Isa Lamang ka Matuod nga Cristianong Relihion—Isa ka Katunayan

ISA lamang ka iglesia, ukon kongregasyon, ang gintukod ni Jesucristo. Ina nga kongregasyon isa ka espirituwal nga lawas, isa ka espirituwal nga pamilya. Buot namon silingon nga isa ini ka katilingban sang mga tawo nga ginpili sang balaan nga espiritu sang Dios​​—⁠ang tanan ginkilala sang Dios nga iya “mga anak.”​​—⁠Roma 8:​16, 17; Galacia 3:⁠26.

Gintudlo ni Jesus nga isa lamang ang dalanon nga gingamit sang Dios sa pagtuytoy sa katawhan padulong sa kamatuoran kag kabuhi. Sa pag-ilustrar sining importante nga kamatuoran, ginpaanggid ni Jesus ang dalanon padulong sa kabuhi nga wala sing katapusan sa isa ka dalan. Sia nagsiling: “Magsulod kamo sa makitid nga gawang; bangod masangkad kag malapad ang dalan nga nagapadulong sa kalaglagan, kag madamo ang nagasulod sa sini; samtang makitid ang gawang kag masipot ang dalan nga nagapadulong sa kabuhi, kag pila lamang ang mga nakatultol sini.”​​—⁠Mateo 7:​13, 14; Juan 14:⁠6; Binuhatan 4:​11, 12.

Isa ka Nahiusa nga Kongregasyon

Indi naton paghunahunaon yadtong unang-siglo nga kongregasyon subong “isa ka bug-os kalibutan, pangkabilugan, organisado nga katilingban subong amo ang pagtamod naton karon sa katoliko nga relihion,” siling sang The New Dictionary of Theology. Ngaa? “Bangod sa simple nga rason,” siling sini, “nga ining sahi sang organisado, pangkabilugan nga katilingban wala gid nagaluntad.”

Wala sing isa nga indi mag-ugyon sa kamatuoran nga ang unang Cristianong kongregasyon indi gid pareho sa ginbalay nga mga sistema sang relihion nga makita naton karon. Apang organisado yadto. Ang indibiduwal nga mga kongregasyon wala nagpanghikot nga independiente sa kada isa. Tanan sila nagkilala sa awtoridad sang isa ka nagadumala nga hubon sa Jerusalem. Ining hubon​​—⁠nga ginatapuan sang mga apostoles kag tigulang nga mga lalaki sa kongregasyon sang Jerusalem⁠—nagbulig agod matipigan ang paghiusa sang kongregasyon subong “isa ka lawas” ni Cristo.​​—⁠Efeso 4:​4, 11-​16; Binuhatan 15:​22-​31; 16:​4, 5.

 Ano ang natabo sa sadtong isa ka matuod nga kongregasyon? Nangin amo bala ini ang Iglesia Katolika? Nangin amo bala ini ang mga denominasyon kag nabahinbahin nga sistema sang Protestante nga simbahan nga aton makita karon? Ukon may iban pa nga natabo sa sini?

“Mga Trigo” kag “mga Gamhon”

Agod mahibaluan ang sabat, binagbinagon naton sing maayo ang ginsiling mismo ni Jesus kon ano ang matabo. Mahimo makibot ka kon mahibaluan mo nga ginpaabot ni Jesus nga malipdan sa maragtas ang iya kongregasyon kag gintugutan niya nga ining indi maayo nga kahimtangan magapadayon sa sulod sang mga siglo.

Ginaangot ang iya kongregasyon sa “ginharian sang mga langit,” sia nagsiling: “Ang ginharian sang mga langit kaangay sang isa ka tawo nga nagsab-ug sang maayo nga binhi sa iya uma. Samtang nagatulog ang mga tawo, ang iya kaaway nag-abot kag nagsab-ug sang mga gamhon sa tunga sang mga trigo, kag naglakat. Sang nagtubo ang tanom kag nagpamunga, nian ang mga gamhon nagtubo man. Gani ang mga ulipon sang tagbalay nagpalapit kag nagsiling sa iya, ‘Agalon, indi bala nga nagsab-ug ka sing maayo nga binhi sa imo uma? Paano bala, nian, nga may mga gamhon ini?’ Nagsiling sia sa ila, ‘Ang kaaway, nga isa ka tawo, naghimo sini.’ Nagsiling sila sa iya, ‘Luyag mo bala, nian, nga magkadto kami kag maggabot sa ila?’ Nagsiling sia, ‘Indi; basi sa paggabot ninyo sang mga gamhon, magabot ninyo pati ang mga trigo. Pabay-i nga magtubo anay sila sing tingob tubtob sa pag-ani; kag sa tig-alani suguon ko ang mga mangangani, Tipuna anay ang mga gamhon kag hugpunga ini agod sunugon, nian tipuna ang mga trigo sa akon tambubo.’”​​—⁠Mateo 13:​24-​30.

