Magsalig sing Bug-os Kay Jehova sa Tion sang Kalisdanan
Magsalig sing Bug-os kay Jehova sa Tion sang Kalisdanan
Dios isa ka dalangpan kag kusog para sa aton, isa ka bulig nga madali matigayon sa tion sang kalisdanan.”—SALMO 46:1.
1, 2. (a) Ano nga halimbawa ang nagapakita nga indi lamang bastante nga magsiling nga nagasalig kita sa Dios? (b) Ngaa indi lamang bastante nga magsiling kita nga nagasalig kita kay Jehova?
MAS mahapos hambalon nga nagasalig kita sa Dios sangsa ipakita ini sa aton mga buhat. Halimbawa, ang dinalan nga “In God We Trust” madugay na nga makita sa kuarta nga papelon kag sensilyo sang Estados Unidos. * Sang 1956, ang Kongreso sang Estados Unidos nagpasar sing layi nga nagadeklarar sini nga ekspresyon subong pungsudnon nga hulubaton sang Estados Unidos. Apang, madamo nga tawo—indi lamang sa sini nga pungsod kundi sa bug-os man nga kalibutan—ang daku pa ang pagsalig sa kuarta kag materyal nga manggad sangsa Dios.—Lucas 12:16-21.
2 Subong matuod nga mga Cristiano, indi lamang bastante nga magsiling kita nga nagasalig kita kay Jehova. Subong nga ang “pagtuo nga wala sing mga binuhatan patay,” ang pagsiling nga nagasalig kita sa Dios wala man sing pulos kon wala naton ini ginapakita sa aton mga buhat. (Santiago 2:26) Sa nauna nga artikulo, natun-an naton nga ginapakita naton ang aton pagsalig kay Jehova kon magdangop kita sa iya sa pangamuyo, kon mangayo kita sing panuytoy gikan sa iya Pulong, kag kon magpatuytoy kita sa iya organisasyon. Binagbinagon naton karon kon paano naton mahimo ining tatlo ka tikang sa tion sang kalisdanan.
Kon Madulaan sing Trabaho Ukon Hawothawot ang Kinitaan
3. Anong mga problema sa pangabuhi ang ginaatubang sang mga alagad ni Jehova sa sining “makahalanguyos nga mga tion,” kag paano naton nahibaluan nga ang Dios handa sa pagbulig sa aton?
3 Sa sining “makahalanguyos nga mga tion,” kita nga mga Cristiano nagaatubang man sing mga problema sa pangabuhi kaangay sang iban nga mga tawo. (2 Timoteo 3:1) Gani, mahimo hinali kita nga madulaan sing trabaho. Ukon mahimo maobligar kita sa pagtrabaho sing malawig nga inoras bisan manubo lamang ang sueldo. Sa sining mga kahimtangan, mahimo mabudlayan kita sa ‘pag-aman para sa ila nga yara sa aton.’ (1 Timoteo 5:8) Ang Labing Mataas nga Dios handa bala sa pagbulig sa aton sa sini nga mga tion? Siempre! Sa pagkamatuod, wala kita ginaamligan ni Jehova batok sa tanan nga mga kabudlayan sa kabuhi sa sining sistema sang mga butang. Apang, kon magsalig kita sa iya, matuman sa aton ang ginasiling sang Salmo 46:1: “Ang Dios isa ka dalangpan kag kusog para sa aton, isa ka bulig nga madali matigayon sa tion sang kalisdanan.” Apang, paano naton mapakita nga nagasalig kita sing bug-os kay Jehova sa tion sang kalisdanan sa pinansial?
