Ginpahiusa sang Matuod nga Pagsimba ang Isa ka Pamilya

TRESE anyos si Maria sang nabatian nila sang iya manghod nga babayi, nga si Lucy, ang tuhoy kay Jehova gikan sa ila paryente. Ginpaathag man niya ang paglaum nga Paraiso sa duta. Bangod interesado, nag-upod sila sa iya sa Kingdom Hall sang mga Saksi ni Jehova. Nagdayaw gid si Maria sa maathag nga pagtudlo didto. Tuhay gid ini sa simbahan, nga halos kinanta lamang ang ila ginhimo! Sa gilayon nagtuon ining mga kabataan sa Biblia upod sa isa sang mga Saksi ni Jehova.

Ang magulang nila nga lalaki, nga si Hugo, interesado sa pilosopiya kag ebolusyon. Nagapangangkon sia nga isa ka ateista. Apang samtang nagaalagad subong soldado, ginbasa niya ang libro nga Life​​—⁠How Did It Get Here? By Evolution or by Creation? ⁠ * Nasapwan niya ang mga sabat sa mga pamangkot nga indi masabat sang iban nga relihion. Sang matapos na ang iya pagsoldado, ginpabakod niya ang iya bag-o masapwan nga pagtuo sa Dios paagi sa pagtuon sa Biblia kag pagtambong sa mga miting upod sa iya mga manghod. Ginbawtismuhan sanday Maria kag Lucy sang 1992, duha ka tuig pagkatapos nila nabatian ang kamatuoran, kag ang ila magulang, duha ka tuig pagkatapos sadto.

Samtang ang ila mga ginikanan, nga debotado sa mga tradisyon sang Katoliko, indi tanto interesado sa kamatuoran sang Biblia. Naugot sila sa mga Saksi ni Jehova, walay sapayan nga ginadayaw nila ang maayo nga mga batasan kag ang maugdang nga panapton sang mga pamatan-on nga mga Saksi nga ginahagad sang ila kabataan sa ila puluy-an. Subong man, sa tion sang pagkaon, samtang ginahambalan sang mga kabataan ang ila nabatian sa mga miting, napukaw ang interes sang ila mga ginikanan.

Apang, ang mga ginikanan interesado sa pagpangaswang. Palahubog ang amay kag ginakastigo niya ang iloy. Daw maguba na ang pamilya. Nian, napriso ang amay sing duha ka semana bangod nagmauy. Samtang sa prisuhan, ginbasa niya ang Biblia. Nabasahan niya ang mga ginhambal ni Jesus tuhoy sa tanda sang katapusan nga mga adlaw. Naligban, ang amay kag ang iloy nagkadto sa Kingdom Hall kag nagbaton sing pagtuon sa Biblia sa puluy-an. Sang nahibaluan nila ang kamatuoran, ginsunog nila ang ila tanan nga libro sa pagpangaswang kag nauntat ang mga pagsalakay sang demonyo paagi sa pagtawag sa ngalan ni Jehova. Naghimo sila sing daku nga mga pagbag-o sa ila personalidad.

Mahanduraw mo bala kon daw ano ang kalipay nanday Maria kag Lucy sang makita ang ila mga ginikanan nga ginbawtismuhan ni Hugo sa isa sang distrito nga mga kombension sa Bolivia sang 1999? Mga siam ka tuig na ang nagligad sang una nga nabatian nanday Maria kag Lucy ang tuhoy kay Jehova kag sa iya mga saad. Kaupod ni Hugo, sila karon yara sa bug-os tion nga ministeryo. Daku gid ang ila kalipay nga ginpahiusa sang matuod nga pagsimba ang ila pamilya!

[Nota]