“GINBATON ninyo nga wala sing bayad, ihatag ninyo nga wala sing bayad.” (Mateo 10:8) Ginhatag ni Jesus ini nga instruksion sa iya mga apostoles sang ginpadala niya sila sa pagbantala sing maayong balita. Gintuman bala ini sang mga apostoles? Huo, kag padayon nila nga gintuman ini bisan wala na si Jesus sa duta.

Halimbawa, sang nakita sang babaylan anay nga si Simon ang milagruso nga gahom sang mga apostoles nga sanday Pedro kag Juan, nagtanyag sia nga bayaran sila agod mahatagan sia sini nga gahom. Apang ginsabdong ni Pedro si Simon, nga nagasiling: “Kabay nga ang imo pilak mawala upod sa imo, bangod ginahunahuna mo nga angkunon paagi sa kuarta ang wala bayad nga dulot sang Dios.”—Binuhatan 8:18-20.

Ginpakita ni apostol Pablo ang panimuot nga kaangay sang iya ni Pedro. Mahimo kuntani makapabug-at sa pinansial si Pablo sa iya Cristianong mga kauturan sa Corinto. Apang, nangabudlay sia paagi sa iya mga kamot agod masakdag ang iya kaugalingon. (Binuhatan 18:1-3) Sa amo, masiling gid niya nga ginbantala niya ang maayong balita sa mga taga-Corinto nga “wala sing bayad.”—1 Corinto 4:12; 9:18.

Sing makapasubo, madamo sang nagapangangkon nga mga sumulunod ni Cristo ang wala magpakita sing pareho sini nga kahanda sa ‘paghatag nga wala sing bayad.’ Sa pagkamatuod, madamo sang relihioso nga mga lider sa Cristiandad ang ‘magatudlo tungod lamang sa suhol.’ (Miqueas 3:11) Ang iban nga mga lider sang relihion nagmanggaranon pa gani bangod sang kuarta nga ginakolekta gikan sa ila mga panong. Sang 1989, ang isa ka ebanghelisador sa Estados Unidos ginsentensiahan nga mabilanggo sing 45 ka tuig. Ang rason? ‘Gindayaan niya ang mga sumalakdag sing minilyon ka dolyar kag gingamit ang iban nga kuarta sa pagbakal sing mga balay kag salakyan, sa pagbakasyon, kag sa pagbakal pa gani sing air-conditioned nga balay sang ido.”—People’s Daily Graphic, Oktubre 7, 1989.

Sa Ghana, suno sa Ghanaian Times sang Marso 31, 1990, ginkuha sang Romano Katoliko nga pari ang kuarta nga nakolekta sa tion sang isa ka misa kag ginwas-ag ini sa kongregasyon. “Ang iya rason,” siling sang pamantalaan, “amo nga, subong mga hamtong, ginapaabot nga maghatag sila sing mas daku nga kantidad.” Indi katingalahan nga madamo nga simbahan ang nagapukaw sang kakagod sa ila mga katapo, kag aktibo nga ginatib-ong ang pagsugal kag iban pa nga mga paagi agod makakuarta.

Sa kabaliskaran, ginapanikasugan sang mga Saksi ni Jehova nga ilugon si Jesus kag ang iya mga disipulo sang una. Wala sila sing ginasuelduhan nga klero. Ang tagsa ka Saksi isa ka ministro nga may responsabilidad nga magbantala sing “maayong balita sang ginharian” sa iban. (Mateo 24:14) Busa, kapin sa anom ka milyon sa ila sa bug-os nga kalibutan ang nagapakigbahin sa pagdala sing “tubig sang kabuhi” nga walay bayad sa mga tawo. (Bugna 22:17) Sa sining paagi, bisan ang mga “wala sing kuarta” makabenepisyo gikan sa mensahe sang Biblia. (Isaias 55:1) Bisan pa ang ila bug-os kalibutan nga hilikuton ginasakdag paagi sa boluntaryo nga mga amot, wala sila nagapanukot  sing kuarta. Subong matuod nga mga ministro sang Dios, indi sila “mga manuglibod sing pulong sang Dios,” kundi nagahambal sila “bangod sang pagkasinsero, huo, subong ginpadala gikan sa Dios.”—2 Corinto 2:17.

Apang, ngaa handa ang mga Saksi ni Jehova nga buligan ang iban, kag ginahimo ini nga ginaabaga ang kagastuhanan? Ano ang nagapahulag sa ila? Ang paghatag bala nga wala sing bayad nagakahulugan nga ginahimo nila ini sing bug-os nga wala sing padya sa ila mga panikasog?

