Mga Pamangkot Gikan sa mga Bumalasa

Sa madamo nga bahin sang kalibutan, kinaandan na ang paghatag sing mga regalo sa kasal. Ano nga mga prinsipio sa Biblia ang dapat naton binagbinagon kon nagahatag ukon ginahatagan sining mga regalo?

Ginapahanugutan sang Biblia ang paghatag sing regalo kon ginahimo ini nga may husto nga motibo kag sa nagakaigo nga okasyon. Kon tuhoy sa paghatag, ginapalig-on sang Biblia ang matuod nga mga Cristiano nga ilugon si Jehova, ang ila maalwan nga Manug-aman. (Santiago 1:17) Si apostol Pablo nagpalig-on sa iya mga masigka-Cristiano: “Dili malimot sa paghimo sing maayo kag sa pagpaambit sang mga butang sa iban, kay sa amo nga mga halad nahamuot gid ang Dios.” Gani, ang mga Cristiano ginapalig-on nga mangin mahinatagon.​​—⁠Hebreo 13:16; Lucas 6:⁠38.

Kamusta naman ang paggamit sing gift registry, nga kinaandan na nga ginahimo sa Estados Unidos? Sa Inglaterra, ginatawag ini nga wedding list. Ang kalaslon kinaandan nga nagaparehistro sa isa ka department store paagi sa pagtan-aw sa mga baligya sini kag sa paghimo sing listahan sang luyag nila nga iregalo sa ila. Ang mga paryente kag mga abyan sang kalaslon ginatudlo sa sini nga balaligyaan sa pagbakal sing regalo nga yara sa registry list sang kalaslon. Kon pagkapraktikal ang pagahambalan, bangod may listahan sang mga naluyagan nga regalo, ang nagaregalo indi na mag-usik sing madamo nga tiempo sa pagpangita sing regalo, samtang ang mga regaluhan naman indi na mahul-an sa pag-uli sa balaligyaan sang mga regalo nga indi nila naluyagan.

Personal nga desisyon sang kalaslon kon bala magagamit sila sing gift registry. Apang, dapat maghalong ang isa ka Cristiano agod malikawan niya ang bisan ano nga kinabatasan nga makalapas sa mga prinsipio sang Biblia. Halimbawa, paano kon mahal gid ang mga butang nga ginlista sang kalaslon? Basi indi masarangan sang mga may limitado nga badyet ang magregalo, ukon basi balibaran na lang nila ang imbitasyon nga magtambong sa kasal agod indi sila mahuy-an nga indi mahal ang ila iregalo. Ang isa ka Cristiano nga babayi nagsulat: “Nangin mabug-at na ini. Gintinguhaan ko nga mangin mahinatagon, apang sining ulihi nadula ang tanan ko anay nga kalipay sa paghatag.” Daw ano kasubo kon ang isa ka kasal mangin kabangdanan sang pagluya sing buot!

Indi dapat mabatyagan sang mga nagaregalo nga agod mangin kalahamut-an ang ila regalo, dapat ini baklon sa isa ka espesipiko nga balaligyaan ukon indi ini magnubo sa isa ka partikular nga presyo. Ginpakita ni Jesus nga ang pinakaimportante sa mata sang Dios amo ang panimuot sang tagipusuon sang nagaregalo, indi ang materyal nga bili sang regalo. (Lucas 21:​1-4) Subong man, tuhoy sa mga dulot sang kaluoy sa mga imol, si apostol Pablo nagsulat: “Maghimo ang kada isa suno sa ginpamat-od niya sa iya tagipusuon, indi sing paganot ukon ginpilit, kay ang Dios nagahigugma sa malipayon nga nagahatag.”​​—⁠2 Corinto 9:7.

Suno sa prinsipio sang Biblia, wala sing malain kon ipakilala sang isa nga sia ang naghatag sang regalo, ayhan paagi sa paglakip sang isa ka malip-ot nga sulat sa regalo. Apang, sa pila ka lugar, isa ka kustombre ang pagpakilala kon sin-o ang naghatag sing regalo sa tanan nga tumalambong. Ini nga kustombre mahimo makahatag sing mga problema. Mahimo nga ang mga naghatag sing regalo indi luyag magpakilala agod malikawan nila ang indi nagakaigo nga atension sa ila kaugalingon. Nagagawi ining mga indibiduwal suno sa prinsipio nga makit-an sa Mateo 6:​3, diin nagasiling si Jesus: “Apang ikaw, kon nagahatag sing mga dulot sang kaluoy, indi pagpahibalua ang imo wala nga kamot sa ginahimo sang imo tuo.” Mahimo ginakabig sang iban nga ang paghatag sing regalo isa ka personal nga butang kag dapat magpabilin nga pribado sa tunga sang naghatag kag sang ginhatagan. Dugang pa, ang pagpakilala sa mga naghatag sing regalo mahimo magdul-ong sa pagkomparar sa mga regalo, “nga nagasulsol sang pagpaindisanay.” (Galacia 5:26) Indi gid luyag sang mga Cristiano nga masaw-ahan ukon mahuy-an ang sin-o man paagi sa pag-anunsio sang ngalan sang mga naghatag.​​—⁠1 Pedro 3:8.

Huo, paagi sa pagpanghikot suno sa mga prinsipio nga masapwan sa Pulong sang Dios, ang paghatag sing mga regalo magapabilin nga makalilipay.​​—⁠Binuhatan 20:35.