Matuod nga Bulig Para sa mga Imol

SANG si Jesucristo, ang Anak sang Dios, yari sa duta, interesado gid sia nga buligan ang mga imol. Ang isa nga aktuwal nga nakasaksi sa ministeryo ni Jesus nagsiling: “Ang mga bulag nakakita liwat, kag ang mga piang nagalakat, ang mga aruon nagtinlo kag ang mga bungol nakabati, kag ang mga minatay ginabanhaw, kag ang mga imol ginawalihan sing maayong balita.” (Mateo 11:5) Apang, paano naman ang minilyon ka imol karon? May maayong balita bala para sa ila? Huo, may yara mensahe sang paglaum!

Bisan ang mga imol masami nga ginasikway kag ginakalimtan sang mga tawo sa kabilugan, ang Pulong sang Dios, ang Biblia, nagasaad: “Ang mga imol indi pagkalimtan sing dayon, ukon madula sing dayon ang paglaum sang mga mahagop.” (Salmo 9:18) Matuman ining makalulugpay nga mga pinamulong kon buslan sang Ginharian sang Dios, nga isa ka matuod nga langitnon nga gobierno, ang bug-os nga paggahom sang tawo. (Daniel 2:44) Bilang Hari sining langitnon nga gobierno, ‘kaluuyan ni Jesus ang kubos kag imol, kag luwason niya ang mga kalag sang mga imol. Tubson niya ang ila kalag gikan sa pagpigos kag kasingki, kag ang ila dugo mangin bilidhon sa iya itululok.’​​—⁠Salmo 72:​13, 14.

Ano ang mangin kahimtangan sang pagkabuhi kon magagahom na si Cristo sa duta? Panginpuslan sang mga nagakabuhi sa idalom sang paggahom ni Cristo sa duta ang ila mga ginpangabudlayan. Ang Biblia nagasiling sa Miqueas 4:​3, 4: “Magalingkod sila, ang tagsatagsa sa idalom sang iya puno sang ubas kag sa idalom sang iya kahoy nga igos, kag wala sing magapakurog sa ila; kay ang baba mismo ni Jehova sang mga kasuldadusan ang nagapamulong sini.” Solbaron pa gani sang Ginharian sang Dios ang mga problema sa balatian kag kamatayon. (Isaias 25:8) Mangin tuhay gid ang kahimtangan sang pagkabuhi! Makapati kita sa sini nga mga saad sang Biblia bangod inspirado ini mismo sang Dios.

Dugang pa sa paghatag sing mensahe sang paglaum, buligan kita sang Biblia nga atubangon ang matag-adlaw nga mga problema, subong sang kon paano malandas ang pagbatyag sang pagkawalay pagtahod sa kaugalingon, nga ayhan dala sang kapigaduhon. Nakahibalo ang isa ka pigado nga Cristiano paagi sa iya pagtuon sa Biblia nga bilidhon sia sa mata sang Dios kaangay man sang isa ka Cristiano nga manggaranon. Ang tulun-an sang Biblia nga Job nagasiling nga ang Dios “wala nagakabig sa dungganon nga labi sa kubos, kay tanan sila binuhatan sang iya mga kamot.” (Job 34:19) Pareho sila nga palangga sang Dios.​​—⁠Binuhatan 10:​34, 35.