Ano nga Sahi sang Ngalan ang Ginahimo Mo Para sa Imo Kaugalingon?

NAKABASA ka na bala sa inyo lokal nga pamantalaan sing mga pahibalo sa kon sin-o ang mga napatay ukon nakakita ka na bala sing isa ka malawig nga report tuhoy sa kabuhi kag hinimuan sang isa ka tawo nga napatay? Ginpamangkot mo bala ang imo kaugalingon, ‘Ano ang masiling sang mga tawo tuhoy sa akon?’ Pila ayhan ang nagahunahuna kon paano sila dumdumon kon mapatay sila? Gani, binagbinaga ining prangka nga mga pamangkot: Ano karon ang masiling sang mga tawo tuhoy sa imo kon napatay ka kahapon? Ano nga sahi sang reputasyon ang ginahimo mo para sa imo kaugalingon? Paano mo luyag nga dumdumon sang imo mga kakilala kag sang Dios?

Ang maalam nga manunulat sang tulun-an sang Manugwali sa Biblia nagsiling: “Ang ngalan maayo pa sa bilidhon nga lana, kag ang adlaw sang kamatayon sangsa adlaw sang pagkatawo sang isa.” (Manugwali 7:1) Ngaa ang adlaw sang kamatayon maayo pa sa adlaw sang pagkatawo? Bangod sa adlaw sang pagkatawo, ang isa ka tawo wala pa sing natukod nga reputasyon. Wala pa sia sing personal nga rekord. Ang iya reputasyon mahimo nga positibo ukon negatibo sandig sa kon paano sia magakabuhi. Para sa mga nagtukod sing maayo nga ngalan sa sulod sang madamo nga tinuig, ang adlaw sang kamatayon maayo pa, sa pagkamatuod, sangsa adlaw sang pagkatawo.

Gani may yara kita mapilian. Sa katunayan, madamo kita sing mapilian sa adlaw-adlaw nga magapat-od sang aton reputasyon sa adlaw sang aton kamatayon, ilabi na kon paano kita dumdumon sang Dios. Gani, ang amo man nga maalam nga Hebreo nagsulat: “Ang handumanan sang matarong pakamaayuhon, apang ang ngalan sang mga malauton madunot.” (Hulubaton 10:7) Isa gid ka pribilehiyo nga dumdumon sang Dios para pakamaayuhon!

Kon maalamon kita, ang aton tulumuron amo ang pahamut-an ang Dios paagi sa pagkabuhi nahisanto sa iya mga talaksan. Nagakahulugan ini sang pagsunod sa sadsaran nga mga prinsipio nga ginpabutyag ni Cristo: “‘Higugmaa si Jehova nga imo Dios sa bug-os mo nga tagipusuon kag sa bug-os mo nga kalag kag sa bug-os mo nga hunahuna.’ Amo ini ang labing daku kag nahauna nga sugo. Ang ikaduha, kaangay sini, amo ini, ‘Higugmaa ang imo isigkatawo subong sang imo kaugalingon.’ Sa sining duha ka sugo natingob ang bug-os nga Kasuguan, kag ang mga Manalagna.”​—⁠Mateo 22:37-40.

Ginadumdom ang iban subong mga pilantropo, mga mabinuligon, mga sumalakdag sa kinamatarong sang mga banwahanon, ukon ginadumdom sila bangod sang ila mga hinimuan sa negosyo, siensia, medisina, ukon iban pa nga mga buhat. Apang, paano mo luyag dumdumon?

Ang taga-Scotland nga mamalaybay nga si Robert Burns (1759-96) nagsiling nga kuntani hatagan kita sang Dios sing ikasarang nga matan-aw naton ang aton kaugalingon subong sang pagtan-aw sang iban sa aton. Matan-aw mo bala sing bunayag ang imo kaugalingon kon sin-o gid ikaw kag masiling mo bala nga may yara ikaw maayo nga reputasyon sa iban nga mga tawo kag sa Dios? Sa ulihi, ang aton relasyon sa iban pat-od gid nga mas importante sangsa bisan ano pa  nga hinimuan naton sa patag sang isport ukon negosyo nga may benepisyo sa sulod sang malip-ot lamang nga tion. Gani ang pamangkot amo: Paano ang aton pagpakig-angot sa iban​—⁠ang aton pagpakighambal, ang aton pamatasan, ang aton paggawi⁠​—⁠nakaapektar sa ila? Ginatamod bala nila kita subong mahapos palapitan ukon subong mabudlay palapitan? Subong mabuot ukon subong mabaris? Subong madali makigbagay ukon subong mabudlay pahamut-an? Subong mainabyanon kag mahinuklugon ukon subong di-mainabyanon kag di-mainulikdon? Subong makasalaklaw nga kritiko ukon subong makapalig-on nga manuglaygay? Usisaon naton ang pila ka halimbawa sang una kag karon agod tan-awon kon ano ang aton matun-an.

[Retrato sa pahina 3]

Handum ni Robert Burns nga kuntani hatagan kita sang Dios sing ikasarang nga matan-aw naton ang aton kaugalingon subong sang pagtan-aw sang iban sa aton

[Credit Line]

From the book A History of England