Ginpaathag ni Jesus nga sia amo “ang manugsab-ug.” “Ang maayo nga binhi” nagalaragway sa iya matuod nga mga disipulo. Ang iya “kaaway” amo si Satanas nga Yawa. “Ang mga gamhon” amo ang huwad nga mga Cristiano nga nakasulod sa unang Cristianong kongregasyon. Nagsiling sia nga tugutan niya nga magtubo sing dungan “ang mga trigo” kag “mga gamhon” tubtob sa “tig-alani,” nga mahanabo sa “katapusan sang sistema sang mga butang.” (Mateo 13:​37-​43) Ano ang kahulugan sini tanan?

Gindagtaan ang Cristianong Kongregasyon

Wala magdugay sa tapos nga napatay ang mga apostoles, ang apostata nga mga manunudlo nga yara mismo sa sulod sang kongregasyon nagkontrol sini. Nagpamulong sila sing “tiko nga mga butang agod ipahilayo ang mga disipulo sunod sa ila.” (Binuhatan 20:​29, 30) Subong resulta, madamo nga Cristiano ang ‘nagtalikod sa pagtuo.’ ‘Nagliso sila sa butig nga mga sugilanon.’​​—⁠1 Timoteo 4:​1-3; 2 Timoteo 4:​3, 4.

 Sang ikap-at nga siglo C.⁠E., siling sang The New Dictionary of Theology, “ang Katolikong Cristianismo nangin opisyal . . . nga relihion sang Emperyo sang Roma.” “Naghiusa ang simbahan kag ang sibil nga katilingban”​​—⁠nagtingob ang Simbahan kag Estado nga sumpakil gid sa mga ginapatihan sang una nga mga Cristiano. (Juan 17:16; Santiago 4:⁠4) Ginsiling sang amo man nga reperensia nga sang ulihi, ang bug-os nga balayan kag kinaugali sang relihion, subong man ang madamo pa nga panguna nga mga pagtuluuhan sini, nagbag-o sing daku “sa impluwensia sang mausisaon kag di-maayo gid nga pagsamo sang Daan nga Testamento kag neoplatoniko nga mga pilosopiya.” Subong sang gintagna ni Jesucristo, ang iya matuod nga mga disipulo nalipdan samtang nagalambo ang huwad nga mga Cristiano.

Nahibal-an sang mga tagpalamati ni Jesus kon daw ano kabudlay nga makilala ang matuod nga mga trigo gikan sa mga gamhon, subong sa makahililo nga bearded darnel, nga sa tion nga nagatubo ini daw kaangay gid sang trigo. Busa gin-ilustrar ni Jesus nga sa sulod sang pila ka tion, mabudlay makilala ang matuod nga mga Cristiano gikan sa huwad. Wala ini nagakahulugan nga ang Cristianong kongregasyon nadula, kay ginsaad ni Jesus nga padayon niya nga tuytuyan ang iya espirituwal nga mga kauturan “sa tanan nga adlaw tubtob sa katapusan sang sistema sang mga butang.” (Mateo 28:20) Si Jesus nagsiling nga ang mga gamhon padayon nga magatubo. Walay sapayan sini, sa sulod sang mga dag-on, ang matuod nga mga Cristiano​​—⁠sing indibiduwal man ukon mga grupo⁠​—⁠​wala duhaduha nga nagtinguha sa ila bug-os nga masarangan agod sundon ang mga panudlo ni Cristo. Apang indi na sila kilala sing maathag subong isa ka kitaon nga hubon, ukon organisasyon. Indi gid sila kaangay sang makita nga apostata nga relihioso nga sistema nga sa bug-os nga maragtas nagdala lamang sing kahuy-anan sa ngalan ni Jesucristo.​​—⁠2 Pedro 2:​1, 2.