4. Kon may mga problema sa pinansial, ano ang aton ipangamuyo, kag paano ginasabat ni Jehova ini nga mga pangamuyo?
4 Ang isa ka paagi agod ipakita ang aton pagsalig kay Jehova amo ang pagdangop sa iya sa pangamuyo. Apang ano ang aton ipangamuyo? Ti, kon may mga problema sa pinansial, mahimo labi pa gid nga kinahanglan naton ang praktikal nga kaalam. Kon amo, ipangamuyo ini! Ang Pulong ni Jehova nagapasalig sa aton: “Kon ang bisan sin-o sa inyo nakulangan sing kaalam, padayon sia nga papangayua sa Dios, kay maalwan sia nga nagahatag sa tanan kag wala nagabasol; kag ihatag ini sa iya.” (Santiago 1:5) Huo, mangayo sing kaalam kay Jehova—ang ikasarang sa pag-aplikar sing nagakaigo sang ihibalo, paghangop, kag paghantop—agod makahimo sing husto nga mga desisyon kag mga pagpili. Ang aton mahigugmaon nga langitnon nga Amay nagapasalig sa aton nga pamatian niya ini nga mga pangamuyo. Handa sia nga tadlungon ang banas sang mga nagasalig sa iya sa bug-os nila nga tagipusuon.—Salmo 65:2; Hulubaton 3:5, 6.
5, 6. (a) Ngaa ang Pulong sang Dios makabulig sa aton sa paglandas sang mga palaligban sa pangabuhi? (b) Ano ang himuon naton agod mabuhinan ang kabalaka kon madulaan kita sing trabaho?
5 Ang pagpangayo sing panuytoy sa Pulong sang Dios isa pa ka paagi sang pagpakita nga nagasalig kita kay Jehova. Ang iya maalamon nga mga pahanumdom sa Biblia napamatud-an nga “masaligan gid.” (Salmo 93:5) Bisan pa ginsulat sang nagligad nga kapin sa 1,900 ka tuig, ining inspirado nga libro nagaunod sing masaligan nga laygay kag maayo nga paghantop nga makabulig sa aton nga maatubang sing maayo pa ang mga palaligban sa pangabuhi. Binagbinaga ang pila ka halimbawa sang kaalam sa Biblia.
6 Ang maalam nga si Hari Solomon nagsiling sang una: “Matam-is ang katulugon sang isa nga nagaalagad, bisan nagakaon sia sing diutay ukon madamo; apang ang manggaranon wala ginapatulog sang iya kabuganaan.” (Manugwali 5:12) Ang tion kag kuarta kinahanglan agod makay-o, matinluan, mamentinar, kag maamligan ang aton materyal nga mga pagkabutang. Gani kon madulaan sing trabaho, isa ini ka kahigayunan agod mausisa naton liwat ang aton estilo sang pagkabuhi, nga nagatinguha nga pat-uron kon ano gid ang mga kinahanglanon kag kon ano ang mga luyag lamang. Agod mabuhinan ang kabalaka, maalamon nga maghimo sing mga pagbag-o. Halimbawa, posible bala nga pasimplehon ang aton kabuhi, ayhan magsaylo sa mas magamay nga puluy-an ukon kuhaon ang di-kinahanglanon nga materyal nga mga pagkabutang?—Mateo 6:22.
7, 8. (a) Paano ginpakita ni Jesus nga nahibaluan niya nga ang di-himpit nga mga tawo may huyog nga mabalaka sing sobra sa materyal nga mga butang? (Tan-awa man ang nota sa ubos.) (b) Anong maalamon nga laygay ang ginhatag ni Jesus tuhoy sa kon paano malikawan ang di-nagakaigo nga pagkabalaka?
7 Sa Sermon sa Bukid, si Jesus naglaygay: “Mag-untat sa pagkabalaka tuhoy sa inyo mga kalag kon ano ang inyo kaunon ukon kon ano ang inyo imnon, ukon tuhoy sa inyo mga lawas kon ano ang inyo isuksok.” * (Mateo 6:25) Nahibaluan ni Jesus nga ang di-himpit nga mga tawo natural lang nga mabalaka sa pagtigayon sang sadsaran nga mga kinahanglanon. Apang, paano kita ‘magauntat sa pagkabalaka’ sa sining mga butang? “Padayon . . . nga pangitaa anay ang ginharian,” siling ni Jesus. Bisan ano man ang aton problema, padayon nga unahon naton sa kabuhi ang pagsimba kay Jehova. Kon ginahimo naton ini, nian ang tanan naton nga adlaw-adlaw nga mga kinahanglanon “idugang” sa aton sang aton langitnon nga Amay. Sa bisan paano, iaman niya ang aton kinahanglanon.—Mateo 6:33.
