Ginapabaloran Mo Bala ang Tigulang nga mga Masigkatumuluo?

SANG nakigkatipan sa Dios ang katawhan sang dumaan nga Israel, ginsugo ang tagsa sa ila: “Magtindog ka sa atubangan sang ulo nga ubanon, kag magpakita ka sing patugsiling sa pagkatawo sang tigulang nga tawo, kag magkahadlok ka sa imo Dios.” (Levitico 19:32) Busa, ang pagtahod sa tigulang isa ka sagrado nga katungdanan, nga suod nga naangot sa pagpasakop sa Dios. Bisan pa nga ang mga Cristiano karon wala na sa idalom sang Mosaikong Kasuguan, ini nagapahanumdom sa aton nga ginatamod ni Jehova ang iya tigulang nga mga alagad subong mapuslanon kag bilidhon. (Hulubaton 16:31; Hebreo 7:18) Ang aton bala pagtamod kaangay man kay Jehova? Ginapabaloran bala naton ang aton tigulang nga Cristianong mga kauturan?

Ginpabaloran Niya ang Iya Mas Magulang nga Abyan

Ang isa ka kasaysayan sa Biblia nga nagapadaku sang pagpakita sing pagtahod sa mga tigulang masapwan sa ikaduha nga tulun-an sang Mga Hari. Ginasaysay sini kon paano ginbuslan si propeta Elias sang mas bataon nga propeta nga si Eliseo. Binagbinaga ang natabo sa hingapusan nga adlaw ni Elias subong propeta sa napulo-ka-tribo nga ginharian sang Israel.

Sadto nga tion, ginsugo ni Jehova ang tigulang nga propeta nga magpanglakaton halin sa Gilgal padulong sa Bethel, halin sa Bethel padulong sa Jerico, kag halin sa Jerico padulong sa Suba Jordan. (2 Hari 2:​1, 2, 4, 6) Sa sining pagpanglakaton sing halos 50 ka kilometro, tatlo ka beses nga ginkumbinse ni Elias si Eliseo nga indi na sia pag-updan. Apang, kaangay sa mas bataon nga si Rut sang siniglo antes sini nga malig-on nga nangindi nga bayaan si Noemi, si Eliseo nangindi man nga bayaan ang tigulang nga propeta. (Rut 1:​16, 17) Tatlo ka beses nga nagsiling si Eliseo: “Samtang buhi si Jehova kag samtang buhi ang imo kalag, indi ko ikaw pagbayaan.” (2 Hari 2:​2, 4, 6) Sadto nga tion, mga anom na ka tuig nga nagaalagad si Eliseo upod kay Elias. Apang, luyag niya nga mag-alagad upod kay Elias sing madugay pa tubtob posible. Sa katunayan, ginasugid pa sang kasaysayan: “Samtang nagalakat sila, nga nagahambalanay, aba, yari karon! . . . si Elias nagpaibabaw.” (Bersikulo 11) Si Elias kag si Eliseo nagahambalanay tubtob sa hingapusan gid nga bahin sang ministeryo ni Elias sa Israel. Maathag nga luyag sang mas bataon nga propeta nga makapamati sing madamo pa nga instruksion kag pagpalig-on gikan sa mas magulang kag mas eksperiensiado nga propeta. Maathag nga ginpabaloran niya ang iya mas magulang nga abyan.

‘Subong mga Amay kag mga Iloy’

Indi mabudlay hangpon kon ngaa palangga ni Eliseo ang mas magulang nga propeta bilang abyan​​ —⁠bilang amay pa gani sa espirituwal. (2 Hari 2:12) Wala lang madugay antes matapos ang hilikuton ni Elias sa Israel, nagsiling sia kay Eliseo: “Pangayua kon ano ang luyag mo nga himuon ko para sa imo antes ako kuhaon sa imo.” (Bersikulo 9) Gani tubtob gid sa katapusan, nag-ulikid si Elias sa espirituwal nga kaayuhan sang iya manugbulos kag sa pagpadayon sang hilikuton sang Dios.

Karon, makalilipay talupangdon ini man nga amaynon kag iloynon nga pag-ulikid sang mas magulang pa sa aton nga Cristianong mga utod samtang bugana nila nga ginapaambit ang ila ihibalo kag kinaalam sa mga mas bataon. Halimbawa, handa buligan sang madugay na nga mga boluntaryo sa mga sanga talatapan sang mga Saksi ni Jehova ang mga bag-o sa panimalay Bethel agod mangin sampaton sila sa paghimo sang ila buluhaton. Subong man, ang nagalakbay nga mga manugtatap kag ang ila mga asawa nga tinuig na nga nagaduaw sa mga kongregasyon malipayon nga nagapaambit sang ila madamo nga eksperiensia sa mga ginahanas agod mangin nagalakbay nga mga ministro. Dugang pa, sa mga kongregasyon sang mga Saksi ni Jehova sa bug-os nga kalibutan, may mga kauturan nga dinekada na nga nagaalagad kay Jehova sing matutom kag malipayon nga nagapaambit sang ila praktikal nga kaalam kag eksperiensia sa bag-o nga mga katapo sang kongregasyon.​​—⁠Hulubaton 2:⁠7; Filipos 3:​17; Tito 2:​3-5.

Bangod sang sinsero nga pag-ulikid nga ginpakita sining pinalangga nga tigulang nga mga Cristiano, makalilipay gid nga magpakita sing pagtahod sa sining mga tigulang. Busa, luyag naton ilugon ang halimbawa ni Eliseo sa pag-apresyar sing hanuot sa tigulang nga mga masigkatumuluo. Subong sang ginpahanumdom sa aton ni apostol Pablo, padayon naton nga kabigon ang “tigulang nga lalaki . . . subong amay” kag ang “tigulang nga mga babayi subong mga iloy.” (1 Timoteo 5:​1, 2) Paagi sa paghimo sini, makaamot kita sing daku sa maayo nga pagpanghikot kag pag-uswag sang Cristianong kongregasyon sa bug-os nga kalibutan.

[Retrato sa pahina 30]

Luyag ni Eliseo nga mag-alagad upod kay Elias sing madugay pa tubtob posible

[Retrato sa pahina 31]

Ang mga bataon makabenepisyo sing daku gikan sa tigulang nga mga Cristiano