Kon Paano Pabakuron ang Inyo Pag-asawahay

HANDURAWA ang isa ka balay nga gubaon. Ang mga pinta sini nagakaukab, ang atop gabok, kag bisan ang ugsaran masiot. Maathag nga ini nga balay naguba bangod sang pila ka mabaskog nga bagyo sa sulod sang mga tinuig, kag napabay-an ini. Dapat bala ini gub-on na lang sing bug-os? Indi gid man. Kon ang pundasyon sini mapag-on kag ang tinukod malig-on, ang balay sarang pa kay-uhon.

Ang kahimtangan bala sini nga balay nagapahanumdom sa imo sang inyo pag-asawahay? Sa sulod sang mga tinuig, ang mabaskog nga bagyo, kon sa aton pa, mahimo naghalit gid sa inyo pag-asawahay. Mahimo nga sa pila ka kasangkaron ginpatumbayaan sang isa sa inyo ukon duha kamo ang inyo pag-asawahay. Mahimo magbatyag ka kaangay ni Sandy. Pagligad sang 15 ka tuig subong minyo, sia nagsiling: “Wala sing butang nga nagasahuay kami luwas sa mag-asawa kami. Kag indi ini tuman.”

Bisan pa ang inyo pag-asawahay kaangay na sini, indi maghinakop sing padasudaso nga dapat na ini tapuson. Mahimo pa mapasag-uli ang inyo pag-asawahay. Nagadepende ini sa kon daw ano kamo ka determinado sang imo tiayon nga ipasag-uli kag tipigan ang inyo pag-asawahay. Ining determinasyon kag handum makabulig sa pagpabakod sang pag-asawahay sa tion sang pagtilaw. Paano ang Biblia makabulig sa imo sa pagpabakod sining determinasyon kag handum?

Ang Panumpa sa Pag-asawahay Nagadalahig sang Salabton

Suno sa isa ka diksionaryo, ang panumpa nagapatuhoy sa “kahimtangan nga obligado ukon ginapahulag sang emosyon.” Halimbawa, ang isa ka kontraktor nangin obligado sa pagtuman sa isa ka kontrata sa pagtukod sang isa ka balay. Mahimo nga indi niya kilala ang nagpaobra. Apang, obligado sia sa pagtuman sang kontrata.

Bisan pa ang pag-asawahay indi isa ka wala sing balatyagon nga kontrata sa negosyo, ang panumpa nga tipigan ini nagadalahig sang salabton. Mahimo gid nga nagsumpaanay kamo sang imo tiayon sa atubangan sang Dios kag sang tawo nga magaunungay, bisan ano man ang matabo. Si Jesus nagsiling: “Sia nga nagtuga sa [lalaki kag babayi] sa ginsuguran naghimo sa ila nga lalaki kag babayi kag nagsiling, ‘Bangod sini bayaan sang lalaki ang iya amay kag iloy kag maghiusa sa iya asawa.’” Si Jesus nagdugang: “Ang gintingob sang Dios dili pagbulagon sang tawo.” (Mateo 19:​4-6)  Gani, kon may mga problema nga mag-utwas, kamo sang imo tiayon dapat mangin determinado nga tumanon ang inyo panumpa sa tagsatagsa.⁠ * Ang isa ka asawa nagsiling: “Sang gin-untatan lamang namon ang plano nga magdiborsio nga nag-uswag ang kahimtangan.”

Apang, indi lamang salabton ang nadalahig sa panumpa sa pag-asawahay. Ano pa ang nadalahig?

Ang Pagbuligay Nagapabakod sang Panumpa sa Pag-asawahay

Ang panumpa sa pag-asawahay wala nagakahulugan nga ang magtiayon wala gid sing di-pag-ugyunay. Kon mag-utwas ang di-paghangpanay, dapat may hanuot nga handum nga solbaron ini indi lamang bangod sang panumpa nga obligado ang isa kundi bangod sang emosyonal nga kaangtanan. Tuhoy sa bana kag asawa, si Jesus nagsiling: “Indi na sila duha, kundi isa ka unod.”

Ano ang buot silingon sang “isa ka unod” kamo sang imo tiayon? Si apostol Pablo nagsulat nga “ang mga bana dapat maghigugma sang ila mga asawa subong sang ila kaugalingon nga mga lawas.” (Efeso 5:​28, 29) Busa, sing bahin, subong “isa ka unod” nagakahulugan nga nabalaka ka para sa kaayuhan sang imo tiayon subong sang imo kabalaka sa imo kaayuhan. Dapat bag-uhon sang mga minyo ang ila panghunahuna halin sa “akon” pakadto sa “amon,” halin sa “ako” pakadto sa “kami.” Ang isa ka manuglaygay nagsulat: “Ang magtiayon dapat mag-untat sa paghunahuna kag pagbatyag nga di-minyo pa sila.”

