Madumduman Mo Bala?

Nalipay ka bala sa pagbasa sang ulihi nga mga isyu sang Ang Lalantawan? Ti, tilawi kon masabat mo ang masunod nga mga pamangkot:

• Nangin maayo nga halimbawa si Rut sa ano nga mga paagi?

Huwaran sia sa iya gugma kay Jehova, sa iya mainunungon nga gugma kay Noemi, kag sa iya kapisan kag pagkamapainubuson. Bangod sang madamo nga rason, ginatamod sia sang mga tawo subong “isa ka maayo gid nga babayi.” (Rut 3:11)​​—⁠4/15, pahina 23-6.

• Paano naton mahibaluan nga nagaulikid si Jehova sa ordinaryo nga mga tawo?

Ginsugo niya ang mga Israelinhon, nga ginpintasan anay sa Egipto, nga indi pagpintasan ang mga kubos. (Exodo 22:21-​24) Si Jesus, nga nag-ilog sa iya Amay, nagpakita sing tunay nga interes sa ordinaryo nga mga tawo, kag ginpili niya subong apostoles ang mga lalaki nga “wala sing tinun-an kag kinaandan lamang.” (Binuhatan 4:​13; Mateo 9:36) Mailog naton ang Dios paagi sa pag-ulikid sa iban, kasubong sa mga pamatan-on.​​—⁠4/15, pahina 28-​31.

• Paano kita makapat-od nga natalupangdan ni Jehova ang aton ginahimo?

Ang mga kasaysayan sa Biblia nagapakita nga natalupangdan ni Jehova ang mga ginahimo sang mga tawo. Natalupangdan niya ang halad ni Abel, kag natalupangdan niya ang aton ‘mga halad sang pagdayaw, ang bunga sang mga bibig.’ (Hebreo 13:15) Nahibaluan ni Jehova nga nagtinguha gid si Enoc nga pahamut-an sia paagi sa pagpangabuhi nga matinlo kag matarong. Kag natalupangdan sang Dios kon paano ang isa ka di-Israelinhon nga balo nga babayi sang Sarepta nagpaambit sang iya limitado nga pagkaon kay propeta Elias. Natalupangdan man ni Jehova ang aton mga buhat sang pagtuo.​​—⁠5/1, pahina 28-​31.

• Ngaa masiling nga pagkatapos sang Pentecostes 33 C.⁠E., ang mga Judiyo nga nangin mga Cristiano kinahanglan maghimo sing personal nga dedikasyon sa Dios?

Sang 1513 B.⁠C.⁠E., gindedikar sang mga Israelinhon ang ila kaugalingon kay Jehova. (Exodo 19:​3-8) Sugod sadto, nabun-ag ang mga Judiyo sa sining dedikado nga pungsod sa idalom sang Kasuguan nga katipan. Apang gindula ni Jehova ang Kasuguan nga katipan paagi sa kamatayon ni Cristo sang 33 C.⁠E. (Colosas 2:14) Pagkatapos sadto, ang mga Judiyo nga luyag mag-alagad sing kalahamut-an sa Dios kinahanglan nga magdedikar sa iya kag magpabawtismo sa ngalan ni Jesucristo.​​—⁠5/15, pahina 30-1.

• May bahin bala karon sa matuod nga pagsimba ang pagsunog sang incienso?

Bahin sang matuod nga pagsimba sang una sa Israel ang paggamit sang incienso. (Exodo 30:​37, 38; Levitico 16:​12, 13) Apang ang Kasuguan nga katipan, lakip ang paggamit sang incienso, natapos sang napatay si Cristo. Ang mga Cristiano makapamat-od kon bala gamiton nila ang incienso sa indi relihioso nga mga katuyuan, apang indi ini bahin sang matuod nga pagsimba karon. Dapat hunahunaon man sing maayo ang balatyagon sang iban agod malikawan nga masandad sila.​​—⁠6/1, pahina 28-​30.

• Ano nga balita karon lang ang nagtiklod sa madamo nga hunahunaon sing maayo ang kamatuoran sang pagkabuhi ni Jesus sa duta sang una?

Daku nga publisidad ang ginhatag sa isa ka kahon, isa ka delepositohan sang tul-an sang patay ukon ossuary, nga nakit-an sa Israel. Daw napetsahan pa ini sa unang siglo, kag may inskripsion ini nga nagasiling: “Si Santiago, nga anak ni Jose, utod ni Jesus.” Ang iban nagakabig sini subong “pinakadumaan nga ebidensia sang arkeolohiya magluwas sa Biblia” tuhoy sa pagluntad ni Jesus.​​—⁠6/15, pahina 3-4.

• Paano matun-an sang isa ka tawo ang pagpakita sing gugma?

Matun-an sa umpisa sang mga tawo nga magpakita sing gugma paagi sa ehemplo kag paghanas sang ila mga ginikanan. Kon ang bana kag asawa nagahigugmaanay kag nagatahuray, matun-an sang mga kabataan nga ipakita ang gugma. (Efeso 5:​28; Tito 2:4) Bisan pa wala nagdaku ang isa ka tawo sa mapinalanggaon nga pamilya, matun-an niya nga magpakita sing gugma paagi sa pagbaton sang amaynon nga panuytoy ni Jehova, paagi sa pagtigayon sang bulig sang balaan nga espiritu, kag paagi sa pagbenepisyo sa mahigugmaon nga pagsakdag sang Cristianong paghiliutod.​​—⁠7/1, pahina 4-7.

• Sin-o si Eusebius, kag ano nga leksion ang matun-an naton gikan sa iya kabuhi?

Si Eusebius isa ka istoryador sang una nga, sang 324 C.⁠E., naghuman sing napulo-ka-tomo nga sinulatan nga may tig-ulo nga History of the Christian Church. Bisan pa nagpati sia nga ang Amay nagluntad antes sang Anak, gin-ugyunan ni Eusebius ang tuhay nga pagtamod sa konsilyo sang Nicaea. Maathag nga wala niya ginsapak ang sugo ni Jesus nga ang Iya mga sumulunod dapat “indi bahin sang kalibutan.” (Juan 17:16)​​—⁠7/15, pahina 29-​31.

• Ginbag-o bala ni Jehova ang iya pagtamod sa poligamya?

Wala, wala ni Jehova ginbag-o ang iya pagtamod sa poligamya. (Malaquias 3:6) Ang kahimusan sang Dios sa una nga lalaki amo nga “magahiusa sia sa iya asawa” kag mangin isa sila ka unod. (Genesis 2:24) Si Jesus nagsiling nga ang pagdiborsio kag pagpangasawa liwat luwas lamang sa rason sang pagpakighilawas nagahimo sa isa nga makihilahion. (Mateo 19:​4-6, 9) Natapos ang pagpaumod ni Jehova sa poligamya sang gintukod na ang Cristianong kongregasyon.​​—⁠8/1, pahina 28.