Mga Pamangkot Gikan sa mga Bumalasa

Ano ang kahulugan sang may “kabuhi sa iya kaugalingon”?

Ang Biblia nagapatuhoy kay Jesucristo subong may “kabuhi sa iya kaugalingon” kag sa iya mga sumulunod subong may ‘kabuhi sa ila kaugalingon.’ (Juan 5:​26; 6:53) Apang, ining duha ka kasulatan may magkatuhay nga kahulugan.

“Subong nga ang Amay may kabuhi sa iya kaugalingon,” siling ni Jesus, “sa amo man nga bagay ginhatagan niya ang Anak sang kabuhi sa iya kaugalingon.” Antes sining talalupangdon nga pinamulong, si Jesus nagsiling: “Sa pagkamatuod nagasiling ako sa inyo, Sia nga nagapamati sa akon pulong kag nagapati sa iya nga nagpadala sa akon may kabuhi nga walay katapusan . . . Ang takna magaabot, kag karon amo na, nga ang mga patay magapamati sa tingog sang Anak sang Dios kag ang mga nagapamati magakabuhi.” Ginpatuhuyan diri ni Jesus ang tumalagsahon nga gahom nga ginhatag sa iya sang Amay​​—⁠ang ikasarang sa paghatag sa mga tawo sang maayo nga tindog sa atubangan sang Dios. Dugang pa, may ikasarang man si Jesus sa pagbanhaw sa mga nagatulog sa kamatayon kag sa paghatag sing kabuhi sa ila. Ang pag-angkon ni Jesus sang “kabuhi sa iya kaugalingon” nagakahulugan nga ginhatagan sia sining mga gahom. Mahimo man badbaron ining mga pinamulong nga kaangay sa Amay, ang Anak man may ‘dulot sang kabuhi sa iya kaugalingon.’ (Juan 5:24-26) Paano naman ang iya mga sumulunod?

Mga isa ka tuig sang ulihi, nagsiling si Jesus sa iya mga tagpalamati: “Sa pagkamatuod nagasiling ako sa inyo, Luwas nga kaunon ninyo ang unod sang Anak sang tawo kag imnon ang iya dugo, wala kamo sing kabuhi sa inyo kaugalingon. Sia nga nagakaon sang akon unod kag nagainom sang akon dugo may kabuhi nga walay katapusan, kag banhawon ko sia sa katapusan nga adlaw.” (Juan 6:​53, 54) Ginapakita diri ni Jesus nga ang pag-angkon sang “kabuhi sa inyo kaugalingon” katumbas sang pag-angkon sang “kabuhi nga walay katapusan.” Masapwan sa iban nga bahin sang Griego nga Kasulatan ang mga ekspresyon nga may subong man nga gramatiko nga konstruksion sa “kabuhi sa inyo kaugalingon.” Ang duha ka halimbawa sini amo ang, “Maghupot kamo sing asin sa inyo kaugalingon” kag “nagabaton sa ila kaugalingon sang bug-os nga kabayaran.” (Marcos 9:​50; Roma 1:27) Sa sining mga halimbawa, ang mga prase wala nagapakita sing ikasarang sa paghatag sing asin sa iban ukon sing kabayaran kay bisan  sin-o. Sa baylo, ini nagapakita sing pagbatyag sing pagkakompleto, ukon kabug-usan. Gani, ang ekspresyon nga “kabuhi sa inyo kaugalingon” nga gingamit sa Juan 6:​53 nagakahulugan lamang sa pag-agom sang bug-os nga kalawigon sang kabuhi.

Sang ginpatuhuyan niya ang iya mga sumulunod subong may kabuhi sa ila kaugalingon, ginsambit ni Jesus ang iya unod kag dugo. Sang ulihi, sang ginsugdan niya ang Panihapon sang Ginuo, naghambal liwat si Jesus tuhoy sa iya unod kag dugo kag nagsugo sa iya mga sumulunod nga kalakip sa bag-ong katipan nga magkaon sang mga emblema sang tinapay nga walay tapay kag alak. Nagakahulugan bala ini nga ang mga hinaplas lamang, nga yara sa bag-ong katipan upod kay Jehova nga Dios, ang makaagom sang bug-os nga kalawigon sang kabuhi? Indi. Isa ka tuig ang antad sang duha ka hitabo. Ang mga nagpamati sa ginsiling ni Jesus nga nakarekord sa Juan 6:​53, 54 wala sing ideya tuhoy sa tuigan nga pagsaulog nga may mga emblema nga nagarepresentar sa unod kag dugo ni Cristo.

Suno sa Juan kapitulo 6, ginkomparar una ni Jesus ang iya unod sa manna, nga nagasiling: “Ang inyo mga katigulangan nagkaon sang manna sa kahanayakan kag walay sapayan sini napatay. Ini amo ang tinapay nga nanaug gikan sa langit, agod nga ang bisan sin-o makakaon sini kag indi mapatay. Ako ang buhi nga tinapay nga nanaug gikan sa langit; kon ang bisan sin-o nga magkaon sining tinapay magakabuhi sia sing dayon.” Ang unod ni Jesus, upod ang iya dugo, labaw pa sa literal nga manna. Paano? Bangod ang iya unod ginhatag para “sa kabuhi sang kalibutan,” nga nagpaposible sa kabuhi nga walay katapusan.⁠ * Gani, ang pinamulong tuhoy sa pag-angkon sang “kabuhi sa inyo kaugalingon” sa Juan 6:​53 naaplikar sa tanan nga makabaton sang kabuhi nga walay katapusan​​—⁠sa langit man ukon sa duta.​​—⁠Juan 6:​48-​51.

San-o mabaton sang mga sumulunod ni Cristo ang kabuhi sa ila kaugalingon, ukon maagom ang bug-os nga kalawigon sang kabuhi? Para sa mga hinaplas nga mga manunubli sang Ginharian, mabaton nila ini sa ila pagkabanhaw sa langitnon nga kabuhi subong di-mamalatyon nga espiritu nga mga tinuga. (1 Corinto 15:​52, 53; 1 Juan 3:2) Maagom sang “iban nga mga karnero” ni Jesus ang bug-os nga kalawigon sang kabuhi pagkatapos sang iya Isa ka Libo ka Tuig nga Paggahom. Sa sina nga tion, natilawan na sila, napamatud-an nga matutom, kag ginpahayag nga matarong para sa pag-agom sang kabuhi nga walay katapusan sa Paraiso nga duta.​​—⁠Juan 10:16; Bugna 20:​5, 7-​10.

[Nota]

[Mga retrato sa pahina 31]

Ang tanan matuod nga mga Cristiano makaangkon sang ‘kabuhi sa ila kaugalingon’