8 Si Jesus naghatag sining dugang pa nga laygay: “Indi gid kamo magkabalaka tuhoy sa masunod nga adlaw, kay ang masunod nga adlaw may iya kaugalingon nga mga kabalaka.” (Mateo 6:34) Indi maalamon nga magkabalaka sing di-nagakaigo sa kon ano ang mahimo nga kinahanglanon sa buwas. Ang isa ka iskolar nagsiling: “Ang aton ginakahangaw-an tuhoy sa palaabuton talagsa lang nagamatuod.” Ang mapainubuson nga pagsunod sa laygay sang Biblia nga padayon nga ituon ang aton mga prioridad sa kon ano gid ang importante kag magkabuhi para sa karon lang nga adlaw makabulig agod malikawan ang di-nagakaigo nga pagkabalaka.—1 Pedro 5:6, 7.
9. Kon may problema sa pinansial, ano nga bulig ang makita naton sa mga publikasyon sang “matutom kag mainandamon nga ulipon”?
9 Kon may problema sa pinansial, mapakita man naton ang aton pagsalig kay Jehova paagi sa pagpangita sing bulig sa mga publikasyon sang “matutom kag mainandamon nga ulipon.” (Mateo 24:45) Sa tion kag tion, ang Magmata! nga magasin nagaunod sing mga artikulo nga nagahatag sing mabuligon nga mga laygay kag mga panugda sa pag-atubang sa mga problema sa pangabuhi. Ginbalay sang artikulo nga “Ginpahalin sa Trabaho—Ano ang mga Solusyon?” sa Agosto 8, 1991, nga gua ang walo ka praktikal nga mga giya nga nagbulig sa madamo nga magpabilin nga malig-on sa pinansial kag sa emosyonal sa tion nga wala sing palamugnan. * Sa pagkamatuod, ini nga mga giya dapat timbangan sing nagakaigo nga pagtamod sa matuod nga importansia sang kuarta. Ginbinagbinag ini sa artikulo nga “Ang Butang nga Mas Importante Pa sa Kuwarta,” nga mabasa sa sini man nga gua.—Manugwali 7:12.
Kon Ginasit-an sing mga Problema sa Kapagros
10. Paano ginapakita sang halimbawa ni Hari David nga realistiko nga magsalig kay Jehova kon ginasit-an sing malubha nga balatian?
10 Realistiko bala nga magsalig kay Jehova kon ginasit-an sing malubha nga balatian? Huo gid! Si Jehova may empatiya sa mga nagamasakit sa iya katawhan. Isa pa, handa sia sa pagbulig. Binagbinaga, halimbawa, si Hari David. Sia man mahimo nga nagamasakit sing malubha sang ginsulat niya ang tuhoy sa pagpakig-angot sang Dios sa isa ka matarong nga nagamasakit. Nagsiling sia: “Sakdagon sia ni Jehova sa higdaan sang balatian; bayluhan mo ang bug-os niya nga higdaan sa iya pagbalatian.” (Salmo 41:1, 3, 7, 8) Ang pagsalig ni David sa Dios nagpabilin nga mabakod, kag sang ulihi ang hari nag-ayo sa iya balatian. Apang, paano kita makapakita sing pagsalig sa Dios kon may mga problema kita sa kapagros?
11. Kon nagamasakit, ano ang mahimo naton ipangabay sa aton langitnon nga Amay?
11 Kon nagamasakit, mapakita naton ang aton pagsalig kay Jehova paagi sa pagpakitluoy sa iya sa pangamuyo nga buligan niya kita nga makabatas. Mahimo naton ipangabay sa iya nga buligan niya kita nga magamit naton ang “praktikal nga kaalam” agod matigayon naton ang kapagros nga ginatugot sang aton kahimtangan. (Hulubaton 3:21) Mahimo man naton ipangabay sa iya nga buligan niya kita nga mapakita ang pagpailob kag pagbatas agod malandas naton ang balatian. Labaw sa tanan, ipangabay naton nga sakdagon kita ni Jehova, nga hatagan niya kita sing kusog agod makapabilin nga matutom sa iya kag indi madula ang aton panimbang, bisan ano man ang matabo. (Filipos 4:13) Mas importante nga huptan ang aton integridad sa Dios sangsa tipigan ang aton karon nga kabuhi. Kon mahuptan naton ang aton integridad, ang Daku nga Manugpadya magahatag sa aton sing himpit nga kabuhi kag kapagros sa walay katubtuban.—Hebreo 11:6.
