila sa aton. Apang, kon madakpan kita nga nagabinutig bisan sing makaisa lang, magaduhaduha na ang iban kon bala ang bisan ano nga isiling naton sa ulihi matuod. Ang isa ka hulubaton sa Aprika nagasiling: “Ang isa ka pagbinutig nagaguba sa isa ka libo nga kamatuoran.” Ang isa pa ka hulubaton nagasiling: “Ang butigon indi pagpatihan, bisan maghambal pa sia sing kamatuoran.”

11. Sa anong paagi ang pagkamaminatud-on indi lamang paghambal sing kamatuoran?

¹¹ Ang pagkamaminatud-on wala lamang nagakahulugan sang paghambal sing kamatuoran. Dalanon ini sang kabuhi. Nagapakilala ini kon sin-o kita. Ginapakilala naton ang kamatuoran sa iban indi lamang paagi sa kon ano ang aton ginasiling kundi paagi man sa kon ano ang aton ginahimo. “Ikaw bala nga nagatudlo sa iban, wala nagatudlo sa imo kaugalingon?” pamangkot ni apostol Pablo. “Ikaw, nga nagabantala nga ‘Dili magpangawat,’ nagapangawat ka bala? Ikaw nga nagasiling ‘Dili magpanghilahi,’ nagapanghilahi ka bala?” (Roma 2:​21, 22) Agod mapaambit naton ang kamatuoran sa iban, dapat kita mangin maminatud-on sa tanan naton nga dalanon. Ang aton reputasyon subong maminatud-on kag bunayag may daku nga epekto sa mangin reaksion sang mga tawo sa aton ginatudlo.

12, 13. Ano ang ginsulat sang isa ka pamatan-on tuhoy sa pagkamaminatud-on, kag ano ang rason kon ngaa mataas ang iya talaksan sa moral?

¹² Nahangpan man sang mga pamatan-on sa tunga sang mga alagad ni Jehova ang importansia sang pagkamaminatud-on. Sa isa ka salaysay sa eskwelahan, si Jenny, nga 13 anyos sadto, nagsulat: “Ang pagkabunayag isa ka kinaiya nga akon gid ginapakabahandi. Makapasubo nga diutay lamang ang bunayag gid sa karon. Nangako ako sa akon kaugalingon nga pirme ako mangin bunayag sa akon kabuhi. Mangin bunayag man ako bisan pa nga ang paghambal sing kamatuoran indi gilayon makabenepisyo sa akon ukon sa akon mga abyan. Ginapat-od ko nga ang akon mga abyan amo ang mga tawo nga nagahambal sing kamatuoran kag bunayag.”

¹³ Bilang komento sa sining salaysay, ang maestra ni Jenny nagsiling: “Bisan bata ka pa, napalambo mo na ang isa ka mataas nga talaksan sa moral kag maayo nga pamatasan. Nahibaluan ko nga sundon mo ang imo talaksan bangod mataas ang imo moral.” Ngaa mataas ang moral sining pamatan-on? Sa introduksion sa iya salaysay, si Jenny nagsiling nga ang iya relihion “nagpahamtang sing mga talaksan para sa [iya] kabuhi.” Pito ka tuig na ang nagligad kutob sang ginsulat ni Jenny yadto nga salaysay. Subong sa ginpaabot sang iya maestra, si Jenny padayon nga nagapakita sing mataas nga talaksan sa moral sa iya kabuhi subong isa sa mga Saksi ni Jehova.

Ginapahayag sang mga Alagad ni Jehova ang Kamatuoran

14. Ngaa ang mga alagad sang Dios ilabi na nga may daku nga salabton sa pagsakdag sa kon ano ang matuod?

¹⁴ Sa pagkamatuod, magluwas sa mga Saksi ni  Jehova, ang iban mahimo nga nagahambal sing kamatuoran kag nagatinguha nga mangin bunayag. Apang, subong mga alagad sang Dios, ilabi na nga may daku kita nga salabton nga sakdagon ang matuod. Gintulin sa aton ang mga kamatuoran sa Biblia​—⁠mga kamatuoran nga makadul-ong sa isa sa kabuhi nga walay katapusan. Gani, obligasyon naton nga ipaambit ini nga ihibalo sa iban. “Ang bisan sin-o nga ginhatagan sing madamo,” siling ni Jesus, “madamo ang kinahanglanon sa iya.” (Lucas 12:48) Pat-od nga “madamo ang kinahanglanon” sa mga ginbugayan sing hamili nga ihibalo sang Dios.