Ang matuod nga mga Cristiano karon panguna nga ginapahulag sang handum nga pahamut-an si Jehova—indi agod magmanggaranon. Sa amo, masabat nila ang hulusayon nga ginpautwas ni Satanas nga Yawa siniglo na ang nagligad. Tuhoy sa matarong nga si Job, ginhangkat ni Satanas si Jehova paagi sa pamangkot: “Nahadlok bala si Job sa Dios sa wala sing pulos?” Nagpasuni si Satanas nga ginaalagad lamang ni Job ang Dios bangod ginaamligan Niya si Job. Kon idingot kay Job ang iya materyal nga pagkabutang, siling ni Satanas, pakamalauton ni Job ang Dios sa iya nawong mismo!—Job 1:7-11.

Agod masabat ini nga hangkat, gintugutan sang Dios si Satanas nga tilawan si Job, nga nagasiling: “Ang tanan nga iya yara sa imo kamot.” (Job 1:12) Ang resulta? Ginpamatud-an ni Job nga butigon si Satanas. Bisan ano man nga kalamidad ang nahanabo sa iya, nagpabilin nga matutom si Job. “Tubtob nga mapatay ako indi ko pag-isikway ang akon integridad gikan sa akon!” siling niya.—Job 27:5, 6.

Ginapakita sang matuod nga mga sumilimba karon ang panimuot nga kaangay sang iya ni Job. Ang ila pag-alagad sa Dios wala ginapahulag sang materyal nga mga butang.

Ang isa pa ka rason kon ngaa ang matuod nga mga Cristiano handa sa ‘paghatag nga wala sing bayad’ amo nga sila mismo ‘nagbaton nga wala sing bayad’ gikan sa Dios. Ang katawhan naulipon sa sala kag kamatayon bangod sang sala sang aton katigulangan nga si Adan. (Roma 5:12) Mahigugmaon nga naghimo sing kahimusan si Jehova nga mapatay ang iya Anak subong halad—isa ka butang nga daku gid ang bili sa Dios. Ang katawhan indi gid takus sa sini. Isa ini ka dulot gikan sa Dios.—Roma 4:4; 5:8; 6:23.

Subong narekord sa Roma 3:23, 24, ginsilingan ni Pablo ang hinaplas nga mga Cristiano: “Ang tanan nagpakasala kag nakulangan sing himaya sang Dios, kag subong walay bayad nga dulot nga ginpahayag sila nga matarong sang iya di-bagay nga kaayo paagi sa paghilway bangod sa pagtubos nga ginbayad ni Cristo Jesus.” Ang mga nagalaum nga mabuhi sing dayon sa duta nakabaton man sing “walay bayad nga dulot.” Ini nga dulot nagalakip sang pribilehiyo nga mapahayag nga matarong subong mga abyan ni Jehova.—Santiago 2:23; Bugna 7:14.

Bangod sang halad nga gawad ni Cristo, ang tanan nga mga Cristiano makaalagad subong mga ministro sang Dios. Si apostol Pablo nagsulat: “Nangin ministro ako sini [sagrado nga likom] suno sa walay bayad nga dulot sang di-bagay nga kaayo sang Dios.” (Efeso 3:4-7) Bangod gintawag sa sining ministeryo paagi sa dulot nga indi sila takus ukon indi nila maangkon paagi sa pagpanikasog, ang matuod nga mga ministro sang Dios indi gid  makapaabot nga bayaran sing materyal tungod sa pagpaambit sing balita tuhoy sa sini nga dulot sa iban.

Kon amo, nagakahulugan bala ini nga ginapaabot sang Dios nga alagaron sia sang mga Cristiano nga wala sing bisan ano nga ginalauman nga padya? Indi, kay ginsilingan ni apostol Pablo ang iya mga masigkatumuluo: “Ang Dios indi di-matarong nga malipat sa inyo binuhatan kag sa gugma nga ginpakita ninyo tungod sa iya ngalan.” (Hebreo 6:10) Wala man sing inhustisya kay Jehova. (Deuteronomio 32:4) Sa kabaliskaran, si Jehova “manugpadya sadtong hanuot nga nagapangita sa iya.” (Hebreo 11:6) Apang indi bala ang saad nga kabuhi nga wala sing katapusan sa Paraiso isa ka pagsugyot sa kakagod?—Lucas 23:43.