12. Anong Makasulatanhon nga mga prinsipio ang makabulig sa aton sa paghimo sing maalamon nga mga desisyon tuhoy sa pagpabulong?
12 Ang aton pagsalig kay Jehova nagapahulag man sa aton nga magdangop sa iya Pulong, ang Biblia, para sa praktikal nga panuytoy. Ang mga prinsipio nga masapwan sa Kasulatan makabulig sa aton sa paghimo sing maalamon nga mga desisyon tuhoy sa pagpabulong. Halimbawa, bangod nahibaluan naton nga ginapakamalaut sang Biblia ang “pagbuhat sing espiritismo,” likawan naton ang bisan ano nga pamaagi sang pagsayasat kag pagpabulong nga nagadalahig sa espiritismo. (Galacia 5:19-21; Deuteronomio 18:10-12) Yari ang isa pa ka halimbawa sang masaligan nga kaalam sang Biblia: “Ang bisan sin-o nga di-eksperiensiado nagatuo sa tagsa ka pulong, apang ang isa nga maalam nagabinagbinag sang iya mga tikang.” (Hulubaton 14:15) Gani, kon nagahunahuna sa pagpabulong, maalamon nga magpangita kita sing masaligan nga impormasyon sa baylo nga ‘magtuo sa tagsa ka pulong.’ Ini nga “kaligdong sa hunahuna” makabulig sa aton nga matulutimbang sing maayo ang aton mga pililian kag makahimo sing desisyon pasad sa ihibalo.—Tito 2:12.
13, 14. (a) Anong impormatibo nga mga artikulo tuhoy sa kapagros ang ginbalhag sang Lalantawan kag Magmata! nga mga magasin? (Tan-awa ang kahon sa pahina 17.) (b) Ano nga laygay tuhoy sa pag-atubang sa madugay na nga mga balatian ang ginpresentar sa Enero 22, 2001, nga Awake!?
13 Mapakita man naton ang aton pagsalig kay Jehova paagi sa pagpanalawsaw sa mga publikasyon sang matutom nga ulipon. Ang Lalantawan kag Magmata! nga mga magasin nagabalhag sa pulupanag-on sing impormatibo nga mga artikulo tuhoy sa nagkalainlain nga espesipiko nga mga problema sa kapagros kag mga balatian. * Kon kaisa, ginabalhag sining mga magasin ang mga artikulo tuhoy sa mga indibiduwal nga nakalandas sing madinalag-on sang nagkalainlain nga balatian, masakit, kag kasablagan. Dugang pa, ang pila ka artikulo nagahatag sing Makasulatanhon nga mga panugda kag sing praktikal man nga mga laygay kon paano mabatas ang madugay na nga mga problema sa kapagros.
14 Halimbawa, ginbinagbinag sang Enero 22, 2001, nga gua sang Awake! ang serye tuhoy sa “Comfort for the Sick.” Ginpresentar sang mga artikulo ang mabuligon nga mga prinsipio sang Biblia kag subong man ang impormasyon gikan sa mga pag-interbyu sa mga indibiduwal nga nagbatas sing nagapainutil nga mga balatian sa sulod sang madamo nga tinuig. Ang artikulo nga “Living Successfully With Your Ailment—How?” naghatag sang masunod nga laygay: Hibalua ang tanan nga masarangan mo tuhoy sa imo balatian. (Hulubaton 24:5) Magtalana sing praktikal nga mga tulumuron, lakip na ang mga tulumuron nga buligan ang iban, apang dapat mo mahangpan nga mahimo nga indi mo malab-ot ang mga tulumuron nga malab-ot sang iban. (Binuhatan 20:35; Galacia 6:4) Indi magpahilayo sa iban. (Hulubaton 18:1) Himua nga isa ka makalilipay nga eksperiensia ang pagduaw sang iban sa imo. (Hulubaton 17:22) Labaw sa tanan, hupti ang suod nga kaangtanan kay Jehova kag sa kongregasyon. (Nahum 1:7; Roma 1:11, 12) Wala bala kita nagapasalamat sa masaligan nga panuytoy nga ginaaman ni Jehova paagi sa iya organisasyon?