15. Ano nga kalipay ang nabatyagan mo sa pagpaambit sang kamatuoran sang Biblia sa iban?

¹⁵ Makalilipay nga ipaambit ang kamatuoran sang Biblia sa iban. Kaangay sang unang-siglo nga mga disipulo ni Jesus, ginabantala naton ang maayong balita​—⁠ang makalilipay nga mensahe sang paglaum⁠​—⁠sa ‘ginpanitan kag nag-alaplaag kaangay sang mga karnero nga wala sing manugbantay’ kag sa mga nabulagan kag nagumon sang “mga panudlo sang mga demonyo.” (Mateo 9:36; 1 Timoteo 4:1) Si apostol Juan nagsulat: “Wala na ako sing daku pa nga rason sa pagpasalamat sangsa sining mga butang, sa pagpamati nga ang akon mga anak padayon nga nagalakat sa kamatuoran.” (3 Juan 4) Ang katutom sang “mga anak” ni Juan​—⁠ayhan ang mga gintudluan niya sing kamatuoran​—⁠naghatag sa iya sing daku nga kalipay. Nagakalipay kita kon apresyahon sang mga tawo ang Pulong sang Dios.

16, 17. (a) Ngaa indi tanan nagabaton sa kamatuoran? (b) Ano nga kalipay ang mabatyagan mo samtang ginabantala mo ang kamatuoran sang Biblia?

¹⁶ Matuod, indi tanan magabaton sa kamatuoran. Ginhambal ni Jesus ang kamatuoran tuhoy sa Dios, bisan pa madamo ang indi luyag sini. Nagsiling sia sa Judiyo nga mga manugpamatok: “Ngaa bala wala kamo nagatuo sa akon? Sia nga gikan sa Dios nagapamati sa mga pulong sang Dios. Amo ini ang kabangdanan kon ngaa wala kamo nagapamati, bangod indi kamo gikan sa Dios.”​—⁠Juan 8:​46, 47.

¹⁷ Kaangay ni Jesus, wala kita nagaisol sa paghambal sang hamili nga kamatuoran tuhoy kay Jehova. Wala kita nagapaabot nga batunon sang tanan ang ginahambal naton sa ila, kay indi tanan nagbaton sa ginsiling ni Jesus. Apang, nalipay kita nga mahibaluan nga husto ang ginahimo  naton. Bangod sa mahigugmaon nga kaayo ni Jehova, luyag niya nga sugiran ang katawhan sang kamatuoran. Subong mga nagapanag-iya sang kamatuoran, ang mga Cristiano nangin mga manugdala sing kapawa sa madulom nga kalibutan. Sa pagpaiwag sa kapawa sang kamatuoran paagi sa aton mga hambal kag mga buhat, mabuligan naton ang iban nga himayaon ang aton langitnon nga Amay. (Mateo 5:​14, 16) Ginapahibalo naton sing dayag nga ginasikway naton ang huwad nga bersion ni Satanas sang kamatuoran kag ginasakdag naton ang putli kag walay simbog nga Pulong sang Dios. Ang kamatuoran nga nahibaluan kag ginapaambit naton makahatag sing matuod nga kahilwayan sa mga nagabaton sini.​—⁠Juan 8:32.

Himud-usi ang Dalanon sang Kamatuoran

18. Ngaa kag paano ginkahamut-an ni Jesus si Natanael?

¹⁸ Ginhigugma kag ginpamulong ni Jesus ang kamatuoran. Sa tion sang iya ministeryo sa duta, ginkahamut-an niya ang mga maminatud-on. Tuhoy kay Natanael, si Jesus nagsiling: “Tan-awa, ang matuod nga Israelinhon, nga sa iya walay limbong.” (Juan 1:47) Amo kon ngaa, si Natanael, nga ayhan gintawag man nga Bartolome, ginpili nga mangin isa sa 12 ka apostoles. (Mateo 10:2-4) Daw ano gid nga kadungganan!

19-21. Paano ginpakamaayo ang anay bulag nga tawo bangod sang iya maisugon nga pagsugid sing kamatuoran?