Indi gid. Kay man, ang handum nga mabuhi sing dayon sa Paraiso sa duta naghalin sa Dios mismo. Sia ang naghatag sini nga paglaum sa una nga mag-asawa. (Genesis 1:28; 2:15-17) Sang gindula nanday Adan kag Eva ini nga paglaum para sa ila mga kaliwat ginpatigayon man sang Dios nga mapasag-uli ini. Sa amo, ang Dios nagasaad sa iya Pulong nga “ang tinuga man mismo hilwayon gikan sa pagkaulipon sa pagkamadinulunton kag magaagom sing mahimayaon nga kahilwayan sang mga anak sang Dios.” (Roma 8:21) Busa nagakaigo gid para sa mga Cristiano karon, kaangay ni Moises sang una, nga ‘magtulok sing maayo sa balos nga padya.’ (Hebreo 11:26) Wala ginahatag sang Dios ini nga padya bilang hamham. Ginahatag niya ini bangod sang iya tunay nga gugma sa mga nagaalagad sa iya. (2 Tesalonica 2:16, 17) Bilang balos, “nagahigugma kita, bangod sia ang una nga naghigugma sa aton.”—1 Juan 4:19.

Gani, dapat usisaon pirme sang mga Cristiano karon ang ila motibo sa pag-alagad sa Dios. Sa Juan 6:10-13, mabasa naton nga milagruso nga ginpakaon ni Jesus ang kadam-an nga kapin sa lima ka libo. Bangod sini, ang iban nagsunod kay Jesus bangod lang sang kakagod. Ginsilingan sila ni Jesus: “Ginapangita ninyo ako . . . bangod nakakaon kamo sing tinapay kag nabusog.” (Juan 6:26) Pagligad sang mga 30 ka tuig, ang pila ka dedikado nga Cristiano nag-alagad man sa Dios apang ‘wala sing putli nga motibo.’ (Filipos 1:17) Ang pila nga ‘wala nagaugyon sa makapapagros nga mga pulong ni Jesucristo’ nangita pa gani sing mga paagi agod makaganar sila gikan sa pagpakig-upod sa mga Cristiano.—1 Timoteo 6:3-5.

Sa karon, ang isa ka Cristiano nga nagaalagad lamang bangod luyag niya mabuhi sing dayon sa Paraiso mahimo nga nagaalagad man bangod sang makagod nga motibo. Sa ulihi, magaresulta ini sa espirituwal nga pagkapukan. Bangod ang sistema sang mga butang ni Satanas daw naglawig sangsa ginapaabot, mahimo nga ‘lapyuon’ sia, kag magabatyag nga nagapalantang ang katapusan. (Galacia 6:9) Mahimo nga maghinakit pa sia gani tungod sa ginhimo niya nga pagsakripisyo sa materyal. Si Jesus nagapahanumdom sa aton: “Higugmaa si Jehova nga imo Dios sa bug-os mo nga tagipusuon kag sa bug-os mo nga kalag kag sa bug-os mo nga hunahuna.” (Mateo 22:37) Huo, ang isa ka tawo nga ang panguna nga rason sa pag-alagad sa Dios amo ang gugma wala nagalatid sang tion sa iya pag-alagad. Determinado sia nga alagaron si Jehova sing dayon! (Miqueas 4:5) Wala sia nagahinulsol sa bisan ano nga pagsakripisyo niya may kaangtanan sa iya pag-alagad sa Dios. (Hebreo 13:15, 16) Ang gugma sa Dios nagapahulag sa iya nga unahon sa iya kabuhi ang mga intereses sang Dios.—Mateo 6:33.

Sa karon, kapin sa anom ka milyon ka matuod nga sumilimba ang ‘nagahalad sang ila kaugalingon sing kinabubut-on’ sa pag-alagad kay Jehova. (Salmo 110:3) Isa ka bala sa ila? Kon indi, nian pamalandungi ang ginatanyag sang Dios: ang putli nga ihibalo sa kamatuoran; (Juan 17:3) kahilwayan gikan sa pagkaulipon sa butig nga relihioso nga mga panudlo; (Juan 8:32) ang paglaum nga mabuhi sing dayon. (Bugna 21:3, 4) Ang mga Saksi ni Jehova makabulig sa imo nga matun-an kon paano mo mabaton ini tanan gikan sa Dios—nga wala sing bayad.