Kon ang Undanon nga Kaluyahon Nagapadayon
15. Paano nadaug ni apostol Pablo ang pagpakigbato niya sa mga kaluyahon sang di-himpit nga unod, kag ano ang ginapasalig sa aton?
15 “Sa akon unod, walay nagapuyo nga maayo,” sulat ni apostol Pablo. (Roma 7:18) Nahibaluan gid ni Pablo kon daw ano kabudlay pakigbatuan ang mga kailigbon kag mga kaluyahon sang di-himpit nga unod. Apang, nagsalig si Pablo nga magamadinalag-on sia. (1 Corinto 9:26, 27) Paano? Paagi sa pagsalig sing bug-os kay Jehova. Amo kon ngaa nakasiling si Pablo: “Kailo ako nga tawo! Sin-o bala ang magaluwas sa akon gikan sa lawas nga nagaagom sini nga kamatayon? Salamat sa Dios paagi kay Jesucristo nga aton Ginuo!” (Roma 7:24, 25) Kamusta naman kita? Kita man nagapakigbato sa undanon nga mga kaluyahon. Samtang nagapakigbato kita agod malandas ini nga mga kaluyahon, mahapos kita nga madulaan sing pagsalig, makumbinsi nga indi gid kita magmadinalag-on. Apang, si Jehova magabulig sa aton kon, kaangay ni Pablo, magsalig gid kita sa Iya kag indi sa aton lamang kusog.
16. Kon ang undanon nga mga kaluyahon nagapadayon, ano ang dapat naton ipangamuyo, kag ano ang dapat naton himuon kon magbalik ang aton kaluyahon?
16 Kon ang undanon nga kaluyahon nagapadayon, mapakita naton nga nagasalig kita kay Jehova paagi sa pagpakitluoy sa iya sa pangamuyo. Dapat kita mangabay, makitluoy pa gani, kay Jehova sing bulig sang iya balaan nga espiritu. (Lucas 11:9-13) Espesipiko kita nga makapangabay sing pagpugong sa kaugalingon, nga bahin sang bunga sang espiritu sang Dios. (Galacia 5:22, 23) Ano ang dapat naton himuon kon magbalik ang aton kaluyahon? Indi gid kita dapat mangampo. Indi gid kita maglapyo sa pagpangamuyo sing mapainubuson sa aton maluluy-on nga Dios, nagapangayo sing patawad kag bulig sa iya. Si Jehova indi gid magasikway, ukon magatalikod, sa tagipusuon nga “buong kag nadugmok” bangod sang pagsukmat sang konsiensia. (Salmo 51:17) Kon mag-ampo kita sa iya upod ang hanuot kag mahinulsulon nga tagipusuon, si Jehova magabulig sa aton nga mabatuan naton ang mga pagsulay.—Filipos 4:6, 7.
17. (a) Ngaa mabuligon nga binagbinagon naton ang ginabatyag ni Jehova tuhoy sa partikular nga mga kaluyahon nga ginapakigbatuan naton? (b) Ano nga mga kasulatan ang mahimo naton masaulo kon ginapakigbatuan naton nga punggan ang hinali nga pagpangakig? nga punggan ang aton dila? nga pamatukan ang huyog sa di-maayo nga kalingawan?
17 Mapakita man naton nga nagasalig kita kay Jehova paagi sa pagpangita sing bulig sa iya Pulong. Paagi sa paggamit sang konkordansia sa Biblia ukon sang Watch Tower Publications Index, mapangita naton ang sabat sa pamangkot, ‘Ano ang ginabatyag ni Jehova tuhoy sa partikular nga kaluyahon nga ginapakigbatuan ko?’ Ang pagbinagbinag sa ginabatyag ni Jehova tuhoy sini nga butang magapabakod sang aton handum nga pahamut-an sia. Sa amo, magabatyag man kita subong sang iya ginabatyag, magadumot sang iya ginadumtan. (Salmo 97:10) Natukiban sang iban nga ang pagsaulo sing mga teksto sa Biblia nga nagakaigo sa espesipiko nga kaluyahon nga ginapakigbatuan nila makabulig. Nagapanikasog bala kita sa pagpugong sa hinali nga pagpangakig? Nian mahimo naton masaulo ang mga teksto subong sang Hulubaton 14:17 kag Efeso 4:31. Nabudlayan bala kita sa pagbantay sa aton dila? Mahimo naton masaulo ang mga teksto subong sang Hulubaton 12:18 kag Efeso 4:29. May huyog bala kita sa di-maayo nga kalingawan? Mahimo naton tinguhaan nga panumdumon ang mga bersikulo subong sang Efeso 5:3 kag Colosas 3:5.