Nagahunahuna kag nagabatyag bala kamo sang imo tiayon subong minyo? Posible nga magkaupod kamo sa madamo nga tinuig apang sa gihapon indi “isa ka unod” sa sina nga kahulugan. Huo, mahimo ini matabo, apang ang libro nga Giving Time a Chance nagasiling: “Ang pag-asawahay nagakahulugan sing pagpaambitay sang kabuhi, kag kon labi nga nagapaambitay ang duha ka tawo, labi pa nga nagabakod ang ila pag-asawahay.”

Ang pila ka di-malipayon nga magtiayon padayon nga nagaupod bangod lamang sa ila mga kabataan ukon sa kasiguruhan sa pinansial. Ang iban padayon nga nagaupod bangod indi gid sila ugyon sa diborsio ukon bangod nahuya sila sa mahimo ihinakop sang iban kon magbulagay sila. Bisan pa dalayawon nga ini nga mga pag-asawahay nagapadayon, dumduma nga ang inyo tulumuron amo ang isa ka mahigugmaon nga kaangtanan, indi lamang nga magpadayon ini.

Ang Di-makagod nga mga Buhat Nagapalig-on sang Panumpa sa Pag-asawahay

Gintagna sang Biblia nga sa “katapusan nga mga adlaw,” ang mga tawo mangin “mahigugmaon sang kaugalingon.” (2 Timoteo 3:​1, 2) Suno  gid sa gintagna, ang daw ginapadaku karon amo ang masimbahon nga debosyon sa kaugalingon. Sa madamo nga pag-asawahay, ang paghimo sang isa ka partikular nga butang ukon buhat nga wala nagapaabot nga balusan ginatamod nga isa ka tanda sang kaluyahon. Apang, sa madinalag-on nga pag-asawahay, ang magtiayon nagapakita sang pagkamasinakripisyuhon. Paano mo ini mapakita?

Sa baylo nga mamangkot nga, ‘Ano ang mabenepisyo ko sa sini nga relasyon?’ pamangkuta ang imo kaugalingon, ‘Ano ang akon personal nga ginahimo sa pagpabakod sang amon pag-asawahay?’ Ang Biblia nagasiling nga ang mga Cristiano dapat ‘magtuon sang ila mga mata, indi sa personal nga interes sang ila kaugalingon lamang nga mga butang, kundi sa personal man nga interes sang iban.’ (Filipos 2:4) Samtang ginapamalandungan ining prinsipio sang Biblia, analisaha ang imo mga ginhimo sang nagligad nga semana. Daw ano ka sunson nga ginhimo mo ang isa ka buhat sang kaayo para sa kaayuhan lamang sang imo tiayon? Sang luyag sang imo tiayon nga maghambal, nagpamati ka bala​​—⁠bisan pa daw indi ka interesado? Pila ka aktibidades ang inyo ginhimo nga mas ginakawilihan sang imo tiayon?

Sa pagbinagbinag sining mga pamangkot, indi magkabalaka nga ang imo maayong mga buhat wala matalupangdan ukon indi mabalusan. “Sa kalabanan nga mga relasyon,” siling sang isa ka reperensia, “ang positibo nga mga buhat ginabalusan, gani himua ang imo masarangan agod palig-unon ang imo tiayon nga mangin positibo paagi sa pagpakita sa iya nga ikaw mismo positibo man.” Ang masinakripisyuhon nga mga buhat nagapabakod sang inyo pag-asawahay bangod ginapakita sini nga ginapabaloran ninyo ini kag luyag ninyo nga matipigan ini.

Ang Pagtamod sa Pag-asawahay Subong Isa ka Butang nga Magapadayon Importante

Ginapabaloran ni Jehova ang pagkamainunungon. Sa pagkamatuod, ang Biblia nagasiling: “Sa mainunungon ikaw [Jehova] magaunong.” (2 Samuel 22:26) Ang pagkamainunungon sa Dios nagakinahanglan sing pagkamainunungon sa kahimusan sang pag-asawahay nga iya ginpasad.​​—⁠Genesis 2:⁠24.

Kon kamo sang imo tiayon mainunungon sa tagsatagsa, makabatyag kamo nga mapinadayunon ang inyo pag-asawahay. Kon pamensaron ninyo ang magaabot nga mga binulan, mga tinuig, kag mga dekada, mahanduraw ninyo ang inyo kaugalingon nga magkaupod pa gihapon. Indi gid ninyo mahunahuna nga indi na kamo mag-asawa, kag ini nga pagtamod nagadala sing kalig-unan sa inyo kaangtanan. Ang isa ka asawa nagsiling: “Bisan pa kon akig gid ako sa [akon bana] kag nainit gid sa nagakatabo sa amon, wala ako nabalaka nga ang amon pag-asawahay maguba. Ginakabalak-an ko kon paano namon mapasag-uli ang amon kaangtanan. Wala ako nagaduhaduha nga magpasag-uliay kami​​—⁠bisan pa kon kaisa indi ko mahibaluan kon paano ini himuon.”