‘Ginpahayag ang Tawo nga Malinapason’

Gintagna ni apostol Pablo ang isa pa ka butang nga magapakilala sa huwad nga relihioso nga sistema. Sia nagsulat: “Indi pagtuguti nga limbungan kamo ni bisan sin-o sa bisan ano nga paagi, kay indi magkari [ang adlaw ni Jehova] kon indi anay mag-abot ang apostasya kag mapahayag ang tawo nga malinapason.” (2 Tesalonica 2:​2-4) Ining “tawo nga malinapason” amo ang klero nga klase nga nagbayaw sang iya kaugalingon sa isa ka nagagahom nga posisyon sa “Cristianong” kongregasyon.⁠ *

Ang apostasya nagsugod sang adlaw ni apostol Pablo. Hinali ini nga naglapnag sang napatay ang mga apostoles kag nadula na ang ila nagapugong nga impluwensia. Makilala ini, siling ni Pablo, paagi sa “pagpanghikot ni Satanas nga may tagsa ka gamhanan nga buhat kag butig nga mga tanda kag may tagsa ka malaut nga paglimbong.” (2 Tesalonica 2:​6-​12) Sibu gid ini nga paglaragway sa mga hinimuan sang tuman ka damo nga relihiosong mga lider sa bug-os nga maragtas!

Bilang pagsakdag sa ila pangangkon nga ang Romanong Katolisismo amo lamang ang matuod nga relihion, ang mga lider sang Katoliko nagsiling nga ang ila nga mga obispo “nakabaton sang ila pagka-apostoles gikan sa orihinal nga mga apostoles paagi sa linya sang pagsalili nga nagsugod pa sang pag-umpisa sang Cristianismo.” Ang matuod, ining pangangkon tuhoy sa pagsalili sa mga apostol wala sing maragtason ukon Makasulatanhon nga sadsaran. Wala sing mabakod nga pamatuod nga ang sistema sang relihion nga nagluntad sang mapatay na ang mga apostoles ni Jesus gintuytuyan sang balaan nga espiritu sang Dios.​​—⁠Roma 8:⁠9; Galacia 5:​19-​21.

Kamusta naman ang iban pa nga mga relihion nga nagtuhaw gilayon sa tapos sang Repormasyon? Ginsunod bala nila ang sulundan sang unang Cristianong kongregasyon? Ginpasag-uli bala nila ang kaputli sang orihinal nga Cristianong kongregasyon? Matuod nga pagkatapos sang Repormasyon, matigayon na sang madamo nga kinaandan nga mga tawo ang Biblia sa ila kaugalingon nga hambal. Apang, ginapakita sang maragtas nga ining mga relihion padayon nga nagatudlo sing sayop nga mga doktrina.⁠ *​​—⁠Mateo 15:​7-9.

 Apang, talupangda ini. Gintagna gid ni Jesucristo nga ang iya isa ka matuod nga kongregasyon ipasag-uli sa tion sang gintawag niya nga katapusan sang sistema sang mga butang. (Mateo 13:​30, 39) Ginapakita sang katumanan sang mga tagna sang Biblia nga nagakabuhi na kita karon sa sina nga tion. (Mateo 24:​3-​35) Bangod matuod ini, ang tagsatagsa sa aton dapat nga mamangkot, ‘Diin na ining isa ka matuod nga relihion?’ Dapat nga mangin mas madali ini makilala.

Mahimo nagabatyag ka nga nasapwan mo na ini nga relihion, ukon kongregasyon. Importante nga makasiguro ka. Ngaa? Bangod kaangay sadtong unang siglo, may isa lamang ka matuod nga relihion. Naghinguyang ka na bala sing tion agod pat-uron nga ang imo relihion nahisuno gid sa sulundan sang unang-siglo nga Cristianong kongregasyon kag nga matutom sini nga ginasunod ang mga panudlo ni Jesucristo? Ngaa indi ini pag-usisaon karon? Malipay ang mga Saksi ni Jehova sa pagbulig sa imo nga himuon ini.​​—⁠Binuhatan 17:11.

[Mga nota]

[Retrato sa pahina 5]

Ano ang ginatudlo sa aton sang ilustrasyon ni Jesus tuhoy sa mga trigo kag mga gamhon nahanungod sa matuod nga kongregasyon?

[Retrato sa pahina 7]

Ginasunod bala sang imo relihion ang sulundan nga ginpahamtang sang unang-siglo nga mga Cristiano sa pagbantala kag pagtuon?