18. Ngaa indi kita mahuya sa pagpangayo sing bulig sa mga gulang agod malandas ang aton kaluyahon?
18 Ang pagpangayo sing bulig sa gintangdo-sang-espiritu nga mga gulang sa kongregasyon isa pa ka paagi sa pagpakita sang aton pagsalig kay Jehova. (Binuhatan 20:28) Man, ining “dulot nga mga lalaki” isa ka aman gikan kay Jehova paagi kay Cristo agod maamligan kag matatap ang iya mga karnero. (Efeso 4:7, 8, 11-14) Matuod, indi mahapos magpangayo sing bulig agod malandas ang isa ka kaluyahon. Mahimo mahuya kita kag mahangawa nga basi tamdon kita sang mga gulang subong indi tanto ka kalahamut-an. Apang walay duhaduha nga tahuron kita sining hamtong sa espirituwal nga mga lalaki tungod sang aton kaisog sa pagpangayo sing bulig. Dugang pa, ang mga gulang nagapanikasog nga ipakita ang mga kinaiya ni Jehova sa ila pagpakig-angot sa panong. Ang ila makalulugpay, praktikal nga laygay kag instruksion gikan sa Pulong sang Dios mahimo amo gid ang ginakinahanglan naton agod mapabakod ang aton pamat-od nga landason ang aton kaluyahon.—Santiago 5:14-16.
19. (a) Sa anong paagi ginatinguhaan ni Satanas nga gamiton ang pagkawalay pulos sang kabuhi sa sining sistema? (b) Ano ang nadalahig sa pagsalig, kag ano dapat ang aton malig-on nga pamat-od?
19 Indi pagkalimti nga nahibaluan ni Satanas nga malip-ot na lamang ang iya tion. (Bugna 12:12) Luyag niya nga gamiton ang pagkawalay pulos sang kabuhi sa sining kalibutan agod paluyahon ang aton buot kag pauntaton kita. Kabay nga magsalig kita sing bug-os sa ginasiling sang Roma 8:35-39: “Sin-o ang magapahamulag sa aton gikan sa gugma ni Cristo? Ang kapipit-an bala ukon kasakit ukon paghingabot ukon tiggulutom ukon kahubo ukon katalagman ukon espada? . . . Sa kabaliskaran, sa sining tanan nga butang bug-os kita nga madinalag-on paagi sa iya nga naghigugma sa aton. Bangod kumbinsido ako nga bisan ang kamatayon bisan ang kabuhi bisan ang mga anghel bisan ang mga panguluhan bisan ang mga butang karon bisan ang mga butang nga magaabot bisan ang mga kagamhanan bisan ang kataason bisan ang kadalumon bisan ang ano pa nga iban nga mga tinuga indi makapahamulag sa aton sa gugma sang Dios nga yara kay Cristo Jesus nga aton Ginuo.” Daw ano nga pinamulong sang pagsalig kay Jehova! Apang, ini nga pagsalig indi lamang isa ka balatyagon. Sa baylo, pagsalig ini nga nagadalahig sang aton mahunahunaon nga mga desisyon sa aton adlaw-adlaw nga pagkabuhi. Kon amo, kabay nga mamat-od kita sing malig-on nga magsalig kay Jehova sing bug-os sa tion sang kalisdanan.
[Mga nota]
^ par. 1 Sa isa ka sulat sa U.S. Mint, nga napetsahan sing Nobiembre 20, 1861, ang Sekretaryo sang Bahandian nga si Salmon P. Chase nagsulat: “Wala sing pungsod ang mabakod luwas sa kusog sang Dios, ukon hilway sa katalagman luwas nga pangapinan Niya. Ang pagsalig sang aton katawhan sa Dios dapat ipahayag sa aton pungsudnon nga mga sensilyo.” Subong resulta, ang hulubaton nga “In God We Trust” una nga nakita sa gingamit nga sensilyo sang Estados Unidos sang 1864.