Ang pagtamod sa pag-asawahay subong isa ka butang nga magapadayon isa ka importante nga bahin sang panumpa sa tiayon sang isa, apang sing makapasubo wala ini sa madamo nga pag-asawahay.  Sa tion sang akig nga pagbaisay, ang isa ka tiayon mahimo magsiling, “Bayaan ko ikaw!” ukon, “Mangita ako sing iban nga nagaapresyar gid sa akon!” Matuod, masami ining mga pulong indi matuod. Apang, ang Biblia nagpatalupangod nga ang dila mahimo mangin “puno sang makamamatay nga hilo.” (Santiago 3:⁠8) Ang mga pamahog kag mga ultimatum nagapaalinton sing mensahe nga: ‘Wala ko ginakabig nga ang aton pag-asawahay magapadayon. Puede ko ini bungkagon sa bisan ano nga tion.’ Ang mensahe kaangay sini makahalalit sa pag-asawahay.

Kon ginatamod mo ang pag-asawahay subong butang nga magapadayon, ginalauman nga magaunong ka sa imo tiayon bisan ano man ang matabo. May dugang pa nga benepisyo sa sini. Ginapahapos sini ang pagbaton ninyo sang imo tiayon sang inyo mga kaluyahon kag mga sayop kag padayon nga magpinaumuray sa isa kag isa kag hilway nga magpinatawaray sa isa kag isa. (Colosas 3:13) “Sa isa ka madinalag-on nga pag-asawahay,” siling sang isa ka libro, “may posibilidad nga kamo nga duha makahimo sing sayop, kag matipigan ang inyo pag-asawahay walay sapayan sini.”

Sa adlaw sang inyo kasal, nanumpa ka, indi sa institusyon sang pag-asawahay, kundi sa buhi nga tawo​​—⁠sa imo tiayon. Ining kamatuoran may daku nga epekto sa imo karon panghunahuna kag paggawi subong isa ka minyo nga tawo. Wala ka bala nagaugyon nga dapat unungan mo ang imo tiayon indi lamang bangod nagapati ka nga sagrado ang pag-asawahay kundi bangod man ginahigugma mo ang tawo nga imo ginpakaslan?

[Nota]

[Kahon/Retrato sa pahina 5]

Kon Ano ang Imo Mahimo Karon

Daw ano kabaskog ang imo determinasyon kag handum nga tipigan kag palig-unon ang inyo pag-asawahay? Ayhan natalupangdan mo nga mapauswag pa ini. Agod mapalig-on ang imo determinasyon kag handum, tilawi ang masunod:

● Usisaa ang imo kaugalingon. Pamangkuta ang imo kaugalingon: ‘Nagabatyag gid bala ako nga minyo, ukon nagahunahuna kag nagahulag pa bala gihapon ako subong isa ka di-minyo?’ Hibalua kon ano ang ginabatyag sang imo tiayon tuhoy sa imo sa sini nga butang.

● Basaha upod sa imo tiayon ini nga artikulo. Nian, sing kalmado, binagbinaga ang mga paagi kon paano ninyo mapauswag ang inyo relasyon subong mag-asawa.

● Upod sa imo tiayon, maghimo sing mga aktibidades nga makapalig-on sa inyo relasyon. Halimbawa: Tan-awa ang mga retrato sang inyo kasal kag iban pa nga dulumdumon nga mga hitabo. Himua ang mga butang nga inyo naluyagan sang naganobyahanay pa lang kamo ukon sang bag-o pa lang kamo mag-asawahay. Tun-i ninyo nga magkaupod ang pasad-sa-Biblia nga mga artikulo sang Ang Lalantawan kag Magmata! nga may kaangtanan sa pag-asawahay.

[Kahon/Retrato sa pahina 6]

Sa Pag-asawahay, ang Panumpa Nagalakip sang . . .

● Obligasyon “Ang ginapanumpa mo, tumana. Mas maayo pa nga indi ka magpanumpa sangsa manumpa ka kag indi pagtumanon.”​​—⁠Manugwali 5:​4, 5.

● Pagbuligay “Ang duha maayo pa sa isa . . . Kay kon mapukan ang isa sa ila, mabangon sang isa ang iya kaupod.”​​—⁠Manugwali 4:​9, 10.

● Pagkamasinakripisyuhon “May kapin nga kalipay sa paghatag sangsa pagbaton.”​​—⁠Binuhatan 20:35.

● Pagtamod nga Magapadayon Ini ‘Ang gugma nagabatas sang tanan nga butang.’​​—⁠1 Corinto 13:​4, 7.

[Mga retrato sa pahina 7]

Kon luyag maghambal sang imo tiayon, nagapamati ka bala?