¹⁹ Ang isa ka kapitulo sa tulun-an ni Juan sa Biblia nagaasoy sang sugilanon sang isa pa ka bunayag nga tawo nga ginpakamaayo ni Jesus. Wala naton mahibalui ang iya ngalan. Ang nahibaluan lang naton amo nga ang tawo isa ka manugpakilimos nga bulag halin sa pagkatawo. Natingala ang mga tawo sang ginpasag-uli ni Jesus ang iya itululok. Ang balita tuhoy sining milagruso nga pagpaayo nakalab-ot sa igdulungog sang pila ka Fariseo, ang mga nagadumot sa kamatuoran, nga naghilisugot nga paguaon sa sinagoga ang bisan sin-o nga nagatuo kay Jesus. Sang mahibaluan ang ila buko, ang hinadlukan nga mga ginikanan sang anay bulag nga tawo nagbinutig sa mga Fariseo, sa pagsiling nga wala sila makahibalo kon ngaa ang ila anak makakita na karon ukon kon sin-o ang nagpaayo sa iya.​—⁠Juan 9:1-23.

²⁰ Ginpaatubang liwat ang gin-ayo nga tawo sa mga Fariseo. Bisan ano pa ang matabo, maisugon nga ginsugid niya ang kamatuoran. Ginpaathag niya nga si Jesus ang nag-ayo sa iya kag kon paano sia gin-ayo. Natingala nga ining prominente kag edukado nga mga lalaki wala nagatuo nga si Jesus naghalin sa Dios, ang gin-ayo nga tawo walay kahadlok nga nagpalig-on sa ila nga batunon ang maathag gid nga butang: “Kon ini nga tawo indi gikan sa Dios, indi sia makahimo sing bisan ano.” Bangod wala sing masabat, ginsumbong sang mga Fariseo ini nga tawo nga bugalon kag ginpagua sia.​—⁠Juan 9:24-34.

²¹ Sang mabalitaan ni Jesus ang natabo, mahigugmaon nga ginpangita niya ang tawo. Sang makita niya sia, ginpalig-on niya ang pagtuo nga ginpakita sang anay bulag nga tawo. Hayag nga ginpakilala ni Jesus ang iya kaugalingon subong ang Mesias. Ginpakamaayo gid sia bangod sang pagsugid niya sing kamatuoran! Pat-od gid nga ginakahamut-an sang Dios ang mga nagahambal sing kamatuoran.​—⁠Juan 9:35-37.

22. Ngaa dapat naton himud-usan ang dalanon sang kamatuoran?

²² Ang pag-aplikar sa kamatuoran isa ka paghimud-os nga dapat naton seriosohon. Kinahanglanon ini agod mapabakod kag mahuptan ang maayo nga kaangtanan sa mga tawo kag sa Dios. Ang pagkamaminatud-on amo ang pagkatampad, matuod, madali palapitan, kag masaligan, kag ginakahamut-an ini ni Jehova. (Salmo 15:​1, 2) Ang pagkadimaminatud-on amo ang pagkamalimbungon, di-masaligan, kag huwad, kag wala ini ginakahamut-an ni Jehova. (Hulubaton 6:16-19) Busa, himud-usi ang dalanon sang pagkamaminatud-on. Sa pagkamatuod, agod mailog ang Dios sang kamatuoran, dapat naton mahibaluan ang kamatuoran, ihambal ang kamatuoran, kag magkabuhi sa kamatuoran.

Paano Mo Sabton?

• Ngaa nagapasalamat gid kita nga nahibaluan naton ang kamatuoran?

• Paano naton mailog si Jehova subong maminatud-on?

• Ano ang mga benepisyo sang pagsugid sa iban sang kamatuoran sang Biblia?

• Ngaa importante nga himud-usan ang dalanon sang pagkamaminatud-on?

[Mga Pamangkot sa Pagtinuon]

[Mga retrato sa pahina 17]

Gintulinan sang kamatuoran sa Biblia, ang mga Cristiano makugi nga nagapaambit sini sa iban

 [Mga retrato sa pahina 18]

Ang tawo nga bulag nga gin-ayo ni Jesus ginpakamaayo gid bangod sang pagsugid sing kamatuoran