^ par. 7 Ang kabalaka nga ginalaragway diri amo ang “mabinalak-on nga pagkahangawa, nga nagadula sang tanan nga kalipay sa kabuhi.” Ang iban nga mga badbad nagasiling nga “indi magkabalaka” ukon “indi magkahangawa.” Apang ini nga mga badbad nagapahangop nga indi kita dapat magsugod sa pagkabalaka ukon sa pagkahangawa. Ang isa ka reperensia nagasiling: “Ang Griego nga verb tense amo ang present imperative, nga nagapahangop sa sugo nga untatan ang paghimo sang pila ka butang nga ginahimo na.”
^ par. 9 Ang walo ka punto amo ang masunod: (1) Indi magsalasala; (2) maghunahuna sing positibo; (3) buksi ang imo hunahuna sa bag-o nga mga sahi sang trabaho; (4) magkabuhi suno sa imo kinitaan—indi sa kinitaan sang iban; (5) maghalong sa utang; (6) hupti ang pamilya nga nahiusa; (7) hupti ang imo pagtahod sa kaugalingon; kag (8) magbadyet.
^ par. 13 Ining mga magasin nga pasad sa Biblia wala nagapanugyan ukon nagarekomendar sing bisan anong partikular nga pagpabulong, kay butang ini nga dapat desisyunan sing personal. Sa baylo, ginabinagbinag sang mga artikulo ang espesipiko nga mga balatian ukon mga masakit agod sugiran ang mga bumalasa sing bag-o nga impormasyon.
Madumduman Mo Bala?
• Kon may mga problema sa pangabuhi, sa anong mga paagi naton mapakita nga nagasalig kita kay Jehova?
• Paano naton mapakita ang pagsalig sa Dios kon ginasit-an kita sang problema sa kapagros?
• Kon ang isa ka undanon nga kaluyahon nagapadayon, paano naton mapakita nga nagasalig gid kita kay Jehova?
[Mga Pamangkot sa Pagtinuon]
[Kahon sa pahina 17]
Nadumduman Mo Bala Ini nga mga Artikulo?
Kon ginasit-an kita sing mga problema sa kapagros, makapalig-on nga mabasa ang tuhoy sa iban nga nakalandas sing madinalag-on sang mga balatian, masakit, ukon mga kasablagan. Ang masunod amo ang pila ka artikulo nga ginbalhag sa Lalantawan kag Magmata! nga mga magasin.
Ang “Paglandas Sang Akon mga Kaluyahon” nasentro sa pag-atubang sa negatibo nga panghunahuna kag depresyon.—Ang Lalantawan, Mayo 1, 1990.
“Not Even an Iron Lung Could Stop Her Preaching.”—Awake!, Enero 22, 1993.
Ang “Isa ka Bala ang Nagpabag-o sang Akon Kabuhi” nasentro sa pag-atubang sa pagkaparalisado.—Magmata!, Nobiembre 8, 1995.
Ang “Wala Kamo Makahibalo Kon Ano ang Mangin Kabuhi Ninyo Buwas” nagabinagbinag sang pag-atubang sa bipolar disorder.—Ang Lalantawan, Disiembre 1, 2000.
Ang “Loida’s Journey out of Silence” nasentro sa pag-atubang sa cerebral palsy.—Awake!, Mayo 8, 2000.
“Ang Akon Pagpakigbato sa Endometriosis.”—Magmata!, Agosto 8, 2000.
“Ang Akon Pagpakigbato sa Scleroderma.”—Magmata!, Agosto 8, 2001.
“I Won My Battle With Postpartum Depression.”—Awake!, Hulyo 22, 2002.
[Retrato sa pahina 15]
Kon madulaan sing trabaho, maalamon naton nga usisaon liwat ang aton estilo sang pagkabuhi
[Retrato sa pahina 16]
Ang sugilanon ni Loida nagapakita kon paano ang pagsalig kay Jehova nagabulig sa isa sa pagbatas. (Tan-awa ang kahon sa pahina 17)
[Retrato sa pahina 18]
Indi kita dapat mahuya sa pagpangayo sing bulig agod malandas ang aton mga kaluyahon
